Samari kulo lʼa dɔdɔɔrɔ pye
23
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 2 «Sipyiyawyii, cèe shuun wa bye wà, pu shuun wu bɛɛri bye nu nigin na. 3 Pee ya dɔdɔɔrɔ pye Misira fiige ki ni. Pʼa bi dɔdɔɔrɔ pye pu lɛduun wu ni. Pʼa pu nacɛbaa wuu pu doyo fanhari wà, na pu dodoyo yi taala. 4 Lɛgɛ fɔɔ wu mɛgɛ ki bye na Oxhola, cuunvɔɔ wu mɛgɛ di ɲɛ na Oxholiba. Nɛ wuu pu bye pii, a pʼi jalaa ni pushaa se. Oxhola, wee ɲɛ Samari kulo le, Oxholiba, wee ɲɛ Zheruzalɛmu kulo le.5 «Nɛ wo wu bye Oxhola, a wu dɔdɔɔrɔ pye. Asiri fiige shɛɛn piimu pu ɲɛ wu tiinɲii pu ge, pee la ya pa shɔ wu ni, a wu pee pye wu taanfɛnamaa. 6 Pee bi faɲɛɛyɛ nizaaya leni, fanhafɛɛ ni ɲuŋɔfɛɛ pu bye pii, pu bɛɛri ɲɛ lɛvɛɛ nizaamaa, na ɲɛ shɔnduguloo piimu ya dugi pu shɔnyɔ na ge. 7 A Oxhola di dɔdɔɔrɔ pye ni pee ni. Asiri fiige ki lɛvɛɛ pu bɛɛri wo naɲisaaŋaa ki bye kii. Pee wo la kʼa bi shɔ wu ni, fo wʼa ɲaha yeege pu fɛni, na wuyɛ nɔhɔ ni pee bɛɛri ni, na wuyɛ nɔhɔ ni pu yapɛrɛɛ ki bɛ ni. 8 Dɔdɔɔrɔ temu wʼa bi byi fo wu nɔhɔpiire ti tuun wu ni Misira fiige ki ni ge, wu ya ta tee ɲɔ yaha wɛ. Misira shɛɛn pʼa bi sinnɛ ni wu ni wu lɛduun wu ni, na wu nacɛbaa wo wu dodoŋɔ ki taala, na dɔdɔɔrɔ pye ni wu ni, na wu nɔhɔ. 9 Lee wuu na nɛ wu le wu taanfɛnamaa pu keŋɛ ni, Asiri shɛɛn pee. Pee wo la kʼa bi shɔ wu ni. 10 A pee di wu ceepile wo wu shɛ, na wu jalaa pee ni wu pushaa pu co, na wuyɛ pyaa ki gbo ni ŋmɔpara ni. A pʼi wu kiiri wu kɔn lee kɔngana li na, a lee di bye cèe pusamaa mu fundogo kaa.»
Zheruzalɛmu kulo lʼa dɔdɔɔrɔ pye
11 «Ayiwa, a wu cuun Oxholiba di lee ɲa, ga lee bɛ na a wee wo kapyegee di fanha tɔ muzhɔ fɔɔ wu wogoo ki na. A wee wo dɔdɔɔrɔ ti ɲubile taha wu muzhɔ wu wuuro ti mu. 12 Asiri fiige shɛɛn piimu pu ɲɛ wu tiinɲii pu ge, a pee wo la di shɔ wu ni. Pee bi faɲɛɛyɛ nizaaya leni. Fanhafɛɛ ni ɲuŋɔfɛɛ pu bye pii, na ɲɛ shɔnduguloo piimu ya dugi pu shɔnyɔ na ge. Pu bɛɛri ɲɛ lɛvɛɛ nizaamaa. 13 A nɛ li ɲa jo wʼa wuyɛ nɔhɔ, jo konunɔ pu shuun wu bɛɛri ya ɲaari. 14 Wu yɛrɛ ya la fara wu wo dɔdɔɔrɔ ti na. Namaa pii wo jaalaa pii wʼa ɲa kasɔrɔgɔ na, Babilɔni shɛɛn pii wo jaalaa, na pu yàa kasɔrɔgɔ na, na pu ɲaaŋa, 15 pu dʼa kiriye taga puyɛ pɔ niŋɛ ke ni, na ɲumigiŋɛɛ nizaaŋaa kii taga ɲuyɔ ye migile. Pu bɛɛri pu bye ɲuŋɔfɛɛ, na ɲɛ ba Babilɔni shɛɛn pu ɲɛ wɛ, piimu ya se Kalide fiige ki ni ge, pu wo fiige ke. 16 Pu ɲazhiinɛ yɛ, a pu la di sii wɛri wu na, a wu tudunmɔɔ tun pu mu Kalide fiige ki ni. 17 A Babilɔni shɛɛn pʼi ba, na ba sinnɛ ni wu ni wu yasinnɛgɛ ki na, na wu nɔhɔ ni pu dɔdɔɔrɔ ti ni. Ba pʼa wu nɔhɔ na xɔ wɛ, a pu la di wolo wu na, a wu gɔn laha pu na. 18 Wʼa bi wu dɔdɔɔrɔ ti paŋa yeege, na wuyɛ shɛ, wu ceepile wo we, a nɛ gɔn laha wu na ba nɛ bi kɔn laha wu muzhɔ wu na wɛ. 19 Lee bɛ na, a wu la fara sanha wu dɔdɔɔrɔ ti na, na wuyɛ funŋɔ to ni wu nɔhɔpiire ti wo dɔdɔɔrɔ ti tuun wu ni, tee temu wʼa bi pye Misira fiige ki ni ge. 20 Wee xuu wu wo dɔdɔ namaa pu la bi sii wɛri wu na. Pee ɲɛ ba kafabee ɲɛ wɛ, pu wo laawa wu di ɲɛ ba shɔnboo ɲɛ wɛ. 21 Shiige baara temu mu ya pye ma nɔhɔpiire ti tuun wu ni ge, tee fɛni mu ya kuri sanha. Misira shɛɛn pu bi ma nacɛbaa wo wu dodoŋɔ ki taala, na ma doyo yi fanhari.»
Zheruzalɛmu wo kakuuŋɔɔ ki foo na ba dɔ wu mu
22 Ayiwa, yemu Kafɔɔ Tɛhɛnɛ Baa Kilɛ wa yu ge, yee yi wa mɛ: «Lee wuu na dɛ Oxholiba, ma naɲilee piimu mu ya she, na gɔn laha pu na ge dɛ, pee nʼa da ba yirige ma fɛni. Nɛ na ba pu yirige ma fɛni na yìri kabaya yi bɛɛri na. 23 Babilɔni shɛɛn, ni Kalide fiige shɛɛn pu bɛɛri, Pekodi wo tirige shɛɛn pee, ni Showa wuu pee, ni Kowa wuu pee, na fara Asiri shɛɛn pu bɛɛri na, pu lɛvɛɛ nizaamaa. Pee bɛɛri ɲɛ ɲuŋɔfɛɛ, ni fanhafɛɛ, ni kashɛn ɲuŋɔfɛɛ, ni sipyigbɔɔ, na dugi shɔnyɔ na. 24 Pu na ba ba ma fɛni, na yìri suumɔ kulo kacɛ ki na ni pu kashɛn yagboyo yi ni, ni pu kashɛn wotoriyo ye, ni pu shɔnyɔ wotoriyo ye, ni sipyiɲɛhɛmɛɛ. Pu na ba foro ma fɛni na yìri kabaya yi bɛɛri na ni pu ŋmasigiye yi ni, yi nagaya fara yi nibiire na, ni pu tɔɔrɔ ɲudɔŋɔɔ ki ni. Nɛ kiirikɔɔn li le pu keŋɛ ni. Pu na ba ma kiiri wu kɔn na saha ni pu wo saliya wu ni. 25 Nɛ na ba na wo naŋmege ki kuuri ma na. Pu na ba kafugo pɛlɛ ma fɛni. Pu na ba ma munaa le, ni ma ɲuwɛyɛ yi kɔn. Ma sipyii piimu na ba gori ge, pee na ba gbo ni ŋmɔpara ni. Pu na ba ma jalaa ni ma pushaa pu co. Ma sipyii piimu na ba gori ge, na na ba pee sorogo. 26 Pu na ba ma fàya yi wolo ma na, na ma yalere nizaara ti shɔ ma na. 27 Nɛ na ba ma nɔhɔmɔ keree kee ni ma dɔdɔɔrɔ ti yereŋɛ, tee temu ɲɔ mʼa kɔn, fo Misira fiige ki ni ge. Kee keree kii funŋɔ da ba diri nige ma mu wɛ, ma funŋɔ di wa da ba dun ni Misira shɛɛn pu ni nige wɛ.»
28 Bani yemu Kafɔɔ Tɛhɛnɛ Baa Kilɛ wa yu ge, yee yi wa mɛ: «Piimu mʼa kɔ ge, piimu na mʼa kɔn laha ge, nɛ na ba ma le pee keŋɛ ni. 29 Pu na ba ma kɔ, na ma cogana kolo. Ma keye yʼa lemu bɛɛri baari pye ge, pu na ba lee bɛɛri shɔ ma na, na ma ceepile wo wu yaha, lize mɛɛ bɛ baa. Ma torogaguunɔ le, ni ma nɔhɔmɔ keree kee, ni ma dɔdɔɔrɔ ti bɛɛri paŋa na ba foro kpɛɛngɛ na. 30 Pu na ba lee pye ma na, bani mʼa dɔdɔɔrɔ pye ni fiiye yatii shɛɛn ni, na mayɛ nɔhɔ ni pu yapɛrɛɛ ki ni. 31 Ma muzhɔ Oxhola wo koo le mu bɛ ya ɲaari. Lee wuu na, cɛɛgbuu lemu ni wee ya gba ge, lee nʼa da ba le mu bɛ keŋɛ ni.»
32 Yemu Kafɔɔ Tɛhɛnɛ Baa Kilɛ ya jo ge, yee yi wa mɛ:
«Ma na ba gba ma muzhɔ
wu wo cɛɛgbuu li ni.
Lee cɛɛgbuu lemu lʼa pɛlɛ,
na jogi ge.
Sipyii na ba zhɛhɛni ma na,
na ma la wo,
bani lee cɛɛgbuu lʼa sii kemɛ ɲi.
33 Li na ba ɲawɔhɔ wɔ ma na,
na funyaŋa wá ma na,
bani fyaara niguuro
ni kakara niguuro wo cɛɛgbuu li wa.
Ma muzhɔ Samari wʼa gba li ni na xɔ.
34 Ma na ba li funŋɔ yaaga ki gba,
na ki xɔ, na ganhaa taga li ja ja,
na yee jaya yi taga
ma doyo yi shɛɛngi shɛɛngi.
Nɛ wʼa jo mu,
Kafɔɔ Tɛhɛnɛ Baa Kilɛ ɲɔjomɔ pi.»
35 Lee wuu na, yemu Tɛhɛnɛ Baa Kilɛ ya jo ge, yee yi wa mɛ: «Mu ya funŋɔ wɔ nɛ na, na nɛ wá ma kadugo yíri, lee wuu na, ma bɛ wu tugo ma wo nɔhɔmɔ pe, ni ma wo dɔdɔɔrɔ ti wo kanhama pu tàan.»
36 A Tɛhɛnɛ Baa Kilɛ di nɛ pye: «Sipyiyawyii, ta mu wa da ba kiiri kɔn Oxhola ni Oxholiba na wɛ? Tanhaŋa keree kiimu pʼa pye ge, ki jo pu ɲii na. 37 Bani pʼa puyɛ kan dɔdɔɔrɔ mu, shishan bɛ di ɲɛ pu keye yi na. Pʼa dɔdɔɔrɔ pye ni pu yapɛrɛɛ ki ni. Na fara lee bɛ na, jalaa piimu pʼa se nɛ mu ge, a pʼi pee bɛ sorogo na ni kee yapɛrɛɛ ki mu. 38 Lemu bɛ pʼa pye sanha nɛ na ge, lee li wa mɛ: Pʼa nɛ fɛfɛɛrɛ puga ki nɔhɔ kee caŋa kiyɛ pyaa, na na cadɛɛnyɛ yi bɛ wo katanhaŋaa pye. 39 Caŋa kemu pʼa pu jalaa pu wolo saraga pu yapɛrɛɛ ki mu ge, kee caŋa kiyɛ pyaa pʼa jé nɛ fɛfɛɛrɛ puga ki ni, na ki nɔhɔ. Lee pʼa pye nɛ wo pɛɛŋɛ puga ki ni. 40 Na fara lee bɛɛri na, a pʼi tuduro yaha shɛ namaa pii yiri na yìri fiitɔɔnyɔ ya ni. Tudunmɔɔ pʼa tun pu mu, a pʼi ba. A mu di lɔhɔ wuu, na kalii le, na ma yalere ti le pee namaa pu wuu na, 41 na diin yasinnɛgɛ nizaaŋa ka na, tabali wa dʼa gbegele, na wee sin kee yasinnɛgɛ ki fɛɛ ni, na nɛ wo nudanga yawurire te, ni nɛ wo sìnmɛ pu taha wee ɲuŋɔ ni. 42 Sipyiɲɛhɛmɛɛ pu bi pa binnɛ, na sii tunmɔ pu pɛlɛ funzhaga baa. Namaa pii bɛ bye wà na yìri siwaga ki kabaya yi bɛɛri na. A pee di kaŋmegee le ceboroshaa shuun wu keye na, na ɲumigiŋɛɛ nizaaŋaa kii migile pu ɲuyɔ yi na.
43 «Ba lee ya pye wɛ, a nɛ jo: ‹Dɔdɔɔrɔ ti na we cee we kyɛɛgi, wu sanha di wuyɛ kaan dɔdɔɔrɔ mu ya?› 44 A pʼi jé wu mu ba pʼa jin dɔdɔshɔ mu wɛ. Lee jegana li na pʼa jé Oxhola ni Oxholiba mu, pee dɔdɔshaa pee. 45 Ga namaa piimu pʼa tii ge, pee na ba kiiri kɔn pu na ba pʼa kiiri kɔɔn dɔdɔshaa pu na wɛ, ba pʼa kiiri kɔɔn sipyigbuu pu na wɛ, bani dɔdɔshaa pu ɲɛ pii, shishan bɛ di ɲɛ pu keye yi na.» 46 Yemu Kafɔɔ Tɛhɛnɛ Baa Kilɛ ya yu ge, yee yi wa mɛ: «Sipyiɲɛhɛmɛɛ pu shɛ pu fɛni, pee di shɛ pu jaalaa pu yirige, pʼi pu yaŋmuyɔ yi bɛɛri kuu. 47 Pee sipyiɲɛhɛmɛɛ pii na zhɛ pu wá ni kagereye ni, na pu gbo ni ŋmɔparaa ni. Pu na pu jalaa pee ni pu poro pushaa pu gbo, na na le pu piyɛyɛ yi na. 48 Lee xɔgana li na nʼa da ba nɔhɔmɔ keree ki xɔ na yeege fiige ki ni. Lee na ba kalaa kan cèe pu bɛɛri mu, pu da ga yee wo nɔhɔmɔ keree kii shi tuugo pye nige wɛ. 49 Yee wo nɔhɔmɔ keree ki kanhama na ba do yee ɲuŋɔ ni. Yi na ba dugo yi wo yapɛɛgaan li wo jurumu wu tàan, lee funŋɔ ni yi da ba li cɛ na Kafɔɔ Tɛhɛnɛ Baa Kilɛ nɛ ɲɛ.»