Izirayɛli nagoo pu na ba guri pu fiige ki kafɛɛrɛ pye sanha
36
Ayiwa, mu sipyiyawyii, Kilɛ tuduro jo Izirayɛli wo faaboboyo yi mu! Yi jo pu mu na: «Izirayɛli wo faaboboyo ye, yi Tɛhɛnɛ Baa Kilɛ wo jomɔ pu logo! 2 Yemu Tɛhɛnɛ Baa Kilɛ wa yu ge, yee yi wa mɛ na: ‹Yee pɛɛn pʼa jo na: “Payi payi! Ye faaboboyo ye yi ɲɛ wà fo taashiinɛ li ni ge, yee ya ɲɛri wèe woyo!” 3 Lee wuu na Kilɛ tuduro jo, mʼa yi jo pu mu na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: Ayiwa, ma na jo pʼa li sha kabaya yi bɛɛri na pʼi yee cogana kolo, pʼi yee ɲɛri takoloŋɔ, kɔnhɔ yee di ɲɛri fiiye yatii shɛɛn wo keŋɛ yaaga, pee piimu pʼa yee ɲɛri pu yafanhaŋa ni lawuu yaaga ge. 4 Lee wuu na, Izirayɛli wo faaboboyo ye, yi Kafɔɔ Tɛhɛnɛ Baa Kilɛ wo jomɔ pu logo! Izirayɛli wo faaboboyo ye, ni yaŋaboboyo ye, ni dugorogoo kee, ni faaya yi tɛ fawegee kee, ni katahaya nigoloyo ye, ni kulogoo kiimu niwaya yi wa, ni ki mahama fiiye yatii shɛɛn ya ki funŋɔ yaŋmuyɔ yi kuu, na ki ɲɛri fanhara yaaga ni lawuu yaaga ge, yemu Kafɔɔ Tɛhɛnɛ Baa Kilɛ ya jo ge, yee yi wa mɛ; 5 Lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: Nakaara baa, na ɲɛpɛɛn li wo na ki ni nʼa yu ni fiiye yatii shɛɛn pu ni, ni Edomu fiige ki bɛɛri. Bani pu fundangbɔhɔ wuu, ni pu makɔŋɔ ki wuu na pʼa nɛ wo fiige ki ɲɛri na pye pu wogo, kɔnhɔ pʼi ki tanahaya yi ta. 6 Lee wuu na, Kilɛ tuduro jo Izirayɛli fiige ki mu! Yi jo faaboboyo ye, ni yaŋaboboyo ye, ni dugorogoo kee, ni faaya yi tɛ fawegee ki mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye na: Na loyireguunɔ wo ni na naŋmege wo wʼa yu, bani fiiye yatii shɛɛn pʼa fanhara wo yee na. 7 Lee wuu na yemu Kafɔɔ Tɛhɛnɛ Baa Kilɛ wa yu ge, yee yi wa ye na: Nɛ kàa ni na keŋɛ ki yirige wu ni fugba wu ni jo fiiye yatii shɛɛn piimu pʼa yee maha ge, jo pee pu da ba zhiige puyɛ pyaa wo fanhara ti keŋɛ ni!›8 «Yee kunni, Izirayɛli wo faaboboyo ye, yee na ba geye yeege, na nagoo pye Izirayɛli mu, nɛ wo sipyii pee, bani jɛɛrɛ funŋɔ ni yʼa da guri da se yi wo fiige ki ni. 9 Oo dɛ, nʼa ma yi mu, nɛ na ba ɲaha tagi yi yíri, yi wo kɛrɛyɛ yi na ba nuri, na yi faani. 10 Nɛ na ba sipyiire ti pye tʼi ɲɛhɛ Izirayɛli fiige ki bɛɛri ni. Sipyiire ti na ba jé kulogoo ki bɛɛri ni, katahaya yi bɛɛri na guri yereŋɛ sanha. 11 Sipyiire te ni yapɔrɔyɔ yi na ba ɲɛhɛ. Yi na ba ɲɛhɛ, na bye sege fɛɛ. Nɛ na ba yi pye yʼa ɲɛhɛ ba taashiinɛ li ɲɛ wɛ, na saama pye yi mu na ye taashiinɛ li na. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. 12 Nɛ wo sipyii pee, Izirayɛli nagoo pee, nɛ na ba pee pye pu da ɲaari sanha ma ɲiŋɛ ki na Izirayɛli. Pu na ba bye ma ɲiŋɛ ki kafɛɛ. Ma na ba bye pu cɛn. Ma da ba pu nagoo pu gbuu nige wɛ.
