Kaciiye yi wo kashɛɛ le
37
Ayiwa, a Tɛhɛnɛ Baa Kilɛ di wu keŋɛ ki taha nɛ na. A Tɛhɛnɛ Baa Kilɛ wo Munaa lʼi nɛ lɔ na shɛ yaha faaya yi tɛ fawii la niŋɛ ni, lee bɛɛri li bi ɲi kaciiye na. 2 A wu nɛ pye nɛ ɲaari na yee kaciiye yi maha. Kaciiye yi bi sii ɲɛhɛ xuuni faaya yi tɛ fawii li ni, na sii waha xuuni.3 A Tɛhɛnɛ Baa Kilɛ di nɛ yege na: «Sipyiyawyii, ta ye kaciiye ye na já guri ɲiifɛɛrɛ pye sanha ya?» A nɛ wu ɲɔ shɔ na jo: «Kafɔɔ Tɛhɛnɛ Baa Kilɛ go mu wu wʼa lee cɛ!» 4 A wu nɛ pye: «Kilɛ tuduro jo ni ye kaciiye ye ni, mʼa yi pye: «Kaciiwaya, yi Tɛhɛnɛ Baa Kilɛ wo jomɔ pu logo! 5 Kafɔɔ Yemu Tɛhɛnɛ Baa Kilɛ wa yu ye kaciiwaya yemu ge, yee yi wa mɛ na: ‹Nʼa da munahaa le yi ni, yʼi guri pye sanha ɲiifɛɛrɛ na. 6 Nʼa da ba kavaan le yi na, di ceexaara le yi na, di ceesɛɛgɛ taga yi tɔ, di munahaa le yi ni, yʼi bye ɲiifɛɛrɛ na, yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »
7 Ayiwa, a nɛ Kilɛ tuduro ti jo ma na jo ba yʼa bi jo nɛ mu wɛ. Ma nɛ yaha nɛ na Kilɛ tuduro ti yu, a tunmɔ pa di foro, a kaa la di bye. A kaciiye yʼi fulo fulo yiyɛ na. 8 A nɛ wii, na kavaan ta yi na. A ceexaara di foro yi na, a ceesɛɛgɛ di yi tɔ, ga munaa bye yi ni wɛ.
9 A Tɛhɛnɛ Baa Kilɛ di nɛ pye: «Kilɛ tuduro jo munaa li mu! Sipyiyawyii, Kilɛ tuduro jo munaa li mu, mʼa yi jo li mu na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: ‹Munaa le, pa na yìri kabaya shishɛɛrɛ wu bɛɛri na! Pa digi pii xuu pii na, kɔnhɔ pʼi ɲiifɛɛrɛ pye sanha!› » 10 A nɛ Kilɛ tuduro jo ma na jo ba yʼa jo nɛ mu jogana lemu na wɛ. Wee tuun wu ni a munaa lʼi digi pu na, a pʼi guri pye sanha ɲiifɛɛrɛ na, na yìri yere pu tɔɔyɔ yi na. Tɛhɛnɛ baa Kashɛn keŋɛ nigbɔhɔ ki bye kii.
11 Ayiwa, a Tɛhɛnɛ Baa Kilɛ di nɛ pye: «Sipyiyawyii, ye kaciiye ye ɲɛ Izirayɛli nagoo pu bɛɛri. Pu wa na yu na: ‹Wèe kaciiye yʼa waha waha, wèe wo tadaŋa kʼa kyɛɛgi, wèe ya piin! 12 Lee wuu na dɛ, Kilɛ tuduro jo, mʼa yi jo pu mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye na: “Ee, nɛ wo sipyii pee, nʼa da ba yi wo faya yi ɲɔ mugi, di yi yeege yi wo faya yi ni, di shɛ ni yi ni Izirayɛli wo ɲiŋɛ ki na. 13 Ee, nɛ wo sipyii pee, nɛ ba ba yee wo faya yi ɲɔ mugi tuun wemu ni, na yee lɔ na yeege yi wo faya yi ni, wee tuun wu ni yee da ba li cɛ na Tɛhɛnɛ Baa Kilɛ nɛ ɲɛ! 14 Nɛ na ba na Munaa li tirige yi na, yi ma ɲiifɛɛrɛ pye. Nɛ na ba yi kuruŋɔ na pa yi wo ɲiŋɛ ki na, yi na ba li cɛ lee funŋɔ ni na nɛ Tɛhɛnɛ Baa Kilɛ wʼa jo mu, na li pye bɛ. Tɛhɛnɛ Baa Kilɛ ɲɔjomɔ pi.
