Kilɛ tuduro na jo wá saannaa Gɔgi na
38
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, ma ɲaha ki ŋmahana ɲɛri Gɔgi yíri, Mɛshɛki ni Tubali shɛɛn pu wo saangbɔ we, Magɔgi fiige ki ni, mʼa Kilɛ tuduro jo wá wu na. 3 Mʼa wu pye na yemu Kafɔɔ Tɛhɛnɛ Baa Kilɛ ya jo ge, na yee yi wa mɛ na: ‹Nʼa da yìri mu Gɔgi fɛni, mu wemu wu ɲɛ Mɛshɛki ni Tubali wo saangbɔ wu ge! 4 Nʼa da ba shɔhɔshɔhɔŋɔ le ma keeshɛnhɛ yi na, di ma kile yeege fanha na ma fiige ki ni, ma ni ma kashɛn keŋɛ ki bɛɛri, shɔnyɔ yi fara shɔnduguloo pu na, pee piimu pʼa puyɛ kemɛ to kashɛn ki kaa na ge, na fara ma sipyiɲɛhɛnɛ li na, pee piimu pu wa ni ŋmasigiye nagaya ni yi nibiire ti ni, pu dʼa ŋmɔparaa kashɛn ki ɲaha cɛ xuuni ge. 5 Pɛrisi fiige ke, ni Kushi fiige ke, ni Puti fiige ke, yee wo kashɛnŋmuu pu bɛ na ba fara ma na, na pu ŋmasigiye nagaya ye ni nibiire ti le, na pu tɔɔrɔ ɲudɔyɔ yi tɔ, 6 na fara Gomɛɛri fiige ki wo kashɛnŋmuu pu bɛɛri, ni Bɛti-Togarima wuu pu bɛɛri, na kari suumɔ kulo kacɛ ki yíri wu ni, na fara fiiye yatii shɛɛn pu wo sipyiɲɛhɛnɛ li na, pee piimu bɛɛri pu wa ni ma ni ge. 7 Mayɛ gbegele, mʼa mayɛ niŋɛ pɔ, ma ni ma sipyiɲɛhɛnɛ li ni, lee lemu lʼa pinnɛ ma tàan ge! Mu wu wa da ba bye pu ɲuŋɔfɔɔ. 8 Yee niɲɛhɛŋɛɛ kii ba doro, nɛ na ba ma pye ma ba do Izirayɛli fiige ki na. Ki sipyii piimu pʼa bi shɔ kashɛn ki na ge, pee bi caaga na kari fiiye yemu ni ge, pee na ba yìri yee fiiye yi ni, na ba diin Izirayɛli wo faaboboyo koomɔ pu ni, kee fiige kemu kʼa yee niɲɛhɛŋɛɛ pye ki na ɲɛ takoloŋɔ, pu dʼa kadugo le ki ni ge. Fo tuun wemu tɛhɛnɛ na pu ni fiiye yatii shɛɛn pʼa puyɛ yaha ge, pu ɲaɲiŋɛ wuu na ba bye. 9 Ma ni ma kashɛn keŋɛ ke, ni ma tɛgɛvɛɛ niɲɛhɛmɛɛ pu ni, yee na ba do pu na, yee na ba gburogi dɔ pu na ba zanha kafɛɛgbɔhɔ ɲɛ wɛ. Yi na ba pu fiige ki tɔ ba ɲahaŋa ɲɛ wɛ.›
10 «Yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Fungɔngɔ ka na ba digi mu Gɔgi mu yee caya yi na, mʼa gbegemɛ niguumɔ pa gbegele. 11 Ma na ba jo na: “Nʼa da zhɛ do fiige ka na, kee kemu ɲɔ kʼa mugi yaha ge. Nʼa da zhɛ do namaa pii na, pee piimu fɛrɛmɛ wuu pʼa tiin ɲaɲiŋɛ na pu fiige ki ni ge. Pu kulogoo ki bɛɛri ki ɲɛ kashɛn ɲaha kɔn kɔn kasɔrɔyɔ baa, gburaya baa, ni shɔhɔshɔhɔyɔ baa. 12 Nʼa da zhɛ pu yaŋmuyɔ yi kuu, di kashɛn naafuu ta.” Sipyii ya kuri pa katahaya yemu yaavonɔ yàa, na diin yi ni ge, sipyii piimu pʼa foro fiiye yatii shɛɛn pu tɛ ni, na pa binnɛ, pu ni pu yapɔrɔyɔ ni pu keŋɛ yaŋmuyɔ yi ge, pee piimu pu wa koŋɔ ki nizhoo li ni ge, pee fɛni mu ya yìri mɛ. 13 Seba shɛɛn ni Dedan shɛɛn, ni Tarisisi fiige ki wo kegaaŋa pyevɛɛ pee, ni pu ɲuŋɔfɛɛ pu bɛɛri na ba ma yege na: “Kashɛn naafuu mʼa ma di ba guu gɛ? Ta mʼa le sipyiɲɛhɛnɛ le pinnɛ, kɔnhɔ mʼa ba pu naafuu wu kuu, mʼa gari ni pu wari we, ni pu sanni wu ni, mʼa pu yapɔrɔyɔ ye ni pu keŋɛ yaŋmuyɔ yi kuu, mʼa kashɛn naafuu niɲɛhɛmɛ ta ya?”›
