41
Lee kadugo na, a ná wu gari ni nɛ ni Kilɛ-pɛɛŋɛ pugbɔhɔ ki wo pugbɔhɔ ki ni. A wu shɛ wee xuu wu wo benɛɛ pu taanna, ke kabanugo ke ɲɛ keŋɛ ɲìi gbaara, ke kabanugo ke bɛ ɲɛ keŋɛ ɲìi gbaara. Lee ɲɛ fàya puga ki wo kadaa le.2 Tajege ki wo kadaa li bye keŋɛ ɲìi kɛ. Ki kabanuyo shuun wu wo kasɔrɔyɔ yi ɲɛ keŋɛ ɲìi kaguro kaguro. A wu Kilɛ-pɛɛŋɛ pugbɔhɔ ki wo pugbɔhɔ ki bɛ taanna, a ki ɲidaa lʼi bye keŋɛ ɲìi kɛlɛɛ shishɛɛrɛ (40), a ki kadaa lʼi bye keŋɛ ɲìi kɛlɛɛ shuun (20). 3 A wu xhɔ na jé pugbɔhɔ ki wo funŋɔ pura li ni, na tajege ki wo benɛɛ pu taanna, a pee di bye keŋɛ ɲìi shuun, a tajege kʼi bye keŋɛ ɲìi gbaara, a ki kadaa lʼi bye keŋɛ ɲìi gbarashuun. 4 A wu pubile liyɛ pyaa taanna, a li ɲidaa lʼi bye keŋɛ ɲìi kɛlɛɛ shuun (20), a li kadaa lʼi bye keŋɛ ɲìi kɛlɛɛ shuun (20). Lee bye pugbɔhɔ ki ɲahagbaa li na. A ná wu nɛ pye: «Fɛfɛɛrɛ ti bɛɛri wo fɛfɛɛrɛ xuu wu wʼa we.»
Kabanugo ki wo piyɛyɛ ye
5 Lee kadugo na, a ná wu Kilɛ-pɛɛŋɛ pugbɔhɔ ki wo kasɔrɔgɔ ki taanna, a kee di bye keŋɛ ɲìi gbaara. Piyɛyɛ yemu yi bye Kilɛ-pɛɛŋɛ pugbɔhɔ ki kabanugo ki na, na ki maha ge, yee bɛɛri bye keŋɛ ɲìi shishɛɛrɛ shɛɛrɛ. 6 Yee piyɛyɛ yi bi yereŋɛ na pye zangaso kuuyo taanri. Kee kuugo nigin wa bɛɛri bye piyɛyɛ kɛlɛɛ taanri (30). Puga ka bɛɛri bi pinnɛ yàa ni kpɛɛngɛ ki wo kasɔrɔgɔ ki ni, ga kʼi ya ta pinnɛ yàa ni Kilɛ-pɛɛŋɛ pugbɔhɔ ki wo kasɔrɔgɔ kiyɛ pyaa ni wɛ. 7 Ma ba duri na gaaŋi zangasoo pu fugba wu ni, Kilɛ-pɛɛŋɛ pugbɔhɔ ki kabanuyo yi na, mʼa fugba wu wo piyɛyɛ yi ta yʼa pɛlɛ pɛlɛ nɔhɔdaan woyo yi na, bani kasɔrɔgɔ ki wo pɛɛrɛ ti bi jin fugba wu wo piyɛyɛ yi ni. Lee li bi fugba wu wo piyɛyɛ yi pye yʼa pɛlɛ pɛlɛ nɔhɔdaan woyo yi na. Na ma yaha zangaso nizhiimɛ wu tàan, ma na já dugi na kari shuun wo wu na, ni taanri wo wu bɛ.
8 A nɛ serege ka ɲa pʼa ki yereŋɛ na Kilɛ-pɛɛŋɛ pugbɔhɔ ki maha, kee bye kabanugo ki wo piyɛyɛ yi wo serege. Kee wo ɲuŋɔkana li bye daanna kagaan li ɲii nigin, lee ɲɛ keŋɛ ɲìi gbaara. 9 Piyɛyɛ yi wo kpɛɛngɛ ki wo kasɔrɔgɔ ki wo pɛɛrɛ ti bye keŋɛ ɲìi kaguro. Laraga kemu ki bye Kilɛ-pɛɛŋɛ pugbɔhɔ ki wo kabanugo piyɛyɛ ye, 10 ni saraya ɲaha shɔɔnrivɛɛ pu wo piyɛyɛ yi tɛ wu ni ge, kee bye keŋɛ ɲìi kɛlɛɛ shuun (20), Kilɛ-pɛɛŋɛ pugbɔhɔ ki mahama pu bɛɛri ni. 11 Kabanugo ki wo piyɛyɛ yi wo tajeye yi bi foro to to kee laraga ke ni. Tajege nigin wa bye suumɔ kulo kacɛ ki na, nigin wa di ɲɛ woroo kulo kacɛ ki na. Kee laraga ki wo kasɔrɔgɔ ki wo pɛɛrɛ ti bye keŋɛ ɲìi kaguro na maha círi.
