Sɛdiri tige ki wo talenɛ le
31
Ayiwa, yee kɛ ni nigin wuu li wo yeŋɛ taanri wogo ki wo cazhiige ke, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, yi jo Farawɔn mu, Misira fiige ki saan we, wu ni wu sipyiɲɛhɛnɛ li ni na:
‹Ma ni jɔgɔ wu dʼa taanna wɛ,
mu wemu wo sefɛɛrɛ ti tʼa pɛlɛ gɛ?
3 Asiri fiige ki bi bye
ba Liban fiige ki wo sɛdiri tige ka ɲɛ wɛ.
Ki geye yi foromɔ bi ɲɔ xuuni,
ki ɲimɛ pu dʼa tɔ, ki dʼa tɔnnɔ.
Ki ɲidii li bi kari fo fugba ɲahaya ye.
4 Lɔhɔyɔ yi bi ki pye ki na lɛgi,
ɲiŋɛ ki nɔhɔdaan lɔhɔyɔ yʼa ki pye ki na dɔɔngi.
Kee bi ki gba keye yi torogo ki mahama pu ni,
na ki loguuyo yi yaha nɔ sige ki tiye yi bɛɛri na.
5 Lee lʼa ki ɲidii li pye lʼa tɔnnɔ
na ye sige ki tiye yi bɛɛri na.
A ki geye yʼi ɲɛhɛ, a ki geye nibya wu jaaga.
Ki bi lɔhɔ taa na foro logbɔhɔyɔ yi ni.
6 Fugba shazhɛɛrɛ ti bɛɛri bi ma
na ti shiire tɛri ki geye yi na.
Naŋa yaaya yi bɛɛri bi ma
na yi nagoo seni ki geye yi nɔhɔ ni.
Fiiye yatii shɛɛn wo sipyiɲɛhɛnɛ li bɛɛri di ma
na dɛn ki ɲimɛ pu ni.
7 Ki bi sii ɲɔ, ki bi tɔnnɔ, a ki geye yi jaaga,
bani ki niyɛ yi bi tigi jé logbɔhɔyɔ yi ni.
8 Kilɛ wo tiire tɛgɛ ki wo sɛdiri tige ka bi ki xɔ wɛ,
Sipɛrɛ tiye yi geye yi bi ki wo geye yi xɔ wɛ.
Pilatani tiye yi wo geye yi bi ki woyo yi xɔ wɛ.
Kilɛ wo tiire tɛgɛ ki wo tige ka shishiin bi ki xɔ saana ni wɛ.
9 Nɛ bi ki geye yi ɲɛhɛ wu pye ki saana,
a ki ɲɛpɛɛn di jé Edɛni wo tiire ti bɛɛri ni,
Kilɛ wo tiire tɛgɛ ki tiire ti bɛɛri.
10 «Lee wuu na, yemu Kafɔɔ Tɛhɛnɛ Baa Kilɛ wʼa yu ge, yee yi wa mɛ na: ‹Ki ɲubile li bi tɔnnɔ. Ki ɲidii li bi nɔni fugba ɲahaya yi na, a ki tɔɔngɔ kʼi tabaara leŋɛ ki ni. 11 Lee wuu na nɛ ki le fiiye yatii shɛɛn wo sefɔɔ wu keŋɛ ni, wee di ba wu wo kuumɔ pu foo tɔ wu mu. Nɛ ki kɔri wá. 12 Nabuun piimu wo kafugo kʼa pɛlɛ na ye ge, pee ya ki kɔn, na kadugo le ki ni. A ki geye yʼi do do faaboboyo ye, ni fadaaŋaa ki na. A ki geye nibya wu gɛgi gɛgi fiige ki dugorogoo ki bɛɛri ni. A ɲiŋɛ ki sipyii pu bɛɛri di foro ki ɲimɛ pu ni, na ki yaha wá.
13 A fugba shazhɛɛrɛ ti bɛɛri di ba
na pa do ki geye nigɔnyɔ yi na.
A naŋa yaaya yi bɛɛri di ba
ki geye nibya wu pye yi tasinnɛyɛ.
14 «Lee ya pye mu, kɔnhɔ tige kemu bɛɛri kʼa lɔhɔ taa xuuni ge, kee ka shishiin ganha ga kiyɛ durogo, fo di zhɛ nɔ ɲahaya ye na, lee di tabaara leŋɛ ki ni wɛ. Bani tiye bɛɛri yi da ba xhu ba sipyiyawyii ɲɛ wɛ. Pu bɛɛri pu da ba digi ɲiŋɛ ke nɔhɔdaan. Pii pʼa sinnɛ wà ge, na shɛ binnɛ ni pee ni.
15 «Yemu Kafɔɔ Tɛhɛnɛ Baa Kilɛ wʼa yu ge, yee yi wa mɛ na: ‹Caŋa kemu sɛdiri tige kʼa tigi jé xuu kulo ni ge, a nɛ koŋɔ ki bɛɛri yaha yamɛɛ na. A nɛ ɲiŋɛ ki nɔhɔdaan lɔhɔyɔ yi tɔ ki wuu na, na gbalaa pu wo lɔhɔyɔ yi yereŋɛ, na logbɔhɔyɔ yi co yereŋɛ. A nɛ nibiige leŋɛ Liban faaboboyo yi ni ki wuu na, a sige ki tiye yi bɛɛri di waha ki wuu na. 16 Piimu pʼa diri na se kakara wege ki ni ge, tuun wemu ni nɛ ki pye kʼa tigi kari xuu kulo ni ni pee ni shiizhan ge, a nɛ fiiye yatii shɛɛn pu pye pʼa cɛlɛ ki to to tunmɔ pu na. Tiire temu bɛɛri ti ɲɛ Edɛni wo tiire tɛgɛ ki ni ɲiŋɛ ki nɔhɔdaan wu ni ge, ni Liban wo tiye yi bɛɛri wo nizaaya, ni yi nijeye ye, yee yemu bɛɛri yʼa lɔhɔ taa xuuni ge, a yi bɛɛri logoo di ɲiŋɛ. 17 Fiiye yatii shɛɛn piimu bɛɛri pu bi dɛgɛ kaan ki mu, na dɛn ki ɲimɛ pu ni ge, a pee bɛ di binnɛ tigi kari ni ki ni xuu kulo ni, ŋmɔpara li wo xuu pu yíri.
18 « ‹Edɛni tiire tɛgɛ ki wo tige ka shishiin bi ma xɔ nɔɔrɔ ni tɔɔngɔ ni wɛ. Lee bɛ ni li wuu ni, ma ni Edɛni tiye yi na ba digi ɲiŋɛ ki nɔhɔdaan. Ma na ba shɛ sinnɛ wà cekɔnbaalaa tɛ ni, ni ŋmɔpara li wo xuu pu ni. Mu na Farawɔn ni wu sipyiɲɛhɛnɛ lʼa da ba bye! Kafɔɔ Tɛhɛnɛ Baa Kilɛ ɲɔjomɔ pi.› »