Kilɛ tuduro na jo wá Edomu shɛɛn na
35
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, ma ɲaha ki ŋmahana ɲɛri Seyiri wo faaboboyo koomɔ pu yíri, mʼa Kilɛ tuduro jo wá pu na! 3 Yi jo pu mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye:
‹Nʼa da yìri mu Seyiri fɛni, faaboboyo yi koomɔ pe!
Nʼa da na keŋɛ ki yirige ma fɛni, di ma ɲɛri takoloŋɔ nidiige.
4 Nɛ na ba ma kulogoo ki ɲɛri katahaya, ma na ba ɲɛri takoloŋɔ.
Lee bu bye, ma na ba li cɛ na Tɛhɛnɛ Baa Kilɛ nɛ ɲɛ.
5 Bani Izirayɛli wo makɔŋɔ ki wa mu zɔ wu na gbee, bani mu ya ŋmɔpara taga pu gbo pu wo bɔɔngɔ ki caŋa, tuun wemu ni pu wo jurumu wʼa bi nɔ wu tɛhɛnɛ na ge. 6 Lee wuu na, nɛ ɲìi wo wu mɛgɛ ki wuu na (Kafɔɔ Tɛhɛnɛ Baa Kilɛ ɲɔjomɔ pi), gbuuro na ba gbo ma funŋɔ ni, ma da ba shɔ gbuuro na wɛ. Nakaara baa mʼa gbuuro gbo, lee na ma da ba shɔ gbuuro na wɛ. 7 Nɛ na ba Seyiri wo faaboboyo koomɔ pu ɲɛri takoloŋɔ nidiige, piimu pʼa se ki ni, na ma ge, nɛ na ba pee ɲuŋɔ tugo. 8 Nɛ na ba wu faaboboyo yi ɲi xuu na. Ŋmɔpara li wo xuu pu na ba dun yaŋaboboyo yi na, ni faaya yi tɛ fawegee ki ni ni duyo yi ni.
9 Nɛ na ba ma pye yaha takoloŋɔ fo gbee,
sipya da ba bye nige ma kulogoo ki ni wɛ.
Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.
10 Bani mu ya jo na: “Izirayɛli ni Zhuda, ye fiiye tɛhɛɛ shuun we na ba bye nɛ woyo, wèe pu da ba bye yi kafɛɛ.” Ma li ta bɛ, nɛ Tɛhɛnɛ Baa Kilɛ bye wà. 11 Lee wuu na, nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, ma wo makɔŋɔ ki funŋɔ ni, mu ya ɲɛpɛɛn taga loyire lemu kuuri pu na ge, lee ɲɛpɛɛn le shi, ni lee loyire le shi nɛ bɛ da ba guuri mu na. Lee shɛgana li na nʼa da ba nayɛ shɛ pu niŋɛ ni mu wo kiiri wu ni. 12 Lee funŋɔ ni ma da ba li cɛ na nɛ Tɛhɛnɛ Baa Kilɛ ya ma fanhara jomɔ pu bɛɛri logo, pee pemu mu ya jo na wá Izirayɛli wo faaboboyo yi na ge na: “Yʼa ɲɛri takoloyo, yʼa kan wèe mu wù yaligee!” 13 Yee ya yiyɛ pɛlɛ nɛ ɲaha tàan ni yi wo jomɔ pu ni, fanhara jomɔ yee ya jo na wá nɛ na, a nɛyɛ pyaa di yi logo.›
14 «Yemu Kafɔɔ Tɛhɛnɛ Baa Kilɛ ya jo ge, yee yi wa mɛ na: ‹Fiige ki bɛɛri ba funŋɔ taan tuun wemu ni, wee tuun wu ni nʼa da ma ɲɛri takoloŋɔ. 15 Izirayɛli wo puga kʼa ɲɛri takoloŋɔ ge, a mu di funŋɔ taan lee wuu na. Lee pyegana li na nʼa da ba mu bɛ pye, ma bɛ na ba ɲɛri takoloŋɔ, Seyiri wo faaboboyo koomɔ pe, ma ni Edomu bɛɛri ni. Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »