Ezekiyɛli 40

Kilɛ-pɛɛŋɛ pugbɔhɔ nivoŋɔ ke

Ayiwa, yee lemu wèe ya co na kari Babilɔni ni ge, lee yee li yee kɛlɛɛ shuun ni kaguro (25) wuu li ɲɔkɔɔnrɔ ti na, yeŋɛ ki caŋa kɛ wogo ki na, Zheruzalɛmu kulo li ja wu yee kɛ ni shishɛɛrɛ wuu le, kee caŋa kiyɛ pyaa, a Tɛhɛnɛ Baa Kilɛ di wu keŋɛ ki taha nɛ na, na nɛ lɔ na kari wee xuu wu ni. 2 A wu gari ni nɛ ni kashɛɛ la ni Izirayɛli ni, na shɛ nɛ yaha faabobotɔɔngɔ ka na. Piyɛyɛ ya yi bye kee wo woroo kulo kacɛ ki na ba kulo la wo piyɛyɛ ɲɛ wɛ. 3 A wu gari ni nɛ ni wà, ná wa wu bye wà, wee wo ɲɛwiinɛ li bye ba daɲaa tɔɔrɔ ɲɛ wɛ. Lɛn mɛɛ li bye wu keŋɛ ni, na fara daanni kagaan la na, wu dʼa yere kuɲɔɔ li ɲɔ na. 4 A wee ná wu nɛ pye: ‹Sipyiyawyii, ma ɲìi ki kemɛ mugi, mʼa ma ɲuwegee ki kemɛ shan! Lemu bɛɛri nʼa da ba zhɛ ma na ge, mʼa kasɛɛgɛ yaha lee na, bani ma kapaa ɲuŋɔ ki wa naha kɔnhɔ mʼa ba wii. Lemu bɛɛri ma da ba ɲa ge, mʼa shɛ li ɲaha jo Izirayɛli wo puga ki mu.

Kaaŋa ke, ni kpɛɛngɛ ki wo kuɲɔyɔ ye

5 Ayiwa, a nɛ kasɔrɔgɔ ka ɲa kemu ya Kilɛ-pɛɛŋɛ pugbɔhɔ ki bɛɛri kuuri ge. Daanna kagaan la li bye ná wu keŋɛ ni lee wo tɔɔngɔ ki ɲɛ keŋɛ ɲii gbaara. Sibiri ɲìi nigin nigin wu bi taha kee keŋɛ ɲìi gbaara wu na. A wu kasɔrɔgɔ ki kadaa li taanna, a lee di bɛ ni wu daanna kagaan li ɲii nigin ni, a wu ki ɲubile li bɛ taanna, a lee bɛ di bɛ ni daanna kagaan li ɲii nigin ni.

