Zheruzalɛmu ɲɛ ba kafunŋɔ shɔɔ ɲɛ wɛ
24
Ayiwa, yee gbarashɛɛrɛ wuu li wo yeŋɛ kɛ wogo ki wo cabyaa kɛ wu caŋa, Tɛhɛnɛ Baa Kilɛ wo jomɔ pʼa nɔ nɛ na, na nɛ pye:2 «Sipyiyawyii, niɲaa wo caŋa ɲii li ka, niɲaa wo caŋa ɲii liyɛ pyaa pyaa ka! Niɲaa yɛ pyaa Babilɔni saan wʼa kashɛn yirige Zheruzalɛmu kulo li fɛni. 3 Kafila talenɛ la jo ke nʼa she puga ke mu, mʼa pu pye na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ:
‹Shɔɔ li yàa taha na ki na,
li taha, mʼa lɔhɔ le li ni.
4 Xaɲilee ki lɔ le li funŋɔ ni,
xaɲilee nijeŋɛɛ ki bɛɛri,
shii le, ni kapaŋa ke,
mʼa li ɲi ni kaciiye
nijeye yi ni.
5 Dubya xaara nijɛrɛ ta lɔ,
mʼa kajiiye le shɔɔ li nɔhɔ ni,
mʼa ti shɔhɔ
fo kaciiye yi bɛ bu shɛ be.› »
6 Lee wuu na yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Kulo lemu lʼa sipyiire ti xuli ge, bɔɔngɔ ki wa lee wogo! Lee kulo li ɲɛ ba kafunŋɔ wo shɔɔ ɲɛ wɛ, li kafunŋɔ ki ya lɛri wɛ. Xaɲilee ki wolo li funŋɔ ni nigin nigin na. Ma ganha ba ti shɔɔnri da wo wɛ, ma keŋɛ bu saha ni lemu ni, mʼa lee wolo. 7 Bani shishan pemu lʼa wo ge, pee ya kori yaha li niŋɛ ni. Faaga ɲuŋmaa wogo ka na lʼa pee shishan pu wo, li ya ta pu wo ɲiŋɛ na, kɔnhɔ gbazhɛnhɛ di daga pu tɔ wɛ. 8 Nɛ pee shishan pu yaha faaga ɲuŋmaa wogo ki na, kɔnhɔ pu ganha bu já dɔ wɛ, lee funŋɔ ni, pu da na luu li yirige, di da li fɔɔ tɔni pu mu.»
9 Lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Kulo lemu lʼa sipyiire ti xuli ge, bɔɔngɔ ki wa lee wogo! Nɛyɛ pyaa kʼa da ba li sorogo sorogo kajiiye yi ɲɛhɛ. 10 Kajiiye niɲɛhɛyɛ pinnɛ, mʼa na ki gbɛri, mʼa xaara ti shɔhɔ, mʼa shiga yaara ti le ti ni, mʼa kaciiye yi sorogo. 11 Lee kadugo na mʼa showaa li taha naganhaa ki na, kɔnhɔ lʼi wɛri, li funŋɔ kʼi ɲaaŋa, li fɔɔnrɔ tʼi sogi li funŋɔ ni, li kafunŋɔ kʼi sogi. 12 Keree bɛɛri ya pye, ga tatiige, shɔɔ li kafunŋɔ ki ya go kʼi laha wɛ, ali na bɛ ya ki lɛri wɛ. 13 Kanɔhɔyɔ yemu mu ya pye ge, yee yʼa ma nɔhɔ. Nɛ bi giin di ma pye fɛɛfɛɛ, ga mu ya ta pye fɛɛfɛɛ wɛ. Ma da ga bye nige fɛɛfɛɛ wɛ, fo na shɛ nɛ pye nɛ na wo loyire li kuuri ma na fo li tɛhɛnɛ na. 14 Nɛ Tɛhɛnɛ Baa Kilɛ wʼa jo mu, lee na ba bye, nɛ na ba li pye. Nʼa da ga guri kadugo wɛ, nʼa da ga ɲuŋɔ ɲaari wɛ, nʼa da ga daburajɛ jo wɛ. Kiiri wu na ba gɔn ma na na saha ni ma torogana le, ni ma kapyegee ki ni. Kafɔɔ Tɛhɛnɛ Baa Kilɛ ɲɔjomɔ pi.»