Kilɛ na ba guri Izirayɛli nagoo pu pinnɛ sanha
15 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
16 «Mu sipyiyawyii, tige ceere la lɔ, mʼa pe kama pe ka li na na: ‹Zhuda wuu, wu ni Izirayɛli nagoo piimu pʼa fara wu na ge.› Mʼa tige ceere la bɛ lɔ, mʼa pe kama pe ka lee bɛ na na: ‹Yusufu wuu, Efirayimu wo pubiin le, wu ni Izirayɛli puga ki shɛɛn piimu bɛɛri pʼa fara wu na ge.› 17 Mʼa kee tige ceregee shuun wu sogi kiyɛ na ma pye tige ceere nigin ma keŋɛ ki ni. 18 Ma wo sipyii pu ba ma pye na: ‹Le kɔ́ri wa lekɛ ma mu ge, ma na lee jo wù mu wɛ?› 19 Mʼa pu pye na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: ‹Yusufu wo tige ceere lemu li wa Efirayimu keŋɛ ni ge, ni Izirayɛli wo gbaweye yemu yʼa fara wu na ge, nɛ lee lɔ, na li sogi Zhuda wo tige ceere li na, na li pye tige ceere nigin. Pu na ba binnɛ na keŋɛ ki ni.› 20 Tige ceregee kiimu na mʼa kama pu ka ge, kee na ba bye ma keŋɛ ki ni pu ɲaha tàan.
21 Lee kadugo na, mʼa pu pye na yemu Kafɔɔ Tɛhɛnɛ Baa Kilɛ wa yu ge, na yee yi wa ye na: ‹Izirayɛli nagoo pʼa bi caaga na kari fiiye yemu ni ge, nʼa da ba pu lɔ na yeege yee fiiye yi ni, di pu pinnɛ na yìri kabaya yi bɛɛri na, di shɛ pu yaha pu wo ɲiŋɛ ki na. 22 Nɛ na ba pu ɲɛri fiige nigin pu wo fiige ki ni, Izirayɛli wo faaboboyo koomɔ pu ni. Saan nigin na ba bye pu bɛɛri mu. Pu da ba bye nige shi tɛhɛɛ shuun wɛ, pu saanra ti bɛ di da bye nige saanra tɛhɛɛ shuun wɛ. 23 Pu wa da ba pu wo yapɛrɛɛ kee, ni pu wo tanhaŋa keree kee, ni pu wo saliya kyɛɛgɛrɛ ti taga da puyɛ nɔrɔgɔ nige wɛ. Tɛyɛ yemu bɛɛri ni pʼa jurumu pye ge, nɛ na ba pu ɲuŋɔ wolo yee bɛɛri ni, na pu pye fɛɛfɛɛ, pʼa bye nɛ wo sipyii, nɛ ma bye pu Kilɛ. 24 Na kapyebye Dawuda, wee na ba bye pu saan, yatɔɔnahama nigin na bye pu bɛɛri mu. Pu na ba daha nɛ wo kodorogoo ki fɛni, na kasɛɛgɛ yaha nɛ wo saliya wu na, na wu koo ɲaari. 25 Fiige kemu nɛ kan na wo kapyebye Yakuba mu ge, kee kemu ni yee tii pʼa pu wo caŋa ɲii li pye ge, pu na ba diin kee fiige ki ni. Pu na ba diin kee ni fo gbee, pu ni pu jalaa, ni pu jalaa pu wo jalaa, na kapyebye Dawuda na bye pu saan fo gbee. 26 Nɛ na ba ɲaɲiŋɛ kariɲɛɛgɛ ɲɔmɛɛ lɔ ni pu ni, lee na ba bye ɲɔmɛɛ nixhɔbaana nɛ ni pu tɛ ni. Nɛ na ba pu teŋɛ, na pu ɲɛhɛ, na na fɛfɛɛrɛ puga ki sin pu tɛ ni na yaha wà gbee. 27 Na tatɛɛngɛ ki na ba bye wà pu tɛ ni. Nɛ na ba bye pu Kilɛ, pee na bye nɛ wo sipyii. 28 Nɛ ba na fɛfɛɛrɛ puga ki sin na yaha wà pu tɛ ni fo gbee tuun wemu ni, fiiye yatii shɛɛn pu na ba li cɛ wee tuun wu ni na nɛ Tɛhɛnɛ Baa Kilɛ wʼa Izirayɛli pyi fɛɛfɛɛ.