13 «Yemu Kafɔɔ Tɛhɛnɛ Baa Kilɛ ya yu ge, yee yi wa mɛ. Pʼa yu na mu Izirayɛli fiige kʼa sipyii ɲuŋɔ tugoo, na mʼa ma fiige ki nagoo pu xuli, 14 lee wuu na ma da ba sipyii ɲuŋɔ tugoo nige wɛ, ma da ba ma fiige ki nagoo pu xuli nige wɛ. Kafɔɔ Tɛhɛnɛ Baa Kilɛ ɲɔjomɔ pi. 15 Nɛ da ba ma yaha mʼa fiiye yatii shɛɛn pu wo fanhara jomɔ pu nuri nige wɛ. Nɛ da ba fiiye yatii shɛɛn pu yaha pʼa shiige leni ma ɲaha ni nige wɛ. Ma da ga ma fiige ki sipyii pu ɲuŋɔ tugo nige wɛ. Kafɔɔ Tɛhɛnɛ Baa Kilɛ ɲɔjomɔ pi.»
Tɛhɛnɛ Baa Kilɛ na ba Izirayɛli kemɛ binnɛ, na wu pye fɛɛfɛɛ
16 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
17 «Tuun wemu ni Izirayɛli nagoo pu bye pu wo fiige ki ni ge, pʼa bi pu torogaguunɔ le, ni pu kapyeguuŋɔɔ ki taga fiige ki nɔhɔ. Pu torogana lʼa pu nɔhɔ nɛ ɲaha tàan ba cee shishan ma wu nɔhɔ mɛ wu lowuuyo yi tuun ni wɛ. 18 Lee wuu na nɛ na loyire li shan pu ɲuŋɔ ni, bani pʼa bi shishan wo fiige ki ni, na puyɛ nɔhɔ ni pu wo yapɛrɛɛ ki ni. 19 Nɛ pu caaga fiiye yatii shɛɛn pu tɛ ni, a pʼi jaaga kari fiiye yi bɛɛri ni. Nɛ kiiri wu kɔn pu na, na saha ni pu kodorogoo kee, ni pu kapyegee ki ni. 20 Fiiye yemu bɛɛri ni pʼa caaga kari ge, xuu bɛɛri ni pʼa nɔ ge, pʼa nɛ fɛfɛɛrɛ mɛgɛ ki nɔhɔ wà, bani pu bi ye yu ni pu ni na: ‹Tɛhɛnɛ Baa Kilɛ wo sipyii pu wa pii, Tɛhɛnɛ Baa Kilɛ wo fiige ki ni pʼa foro!› 21 A nɛ kasɛɛgɛ yaha na fɛfɛɛrɛ mɛgɛ ki na, kee kemu Izirayɛli nagoo pʼa nɔhɔni fiiye yatii shɛɛn pu tɛ ni ge.
22 «Lee wuu na dɛ, yi jo Izirayɛli puga ki mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye na: ‹Lemu nʼa da ba bye ge, lee wa da ba bye yee wuu na wɛ, Izirayɛli wo puga ke. Ga na wo fɛfɛɛrɛ mɛgɛ ki wuu na nʼa da ba lee pye, kee kemu yee wa shɛ nɔhɔni fiiye yatii shɛɛn pu tɛ ni ge. 23 Nɛ wo mɛgbɔhɔ kemu yee wa nɔhɔ fiiye yatii shɛɛn pu tɛ ni ge, nɛ na ba ki pye fɛɛfɛɛ, kee mɛgɛ kemu yee wa nɔhɔ pu tɛ ni ge. Nɛ ga ba na wo fɛfɛɛrɛ ti shɛ yee tɛ ni, fiiye yatii shɛɛn pu ɲii na, pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. Kafɔɔ Tɛhɛnɛ Baa Kilɛ ɲɔjomɔ pi. 24 Nɛ na ba yee lɔ na yeege fiiye yatii shɛɛn pu tɛ ni. Nɛ na ba yi kemɛ binnɛ na foro fiiye yi bɛɛri ni, na ba ni yi ni yi wo ɲiŋɛ ki na. 25 Nɛ na ba fɛfɛɛrɛ lɔhɔ ka ɲɛrɛgi ɲɛrɛgi yi na, na yi pye fɛɛfɛɛ, nɛ na ba yi pye fɛɛfɛɛ na foro yi wo nɔhɔmɔ pu bɛɛri, ni yi wo yapɛrɛɛ ki bɛɛri ni. 26 Nɛ na ba zɔ nivomɔ kan yi mu, na munaa nivoŋɔ le yi ni. Yi zɔlɔɔ pu pʼa waha ba faapinnɛ ɲɛ-ɛ ge, nɛ na ba pee wolo yi funyɔ ni, na zɔsaamaa le yi funyɔ ni. 27 Nɛ na ba na Munaa li le yi ni, na yi pye yi ma já na nɛ wo saliya wu koo ɲaari, na daha nɛ wo kodorogoo ki fɛni, na ki koo ɲaari. 