14 «Lee wuu na, sipyiyawyii, Kilɛ tuduro jo! Yi jo Gɔgi mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye na: ‹Izirayɛli nagoo pee, pee piimu pu ɲɛ nɛ wo sipyii pu ge, caŋa kemu pu da ba shɛ diin ɲaɲiŋɛ na ge, mu na ba lee cɛ. 15 Ma fiige ke ki wa fo suumɔ kulo kacɛ ki funŋɔ ki ni ge, ma na ba ba na yìri wà, ma ni ma sipyiɲɛhɛmɛɛ pu ni, pee piimu pʼa dugi shɔnyɔ na ge, pee sipyiɲɛhɛnɛ pee, kee kashɛn keŋɛ nigbɔhɔ ke. 16 Izirayɛli nagoo pee, nɛ wo sipyii pee, mu Gɔgi na ba ba pu fɛni ba ɲahaya ma fiige tɔ mɛ wɛ. Lee na ba bye cabaya yi na. Nɛ na ba ma pye mʼa pa na wo fiige ki fɛni, kɔnhɔ nɛ ba mu Gɔgi lɔ fiiye yatii shɛɛn pu ɲii na na taga na wo fɛfɛɛrɛ ti shɛ tuun wemu ni, fiiye yatii shɛɛn pʼi na cɛ!›
17 «Yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nɛ mu kaa jo fo taatuunnɔ li ni, na kapyebyii pu ɲɔ na, pee piimu pu ɲɛ Izirayɛli wo Kilɛ tudunmɔɔ pu ge. Pee ya Kilɛ tuduro jo wee tuun wu ni, li yee wa ɲɛhɛ, na nɛ na ba mu yaha na pa na wo sipyii pu fɛni. 18 Ga kee caŋa ki kunni, caŋa kemu mu Gɔgi da ba ba Izirayɛli nagoo pu fɛni ge, nɛ luu li na ba yìri fo xuuni kee caŋa ke, Kafɔɔ Tɛhɛnɛ Baa Kilɛ ɲɔjomɔ pi. 19 Na wo naŋmegea ke, ni na wo loyire li wo na ki funŋɔ ni nʼa da yi jo nakaara baa jo ɲiŋɛ cɛlɛŋɛ nigbɔhɔ na ba bye kee caŋa ke Izirayɛli ni. 20 Suumɔ lɔhɔ ki fyaa pee, ni fugba shazhɛɛrɛ ti na ba jɛlɛ nɛ ɲaha tàan, na fara sige naŋa yaaya yi na, ni ɲiŋɛ ki yakokaara temu bɛɛri ti wa ɲiŋɛ ki na ge, ni ɲiŋɛ ki sipyii pu bɛɛri. Faaboboyo yi na ba do do, faaya yi ma ja ja, kasɔrɔyɔ yi bɛɛri na do do ɲiŋɛ ki na. 21 Nɛ na ba ŋmɔpara yiri na yìri na wo faaboboyo yi bɛɛri na Gɔgi fɛni. Kafɔɔ Tɛhɛnɛ Baa Kilɛ ɲɔjomɔ pi. Wa bɛɛri na ba wu ŋmɔpara kɔɔngi wu ceboro fɛni Gɔgi wo sipyii pu ni. 22 Nɛ na ba kiiri kɔn wu na, na kafɛɛgɛ yama yaha pa wu fɛni, ni gbuuro pyevɛɛ. Nɛ na ba zangbɔhɔ, ni zanha kagereye, ni na ni kirimu shan wu ɲuŋɔ ni, wu ni wu kashɛn keye ye, ni wu sipyiɲɛhɛmɛɛ pee, pee piimu pu wa ni wu ni ge. 23 Nɛ na ba na wo pɛɛŋɛ ke ni na wo fɛfɛɛrɛ ti shɛ fiiye yatii shɛɛn pu wo sipyiɲɛhɛmɛɛ pu ɲii na, pʼa li cɛ lee funŋɔ ni na Tɛhɛnɛ Baa Kilɛ nɛ ɲɛ.› »