Kilɛ tuduro na jo wá Izirayɛli wo ɲuŋɔfɛɛ pu na
34
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, Kilɛ tuduro jo ma wá Izirayɛli wo yatɔɔnahamaa pu na! Kilɛ tuduro jo ma wá pu na, mʼa pu pye na yemu Kafɔɔ Tɛhɛnɛ Baa Kilɛ wa yu ge, na yee yi wa ye: ‹Yee piimu pu ɲɛ Izirayɛli wo yatɔɔnahamaa pu ge, bɔɔngɔ ki wa yee wogo. Yee jate ya nɔ watii na wɛ, fo yiyɛ pyaa! Ta yatɔɔnahamaa bɛ pʼa yaa na yatɔɔyɔ yi naha wɛ? 3 Yee wa yapɔrɔyɔ sìnmɛ woyo yi xaa, na dubyaa shiire fàya yi leni, na yatɔɔyɔ yi nijeye yi gbuu, na ta yee di ya ta kasɛɛgɛ yaha yatɔɔyɔ yi na wɛ. 4 Yatɔɔyɔ yemu wo fanha kʼa xɔ ge, yee ya ta yee tɛgɛ yʼi fanha ta wɛ. Yemu yʼa yá ge, yee ya ta yee wɛrɛ pye wɛ. Yemu yʼa lɔ ge, yee ya ta yee wo nɔɔyɔ yi pɔ wɛ. Yemu yʼa ɲaha tagi na se xuu watii ni ge, yee ya yee kuruŋɔ na ma wɛ. Yemu yʼa bɛnri ge, yee ya yee shaa na ma wɛ. Ga yee ya yi wo fanha ki digi yi na ni kafupege ni. 5 A yatɔɔyɔ yi jaaga nahavɔɔ baara na. A yʼi ɲɛri yacoyo yi bɛɛri wo xaara, a yʼi jaaga. 6 Nɛ wo yatɔɔgbaha ki wa na ɲaari yiyɛ ɲuŋɔ fɛni faaboboyo yi bɛɛri na, ni yaŋa bobotɔɔnyɔ yi bɛɛri na. Nɛ wo yatɔɔgbaha kʼa caaga fiige ki bɛɛri ni. Sipya wa shishiin ya kasɛɛgɛ yaha yi na wɛ. Sipya wa shishiin yʼa yi shaa wɛ.›
7 «Lee wuu na, yatɔɔnahamaa, yi ɲuwegee shan ni Tɛhɛnɛ Baa Kilɛ wo jomɔ pu ni! 8 Nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi. Nɛ wo yatɔɔgbaha ki ɲɔ ya mugi yaha yi covɛɛ pu mu. Nɛ wo yatɔɔgbaha kʼa ɲɛri yacoyo yi bɛɛri wo xaara, nahavɔɔ baara na. Nɛ wo yatɔɔnahamaa pu ya ta kasɛɛgɛ yaha nɛ wo yatɔɔgbaha ki na wɛ, bani nɛ wo yatɔɔnahamaa pu bi puyɛ kemɛɛ, na bye pu ya nɛ wo yatɔɔgbaha ki naha wɛ. 9 Lee wuu na, yatɔɔnahamaa yi ɲuwegee shan ni Tɛhɛnɛ Baa Kilɛ wo jomɔ pu ni! 10 Yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nʼa da yìri yatɔɔnahamaa pu fɛni! Nɛ na ba na yatɔɔyɔ yi yegeŋɛ pye pu na, nɛ da ba na yatɔɔyɔ yi yaha nige pu kacɛ na wɛ, kɔnhɔ pu ganha bu diin da puyɛ ɲɔ shaa yi ni wɛ. Nɛ na ba na wo yatɔɔgbaha ki wolo pu ɲɔyɔ yi ni, ki da bye nige xaara pu mu pʼa joni wɛ.›
11 «Bani yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nɛyɛ pyaa kʼa da ba shɛ na yatɔɔyɔ yi sha, na ba kasɛɛgɛ yaha yi na. 12 Ba yatɔɔnahama ma kasɛɛgɛ yaha mɛ wu yatɔɔyɔ yi na, na wu yaha yi tɛ ni wɛ, mu na nɛ bɛ wa da ba kasɛɛgɛ yaha na wo yatɔɔyɔ yi na. Tɛyɛ yemu bɛɛri ni yʼa caaga kari kapii caŋaa na ge, nɛ na ba shɛ yi sha wà, na ba yi pinnɛ xuu nigin ni. 13 Nɛ na ba yi yeege fiiye yatii shɛɛn pu tɛ ni, na yi kemɛ pinnɛ na yìri fiiye yi bɛɛri ni, na ba ni yi ni yi wo ɲiŋɛ ki na. Nɛ na ba yi naha Izirayɛli wo faaboboyo yi na, ni dugorogoo ki ni, ni fiige ki xuu wemu bɛɛri ni sipyii wa ge. 14 Nɛ na ba yi naha yatɔɔyɔ tanahaŋa nijeŋɛ ka ni. Izirayɛli wo faaboboyo yi ɲidegee ki na ba bye yi tamaraga. Yi na ba sinnɛɛ wà tasaaŋa ka ni, na naha tanahaŋa nijeŋɛ ka ni, Izirayɛli wo faaboboyo yi na. 15 Nɛ wʼa da ba na wo yatɔɔgbaha ki naha. Nɛ wʼa da ba na wo yatɔɔyɔ yi sinniŋɛ. Kafɔɔ Tɛhɛnɛ Baa Kilɛ ɲɔjomɔ pi. 16 Yemu yʼa piin ge, nɛ na zhɛ yee sha na pa. Yemu yʼa caaga ge, nɛ na zhɛ yee kuruŋɔ na pa. Yemu yʼa lɔ ge, nɛ na ba yee wo nɔɔyɔ yi pɔ. Yemu yʼa yá ge, nɛ na ba baraga le yee ni. Ga yemu yi ɲɛ sìnmɛ woyo, ni baraga woyo yi ge, nɛ na ba yee ɲuŋɔ tugo. Nɛ na ba yi naha ni tiimɛ ni.› »
