Kilɛ ya Ezekiyɛli pye kasɛɛgɛ pyevɔɔ
33
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, jo ni ma shi shɛɛn pu ni! Yi jo pu mu na: ‹Nɛ bu ŋmɔpara yaha shɛ fiige ka fɛni, a kee fiige ki wo sipyii pʼi ná wa shɔɔnri lɔ puyɛ tɛ ni, na wee pye kasɛɛgɛ pyevɔɔ, 3 wee ná wu bu ŋmɔpara li ɲa li na ma fiige ki fɛni, na maga ki wi, na sipyiire ti kaala, 4 wemu bu maga ki mɛɛ li logo, wu di ya ta li yaha kaa wɛ, ŋmɔpara li bu ba wu gbo, wu shishan pu na do wuyɛ pyaa ki ɲuŋɔ ni. 5 Wʼa maga ki mɛɛ li logo, ga wu di ya ta li yaha kaa wɛ. Wu shishan pu na do wuyɛ pyaa ki ɲuŋɔ ni. Wemu bu li yaha see kaa, wee na wu wo munaa li ɲuŋɔ wolo. 6 Kasɛɛgɛ pyevɔɔ wu bu ŋmɔpara li ɲa li na ma, na bye wu ya ta maga ki wi wɛ, wu bye wu di ya sipyiire ti kaala wɛ, ŋmɔpara li bu ba sipya wa gbo, wufɔɔ wo nahama pʼa wee xu wu nɔ wu na, ga wu shishan pu pi ge, nɛ na ba pee foo yege kasɛɛgɛ pyevɔɔ wu na.
7 « ‹Ayiwa, mu sipyiyawyii, nɛ mu teŋɛ na pye Izirayɛli puga ki wo kasɛɛgɛ pyevɔɔ. Ta na ɲɔjomɔ pu nuri, ma da se mʼa pu kaala na mɛgɛ na. 8 Nɛ ba sipyikuuŋɔ pye: “Sipyikuuŋɔ, ma da ba xhu!” ma bye ma di ya shɛ jo, na sipyikuuŋɔ ki kaala ki kooguunɔ li na wɛ, kee sipyikuuŋɔ ke na ba xhu ki wo nahama pu ni, ga wu shishan pu pi ge, nɛ na ba pee foo yege ma na. 9 Ga ma bu sipyikuuŋɔ ki kooguunɔ li kaa taga ki kaala, a kʼi pye ki ya kuri kadugo, na ki kooguunɔ li ɲɔ yaha wɛ, ki na ba xhu ki nahama pu ni, mu na ma wo munaa li ɲuŋɔ wolo.› »
Sipyikuuŋɔ kemu bu guri pa Kilɛ mu, kee na zhɔ
10 «Ayiwa, sipyiyawyii, yi jo Izirayɛli puga ki mu na: ‹Yee wa yu na: “Wèe wo saliya kyɛɛgɛrɛ te ni wèe wo jurumu wu wa wèe ɲuŋɔ ni, lee li wa bɔɔngɔ nɔni wèe na. Wèe na bye dii na ɲiifɛɛrɛ pye wɛ?” 11 Yi jo pu mu na nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, sipyikuuŋɔ wo xu wu ɲɛ nɛ ɲidaan wɛ. Ga wu wu ɲaarigana li faa, kɔnhɔ wu ɲiifɛɛrɛ pye! Yi kuri kadugo, yi kuri kadugo, yʼi yi koguuŋɔɔ ki yaha. Ɲaha na yʼi wa zhaa da xhuli wɛ, Izirayɛli wo puga ke?› »
12 « ‹Sipyiyawyii, yi jo ma wo sipyii pu mu na: ‹Sipya wemu wʼa tii ge, wee ba saliya kyɛɛgi caŋa kemu, wu tiimɛ pu wa da wu shɔ kee caŋa wɛ. Sipyikuuŋɔ bɛ bu ki wo kooguunɔ li yaha caŋa kemu, wu kuumɔ pu wa da já wu ɲuŋɔ tugo kee caŋa wɛ. Sipya wemu wʼa tii ge, wee wo tiimɛ pu wa da já wu pye ɲiifɛɛrɛ fɔɔ wu jurumu wu cabyege wɛ. 13 Sipya wemu wʼa tii ge, nɛ bu wee pye: “Nakaara baa ma na ba ɲiifɛɛrɛ pye.” Wu bu wu tiimɛ pu pye wu tadaŋa, na ganha na tiibaara pyi, lemu bɛɛri wʼa pye tiimɛ pu funŋɔ ni ge, lee dʼa jate wɛ, bani wʼa tiibaara pye, wu na xhuu. 14 Nɛ bu sipyikuuŋɔ pye: “Nakaara baa ma da ba xhu.” Ki bu ki kooguunɔ li yaha, na ganha na tiimɛ ni tifire koo ɲaari, 15 yaaga kemu ya tiimɛ wu mu ge, wu bu kee tɛrɛŋɛ, kelee yaaga kemu wʼa yu ge, wu bu kee tɛrɛŋɛ, Kilɛ wo saliya wemu wʼa ɲiifɛɛrɛ kaan ge, wu ba wee koo ɲaari, na tiibaara ti yaha, wu da xhuu wɛ, ga nakaara baa wu na ɲiifɛɛrɛ pye. 16 Jurumu wemu bɛɛri wʼa pye toro ge, sipya funŋɔ da do ni wee wa shishiin ni wɛ. Wʼa tiimɛ pe ni tifire koo ɲaari, wu na ba ɲiifɛɛrɛ pye.