12 Kilɛ-pɛɛŋɛ pugbɔhɔ ki caŋatomɔ pu ni piyɛyɛ ya bye wà na ɲaha tii kee laraga ki na. Yee piyɛyɛ yi wo ɲidaa li bye keŋɛ ɲìi kɛlɛɛ gbarashɛɛrɛ (90), yi kadaa lʼi ɲɛ keŋɛ ɲìi kɛlɛɛ gbarashuun (70). Yi kasɔrɔyɔ yi wo pɛɛrɛ ti bye keŋɛ ɲìi kaguro.a 13 Lee kadugo na, a ná wu Kilɛ-pɛɛŋɛ pugbɔhɔ ki taanna, a ki ɲidaa lʼi bye keŋɛ ɲìi xhuu nigin (100)b. Laraga ke, ni caŋatomɔ pu wo piyɛyɛ ye, ni yi kasɔrɔyɔ ye, a yee bɛɛri wo ɲidaa lʼi bye keŋɛ ɲìi xhuu nigin (100). 14 Kilɛ-pɛɛŋɛ pugbɔhɔ ki ɲahagbaa le, ni laraga ke, Kilɛ-nɔhɔ kacɛ ki na, yee wo kadaa li ɲɛ keŋɛ ɲìi xhuu nigin (100). 15 Piyɛyɛ yemu yi wa Kilɛ-pɛɛŋɛ pugbɔhɔ ki kadugo yíri wu ni na ɲaha tii laraga ki na ge, ni tatorogo kemu ki wa yi kabanuyo shuun wu bɛɛri na ge, a ná wu yee bɛ taanna, a yee bɛ di bye keŋɛ ɲìi xhuu nigin (100). Kilɛ-pɛɛŋɛ pugbɔhɔ ki wo pugbɔhɔ ke, ni ki funŋɔ pura le, ni ki kpaan lee, lee lemu lʼa ɲaha tagi kaaŋa ki yíri ge, tige kɔrɔyɔ yi bi taga yee bɛɛri tɔ. 16 Tajeye ye, ni fɛnɛtirilee pee, ni tatoroyo yemu yi bye zangaso kuuyo taanri wu wo mahama pu ni ge, tige kɔrɔyɔ yi bi taga yee bɛɛri tɔ, na co ɲiŋɛ ki na, fo na shɛ nɔ fɛnɛtirilee pu na. Tige kɔrɔyɔ yi bye ali fɛnɛtirilee pu bɛ na. 17 Na co Kilɛ-pɛɛŋɛ pugbɔhɔ ki tajege ki fugba wu ni, kpɛɛngɛ ki na, fo na shɛ nɔ pugbɔhɔ ki funŋɔ pura li funŋɔ ki ni, ni pugbɔhɔ ke, ni ki funŋɔ pura li wo kasɔrɔyɔ ye, fɛ pu bye yee kasɔrɔyɔ yi na. 18 Serubɛɛn wo jaalaa, ni fɛnhɛɲubaya wo jaalaa pu pi yàa yee tɛyɛ yi bɛɛri ni, na pee jaalaa pu sogi sogi puyɛ na. Fɛnhɛɲubaŋa jaa nigin, ni serubɛn jaa nigin. Ɲahaya shuun shuun wu bye serubɛɛn pu bɛɛri nigin nigin wu mu. 19 Ɲaha nigin wa bye ba sipya wogo ɲɛ wɛ, kee ɲaha bi tagi fɛnhɛɲubaŋa ka yíri, ɲaha ka di ɲɛ ba cɛnripepinŋɛ wogo ɲɛ wɛ, kee bɛ ɲaha bi tagi fɛnhɛɲubaŋa ka yíri. Lee surigana li na jaalaa pʼa suri suri na Kilɛ-pɛɛŋɛ pugbɔhɔ ki maha círi. 20 Pʼa bi serubɛɛn wo jaalaa, ni fɛnhɛɲubaya wo jaalaa yàa Kilɛ-pɛɛŋɛ pugbɔhɔ ki kasɔrɔyɔ yi na, na lɔ ɲiŋɛ ki na, fo na shɛ nɔ tajege ki ɲuɲɔ wu na. 21 Kilɛ-pɛɛŋɛ pugbɔhɔ ki wo pugbɔhɔ ki wo benɛɛ pu tɔɔngɔ ni pu pɛɛrɛ ti bɛɛri bye nigin. Yaaga ka bye fɛfɛɛrɛ ti bɛɛri wo fɛfɛɛrɛ xuu wu ɲahagbaa na ma na jo 22 saraya tawologo, kee kemu ya yàa ni tiye ni ge. Ki ɲuŋɔkana li ɲɛ keŋɛ ɲìi taanri, ki kadaa li ɲɛ keŋɛ ɲìi shuun. Guzheŋɛɛ ki bye ki na, ki serege ke, ni ki ɲɔkoyo yʼi ɲɛ tige. A ná wu nɛ pye: «Tabali wemu wu ɲɛ Tɛhɛnɛ Baa Kilɛ ɲaha tàan ge, wee wu ɲɛ we.c» 23 Tajeye shuun wu bye Kilɛ-pɛɛŋɛ pugbɔhɔ ki wo pugbɔhɔ ke, ni fɛfɛɛrɛ ti bɛɛri wo fɛfɛɛrɛ xuu wu na. 24 Gburaya shuun shuun wu bye yee tajeye yi na, na yi ɲɔ tɔni. Shuun wa ɲɛ ke kuɲɔgɔ ke na, shuun wa di ɲɛ ke kuɲɔgɔ ke na. 25 Pu bi serubɛɛn jaalaa, ni fɛnhɛɲubaya jaalaa yàa Kilɛ-pɛɛŋɛ pugbɔhɔ ki gburaya yi na, ba ki kasɔrɔyɔ yi wuu pu ɲɛ wɛ. Gba wa bye kpaan li ɲahagbaa li na kpɛɛngɛ ki na, wee bi yàa ni tiire ni. 26 Fɛnɛtirilee bi yàa, na giriyazhii le pu na, pere ni fɛnhɛɲubaya wo jaalaa bye kpaan li kabanuyo yi bɛɛri na, ni Kilɛ-pɛɛŋɛ pugbɔhɔ ki kabanugo ki wo piyɛyɛ yi kasɔrɔyɔ ye, ni gbalaa pu na.