Kilɛ ya wu wo sipyii pu tɛri
17 «Ayiwa, yee piimu pu ɲɛ nɛ wo yatɔɔgbaha ki ge, yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nɛ na ba na wo kiiri wu kɔn dubyaa ni dubyaa tɛ ni, na wu kɔn dubyapee ni sikapee tɛ ni. 18 Yee bu naha tanahaŋa nijeŋɛ ni, lee da yee funŋɔ ɲiŋɛ wɛ, fo yee bu shɛ ɲa kisaŋa tanhana tanhana yi tɔɔyɔ yi ni gɛ? Yee bu losaaŋa ta na gba, lee da yee funŋɔ ɲiŋɛ wɛ, fo yee bu shɛ kisaŋa buuri ni yi tɔɔyɔ ni gɛ? 19 Ɲà kemu yee ya tanhana tanhana yi tɔɔyɔ yi ni ge, nɛ wo yatɔɔyɔ ye yi da ba kee li. Lɔhɔ kemu yee ya buuri ni tɔɔyɔ ni ge, nɛ wo yatɔɔyɔ ye yi da ba kee gba.›
20 «Lee wuu na, yemu Kafɔɔ Tɛhɛnɛ Baa Kilɛ ya yu pu mu ge, yee yi wa mɛ na: ‹Nɛyɛ pyaa kʼa da ba kiiri wu kɔn dubya nagaya ye ni dubyawaara ti tɛ ni. 21 Bani yee piimu pu ɲɛ dubya nagaya yi ge, yee ya yi gbodiye ni yi kapaya taga na dubyawaara ti bɛɛri ŋmunuŋɔ, na yeŋɛɛ taga na ti suu, fo na ti bɛɛri niinɛ caaga. 22 Lee wuu na nʼa da ba na yatɔɔgbaha ki ɲuŋɔ wolo, kɔnhɔ pu ganha ba pu coni nige wɛ. Nɛ na ba kiiri kɔn dubyaa pee ni puyɛ tɛ ni. 23 Nɛ na ba yatɔɔnahama nigin taha yi na, wee di da yi naha. Wee ɲɛ Dawuda, nɛ wo kapyebye we, wee wu da ba yi naha, wee wu da ba bye yatɔɔnahama we. 24 Nɛ Tɛhɛnɛ Baa Kilɛ na ba bye pu Kilɛ, na kapyebye Dawuda ma bye pu ɲuŋɔfɔɔ. Nɛ Tɛhɛnɛ Baa Kilɛ, nɛ wo ɲɔjomɔ pu wa. 25 Nɛ na ba ɲaɲiŋɛ wo kariɲɛɛgɛ ɲɔmɛɛ lɔ ni pu ni, na yacoyo yi ɲuŋɔ tugo na yeege fiige ki ni. Pu ɲaɲiŋɛ wuu na ba bye siwaga ki ni, na shuun tahaya yi ni. 26 Nɛ na ba baraga le pu ni, na baraga le na faaboboŋɔ ki wo mahama pu ni. Nɛ na ba zanhaya yi shaan yi shanduun ni, yi na ba bye baraga wo zanhaya. 27 Tiye yi na ba nagoo pyi, ɲiŋɛ ki faa yapyiire ti na ganha na ɲɔgi. Pu ɲaɲiŋɛ wuu na ba bye pu ɲiŋɛ ki na. Nʼa da ba pu zhuloo pu wo pɔɔrɔ ti kɔn, di pu wolo pu ɲaavɛɛ pu keŋɛ ni, pee piimu mu pʼa bulooro ti pyi ge. Lee bu bye, pu na li cɛ na Tɛhɛnɛ Baa Kilɛ nɛ ɲɛ. 28 Fiiye yatii shɛɛn da da ma da pu yaŋmuyɔ yi kori nige wɛ. Sige ki wo yacoyo yi da da pu coni nige wɛ. Pu ɲaɲiŋɛ wuu na ba bye, sipya wa shishiin da ba pu ɲaha wɛrɛŋɛ nige wɛ. 29 Nɛ na ba faa ɲiŋɛ kan pu mu, kemu mɛgɛ ya foro ki yapyiire nizaara ti wuu na ge. Xuugo da ga ba jé nige pu fiige ki ni wɛ, fiiye yatii shɛɛn bɛ di wa da ga ba pu shɛhɛlɛ nige wɛ. 30 Lee bu bye, pu na ba li cɛ na nɛ Tɛhɛnɛ Baa Kilɛ, pu wo Kilɛ we, na nɛ wa ni pu ni, na nɛ wo sipyii pu ɲɛ pii, Izirayɛli wo puga ke. Kafɔɔ Tɛhɛnɛ Baa Kilɛ ɲɔjomɔ pi. 31 Yee piimu pu ɲɛ nɛ wo yatɔɔgbaha ki ge, kee yatɔɔgbaha kemu nɛ naha ge, sipyiyawyegee yee ɲɛ, nɛ di ɲɛ yi Kilɛ. Kafɔɔ Tɛhɛnɛ Baa Kilɛ ɲɔjomɔ pi.› »