Kilɛ ya Izirayɛli ɲaha co, ali na li ta bɛ pʼa ɲuŋɔ nari wu na.
20
Ayiwa, yee gbarashuun wuu li wo yeŋɛ kaguro wogo ki cabyaa kɛ wu na, Izirayɛli nɔhɔlɛɛ pʼi ya pa, na ba diin nɛ tàan na Tɛhɛnɛ Baa Kilɛ pʼa pa di ba yege. 2 A Tɛhɛnɛ Baa Kilɛ wo jomɔ pʼi nɔ nɛ na, na nɛ pye:3 «Jo ni Izirayɛli nɔhɔlɛɛ pu ni, mʼa pu pye na yemu Kafɔɔ Tɛhɛnɛ Baa Kilɛ ya yu ge, na yee yi wa mɛ: ‹Ta yegeŋɛ tapyege ni yee ya pa nɛ mu ya? Nɛ ɲìi wo wu mɛgɛ ki wuu na, nɛ da ga na yɛ yaha yee pu yege wɛ. Kafɔɔ Tɛhɛnɛ Baa Kilɛ ɲɔjomɔ pi. 4 Ta mu wʼa da kiiri kɔn pu na wɛ? Sipyiyawyii, ta mu wʼa da kiiri kɔn pu na wɛ? Pu tii pu wo tanhaŋa keree ki jo pu mu!›
5 «Mʼa pu pye na yemu Kafɔɔ Tɛhɛnɛ Baa Kilɛ ya jo ge, na yee yi wa mɛ: ‹Caŋa kemu nɛ Izirayɛli shɔɔnri lɔ ge, nɛ kàa Yakuba tirige shɛɛn pu mu ni na keŋɛ ki yirige wu ni, nʼa nayɛ shɛ pu na Misira fiige ki ni. A nɛ gàa pu mu ni na keŋɛ ki yirige wu ni, na jo: “Tɛhɛnɛ Baa Kilɛ nɛ ɲɛ, yee wo Kilɛ we.” 6 Kee caŋa ki nɛ kàa pu mu ni na keŋɛ ki yirige wu ni, jo nʼa da pu yeege Misira fiige ki ni, di shɛ ni pu ni fiige ka ni, kee kemu nɛ saala yaha pu mu ge. Fiige ki ɲɛ kii, kemu kʼa fúu nujirimɛ ni sɛrɛ na ge, fiiye yi bɛɛri wo nizaaŋa ki wa kii. 7 A nɛ pu pye jo pu bɛɛri nigin nigin wu zɔlɔɔ pʼa gilee pɛɛŋɛ yaŋmuyɔ tanhaŋa woyo yemu fɛni ge, jo pu kadugo le yee ni, jo pu ganha ba puyɛ leni nɔhɔmɔ ni ni Misira fiige ki wo yapɛrɛɛ ki ni wɛ. Tɛhɛnɛ Baa Kilɛ nɛ ɲɛ, yee wo Kilɛ we.
8 « ‹A pʼi nʼa she le puyɛ ni na wá nɛ na, pu ya sɔɔ na nɛ jomɔ pu logo wɛ. Pu zɔlɔɔ pʼa gilee pɛɛŋɛ yaŋmuyɔ tanhaŋa woyo yemu fɛni ge, wa shishiin bɛ ya sɔɔ na kadugo le wu woyo yi ni wɛ. Pu ya ta sɔɔ na kadugo le Misira fiige ki wo yapɛrɛɛ ki ni wɛ. A nɛ li kɔn nayɛ funŋɔ ni jo di na wo loyire niguunɔ li kuuri pu na Misira fiige ki ni, di na wo loyire li niinɛ fo li tɛhɛnɛ na pu fɛni. 9 Ga na wo mɛgɛ ki wuu na, nɛ ta lee pye wɛ. Fiiye yatii shɛɛn piimu tɛ ni pu ɲɛ ge, kɔnhɔ na mɛgɛ ki ganha bu gyɛɛgi pee tɛ ni wɛ. Nɛ bi nayɛ shɛ pee na Izirayɛli nagoo pu yeegeduun wu ni Misira fiige ki ni. 10 Nɛ bi pu yeege Misira fiige ki ni, na pu ɲaha co na kari siwaga ki ni. 11 Nɛ bi na saliya wu kan pu mu, nʼa na wo kodorogoo ki shɛ pu na, kee kiimu sipya ya yàa na ɲaari, kɔnhɔ mʼa ɲiifɛɛrɛ pye ki baraga ni ge. 12 A nɛ na cadɛɛnyɛ yi bɛ kan pu mu na pye ɲaha shɛshɛɛrɛ na ni pu tɛ ni, kɔnhɔ pʼi li cɛ na nɛ wu ɲɛ Tɛhɛnɛ Baa Kilɛ we, wee wemu wʼa pu pyi fɛfɛɛrɛ wuu ge.
13 « ‹Ga a Izirayɛli puga kʼi nʼa she le kiyɛ ni na wá nɛ na siwaga ki ni. Pu ya ta nɛ wo saliya wu koo ɲaari wɛ, na kadugo le nɛ wo kodorogoo ki ni, kiimu sipya ya yaa na ɲaari, kɔnhɔ mʼa ɲiifɛɛrɛ pye ki baraga ni ge. A pʼi nɛ wo cadɛɛnyɛ yi nɔhɔgana kolo. A nɛ li kɔn nayɛ funŋɔ ni jo di na wo loyire niguunɔ li tirige pu na siwaga ki ni, di pu ɲuŋɔ tugo. 14 Ga na wo mɛgɛ ki wuu na, nɛ ta lee pye wɛ. Fiiye yatii shɛɛn piimu ɲii na nɛ pu yeege Misira fiige ki ni ge, kɔnhɔ na mɛgɛ ganha bu gyɛɛgi pee tɛ ni wɛ. 15 A nɛ gàa pu mu sanha siwaga ki ni ni na keŋɛ ki yirige wu ni, jo fiige kemu nɛ bi kan pu mu, ni kʼa fúu nujirimɛ ni sɛrɛ na, na ɲɛ fiiye yi bɛɛri wo nijeŋɛ ge, jo nɛ da pu ɲaha co di jé kee ni wɛ. 16 Lee bɛɛri ya pye ma li kaɲuŋɔ pye pʼa kadugo le nɛ wo kodorogoo ki ni, pu ya na saliya wu koo ɲaari wɛ, na na cadɛɛnyɛ yi nɔhɔ, bani pu zɔlɔɔ pu bi nɔrɔ yaha pu yapɛrɛɛ ki na. 17 Ga lee bɛ ni li wuu ni, a nɛ ɲuŋɔ ɲaari pu na. Nɛ ta pu kyɛɛgi wɛ, nɛ ta pu ɲuŋɔ tugo siwaga ki ni wɛ. 18 A nɛ yi jo pu jalaa pu mu siwaga ki ni jo “Yi ganha bu daha yi sefɛɛ pu wo saliyaa pu fɛni wɛ, yi ganha ba pu wo kodorogoo ki ɲaari wɛ, yi ganha ba yiyɛ nɔrɔgɔ ni pu wo yapɛrɛɛ ki ni wɛ! 19 Tɛhɛnɛ Baa Kilɛ nɛ ɲɛ, yee wo Kilɛ we. Yʼa na wo saliyaa pu koo ɲaari, yʼi kasɛɛgɛ yaha na wo kodorogoo ki na, yʼi da ki koo ɲaari. 20 Yi na cadɛɛnyɛ yi pye fɛfɛɛrɛ caya, yee na ba bye ɲaha shɛshɛɛrɛ nɛ ni yee tɛ ni, kɔnhɔ yʼi li cɛ na Tɛhɛnɛ Baa Kilɛ nɛ ɲɛ, yee wo Kilɛ we.”