17 « ‹Ma shi shɛɛn pu wa na yu na: “Tɛhɛnɛ Baa Kilɛ wo korogoo ki ya ta saha wɛ.” Ga pee wo korogoo kii ki wa ki ya saha wɛ. 18 Sipya wemu wʼa tii ge, wee bu tiimɛ pu koo li yaha, na ganha na tiibaara pyi, wu na xhuu lee wuu na. 19 Sipyikuuŋɔ bu ki wo koo niguunɔ li yaha, na ganha na tiimɛ ni tifire keree pyi, wu na ɲiifɛɛrɛ pye lee wuu na. 20 Yee wa yu na Tɛhɛnɛ Baa Kilɛ wo korogoo ki ya saha wɛ. Izirayɛli wo puga ke, nɛ na ba yee wa bɛɛri wo kiiri wu kɔn na saha ni wu kodorogoo ki ni!
Izirayɛli ɲuŋɔ na ba dugo
21 Ayiwa, wèe ya co kari, li yee kɛ ni shuun wuu li wo yeŋɛ kɛ wogo ki cabyaa kaguro wu na, a Zheruzalɛmu shɛn wa di mɔɔri shɔ, na ba nɔ nɛ na kee caŋa ke, na nɛ pye «Pʼa kulo li co!» 22 Caŋa kemu wo ɲimuguro na ná wʼa pa ge, lee bi Tɛhɛnɛ Baa Kilɛ ta wʼa wu keŋɛ ki taha nɛ na kee caŋa ki wo yakoŋɔ ki ni, na nɛ ɲɔ ki mugi. Ná wʼa jo wʼa nɔ nɛ na ɲimuguro ti ɲisɔɔgɔ ki na tuun wemu ni ge, lee bi nɛ ɲɔ ki ta kʼa mugi, nɛ bye nige bobo wɛ.
23 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
24 «Sipyiyawyii, piimu pʼa tiin Izirayɛli wo katapiye yi ni ge, pee wa yu na: ‹Wu yɛ nigin Ibirayima bye, ga lee bɛ na a pʼi fiige ki kafɛɛrɛ kan wu mu, ayiwa, wèe piimu pʼa ɲɛhɛ ge, fiige ki kafɛɛrɛ ya kan wèe bɛ mu nimɛ!› 25 Lee wuu na, yi jo pu mu na yemu Kafɔɔ Tɛhɛnɛ Baa Kilɛ wʼa yu ge, na yee yi wa mɛ na: ‹Yee wa xaara xaa ni ti shishan ni, yee wa yapɛrɛɛ kaan, yee wa gbuuro pyi, yee ma já fiige ki kafɛɛrɛ ta tagana lekɛ na wɛ? 26 Yee wa yi wo ŋmɔparaa ki pye yi tadaya, na tanhaŋa keree pyi. Yee bɛɛri nigin nigin wa sinnɛɛ ni yi sipyiɲii cèe ni. Fiige ki ma já pye yee wogo pyegana lekɛ na wɛ?› 27 Yi jo pu mu na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: ‹Nɛ ɲìi wo wu mɛgɛ ki wuu na, nakaara wa li ni wɛ, piimu pu wa katapiye yi ni ge, ŋmɔpara na ba pee gbo. Piimu pu wa sige ki ni ge, nɛ na ba pee kan yacoyo yi mu yi wo yalige. Piimu pu wa yaŋa wegeye ye, ni faaga wegeye yi ni ge, kafɛɛgɛ yama na ba pee gbo. 28 Nɛ na ba fiige ki ɲɛri na pye takoloŋɔ nidiige. Baraga kemu ki bi tabaara ti leni pu ni ge, nɛ na ba kee xɔ. Izirayɛli wo faaboboyo yi na ba ɲɛri takoloyo, fo sipya bɛ da ba doroo wà nige wɛ. 29 Tanhaŋa keree kiimu pʼa pye ge, nɛ ba fiige ki ɲɛri takoloŋɔ nidiige kee tanhaŋa keree ki wuu na, pu na ba li cɛ lee funŋɔ ni na nɛ Tɛhɛnɛ Baa Kilɛ nɛ ɲɛ.
30 «Mu wi ge, sipyiyawyii, ma shi shɛɛn pu wa ma kaa yu pu kasɔrɔyɔ yi fɛrɛɛ ni, ni pu piyɛyɛ yi kuɲɔgɔɔ ki ɲɔ na. Pu ma ma la wo, na yi yu puyɛ mu na: ‹Yi pa ɲuwegee shan sa, jomɔ pe pʼa yìri Tɛhɛnɛ Baa Kilɛ yíri ge, wù pee logo!› 31 Pu niɲɛhɛmɛɛ ma ba binnɛ ma tàan, nɛ wo sipyii pu ma ba diin ma tàan. Pu ma mu jomɔ pu logo, ga pu di da da pu koo ɲaari wɛ. Ɲɔtanga jomɔ pʼa foro pu ɲɔyɔ ni, na ta pu zɔlɔɔ pu dʼa ɲi tinbaara keree na. 32 Mu ya ɲɛri pu mu ba cii ɲɛ wɛ, wemu mɛɛ lʼa taan wu yatinŋɛ ki bɛ dʼa taan ge. Pʼa ma jomɔ pu nuri, ga pu di ya pu koo ɲaari wɛ.
33 «Lee wuu na jomɔ pemu mu ya yu pu mu ge, pee ba ɲɔ kɔn na fani na foro tuun wemu ni, nakaara baa pu na ba fa voro! Pu na ba li cɛ wee tuun wu ni na Kilɛ tudunmɔ bye pee tɛ ni.»