Kilɛ tuduro na jo wá Gɔgi na
39
Ayiwa, sipyiyawyii, Kilɛ tuduro jo wá Gɔgi na! Yi jo wu mu na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: «Nʼa da yìri mu Gɔgi fɛni, mu wemu wu ɲɛ Mɛshɛki ni Tubali wo saangbɔ wu ge! 2 Nʼa da ba ma ɲaha ɲɛri, nɛ nʼa da ba shɛ ma co fo suumɔ kulo kacɛ ki funŋɔ ki ni, di ma yeege, di ma pye mʼa shɛ do Izirayɛli wo faaboboyo yi na. 3 Nɛ na ba ma sindaa ki kpɔn na wolo ma kamɛnɛ keŋɛ ki ni, na ŋmaya yi kpɔn na wolo shan ma kanige keŋɛ ki ni. 4 Ma na ba do Izirayɛli wo faaboboyo yi na, ma ni ma kashɛn keye yi bɛɛri, ni sipyiɲɛhɛnɛ lemu bɛɛri li wa ni ma ni ge. Nɛ na ba ma kan na pye xaara xa xa shazhɛɛyɛ yi wo yaligee, ni shazhɛɛyɛ yi tuuyo yi bɛɛri, ni sige naŋa yaaya yi wo yaligee. 5 Ma na ba do na xhu sige ki ni, bani nɛ wʼa jo. Kafɔɔ Tɛhɛnɛ Baa Kilɛ ɲɔjomɔ pi. 6 Magɔgi fiige ke, ni sipyii piimu ɲaɲiŋɛ wuu pʼa tiin suumɔ lɔhɔ ki takpiiye yi na ge, nɛ na ba na tirige pee na. Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. 7 Nɛ na ba na fɛfɛɛrɛ mɛgɛ ki shɛ na sipyii pu niŋɛ ni, Izirayɛli nagoo pee. Nɛ da ba sɔɔ pʼa na fɛfɛɛrɛ mɛgɛ ki kyɛɛgi nige wɛ. Fiiye yatii shɛɛn pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ, Fɛfɛɛrɛ wo Izirayɛli ni.8 «Kii keree kii bɛɛri na ba bye, kʼa ɲɔ kɔn na xɔ bɛ na byi. Kafɔɔ Tɛhɛnɛ Baa Kilɛ ɲɔjomɔ pi. Caŋa ɲii lemu kaa nɛ bi jo ge, lee lʼa nɔ. 9 Izirayɛli nagoo pu na ba foro pu kulogoo ki ni, na na gbɛri na pu pɛɛn pu wo kashɛn yagboyo yi sorogo. Pu ŋmasigiye yi bɛɛri, yi nifɛnhɛŋɛɛ fara yi nagaya yi na, ni pu sindaaya ye, ni ŋmaya ye, ni pubegee kee, ni tanmaa pee. Pu na ba yee sorogo fo na shɛ da yee gbarashuun. 10 Pu da ba kajiiwaya shaa nige sige ki ni wɛ, pu di wa da ba kajiipuriye bɛ kpɔɔn nige taha ki ni wɛ, bani kashɛn yagboyo yi ni pʼa da ba na ki gbɛri. Piimu pʼa bi pu yaŋmuyɔ yi shɔ pu na ge, pu na ba peefɛɛ woyo yi shɔ pu na. Piimu pʼa bi pu yaŋmuyɔ yi kuu ge, pu na ba peefɛɛ woyo yi kuu. Kafɔɔ Tɛhɛnɛ Baa Kilɛ ɲɔjomɔ pi. 11 Nɛ na ba xuu taleŋɛ ka kan Gɔgi mu kee caŋa ke, Izirayɛli fiige ki ni. Kee ɲɛ ɲaaɲaalaa pu wo faaya yi tɛ fawii li ni, lee lemu li wa suumɔ loxugo ki Kilɛ-nɔhɔ ki na ge. Yee faya yi na ba ɲaaɲaalaa pu wo koo li tɔ, bani wà pʼa da ba Gɔgi ni wu sipyiɲɛhɛnɛ li bɛɛri le. Pu na ba wee xuu wu mɛgɛ yiri na: ‹Gɔgi ni wu sipyiɲɛhɛnɛ li wo faaya yi tɛ fawii le.› 12 Izirayɛli puga ki na ba pu nixhuyo yi le wà kɔnhɔ fiige ki bye fɛɛfɛɛ. Pu na ba yebyaa gbarashuun pye na pu nixhuyo yi leni. 13 Caŋa kemu nʼa da ba na wo nɔɔrɔ wu shɛ ge, fiige ki sipyii pu bɛɛri na ba pu nixhuyo yi le, na mɛgɛ ta lee funŋɔ ni. Kafɔɔ Tɛhɛnɛ Baa Kilɛ ɲɔjomɔ pi. 14 Yebyaa gbarashuun bu doro, pu na ba namaa pii shɔɔnri lɔ, pee na ganha na ɲaari tuun bɛɛri ni fiige ki ni. Xuu piimu pu ɲɛ ɲiŋɛ ki na ge, pʼa ganha na pee shaa, na pee leni faya ni, kɔnhɔ pʼi fiige ki pye fɛɛfɛɛ. 15 Pee sipyii pu na ba fiige ki saala, pu bu shɛ sipya kaciiye ta xuu wemu bɛɛri ni, pʼa faakagereye pinnɛ wee xuu wu ni na pye toŋɔ. Faduguloo pu ba nɔ wà, pʼa yee kaciiye yi lɔ na shɛ le Gɔgi ni wu sipyiɲɛhɛnɛ li wo faaya yi tɛ fawii li ni. 16 Kulo la bɛ na ba bye wee xuu wu ni, pʼa li mɛgɛ le na Amɔna (Sipyiɲɛhɛnɛ). Lee pyegana li na pu da ba fiige ki pye fɛɛfɛɛ.
