Kapii la lʼa Izirayɛli ɲaha mari
21
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, ŋmahana ɲɛri kanige cɛ wu ni, ma Kilɛ tuduro jo wá woroo kulo kacɛ ki na! Mʼa keree nibaŋaa jo wá woroo kulo kacɛ fiige ki wo taha ki na! 3 Mʼa yi jo woroo kulo kacɛ ki wo taha ki mu na ki ɲuwegee shan ni Tɛhɛnɛ Baa Kilɛ wo jomɔ pu ni, na yemu Kafɔɔ Tɛhɛnɛ Baa Kilɛ wʼa yu ge, na yee yi wa mɛ: ‹Nʼa da ba na ka le ma na, kee na ba ma tipuriye yi bɛɛri, ni ma tiwaya yi bɛɛri sorogo. Kee na ki wa da ga fugi wɛ, ki na ba ɲahaya yi bɛɛri paari, na co woroo kulo kacɛ ki na, fo na shɛ nɔ suumɔ kulo kacɛ ki na. 4 Sipyii pu bɛɛri na ba li cɛ na nɛ Tɛhɛnɛ Baa Kilɛ wʼa na ki le, na ki wʼa da vugi wɛ.› »
5 A nɛ jo: «Aa, na Kafɔɔ Tɛhɛnɛ Baa Kilɛ, pii sipyii pii wa yu na giraya nɛ jee.»
6 A Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
7 «Sipyiyawyii, ma ɲaha ki ŋmahana ɲɛri Zheruzalɛmu kulo li yíri, mʼa Kilɛ tuduro jo ma wá fɛfɛɛrɛ puga ki na! Mʼa keree nibaŋaa jo ma wá Izirayɛli wo ɲiŋɛ ki na! 8 Mʼa Izirayɛli ɲiŋɛ ki pye na yemu Tɛhɛnɛ Baa Kilɛ wa yu ge, na yee yi wa mɛ: ‹Nʼa da zhɛ ma fɛni, di na ŋmɔpara li kɔɔngi li forogo ki ni, di ma funŋɔ sipyii pu bɛɛri ɲuŋɔ tugo, tiimɛ fɛɛ pu fara sipyikuuyo yi na. 9 Bani nʼa giin di tiimɛ fɛɛ pu ni sipyikuuyo yi bɛɛri ɲuŋɔ tugo di voro ma ni. Lee wuu na na ŋmɔpara lʼa da ba foro li forogo ki ni, lʼi pu bɛɛri kpɔn, na co woroo kulo kacɛ ki na, fo na shɛ nɔ suumɔ kulo kacɛ ki na. 10 Sipyii pu bɛɛri na ba li cɛ na nɛ Tɛhɛnɛ Baa Kilɛ wʼa na ŋmɔpara li kɔɔngi wolo li forogo ki ni. Li wa da ba le nige li forogo ki ni wɛ.› »
11 «Sipyiyawyii, ma tikunnɔ li kuri, ma da zhiin funyaŋa keŋɛ ni pu ɲii na! 12 Pu bu ma yege na: ‹Ɲaha na ma di zhiin wɛ?› Mʼa pu pye: ‹Bani kapii la lʼa ma… Lee na ba sipyii pu bɛɛri jaalaa yirige, na pu keye yi baraga ki xɔ, na pu yatɛnyɛ gbo, na pu nugunyɔ yi fanha xɔ… Lee kapii lʼa ma, lʼa nɔ yere! Kafɔɔ Tɛhɛnɛ Baa Kilɛ ɲɔjomɔ pi.› »
Ŋmɔpara le
13 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 14 «Sipyiyawyii, Kilɛ tuduro jo! Mʼa yi jo na yemu Kafɔɔ wa yu ge, na yee yi wa mɛ:
‹Ŋmɔpara! Ŋmɔpara!
Li ɲɔ kʼa wolo, lʼa jɔgɔ fo li na ɲí.
15 Gbuuro kaa na li ɲɔ kʼa wolo,
Lʼa kemɛ jɔgɔ kɔnhɔ li da ɲí.
Ta wèe na já da fundanga pyi?
Nɛ ja wu wo saanra pubiin lʼa tiye yi bɛɛri fanri.
16 Pʼa li kan pʼa jɔgɔ,
kɔnhɔ keŋɛ di ba li ɲɛri.
Li ɲɔ kʼa wolo, lʼa jɔgɔ,
kɔnhɔ lʼi gan gbuuro pyevɔɔ wu mu.
17 Sipyiyawyii, ta sipyaa waa, ma da xhuulo!
Bani nɛ wo sipyii pu fɛni lʼa lɔ,
Izirayɛli wo ɲuŋɔfɛɛ pu bɛɛri fɛni lʼa lɔ.
Pʼa pu kan ŋmɔpara mu, pu ni nɛ wo sipyii pu ni.
Lee wuu na, ta ma shii li kpɔɔn!
18 Bani nɔwuuro ti wa tii. Le saanra pubiin le lʼa fanhara ti pyi ge, lee ɲuŋɔ bu dugo, ɲaha na bye wɛ? Kafɔɔ Tɛhɛnɛ Baa Kilɛ ɲɔjomɔ pi.›
19 Ayiwa, sipyiyawyii,
Kilɛ tuduro jo, ma da kadahaa kori!
Ŋmɔpara li na ba li
tɔɔɲii shuun, tɔɔɲii taanri!
Gbuuro wo ŋmɔpara li wa,
li na ba gbuuro pye kabaya yi bɛɛri na.
20 Nɛ gbuuro wo ŋmɔpara yaha
pu tajeye yi bɛɛri ni,
kɔnhɔ pu jaalaa di yìri,
pu niɲɛhɛmɛɛ di guruŋɔ to.
Aa, ŋmɔpara lʼa jɔgɔ fo li na ɲí.
Gbuuro ti kaa na lʼa gbegele yaha.
21 Ŋmɔpara ɲɔtanga wuu le,
gbo kanige cɛ, mʼa gbo kamɛnɛ cɛ!
Ma ɲaha ki tagi
kabaya yi bɛɛri na, mʼa gbo!
22 Nɛ bɛ wi ge, nɛ bɛ na ba kadaa kori,
di na loyire niguunɔ li kuuri.
Nɛ Tɛhɛnɛ Baa Kilɛ wʼa jo mu.»
Babilɔni saan wu wo ŋmɔpara le
23 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, nʼa nɛ pye: 24 «Sipyiyawyii, korogoo shuun wolo, Babilɔni saan wu wo ŋmɔparaa fɛɛ pu tapaga. Kee korogoo shuun wu bɛɛri di foro fiige nigin ni. Koo lemu ya se kulo lemu ni ge, mʼa lee kulo li mɛgɛ ka kɔrɔgɔ ka na ma sin lee koo li ɲɔ na. 25 Koo nigin wa di Babilɔni kashɛnŋmuu pu ɲaha co lʼa se Araba kulo li ni, Amɔ shi shɛɛn pu wo kugbɔɔ le. Koo lʼa di pu ɲaha co lʼa se Zheruzalɛmu kulo li ni, pu kashɛn ɲaha kɔn kɔn kugbɔɔ le, Zhuda koomɔ pu ni. 26 Bani Babilɔni saan wu niyerege ki wa koŋmaragaa ki na, xuu wemu ni korogoo kʼa waagi ge, kɔnhɔ wu celɔrɔ pye. Wʼa celɔrɔ ti cee ni ŋmaya yi ni, na wu yapɛrɛɛ ki yege, na wu saraga yatɔɔyɔ yi wo ɲɛrɛɛ ki sɛɛri. 27 A ye celɔrɔ yaŋmuyɔ ye di Zheruzalɛmu kulo li shɛ wu kanige keŋɛ ki ni. Wu na ba kashɛn ki koo kan Zheruzalɛmu kulo li fɛni, na pu shɛ pʼi shɛ kashɛn sipyaa wá. Wu na ba kasɔrɔyɔ shan shan mazhiye yàa kulo li tajeye yi wo gburaya yi kaa na, na taduguyo ya yàa, na kataduguyo ya yàa. 28 Ga Zheruzalɛmu shɛɛn na ba tee celɔrɔ te wo keree ki yaha ba kafinɛyɛ ɲɛ wɛ, ma li kaɲuŋɔ pye pʼa bi kaaya kaa puyɛ mu ni Babilɔni shɛɛn ni. Ga Babilɔni wo saan wu na ba pu funŋɔ tirige pu wo nahama pu na, na li shɛ na pu da pu co na gaaŋi.» 29 Lee wuu na yemu Kafɔɔ Tɛhɛnɛ Baa Kilɛ ya yu ge, yee yi wa mɛ: «Yee wa nɛ funŋɔ tun yi tiibaara ti na ni yi wo saliya kyɛɛgɛrɛ ti ni, na yi wo jurumu wu shee yi wo kapyegee ki bɛɛri ni, na nɛ funŋɔ to ni yee bɛɛri ni, lee wuu na yee pɛɛn pu keye yi wa da ba yee co na kari. 30 Mu kunni, Izirayɛli wo ɲuŋɔfɔɔ we, Kilɛ mɛgɛ kyɛɛgivɔɔ we, sipyikuuŋɔ, mu wo kuumɔ pu foo li tɔduun wʼa nɔ, mu wo kuumɔ pʼa nɔ pu tadaŋa ni!» 31 Yemu Kafɔɔ Tɛhɛnɛ Baa Kilɛ wa yu ge, yee yi wa mɛ: «Ma ɲumiginɛ li na ba sanhana, na ma saanra ɲudɔnɔ li kɔɔngi! Keree ki bɛɛri na ba ɲɛri! Wemu wʼa tirige ge, wee na ba yirige, wemu wʼa yirige ge, na wee tirige. 32 Kakara, kakara! Kakara nʼa da ba bye Zheruzalɛmu kulo li ni. Tee kakara ti ɲɔhɔ sanha dee pye wɛ. Kiiri wu wa wemu keŋɛ ni ge, wee wemu mu keŋɛ ni nʼa da ba wu kaa le ge, kii keree kii wa da bye wɛ, fo wee bu shɛ ba.»
Ŋmɔpara lʼa lɔ Amɔ shi shɛɛn pu fɛni
33 «Ayiwa, mu sipyiyawyii, Kilɛ tuduro jo, mʼa yi jo na yemu Kafɔɔ Tɛhɛnɛ Baa Kilɛ wa yu Amɔ shi shɛɛn pu fɛni, ni pu Kilɛ mɛkyɛɛgɛrɛ ti wuu na ge, na yee yi wa ye na: ‹Ŋmɔpara, ŋmɔpara lʼa kɔɔngi na wolo li forogo ki ni gbuuro ti kaa na. Lʼa jɔgɔ kakara ti kaa na, kɔnhɔ lʼi da ɲí. 34 Na ma yaha ma nafaanra kashɛgɛɛ kee, ni ma kafinɛyɛ kaɲagaa ki ni, ŋmɔpara na ba ma gbo ni sipyikuuyo yi ni, bani pu wo kakuuyo yi wo foo li tɔduun wʼa nɔ, pu jurumu wʼa nɔ wu tadaŋa ni› »
Kilɛ na ba kiiri kɔn ŋmɔpara li fɔɔ wu bɛ na
35 «Ŋmɔpara li kuruŋɔ le li forogo ki ni. Fiige kemu ni mʼa se ge, ma nɔhɔ tayirige ki wo fiige ke, nɛ na ba kiiri kɔn ma na kee fiige kiyɛ pyaa ni. 36 Nɛ na ba na loyire niguunɔ li tirige ma na, na na loyire li na ki taga ma fɔ̀, na ma le naŋmaya ya keŋɛ ni, yee yemu yʼa kakara niguuro pyi ge. 37 Na na ba ma sorogo. Ma shishan pu na ba wo fiige ki ni, sipya wa shishiin funŋɔ da ba do ni ma kaa ni wɛ. Nɛ Tɛhɛnɛ Baa Kilɛ wʼa jo mu.»