6 Kuɲɔɔ lemu li wa Kilɛ-nɔhɔ ki na ge, a wu xhɔ na gari lee yíri. A wu dugi kuɲɔɔ li taduguŋɔ ki na, na kuɲɔwege ki taanna. A ki kadaa li bɛ ni daanna kagaan li ɲii nigin ni. 7 Pugaa kii bye wà, lee la bɛɛri wo ɲidaa bye daanna kagaan li ɲii nigin, li kadaa li bɛ di ɲɛ daanna kagaan li ɲii nigin. Kasɔɔgɔɔ kiimu ki bye pugaa ki tɛ wu ni ge, lee kasɔɔrɔ la bɛɛri wo kadaa li bye keŋɛ ɲìi kaguro. Kpaan lemu li bye Kilɛ-pɛɛŋɛ pugbɔhɔ ki ɲahatiimɛ pu ni ge, kuɲɔɔ lemu li bye sani ma nɔ lee kpaan le na ge, lee wo kuɲɔwege ki bye daanna kagaan li ɲii nigin. 8 A wu tajege ki wo kpaan li taanna, a li bɛ di bye daanna kagaan li ɲii nigin. 9 A wu tajege ki wo kpaan li taanna, a lee di bye keŋɛ ɲìi gbarataanri. A wu li benɛɛ pu bɛ taanna, a pee di bye keŋɛ ɲìi shuun. Tajege ki wo kpaan li bi bye funŋɔ ki ni. 10 Pugaa taanri wa bye Kilɛ-nɔhɔ wo tajege ki kabanugo ka na, taanri wa di ɲɛ ke kabanugo ke bɛ na. Kee pugaa taanri wu bɛɛri wo ɲuŋɔkaŋaa ki bye nigin, ki kabanugo benɛɛ pu bɛ wo ɲuŋɔkaŋaa kʼi ɲɛ nigin. 11 A wu tajege ki wo kadaa li taanna, a lee di bye keŋɛ ɲìi kɛ, a li ɲidaa lʼi bye keŋɛ ɲìi kɛ ni taanri. 12 Kasɔɔgɔɔ ki bye pugaa ki bɛɛri nigin nigin ɲahagbaa na, kabanuyo shuun wu bɛɛri na, kee wo ɲuŋɔkana li bye keŋɛ ɲii nigin. Pura la bɛɛri, li kabanugo ka bɛɛri bye keŋɛ ɲìi gbaara. 13 A wu xhɔ na tajege ki bɛ taanna, na co pura la wo kataŋa ki na, fo na shɛ nɔ la wo kataŋa ki na. A kee laraga kʼi bye keŋɛ ɲìi kɛlɛɛ shuun ni kaguro (25), na co pura la wo tajege ki na, na shɛ nɔ la wo tajege ki na, yee tajeye yemu yʼa saha ni yiyɛ ni ge. 14 A wu kpaan li bɛ taanna, a lee di bye keŋɛ ɲìi kɛlɛɛ shuun (20). Tafaga ka ki bi tajege ki wo kpaan li maha. 15 Kpɛɛngɛ ke ki bye tajege ke ni funŋɔ ki wo tajege ki wo kpaan li tɛ wu ni ge, kee bye keŋɛ ɲìi kɛlɛɛ kaguro (50). 16 Fɛnɛtirilee pu bye pugaa kee, ni ki benɛɛ pu na tajege ki funŋɔ ki ni, giriyazhii di ɲɛ pee fɛnɛtirilee pu na. Fɛnɛtirilee pu bye kpangaa ki bɛ na ma ki maha, funŋɔ ki ni. A pʼi fɛnhɛgeye jaalaa yàa benɛɛ pu na.

17 Lee kadugo na, a wu gari ni nɛ ni kpɛɛngɛ ki wo kaaŋa ki ni. Piyɛyɛ ya yi bi yereŋɛ wà kee kpɛɛngɛ ki na, na kadaan la yàa na kaaŋa ki maha círi ni faakagereye wo daalaa ni. Piyɛyɛ kɛlɛɛ taanri (30) wu bye lee daalaa kadaan li na. 18 Kuɲɔyɔ yi wo kabanuyo yi wo daalaa pee ni kuɲɔyɔ yi wo tɔɔngɔ ki bye nigin. Lee daalaa kadaan li bi tigi nɔhɔdaan. 19 Na co nɔhɔdaan wo tajege ki ɲɔ ki na, fo na shɛ nɔ funŋɔ ki wo kaaŋa ki wo tɛhɛnɛ li na kpɛɛngɛ ki na, a wu wee xuu wu bɛ taanna, a wee di bɛ ni keŋɛ ɲìi xhuu nigin (100) ni Kilɛ-nɔhɔ kacɛ ki na.