17 «Sipyiyawyii, yemu Kafɔɔ Tɛhɛnɛ Baa Kilɛ wa yu ge, yee yi wa mɛ na ma yi jo shazhɛɛrɛ ti tuuyo yi bɛɛri, ni sige naŋa yaaya yi bɛɛri mu na: ‹Yi pa binnɛ, yi pa yʼi ba binnɛ na yìri tɛyɛ yi bɛɛri ni, yʼi ba nɛ wo saraga ki li, kee kemu nɛyɛ pyaa ya wolo na kan yee mu ge, kee saraga nigbɔhɔ ke, Izirayɛli wo faaboboyo yi na. Yi na ba xaara xa, na shishan gba. 18 Yi na ba kashɛn naŋmaya xaara xa, na ɲiŋɛ ki wo ɲuŋɔfɛɛ pu shishan gba. Pee ɲɛ dubyapelɛyɛ, ni dubyapepinyɛ, ni sikapee, ni nupɛhɛɛ, yee yemu ya kemɛ pɔri Bashan wo koomɔ pu ni ge. 19 Yi na ba sìnmɛ xa fo na din pu na, na shishan gba fo na ɲawɔhɔ wɔ yiyɛ na, nɛ wo saraga ki ni, kee kemu nɛ wolo yee mu ge. 20 Yi na ba din shɔnyɔ xaara, ni wotoriyo shɔnyɔ xaara na, ni kashɛn naŋmaya xaara, ni kashɛnŋmuu pu bɛɛri wo xaara na. Kafɔɔ Tɛhɛnɛ Baa Kilɛ ɲɔjomɔ pi. 21 Nɛ na ba na wo nɔɔrɔ wu shɛ fiiye yatii shɛɛn pu tɛ ni. Kiiri wemu nʼa da ba zhan pu ɲuŋɔ ni ge, ni nɛ na ba na keŋɛ ki digi pu na digigana lemu na ge, pu na ba lee ɲa. 22 Na co kee caŋa ki na, Izirayɛli puga ki na ba li cɛ na Tɛhɛnɛ Baa Kilɛ nɛ ɲɛ, wu wo Kilɛ we.› »
Izirayɛli na ba pɛɛŋɛ kemu ta ɲibaŋa na ge
23 «Ayiwa, fiiye yatii shɛɛn pu na ba li cɛ na pu kanahaya yi wuu na Izirayɛli nagoo pʼa co na kari fiiye yatii ni, bani pu ya ta pye ɲɔmɛhɛɛ fɛɛ nɛ mu wɛ. Lee wuu na nɛ kadugo le pu ni, na pu le pu pɛɛn pu keŋɛ ni, kɔnhɔ ŋmɔpara di pu bɛɛri gbo. 24 Nɛ kadugo le pu ni, na pu co na saha ni pu nɔhɔmɔ pe, ni pu nahama keree ki ni.
25 «Lee wuu na yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nimɛ nʼa da ba ɲɛri le Yakuba wo keree ki ni. Nʼa da ba ɲuŋɔ ɲaari Yakuba wo puga ki bɛɛri na. Nɛ wo fɛfɛɛrɛ mɛgɛ kʼa yaa ni pɛɛŋɛ kemu ni ge, kee fanha na ba bye sipyiire ti bɛɛri na. 26 Lee bu bye, nahama pemu bɛɛri, ni ɲɔmɛɛ baara temu bɛɛri pʼa pye nɛ na ge, pu funŋɔ na ba wɔ kee shiige ki na. Pu na ba guri bye sanha ɲaɲiŋɛ na pu fiige ki ni, sipya wa shishiin bɛ di wa da ga pu fyaguunɔ fya wɛ. 27 Nɛ ba ba pu yeege fiiye yatii shɛɛn pu tɛ ni, nɛ ba ba pu pinnɛ na foro pu pɛɛn pu wo fiiye yi ni tuun wemu ni, wee tuun wu ni nʼa da ba na wo fɛfɛɛrɛ ti shɛ pu tɛ ni fiiye yatii shɛɛn niɲɛhɛmɛɛ ɲii na. 28 Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ, pu wo Kilɛ we, bani nɛ bi pu pye pʼa pu co na kari fiiye yatii ni, ga nimɛ, nɛ pa pu pinnɛ puyɛ pyaa wo ɲiŋɛ ki na. Nʼa da ga pu shɛn nigin bɛ yaha fiige katii ni nige wɛ. 29 Nʼa da ga kadugo bɛ le nige pu ni wɛ, bani nʼa da ba na Munaa li tirige Izirayɛli wo puga ki na. Kafɔɔ Tɛhɛnɛ Baa Kilɛ ɲɔjomɔ pi.› »