Kafɔɔ wo caŋa kʼa nɔ Misira fiige ki shizhaa na
30
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, Kilɛ tuduro jo!
Yi jo na yemu Kafɔɔ Tɛhɛnɛ Baa Kilɛ ya jo ge,
na yee yi wa mɛ na:
‹Yʼa sipyaa waa
kee bɔɔngɔ caŋa ki wuu na!
3 Bani kee caŋa kʼa tɛɛŋɛ,
Tɛhɛnɛ Baa Kilɛ wo caŋa kʼa tɛɛŋɛ.
Nibiige caŋa ki ɲɛ kii,
fiiye yatii shɛɛn pu wo kiiri caŋa ki ɲɛ kii.
4 Ŋmɔpara na ba jé Misira fiige ki ni.
Sipyixuyo yi ba ɲɔ kɔn na dun
Misira fiige ki ni tuun wemu ni,
Pu ba Misira fiige ki naafuu wu kuu,
na fiige ki ja fo ki serege ke,
kanhama pu na ba nɔ
Kushi fiige ki bɛ na.
5 Kushi fiige ki shɛɛn pee,
ni Puti shi shɛɛn pee,
ni Ludi shi shɛɛn pee,
ni Arabuu wo fiige ke,
ni Libi fiige ki shɛɛn pee,
ni kariɲɛɛgɛ ɲɔmɛɛ li wo sipyii pii bɛ,
ŋmɔpara na ba pee bɛɛri shan
ni Misira shɛɛn pu ni.›
6 «Yemu Tɛhɛnɛ Baa Kilɛ ya jo ge,
yee yi wa mɛ na:
‹Piimu bɛɛri pʼa Misira fiige ki tɛgɛ ge,
pee na ba do,
wu sefɛɛrɛ tabaara wuuro ti ma xhɔ.
Ŋmɔpara na ba pu shan
na lɔ Migidɔli kulo li na
suumɔ kulo kacɛ ki na,
fo na shɛ nɔ Siyɛni kulo li na
woroo kulo kacɛ ki na.
Kafɔɔ Tɛhɛnɛ Baa Kilɛ ɲɔjomɔ pi.›
7 «Fiige ki na ba ɲɛri takoloŋɔ na ye fiikoloyo yisaya na, wu kulogoo ki ma ɲɛri katahaya na ye katahaya kulogoo kisaŋaa na. 8 Nɛ ba na le tuun wemu ni Misira fiige ki na, na wu tɛgɛvɛɛ pu bɛɛri ɲuŋɔ tugo, pu na ba li cɛ lee funŋɔ ni na nɛ wu ɲɛ Tɛhɛnɛ Baa Kilɛ we. 9 Kee caŋa ke, nʼa da ba tudunmɔɔ pii tun ni suumɔ lɔhɔ kɔrɔyɔ yi ni na shɛ Kushi fiige ki fɛni, pʼi shɛ ki pye kʼi jɛlɛ, kee kemu ki wa ɲaɲiŋɛ na ge. Kanhama na ba nɔ pu bɛ na Misira fiige ki wo bɔɔngɔ ki caŋa. Kee caŋa ki wa lii wɛ, kʼa nɔ xɔ!
10 «Yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nɛ na ba Misira fiige ki wo sipyiɲɛhɛnɛ li ɲuŋɔ tugo fɛɛfɛɛ, saannaa Nabukodonozɔɔri keŋɛ kurogo, Babilɔni wo saan we. 11 Were ni wu wo sipyii pee, pee piimu pu ɲɛ fiiye yatii shɛɛn pu bɛɛri wo kafupege fɛɛ pu ge, pee na ba ba pʼi ba Misira fiige ki ja. Pu na ba pu ŋmɔparaa ki yeege Misira fiige ki fɛni, na fiige ki ɲi sipyixuyo na. 12 Nɛ na ba Nili Gba keye yi waha waha, na fiige ki pɛrɛ sipyikuuyo mu. Nɛ na ba fiige ke ni ki funŋɔ yaŋmuyɔ yi bɛɛri kyɛɛgi nabuun keŋɛ kurogo. Nɛ Tɛhɛnɛ Baa Kilɛ, nɛ wʼa jo.›
13 «Yemu Kafɔɔ Tɛhɛnɛ Baa Kilɛ ya jo ge, yee yi wa ye: ‹Nɛ na ba yapɛrɛɛ ki ɲuŋɔ tugo, na Mɛnfisi kulo li wo nafaanra kilɛlɛɛ pu ɲuŋɔ tugo. Ɲuŋɔfɔɔ da ba da nige Misira fiige ki ni wɛ. Nɛ na ba fyaara niguuro leŋɛ fiige ki ni. 14 Nɛ na ba fiige ki woroo kulo kacɛ ki ja, di na le Zowan kulo li na, di na kiiri wu shan Tebɛsi kulo li ɲuŋɔ ni. 15 Nɛ na ba na loyire li kuuri Sini kulo li na, Misira fiige ki wo kashɛn ɲaha kɔn kɔn kulo le, di Tebɛsi wo sipyiɲɛhɛnɛ li ɲuŋɔ tugo. 16 Nɛ na ba na le Misira fiige ki na, Sini kulo li na ba nahana nahana yama keŋɛ ni. Kapahaŋa na ba gɔn Tebɛsi kulo li maha maha kasɔrɔgɔ ki na. Pɛɛn pu na ba Mɛnfisi kulo li co cafugo na. 17 Ŋmɔpara na ba Eliyopolisi kulo le, ni Pibesɛti kulo li wo lɛvɛɛ pu shaan, pu na ba kee kulogoo ki co na kari kashɛn bulooro ni. 18 Nɛ ba Misira fiige ki wo zhuloo pu kɛgi, fanha kemu kʼa tabaara ti le wu ni ge, na kee yereŋɛ tuun wemu ni, nibiige na ba jé caŋa ki ni Tapanɛsi kulo li ni. Ɲahaŋa ka na ba Tapanɛsi kulo li tɔ, li pushaa pu na jo na kari kashɛn bulooro ni. 19 Nɛ na ba na wo kiiri wu shan Misira fiige ki ɲuŋɔ ni, pʼa li cɛ lee funŋɔ ni na nɛ wu ɲɛ Tɛhɛnɛ Baa Kilɛ we.› »
Babilɔni wo saan wʼa pye Kilɛ wo labye yaaga
20 Ayiwa, yee kɛ ni nigin wuu li wo yeŋɛ nizhiige ki wo cabyaa gbarashuun wu na, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
21 «Sipyiyawyii, nɛ Farawɔn keŋɛ ki kɛgi, Misira fiige ki wo saan we. Pu ya ta ki pɔ kɔnhɔ kʼi juuŋɔ wɛ, pu ya ta wɛrɛ pye ki na, na ki pɔ, kɔnhɔ ki da jani ŋmɔpara na wɛ. 22 Lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ na: ‹Nʼa da yìri Farawɔn fɛni, Misira fiige ki saan we, nʼa da wu keye yi kɛgi, kegɛgɛŋɛ ki fara nijeŋɛ ki na, di wu keŋɛ ki wo ŋmɔpara li shan. 23 Nɛ na ba Misira shɛɛn pu caaga na kari fiiye yatii ni. Nɛ na ba pu caaga fiiye yi bɛɛri ni. 24 Nɛ na ba baraga le Babilɔni fiige ki wo saan wu keye yi ni, di na ŋmɔpara li le wu keŋɛ ni. Nɛ na ba Farawɔn wo keye yi kɛgi, wʼa ganha na wu xu xu sipyaa waa Babilɔni saan wu ɲii na. 25 Nɛ na ba baraga le Babilɔni saan wu wo keye yi ni, Farawɔn wo keye yi ma do. Nɛ ba na wo ŋmɔpara li le Babilɔni fiige ki saan wu keŋɛ ni, a wu li sanha Misira fiige ki fɛni tuun wemu ni, pu na ba li cɛ lee funŋɔ ni na nɛ wu ɲɛ Tɛhɛnɛ Baa Kilɛ we. 26 Nɛ na ba Misira shɛɛn pu caaga na kari fiiye yatii ni. Nɛ na ba pu caaga fiiye yi bɛɛri ni, pʼa li cɛ lee funŋɔ ni na nɛ wu ɲɛ Tɛhɛnɛ Baa Kilɛ we.› »