20 Tajege kemu ki ɲɛ kpɛɛngɛ ki wo kaaŋa ki suumɔ kulo kacɛ ki na ge, a wu kee bɛ wo ɲidaa le, ni ki kadaa li taanna. 21 Pugaa taanri wu bye ki kabanugo ka na, taanri wa di ɲɛ kabanugo ka bɛ na. Ki benɛɛ pee ni ki kpangaa ki ɲuŋɔkana le, ni tajege nizhiige ki wo ɲuŋɔkana li bye nigin. Yi ɲidahaa ki bye keŋɛ ɲìi kɛlɛɛ kaguro (50), yi kadahaa kʼi ɲɛ keŋɛ ɲìi kɛlɛɛ shuun ni kaguro (25). 22 Ki fɛnɛtirilee pee, ni ki kpangaa kee, ni ki fɛnhɛɲubaya yi jaalaa pu wo ɲuŋɔkana le, ni Kilɛ-nɔhɔ ki wo tajege ki wo ɲuŋɔkana li bye nigin. Kee tajege ki wo taduguŋɔ ki bye girimɛɛ gbarashuun. Kee taduguŋɔ ki wo ɲahagbaa li na kpangaa ki bi bye. 23 Tajege ka ki bye funŋɔ ki wo kaaŋa ki na, na saha ni suumɔ kulo kacɛ ki wo tajege ki ni, ka dʼa saha ni Kilɛ-nɔhɔ kacɛ ki bɛ wo tajege ki ni. A wu yee tajeye shuun wu tɛ wu taanna, a wee di bye keŋɛ ɲìi xhuu nigin (100).

24 Lee kadugo na, a wu gari ni nɛ ni woroo kulo kacɛ ki na. A nɛ shɛ woroo kulo kacɛ ki wo tajege ki ɲa. A wu ki benɛɛ pee ni ki kpangaa ki taanna, a yee bɛ wo ɲuŋɔkaŋaa kee ni yeyisaya wo ɲuŋɔkaŋaa kʼi bye nigin. 25 Fɛnɛtirilee pu bye kee tajege ki bɛ ni ki wo kpangaa ki na, ba piipu fɛnɛtirilee pu ɲɛ wɛ. Pee fɛnɛtirilee pu bɛ wo ɲidaa li bye keŋɛ ɲìi kɛlɛɛ kaguro (50), pu kadaa li ɲɛ keŋɛ ɲìi kɛlɛɛ shuun ni kaguro (25). 26 Kee tajege ki wo taduguŋɔ ki bye girimɛɛ gbarashuun. Kee taduguŋɔ ki wo ɲahagbaa li na kpangaa ki bi bye. Fɛnhɛɲubaya wo jaalaa pu bye ki benɛɛ pu na kabaya shuun wu bɛɛri na. 27 Tajege ka ki bye funŋɔ ki wo kaaŋa ki na woroo kulo kacɛ ki na, na ɲaha tii ni kpɛɛngɛ ki wo kaaŋa ki wo woroo kulo kacɛ ki wo tajege ki ni. A wu yee tajeye shuun wu tɛ wu taanna, a wee di bye keŋɛ ɲìi xhuu nigin (100).

Funŋɔ ki wo kaaŋa ke ni ki tajeye ye

28 Lee kadugo na, a wu jé ni nɛ ni funŋɔ ki wo kaaŋa ki ni, woroo kulo kacɛ ki wo tajege ki ni. A wu kee tajege ki taanna, a kee bɛ wo ɲuŋɔkana le ni yeyisaya di bye nigin. 29 Ki pugaa kee, ni ki benɛɛ pee, ni ki kpangaa ki wo ɲuŋɔkaŋaa ni yeyisaya wo ɲuŋɔkaŋaa ki bye nigin. Fɛnɛtirilee pu bye kee tajege ke, ni ki kpangaa ki na ma yi maha. Pee fɛnɛtirilee pu ɲidahaa ki bye keŋɛ ɲìi kɛlɛɛ kaguro (50), pu kadahaa kʼi ɲɛ keŋɛ ɲìi kɛlɛɛ shuun ni kaguro (25). 30 Kpangaa ki bye ma ki maha. Ki ɲidahaa ki bye keŋɛ ɲìi kɛlɛɛ shuun ni kaguro (25), ki kadahaa ki ɲɛ keŋɛ ɲìi kaguro. 31 Kee kpangaa ki bi foro to kpɛɛngɛ ki wo kaaŋa ki ni. Fɛnhɛɲubaya jaalaa pu bye ki benɛɛ pu na, ki taduguŋɔ kʼi ɲɛ girimɛɛ gbarataanri.

