Zheruzalɛmu ya tanhaŋa keree pye
22
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Mu sipyiyawyii, ma na kiiri wu kɔn wɛ, ma na kiiri wu kɔn Zheruzalɛmu kulo li na wɛ, sipyii gbo gbo kulo le? Li tanhaŋa keree ki bɛɛri shɛ li na!
3 «Mʼa li pye na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ: ‹Kulo li le, lemu wo sipyii pʼa sipyii gbuu li funŋɔ ni, kɔnhɔ li kiiri wu caŋa kʼi wɛri nɔ ge. Lʼa yapɛrɛɛ yari liyɛ mu, na liyɛ pyi fɛfɛɛrɛ baa kulo. 4 Mu ya mayɛ le jaagi ni ni sipyii pu wo gbo wu ni, yapɛrɛɛ kii mu ya yàa mayɛ mu ge, na mayɛ pye fɛfɛɛrɛ baa fɔɔ ni kee ni. Lee funŋɔ ni mu ya ma shi wu caya yi cɛrɛŋɛ, na ma shi wu gbere. Lee wuu na nɛ mu pye yafanhaŋa fiiye yatii shɛɛn pu mu, na ma pye lawuu yaaga fiiye yi bɛɛri mu. 5 Fiiye yemu yʼa ma tɛɛŋɛ ni yemu ya lii ma na ge, yee bɛɛri na ba ma la wo, bani ma mɛgɛ kʼa nɔhɔ, ma bɛɛri dʼa ɲi kawuriye na.
6 « ‹Li wii, Izirayɛli ɲuŋɔfɛɛ pʼa pu fanha ki pye pu tadaŋa na ganha na gbuuro pyi. 7 Ma sipyii pʼa pu tii ni pu nii fanri. Ma sipyii pʼa nadadiinmɛɛ pu cogana kolo. Ma sipyii pʼa cirimɛɛ ni naxhugoshaa pu toɲɔni. 8 Mʼa na fɛfɛɛrɛ xuu wu fanri, na na cadɛɛnyɛ yi nɔhɔni. 9 Mu wo sipyii pii wa kalɔhɔjuuro pyi, na pu sipyiɲii xuli. Mu wo sipyii pii wa yapɛrɛɛ saraya li faaboboyo yi na. Sipyii pu wa na nɔhɔmɔ keree pyi mu funŋɔ ni. 10 Mu wo sipyii pii wa sinnɛɛ ni pu tii cèe ni. Mu wo sipyii pii wa sinnɛɛ ni cèe lowuuyo wuu ni. 11 Mu wo sipyii pii wa tanhaŋa keree pyi ni pu sipyiɲii cèe ni. Pii wa cemɔhɔrɔ pyi na sinnɛɛ ni pu jalaa cèe ni. Pii wa pu ciinnɛɛ shaan fanha ni, pu tii pu poro pushaa pee. 12 Mu wo sipyii pii wa kaguruyo taga na pii ɲɔyɔ suua kɔnhɔ pʼi gbuuro pye. Mu ya fɔhɔɔ leni, na ɲudahara tɛri ki na, na kuduun nide bɛ shaa. Mu ya ma sipyii ŋmahana na pu keŋɛ yaŋmuyɔ karamu na zhuu pu na. Ga a mu di funŋɔ wɔ nɛ na, Kafɔɔ Tɛhɛnɛ Baa Kilɛ ɲɔjomɔ pi.
13 « ‹Naafuu wemu mu ya karamu shɔ naŋmahara ti ni ge, ni gbuuro temu tʼa gbo mu funŋɔ ni ge, yee wuu na nɛ kadahaa kori. 14 Nɛ ga ba ma fɛni caŋa kemu, ta ma xakili wu na ba diin ya? Ta baraga na ba da ma keye yi ni ya? Nɛ Tɛhɛnɛ Baa Kilɛ wʼa jo mu, nɛ shiin wa da li pye. 15 Nɛ na ba ma caaga fiiye yatii shɛɛn pu tɛ ni, na ma caaga kari fiiye yi bɛɛri ni, na ma nɔhɔmɔ pu xɔ na laha ma na fɛɛfɛɛ. 16 Mayɛ pyaa ki na ba mayɛ le nɔhɔmɔ ni fiiye yatii shɛɛn pu ɲii na. Lee bu bye, ma na ba li cɛ na Tɛhɛnɛ Baa Kilɛ nɛ ɲɛ.› »
17 A Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 18 «Sipyiyawyii, Izirayɛli puga kʼa ɲɛri nɛ ɲaha tàan ba tɔɔvire ɲɛ wɛ. Pu bɛɛri pu ɲɛ daɲaa tɔɔrɔ, ni lɛtɛn, ni toowɔ, ni pulɔn dagoŋɔ funŋɔ ni. Warifyɛn wo tɔɔvire ti ɲɛ tii. 19 Lee wuu na yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Yee ya ɲɛri ba tɔɔvire ɲɛ wɛ, lee wuu na nʼa da ba yee pinnɛ Zheruzalɛmu kulo li niŋɛ ki ni. 20 Ba pu ma warifyɛn, ni daɲaa tɔɔrɔ, ni toowɔ, ni pulɔn, ni lɛtɛn pinnɛ, na yi le dagoŋɔ ni, na na le yi nɔhɔ ni, na yi ɲa ɲagana lemu na wɛ, lee pinnɛgana li na nʼa da ba yee pinnɛ na wo loyire niguunɔ le, ni na wo kafupege ki funŋɔ ni, na na le yi nɔhɔ ni, na yi ɲa. 21 Nɛ na ba yi pinnɛ toŋɔ, na na wo loyire li wo na ki beree yi nɔhɔ ni, na yi ɲa kulo li niŋɛ ki ni. 22 Ba warifyɛn ya ɲani ɲagana lemu na dagoŋɔ funŋɔ ni wɛ, lee ɲagana li na, yʼa da ba ɲa kulo li niŋɛ ki ni. Lee funŋɔ ni yʼa da ba li cɛ na nɛ Tɛhɛnɛ Baa Kilɛ wʼa na loyire niguunɔ li tirige yi na.› »
23 A Tɛhɛnɛ Baa Kilɛ wo jomɔ pʼi nɔ sanha nɛ na, na nɛ pye: 24 «Sipyiyawyii, yi jo Zheruzalɛmu kulo li mu na: ‹Mu ɲɛ ɲiŋɛ, kemu ki ɲɛ fɛfɛɛrɛ baa wogo ge. Zanha ya ta to ki na nɛ wo loyire li caŋa ki na wɛ. 25 Ma tudunmɔɔ pʼa ɲɔfaanya pyi ma funŋɔ ni. Pu ɲɛ ba cɛnri ɲɛ wɛ wemu ya guuri, na wu xaara coni, na ti cere ge. Pʼa sipyiire ti naafuu wu shuu pu na, ni pu pɛɛwa yaŋmuyɔ ye, na cèe pu namaa pu xuli, na naxhugoshaa pu ɲɛhɛŋi kulo li ni. 26 Ma saraya ɲaha shɔɔnrivɛɛ pʼa nɛ wo saliya wu kyɛɛgi, yaŋmuyɔ yemu yʼa yaha nɛ yahama ni ge, na ye nɔhɔni. Yaaga kemu ya yaha nɛ yahama ni, ni yaaga kemu ya nɔhɔ ge, pu ya tɛhɛnɛ kɔɔn yee na wɛ. Pu ya sipyiire ti kalaa pʼi fɛfɛɛrɛ yaŋmuyɔ yi cɛ wolo fɛfɛɛrɛ baa woyo yi ni wɛ. Pu ya kasɛɛgɛ yɛri nɛ wo cadɛɛnyɛ yi na wɛ, a pʼi bye pu jate ya ta nɔ nɛ wo fɛfɛɛrɛ ti na wɛ. 27 Ma ɲuŋɔfɛɛ pu ɲɛ ba sige poyo ɲɛ wɛ, na yi yacoyo shɛɛngi. Pʼa gbuuro pyi, na sipyii ɲuyɔ tugoo na daga na puyɛ pyi naafuu fɛɛ. 28 Ma tudunmɔɔ pʼa sipyiire ti jurumu wu ɲɔ tɔni, na wu wɔɔgɔ ni lasho ni, na nafaanra kashɛgɛɛ shɛɛ, na kafinɛyɛ kaɲagaa yu. Pu ma yu na: “Yemu Kafɔɔ Tɛhɛnɛ Baa Kilɛ ya jo ge, yee yi wa ye.” Na ta Tɛhɛnɛ Baa Kilɛ di ya ta yaaga bɛ jo wɛ. 29 Fiige ki sipyii pʼa dun sipyii na, na pu keŋɛ yaŋmuyɔ yi ŋmahana na zhuu pu na, na labaafɛɛ ni kanhama fɛɛ toɲɔni, na nabuun pu co cogaguunɔ na, na pu kaɲɛŋɛɛ shuu pu na. 30 A nɛ ganha na sipya wa shaa pu tɛ ni, wemu na kasɔrɔgɔ yirige ge, wemu na yere kapahaya yi ɲɔ na nɛ ɲaha tàan, fiige ki wo ɲaɲiŋɛ wuu na ge, kɔnhɔ fiige ki ɲuŋɔ ganha bu dugo wɛ, ga nɛ ta shɛn nigin bɛ ta wɛ. 31 Lee wuu na nɛ na loyire niguunɔ li turi pu na, na na loyire li na ki taga pu ɲuŋɔ tugo. Nɛ na ba pu kapyegee ki foo tɔ pu mu. Kafɔɔ Tɛhɛnɛ Baa Kilɛ ɲɔjomɔ pi.› »