28 Fiige kemu nɛ kan yi sefɛlɛɛ pu mu ge, yi na ba shɛ diin kee ni. Yi na ba bye nɛ wo sipyii, nɛ ma bye yi Kilɛ. 29 Nɛ na ba yi ɲuŋɔ wolo na foro yi wo nɔhɔmɔ pu bɛɛri ni. Nɛ na ba shinma yiri na pa yi mu, na wu pye wʼa ɲɛhɛ xuuni, di wa da ga kuugo yaha zhan yi ɲuŋɔ ni nige wɛ. 30 Nɛ na ba tiye yi yasɛyɛ yi pye yʼa ɲɛhɛ, na ɲiŋɛ ki faa yapyiire ti ɲɔ, kɔnhɔ xuugo ganha bu shiige le nige yi ɲahaya ni fiiye yatii shɛɛn pu tɛ ni wɛ. 31 Lee bu bye, yi funyɔ na ba do yi wo torogaguuŋɔɔ kee, ni yi wo kapyegee niguuŋɔɔ ki na. Yi wo nahama pe ni yi wo tanhaŋa keree ki na ba yi shiige, fo wa da já ɲuŋɔ yirige di wa wii wɛ. 32 Ga yee ya yaa na li cɛ na nɛ wa da ba lee pye yee wuu na wɛ, Kafɔɔ Tɛhɛnɛ Baa Kilɛ ɲɔjomɔ pi. Izirayɛli nagoo, yee wo kapyegee kʼa yaa na yee shiige fo na yi ɲuyɔ yi sogi!
33 «Yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nɛ ba yee pye fɛɛfɛɛ na foro yi wo tiibaara ti bɛɛri ni caŋa kemu, nɛ na ba guri sipyii leŋɛ yi kulogoo ki ni sanha, pʼa katahaya yi yereŋɛvonɔ yereŋɛ. 34 Ɲiŋɛ ki kʼa ɲɛri takoloŋɔ ge, pu na ba faa pyi kee na, ali ma li ta bɛ kʼa bi ɲɛri takoloŋɔ kodoroloo pu bɛɛri ɲaha tàan. 35 Pu na ba yu na: “Ke fiige ke ki bye takoloŋɔ ge, kee kʼa ɲɛri mɛ ba Edɛni tiire tɛgɛ ki ɲɛ wɛ. Ki kulogoo kiimu kʼa bi ja, na ki ɲɛri katahaya ni takoloyo ge, pʼa kee yereŋɛ na pye kashɛn ɲaha kɔn kɔn kulogoo, a sipyii di jé ki ni sanha!” 36 Wee tuun wu ni fiiye yemu na ba gori yee mahama pu ni ge, yee na ba li cɛ na kulogoo kiimu kʼa bi ja ja ge, na nɛ Tɛhɛnɛ Baa Kilɛ wʼa ki yereŋɛ, na tɛyɛ yemu yi bye takoloyo ge, na nɛ wʼa tiire nɔrɔgi yi ni. Nɛ Tɛhɛnɛ Baa Kilɛ ɲɔjomɔ pi, nɛ Tɛhɛnɛ Baa Kilɛ wʼa da ba lee pye.›
37 «Yemu Kafɔɔ Tɛhɛnɛ Baa Kilɛ wa yu ge, yee yi wa mɛ: ‹Nɛ na ba sɔɔ sanha na Izirayɛli nagoo pu wo ɲɛrɛgɛ ki logo, na kaa lemu pye pu mu ge, lee li wa mɛ jo nɛ na ba pu namaa pu ɲɛhɛ ba yatɔɔgbaha ɲɛ wɛ. 38 Kulogoo kiimu kʼa ja ja ge, nɛ na ba kee wo namaa pu ɲɛhɛ ba yatɔɔgbaha ɲɛ wɛ, ba Zheruzalɛmu kulo li ma ɲi mɛ saraga yatɔɔyɔ na kaleŋɛɛ tuun wu ni wɛ. Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »