Izirayɛli shi wu wo yɛri yɛri jomɔ
(Ezekiyɛli 2:3-7 ; Zheremi 1:17-19)
3
Ayiwa, wemu wʼa yu ni nɛ ni ge, a wee di nɛ pye: «Sipyiyawyii, yaaga kemu ki wa ma fɛɛ ni ge, ki li, le sɛmɛpoo le li, mʼa shɛ jo ni Izirayɛli puga ki ni.» 2 A nɛ na ɲɔ ki mugi, a wu nɛ pye nɛ sɛmɛpoo li li. 3 A wu nɛ pye: «Sipyiyawyii, le sɛmɛpoo le nʼa gaan ma mu ge, li li le ma yacɛrɛ li ni, mʼa ma yacɛrɛ li ɲi.» A nɛ li li, a lʼi daan nɛ ɲɔ ki ni ba sɛrɛ ɲɛ wɛ.4 A wu nɛ pye: «Sipyiyawyii, shɛ Izirayɛli puga ki mu, mʼa shɛ na jomɔ pu jo pu mu. 5 Shi wemu wu ɲɛ mu ya wu jomɔ nuri wɛ ge, shi wemu jomɔ ɲaha cɛmɛ pʼa pɛn ge, nɛ ta ma tun wee shi wu mu wɛ, ga Izirayɛli wo puga ki mu nɛ mu tun. 6 Shi niɲɛhɛmɛ wemu wu ɲɛ ma ya wu jomɔ nuri wɛ, wu jomɔ ɲaha cɛmɛ na pɛn, ma di ya wu kafila ɲaha cɛ-ɛ ge, nɛ ta ma tun pee mu wɛ. Nɛ da bi ma tun pee mu, pee bi da ma jomɔ pu logo. 7 Ga Izirayɛli puga ki wa da zhɛ sɔɔ di ma jomɔ pu logo wɛ, ma li kaɲuŋɔ pye pu funŋɔ wa pʼi nɛ jomɔ logo wɛ, bani Izirayɛli puga ki bɛɛri ɲuwii lʼa waha, pu ɲuyɔ yʼa waha. 8 Nɛ na ba ma ɲuwii li waha ba pu wogoo ki ɲɛ wɛ, nɛ na ba ma ɲuŋɔ ki waha ba pu woyo yi ɲɛ wɛ. 9 Nɛ na ba ma ɲuŋɔ ki waha ba luulu faakagereŋɛ ɲɛ wɛ, ki na ba waha faaga na. Ma ganha bu fya pu na wɛ, ma jaa wu ganha bu yìri pu ɲaha na wɛ, bani nʼa she fɛɛ puga ki ɲɛ kii.»
10 A wu nɛ pye: «Sipyiyawyii, jomɔ pemu bɛɛri nʼa da ba jo ma mu ge, pu logo ma ɲuwegee ki ni, mʼa pu mara ma zɔ wu na. 11 Ma shi shɛɛn piimu pʼa co na pa naha ge, shɛ pee mu mʼa shɛ jo ni pu ni. Pʼa ma jomɔ pu logo la, pu ya pu logo wɛ la, mʼa shɛ pu pye: ‹Yemu Tɛhɛnɛ Baa Kilɛ wa yu ge, yee yi wa mɛ.› »
12 Wee tuun wu ni a Kilɛ Munaa di nɛ yirige, a nɛ tunmɔ nigbɔ pa logo na kadugo yíri na: «Pɛɛŋɛ kʼa dɛri Tɛhɛnɛ Baa Kilɛ na wu nɔɔrɔ tatɛɛngɛ ki ni!» 13 A nɛ ɲìi yaŋmuyɔ yi kapaya tunmɔ logo yi na guuni yiyɛ na, ni gɔrɔyɔ yi wo tunmɔ pe yi tàan wu ni, ni tunmɔ nigbɔ pa. 14 Lee kadugo na, a Kilɛ Munaa lʼi nɛ yirige, na gari ni nɛ ni. Nɛ loyire wo ni na funyaŋa wo wʼa kari. Tɛhɛnɛ Baa Kilɛ wo keŋɛ ki fanha ki bi digi nɛ na. 15 Sipyii piimu pʼa co na kari ge, a nɛ shɛ nɔ pu na Tɛli-Avivu kulo li ni, Kebari Gba wu ɲɔ ki na, pu tatɛɛngɛ ki ni. Wà pu bi tiin, a nɛ diin pu tɛ ni, na ɲawomɔ wo, na cabyaa gbarashuun pye.