32 Lee kadugo na, a wu gari na shɛ jé ni nɛ ni funŋɔ ki wo kaaŋa ki ni Kilɛ-nɔhɔ kacɛ ki wo tajege ki ni. A wu kee tajege ki taanna, a ki wo ɲuŋɔkana le ni yeyisaya wo ɲuŋɔkaŋaa kʼi bye nigin. 33 Ki pugaa kee, ni ki benɛɛ pee, ni ki kpangaa ki wo ɲuŋɔkaŋaa ni yeyisaya wo ɲuŋɔkaŋaa ki bye nigin. Kee tajege ke ni ki kpangaa ki bye ni fɛnɛtirilee ni ma yi maha. Pee fɛnɛtirilee pu ɲidahaa ki bye keŋɛ ɲìi kɛlɛɛ kaguro (50), ki kadahaa kʼi ɲɛ keŋɛ ɲìi kɛlɛɛ shuun ni kaguro (25) 34 Kpangaa ki bi foro to kpɛɛngɛ ki wo kaaŋa ki ni. Fɛnhɛɲubaya wo jaalaa pu bye ki benɛɛ pu na kabanuyo shuun wu bɛɛri na, ki taduguŋɔ kʼi ɲɛ girimɛɛ gbarataanri.

35 Lee kadugo na, a wu gari na shɛ jé ni nɛ ni suumɔ kulo kacɛ ki wo tajege ki ni. A wu kee tajege ki bɛ taanna, a ki ɲuŋɔkana ni yeyisaya wo ɲuŋɔkaŋaa kʼi bye nigin. 36 Kee tajege ki bɛ bye ni ki pugaa, ni ki benɛɛ, ni ki kpangaa, fɛnɛtirilee dʼa ki maha. Pee fɛnɛtirilee pu ɲidahaa ki bye keŋɛ ɲìi kɛlɛɛ kaguro (50), ki kadahaa kʼi ɲɛ keŋɛ ɲìi kɛlɛɛ shuun ni kaguro (25). 37 Ki kpangaa ki ɲaha bi tagi kpɛɛngɛ ki wo kaaŋa ki yíri. Fɛnhɛɲubaya wo jaalaa pu bye ki benɛɛ pu na kabanuyo shuun wu bɛɛri na, ki taduguŋɔ kʼi ɲɛ girimɛɛ gbarataanri.

38 Puga ka wo tajege ki bi foro to na ɲaha tii suumɔ kulo kacɛ ki wo tajege ki na, kee puga ki ni pu bi saraya nizogoyo yi jii. 39 Tabalaa shuun wu bye kee tajege ki wo kpaan li kabanugo ka na, shuun wa di ɲɛ ke kabanugo ke bɛ na. Pee tabalaa pu na pu bi saraya nizogoyo yi xuli, ni jurumu yafa wo saraya ye, ni yaaŋa ki wo saraya ye. 40 Tabalaa shuun wu bye lee kpaan li wo suumɔ kulo kacɛ ki wo tajege ki kabanugo ka na, shuun wa di ɲɛ ke ki kabanugo ki bɛ na tajege ki wo kpaan li shizhaa wu na. 41 Tabalaa shishɛɛrɛ wu bye tajege ki kabanugo ka na, shishɛɛrɛ di ɲɛ kabanugo ka bɛ na. Pee tabalaa gbarataanri wu na pu bi saraga yatɔɔyɔ yi xuli. 42 Tabalaa shishɛɛrɛ wa bɛtii bye wà sanha, na pu tɛ na wolo faaya ni, saraya nizogoyo yi kaa na. Pee tabalaa pu ɲidahaa ki bye keŋɛ ɲii nigin ni taaga, pu kadaa lʼi ɲɛ keŋɛ ɲii nigin ni taaga, pu ɲuŋɔkana lʼi ɲɛ keŋɛ ɲii nigin. Yagboyo yemu ni pu bi saraya nizogoyo ye, ni saraya yisaya xuli ge, pee tabalaa pu na pu bi yaa na yee yagboyo yi tɛri. 43 Pu bi ɲɔgoyo yàa pee tabalaa pu na na pu maha, kee ɲɔgoŋɔ ki ɲuŋɔkana bye sibiri ɲii nigin. Pee tabalaa pu na pu bi saraya yi wo xaara ti tɛri.

