Yamɛɛ Farawɔn ni Misira fiige ki ɲuŋɔ ni
32
Ayiwa, yee kɛ ni shuun wuu li wo yeŋɛ kɛ ni shuun wogo ki wo cazhiige ke, a Tɛhɛnɛ Baa Kilɛ wo jomɔ pʼi nɔ nɛ na na pye:2 «Sipyiyawyii, yamɛɛ le mʼa suu Farawɔn na, Misira fiige ki saan we! Mʼa wu pye na:
‹Mu bi bye fiiye yatii shɛɛn pu tɛ ni
ba cɛnripepinŋɛ ɲɛ wɛ,
mu bi bye ba suumɔ lɔhɔ yakanhaŋa ɲɛ wɛ.
Mu bi ma gbalaa pu lɔhɔyɔ yi cɛnrɛɛ.
Mu bi ma lɔhɔyɔ yi duuri
ni ma tɔɔyɔ yi ni,
mu bi lɔhɔyɔ yi tinni.›
3 «Yemu Tɛhɛnɛ Baa Kilɛ ya jo ge, yee yi wa mɛ na:
‹Nɛ na ba na jɔ̀ wu wá ma na
sipyiire niɲɛhɛrɛ ta wo cabinnɛgɛ,
pee na nɛ wo saan ki taga
ma kile yeege.
4 Nɛ na ba ma yaha ɲiŋɛ ki na,
nɛ na ba ma wá sige ki ni.
Fugba shazhɛɛrɛ ti bɛɛri na ba ma
na dun ma na.
Ɲiŋɛ ki bɛɛri naŋa yaaya yi na ba din
ma xaara ti na.
5 Nɛ na ba ma xaara ti taha
faaboboyo yi na,
na faaya yi tɛ fawegee ki ɲi
ma xaɲahara ti na.
6 Nɛ na ba ma shishan pu taga ɲiŋɛ ki gba.
Pu na ba fúu faaboboyo yi na.
Dugorogoo ki na ba ɲi
ma shishan pu na.
7 Mu ba fugi tuun wemu ni,
nɛ na ba fanfanga taga fugba wu tɔ,
na nibiige leŋɛ wɔrɔɔ ki ni.
Nɛ na ba ɲahaŋa taga caŋa ki tɔ,
yeŋɛ ke di wa da kpɛɛngɛ kan nige wɛ.
8 Nɛ na ba nibiige leŋɛ
fugba wu kpɛɛnyegeye yi bɛɛri ni
mu wuu na.
Nɛ na ba nibiige leŋɛ ma fiige ki ni.
Kafɔɔ Tɛhɛnɛ Baa Kilɛ ɲɔjomɔ pi.›
9 «Nɛ ba mu wo bɔɔngɔ ki keree jo tuun wemu ni fiiye yatii shɛɛn pu mu, fiiye yemu yi ɲɛ ma ya yi cɛ-ɛ ge, nɛ na ba funyaŋa wá shi niɲɛhɛmɛ na. 10 Nɛ na ba shi niɲɛhɛmɛ wo jaalaa yirige mu wuu na, pu saannaa pu na fya fo xuuni, nɛ ba na ŋmɔpara li wá pu ɲaha na tuun wemu ni. Wa bɛɛri na ba jɛlɛ tuun bɛɛri ni, wu munaa wuu na ma cadogo ke.
11 «Bani yemu Tɛhɛnɛ Baa Kilɛ ya jo ge, yee yi wa mɛ na: ‹Babilɔni saan wu wo ŋmɔpara li na ba ma ta.
12 Nɛ na ba ma sipyiɲɛhɛnɛ li gbo
ni kashɛnŋmuu pii wo ŋmɔparaa ni,
pee piimu pu ɲɛ fiiye yatii shɛɛn
pu bɛɛri wo kafupege fɛɛ pu ge.
Pu na ba Misira fiige ki wo tabaara ti xɔ,
na wu sipyiɲɛhɛnɛ li bɛɛri ɲuŋɔ tugo.
13 Nɛ na ba wu yapɔrɔyɔ yi bɛɛri gbo
wu logbɔhɔyɔ yi ɲɔ ki na.