Ezekiyɛli ya pye Izirayɛli puga ki kasɛɛgɛ pyevɔɔ
16 Ba cabyaa gbarashuun ya toro wɛ, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 17 «Sipyiyawyii, nɛ mu teŋɛ na pye Izirayɛli puga ki wo kasɛɛgɛ pyevɔɔ. Ta na ɲɔjomɔ pu nuri, ma da se mʼa pu kaala na mɛgɛ na. 18 Nɛ ba sipyikuuŋɔ pye: ‹Ma da ba xhu!› ma bye ma di ya shɛ jo, na sipyikuuŋɔ ki kaala ki kooguunɔ li na wɛ, kɔnhɔ mʼa wu munaa ɲuŋɔ wolo wɛ, kee sipyikuuŋɔ ke na ba xhu ki wo nahama pu ni, ga wu shishan pu pi ge, nɛ na ba pee foo yege ma na. 19 Ga ma bu sipyikuuŋɔ ki kaala, a kʼi bye ki ya kuri kadugo, na ki kuumɔ pu ɲɔ yaha, na ki kooguunɔ li yaha wɛ, ki na ba xhu ki nahama pu ni, mu na ma wo munaa li ɲuŋɔ wolo. 20 Sipya wemu wʼa tii ge, wee bu tiimɛ pu koo li yaha, na ganha na katiibaagaa pyi, nɛ na ba wu pɛri, kɔnhɔ wu guruŋɔ. Wu na ba xhu. Ma bye ma di ya wu kaala wɛ, wu na ba xhu wu jurumu wu ni. Tiimɛ pemu wʼa pye toro ge, sipya funŋɔ da ba do ni pee ni wɛ. Ga nɛ na ba wu shishan foo yege ma na. 21 Ga sipya wemu wʼa tii ge, ma bu wu kaala, kɔnhɔ wu ganha bu jurumu pye nige wɛ, a wu shiin di bye wu ya jurumu pye nige wɛ, wu na ba ɲiifɛɛrɛ pye, ma li kaɲuŋɔ pye pʼa wu kaala. Mu bɛ na ma wo munaa li ɲuŋɔ wolo.»
Kilɛ ya Ezekiyɛli ɲɔjogo shɔ wu na
22 Ayiwa, ma nɛ yaha wee xuu wu ni a Tɛhɛnɛ Baa Kilɛ wo keŋɛ kʼi daha nɛ na sanha na nɛ pye: «Yìri, mʼa shɛ fadaan li na, wee xuu wu ni nʼa da zhɛ jo ni ma ni.» 23 A nɛ yìri na gari fadaan li na. A nɛ Tɛhɛnɛ Baa Kilɛ wo nɔɔrɔ wu ɲa wà ba nɛ wu ɲa Kebari Gba wu tàan ɲagana lemu na wɛ. Wee tuun wu ni a nɛ buri ɲiŋɛ ke na, na ɲaha ke buri. 24 A Kilɛ Munaa di ba jé nɛ ni, na nɛ yirige yereŋɛ na tɔɔyɔ yi na, na nɛ pye: «Shɛ jé ma puga, mʼa gbura ki tɔ wá mayɛ na. 25 Mu sipyiyawyii, pu na ba mɛɛrɛ le ma na, na ma pɔ. Ma da já da fòro da se nige pu niŋɛ ni wɛ. 26 Nɛ na ba ma ɲile li tara ma ɲɔ ki ni, kɔnhɔ mʼa bye bobo, ma ganha bu já da pu jaagi nige wɛ, bani nʼa she fɛɛ puga ki ɲɛ kii. 27 Ga nɛ ba da jo ni ma ni tuun wemu ni, nɛ na ma ɲɔ ki mugi, kɔnhɔ mʼa yi jo pu mu na: ‹Yemu Tɛhɛnɛ Baa Kilɛ wa yu ge, yee yi wa ye, wemu na logo ge, wu logo, wemu dʼa logo wɛ, wu ganha bu logo wɛ.› Bani nʼa she fɛɛ puga ki ɲɛ kii.»