44 Yoceelee pu wo piyɛyɛ yi bye funŋɔ ki wo tajege ki wo kpɛɛngɛ ki na, funŋɔ ki wo kaaŋa ki ni. Puga ka bye suumɔ kulo kacɛ ki wo tajege ki ɲɔ ki na, na ɲaha tii woroo kulo kacɛ ki na. Puga ka bɛ di ɲɛ woroo kulo kacɛ ki wo tajege ki ɲɔ ki na, na ɲaha tii suumɔ kulo kacɛ ki na. 45 A ná wu nɛ pye: «Ke puga ke kʼa ɲaha tagi woroo kulo kacɛ ki na ge, kee ɲɛ saraya ɲaha shɔɔnrivɛɛ pii wogo, pee piimu pʼa labye pyi Kilɛ-pɛɛŋɛ pugbɔhɔ ki ni ge.» 46 Puga kemu kʼa ɲaha tagi suumɔ kulo kacɛ ki na ge, kee ɲɛ saraya ɲaha shɔɔnrivɛɛ pii wogo, pee piimu pʼa labye pyi saraya yi tawologo ki ni ge. Pee ɲɛ Sadɔki wo jalaa pee, na foro Levi wo tirige shɛɛn pu ni, pee pʼa yeree Tɛhɛnɛ Baa Kilɛ ɲaha tàan, na saraya yi wo.

Kilɛ-pɛɛŋɛ pugbɔhɔ ke

47 Lee kadugo na, a ná wu funŋɔ ki wo kaaŋa ki taanna, a ki tɔɔngɔ kʼi bye keŋɛ ɲìi xhuu nigin (100), a ki ɲidaa li bɛ di bye keŋɛ ɲìi xhuu nigin (100). Ki ɲidaa le ni ki kadaa li bɛɛri li bye nigin. Saraya yi tawologo ki bye Kilɛ-pɛɛŋɛ pugbɔhɔ ki ɲahagbaa na.

48 Lee kadugo na, a wu gari ni nɛ ni Kilɛ-pɛɛŋɛ pugbɔhɔ ki wo kpaan li ni. A wu kpaan li wo benɛɛ pu taanna, kabanugo ka bye keŋɛ ɲìi kaguro, ka bɛ di ɲɛ keŋɛ ɲìi kaguro. Tajege ki wo kadaa li bye keŋɛ ɲìi kɛ ni shishɛɛrɛ. Kasɔrɔgɔ kemu ki bye ki kabaya shuun wu na ge, kee ka bɛɛri bye keŋɛ ɲìi taanri. 49 Kpaan li ɲidaa li bye keŋɛ ɲìi kɛlɛɛ shuun (20), li kadaa lʼi ɲɛ keŋɛ ɲìi kɛ ni nigin. Li taduguŋɔ ki bye ni girimɛɛ ni. Beni nagaya shuun wa bye tajege ki ɲɔ ki wo benɛɛ pu tàan, nigin wa ɲɛ ke kabanugo ke na, nigin wa di ɲɛ ke kabanugo ke bɛ na.