Ezekiyɛli shɔ wu kpɔn pe
15 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 16 «Sipyiyawyii, nʼa da ba ma fundanga yaaga ki shɔ ma na taapile ni. Ga ma ganha bu tataara pye wɛ, ma ganha bu mɛɛ su wɛ, ɲɛsinmɛ ganha bu foro ma ɲaha ki ni wɛ. 17 Ma shiinnɛ li yaha li da diri ma funŋɔ ni, ma ganha bu kpɔn pu le wɛ. Mʼa ma ɲumiginɛ li migile ma ɲuŋɔ ki ni, mʼa tanhaya yi le ma tɔɔyɔ yi na. Ma ganha bu ma ɲabozhiire ti tɔ wɛ, ma di ganha bu kpɔn yalige ka bɛ li wɛ.»
18 Nɛ jo ni sipyiire ti ni ɲisɔɔgɔ ki na, a nɛ shɔ wu xhu kee yakoŋɔ ki ni. Tɛhɛnɛ Baa Kilɛ bi yemu jo nɛ mu ge, a nɛ yee ko ɲaari ɲimuguro ti na. 19 A sipyiire tʼi nɛ pye: «Le mu wa byi mɛ ge, ma na lee wo kɔ́ri jo wù mu wɛ?» 20 A nɛ pu pye jo Tɛhɛnɛ Baa Kilɛ wo jomɔ pʼa nɔ nɛ na, na nɛ pye na: 21 «Yi jo Izirayɛli puga ki mu na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: ‹Nɛ fɛfɛɛrɛ xuu wemu wu ɲɛ yee wo baraga ke, ni yee wo tabaara ti kaɲuŋɔ ge, nɛ na ba wee nɔhɔ. Wee wu ɲɛ yee ɲìi ki wo fundanga ke, na ɲɛ yee wo tadaŋa ke. Yi jalaa ni yi poro pushaa piimu yee ya yaha Zheruzalɛmu ni ge, ŋmɔpara na ba pee gbo. 22 Wee tuun wu ni, lemu nɛ pye mɛ ge, yi na ba lee pye. Yi da ba yi ɲabozhiire ti tɔ wɛ, yʼi wa da ba kpɔn yalige li wɛ. 23 Yi na ba yi ɲumigiŋɛɛ ki yaha yi ɲuyɔ yi na, na yi tanhaya yi yaha yi tɔɔyɔ yi na. Yi wa da ba tataara pye wɛ, yʼi wa da ba mɛhɛɛ bɛ su wɛ. Yi na ba shɔgɔ shɔgɔ yi wo katiibaagaa ki wuu na. Wa bɛɛri na ba zhiin wu ceboro wuu na. 24 Ezekiyɛli na ba bye yi mu ɲaha shɛshɛɛrɛ. Lemu wʼa pye ge, yi na ba lee pye cibɛ. Lee ba bye tuun wemu ni, lee na yi da ba li cɛ na Kafɔɔ Tɛhɛnɛ Baa Kilɛ nɛ ɲɛ.›
25 «Mu wi ge sipyiyawyii, can na, caŋa kemu nʼa da ba pu baraga ke, ni pu wo fundanga ke, ni pu wo ɲafɛ we, ni pu ɲidaan xuu we, wee wemu kaa lʼa waha pu mu ge, ni pu jalaa pee ni pu poro pushaa pu shɔ pu na ge, 26 wa na ba baa zhɔ kashɛn ki na kee caŋa ke, na ba yi ɲaha jo ma mu. 27 Ma ɲɔ ki na ba mugi kee caŋa ke, mʼa jo ni wee sipya we ni, wee wemu wʼa shɔ kashɛn ki na ge. Ma na ba yu, ma da ba bye nige bobo wɛ. Ma na ba bye pu mu ɲaha shɛshɛɛrɛ, pʼa li cɛ lee funŋɔ ni na Tɛhɛnɛ Baa Kilɛ nɛ ɲɛ.»