Sipya tɔɔgɔ wa da ga yee buuri nige wɛ.
Yapɔrɔgɔ fereŋɛ wa da ga yi buuri nige wɛ.
14 Nɛ na ba Misira fiige ki lɔhɔyɔ
yi ɲaha pye kʼa ɲiŋɛ wee tuun wu ni,
na wu gbalaa pu lɔhɔyɔ yi pye
yi na fúu ɲaɲiŋɛ na ba sìnmɛ ɲɛ wɛ.
Kafɔɔ Tɛhɛnɛ Baa Kilɛ ɲɔjomɔ pi.
15 Nɛ ba Misira fiige ki ɲɛri
takoloŋɔ tuun wemu ni,
na ki funŋɔ yaŋmuyɔ yi bɛɛri kuu na yeege,
na ki sipyii pu bɛɛri gbo,
wee tuun wu ni pu da ba li cɛ
na nɛ wu ɲɛ Tɛhɛnɛ Baa Kilɛ we!› »
16 «Ayiwa, yamɛɛ li wa le, shi wu bɛɛri wo cèe pu na ba lemu suu Misira fiige ke, ni ki sipyiɲɛhɛnɛ li na ge. Kafɔɔ Tɛhɛnɛ Baa Kilɛ ɲɔjomɔ pi.»
Tataara yogo kabanuyo yi wo shi shɛɛn pu keree na
17 Ayiwa, yee kɛ ni shuun wuu li wo yeŋɛ ki cabyaa kɛ ni kaguro wu na, a Tɛhɛnɛ Baa Kilɛ wo jomɔ pʼi nɔ nɛ na na nɛ pye:
18 «Sipyiyawyii, ta zhiin Misira fiige ki wo sipyiɲɛhɛnɛ li wuu na.
Mʼa pu tirige ɲiŋɛ ki nɔhɔdaan,
xuu pu wo tatigiŋɛ ki ni,
pu ni fiiye nizaaya yi wo pushaa pee!
19 Yi jo pu mu na:
‹Ta yee pʼa pɔrɔ na ye shi wusama na ya?
Yi bɛ pu tigi shɛ sinnɛ
ni cekɔnbaalaa pu ni ɲiŋɛ ki nɔhɔdaan.›
20 Pu na ba do na xhu
ni kashɛn ŋmɔpara li wo xuu pu ni.
Ŋmɔpara lʼa foro li koofogo ki ni.
Lʼa Misira ni wu sipyiɲɛhɛnɛ li bɛɛri gbo!
21 Kashɛn naŋmaya ni Misira wo
kariɲii piimu pu ɲɛ xuu kulo ni ge,
pee na ba wu pyi na:
‹Pʼa tigi na shɛ sinnɛ ni wèe ni,
pʼi cekɔnbaalaa piiri,
pee piimu ŋmɔpara lʼa gbo ge.›
22 Asiri fiige ki ni ki kashɛnŋmuu pu wa wà.
Wu kashɛnŋmuu pu wo faya yʼa wu kuuri,
pee piimu bɛɛri ŋmɔpara lʼa gbo ge.
23 Pee faya yi wa fo ɲiŋɛ ki nɔhɔdaan wu ni.
Kashɛnŋmuu pu wo faya
yʼa saan wu wogo ki kuuri.
Pu bɛɛri pʼa to,
ŋmɔpara lʼa pu gbo.
Pee piimu pu bi
ɲiŋɛ ki sipyii pu jaalaa pu yirige
koŋɔ puga funŋɔ ni ge.
24 Elamu wo saan we
ni wu wo sipyiɲɛhɛnɛ li wa wà.
Wu kashɛnŋmuu pu wo faya
yʼa wu wogo ki kuuri.
Pu bɛɛri pʼa to, ŋmɔpara lʼa pu gbo.
Pee cekɔnbaalaa pii bɛɛri ya tigi kari
ɲiŋɛ ki nɔhɔdaan wu ni,
pee piimu pu bi
ɲiŋɛ ki sipyii pu jaalaa pu yirige
koŋɔ puga funŋɔ ni ge.
Pʼa shiige tagi pu ɲuŋɔ ni,
pu ni ɲiŋɛ ki nɔhɔdaan wuu pu ni.
25 Pʼa tasinnɛgɛ kan Elamu saan wu mu
sipyixuyo yi tɛ wu ni,
wu ni wu kashɛnŋmuu pu ni.
Wu kashɛnŋmuu pu wo faya
yʼa wu wogo ki kuuri.
Ŋmɔpara lʼa
pii cekɔnbaalaa pii bɛɛri gbo,
pee piimu pu bi
ɲiŋɛ ki sipyii pu jaalaa pu yirige
koŋɔ puga funŋɔ ni ge.
Pʼa shiige tagi pu ɲuŋɔ ni,
pu ni ɲiŋɛ ki nɔhɔdaan wuu pu ni.
Pu nixhuyo yi wa xuu pusamaa tɛ wu ni.
26 Mɛshɛki ni Tubali wo saannaa pee
ni pu sipyiɲɛhɛnɛ li wa wà.
Pu kashɛnŋmuu pu wo faya
yʼa pu woyo yi kuuri.
Ŋmɔpara lʼa pii cekɔnbaalaa pii bɛɛri gbo,
bani pu bi fyaara leŋɛɛ
sipyii pu ni koŋɔ puga funŋɔ ni.
27 Pu ya ta pu le
ni taashiinɛ li wo kashɛn naŋmaya yi ni wɛ,
pee cekɔnbaalaa piimu pʼa to ge.
Pu bi pee kashɛnŋmuu piiri
ni pu kashɛn yagboyo yi leni pu faya yi ni.
Pu bi ma pee wo ŋmɔparaa ki yaha
pu ɲuyɔ yi tàan.
Ga na pu wo nahama pu taha
pu kaciiye yi ɲuŋɔ ni,
bani yee kashɛn naŋmaya ye bi fyaara leŋɛɛ
sipyii pu ni koŋɔ puga funŋɔ ni.
28 Mu Farawɔn bɛ,
mu bɛ ya xu ni cekɔnbaalaa pu ni,
na shɛ sinnɛ ni ŋmɔpara li wo xuu pu ni!
29 «Edomu bɛ wa wà ni wu saannaa pee, ni wu ɲuŋɔfɛɛ pu bɛɛri ni. Pu ni pu nara ti bɛ ni, pʼa le faya ni ni ŋmɔpara li wo xuu pu ni. Pee bɛ ya shɛ sinnɛ ni cekɔnbaalaa pu ni, ni piimu pʼa tigi jé faya yi ni ge. 30 Suumɔ kulo kacɛ ki wo ɲuŋɔfɛɛ pu bɛɛri, ni Sidɔn shɛɛn pu bɛɛri wa wà, pʼa tigi kari ni xuu pu ni. Kashɛn naŋmaya yi bye yʼi fo yemu wo keree ya sipyii jaalaa yirige ge. Ga nimɛ, pee cekɔnbaalaa pii shiige wuu ya shɛ sinnɛ ni ŋmɔpara li wo xuu pu ni. Shiige ki wa pu taa, pu ni piimu bɛɛri pʼa tigi ɲiŋɛ ki nɔhɔdaan ge.
31 «Farawɔn ba pee ɲa, la na voro wu kashɛnŋmuu pu nixhuyo yi wo funyaŋa ki ni, wee wemu ŋmɔpara lʼa gbo ni wu kashɛnŋmuu pu ni ge. Kafɔɔ Tɛhɛnɛ Baa Kilɛ ɲɔjomɔ pi.
32 «Nɛ wu yaha wʼa sipyiire ti jaalaa pu yirige koŋɔ puga funŋɔ ni. Ga wu ni wu kashɛnŋmuu pu ni, pu na ba pu sinniŋɛ cekɔnbaalaa pu tɛ ni, ni ŋmɔpara li wo xuu pu ni. Kafɔɔ Tɛhɛnɛ Baa Kilɛ ɲɔjomɔ pi.»