21 « ‹Ga a jalaa pu bɛ di ɲuŋɔ nari nɛ na. Pu ya ta taha nɛ wo saliyaa pu fɛni wɛ. Pu ya ta sɔɔ na nɛ wo kodorogoo ki ɲaari wɛ, kee kiimu sipya ya yaa na ɲaari, kɔnhɔ mʼa ɲiifɛɛrɛ pye ki baraga ni ge. Pʼa nɛ cadɛɛnyɛ yi nɔhɔ. A nɛ li kɔn nayɛ funŋɔ ni jo di na wo loyire niguunɔ li tirige pu na siwaga ki ni, di na loyire li kuuri fo li tɛhɛnɛ na pu na. 22 Ga na wo mɛgɛ ki wuu na nɛ nayɛ co pu tàan. Fiiye yatii shɛɛn piimu ɲii na nɛ pu yeege Misira fiige ki ni ge, kɔnhɔ na mɛgɛ ganha bu gyɛɛgi pee tɛ ni wɛ. 23 A nɛ gàa pu mu sanha siwaga ki ni ni na keŋɛ ki yirige wu ni, jo nʼa da pu caaga fiiye yatii shɛɛn pu tɛ ni, di pu caaga fiiye yi bɛɛri ni. 24 Bani pu bi nɛ wo kodorogoo ki ɲaari wɛ, na kadugo le nɛ wo saliyaa pu ni, na nɛ wo cadɛɛnyɛ yi nɔhɔ, na ganha na gilee pu tii pu wo yapɛrɛɛ ki fɛni. 25 Saliyaa piimu pu ɲɛ pu ya ɲɔ wɛ ge, a nɛ pee kan pu mu, kodorogoo kiimu da já ɲiifɛɛrɛ kan pu mu wɛ ge, na kee kan pu mu. 26 Nɛ pu pye fɛfɛɛrɛ baa fɛɛ pu saraya yi wuu na, bani pʼa pu jashiilee pu bɛɛri pye saraya nizogoyo. Nɛ lee yaha lʼa pye, kɔnhɔ pu jaalaa di yìri, pʼi li cɛ na Tɛhɛnɛ Baa Kilɛ nɛ ɲɛ.› »
Kilɛ na ba Izirayɛli wo yapɛɛgaan li ɲɔ yereŋɛ
27 «Lee wuu na, sipyiyawyii, shɛ jo ni Izirayɛli puga ki ni, mʼa pu pye na yemu Kafɔɔ Tɛhɛnɛ Baa Kilɛ ya jo ge, na yee yi wa mɛ: ‹Yee tii pʼa nɛ fanha ni pu katiibaagaa ki ni.› 28 Nɛ bi kàa pu mu ni na keŋɛ ki yirige wu ni jo nɛ na ba fiige kemu kan pu mu ge, nɛ pu ɲaha co na kari kee ni. Ga ba pʼa jé wà wɛ, na ɲii yeege faabobotɔɔnyɔ yi bɛɛri ni titɔyɔ yi bɛɛri fɛni, na ganha na pu saraya yi wo wà, na pu mamama yakanya yi wo wà, na nɛ luu li yirige, na pu nudanga yawurire ti wolo wà, na pu saraya niwoyo yi wolo wà. 29 A nɛ pu yege jo: ‹Ye gan tapyeye ye ni yee wa se na gan wu pyi ge, yee di ɲɛ ɲaha wɛ?› A pʼi yee mɛgɛ le na gan tapyeye, fo na pa nɔ niɲaa na.
30 «Lee wuu na, yi jo Izirayɛli puga ki mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye: ‹Nɛ go nɔhɔmɔ ni yee wa yiyɛ leni yi tii pu shi wɛ? Pu yapɛrɛɛ kee, nɛ go yee tanhaŋa yaŋmuyɔ yi ni yee wa dɔdɔɔrɔ pyi wɛ? 31 Yee ba yi yakanya yi kaan yapɛrɛɛ mu, na yi nagoo pu sorogo na ni, nɔhɔmɔ ni yee ya yiyɛ leni ni yi yapɛrɛɛ ki bɛɛri ni, fo na pa nɔ niɲaa na. Na yee yaha pee yahama pu ni, nɛ ma nayɛ yaha yee mu yee pu yege ya Izirayɛli nagoo? Nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, nɛ da ga nayɛ yaha yi mu yi yege wɛ.› 32 Yee wa yu na: ‹Wèe funŋɔ ki wa wù bye ba fiiye yatii shɛɛn pu ɲɛ wɛ, wù bye ba fiiye yisaya wo sipyii pu ɲɛ wɛ, wù da tiye ni faakagereye yi pɛlɛ.› Lee lemu yee wa gɔɔn yiyɛ funyɔ ni ge, lee wa da voro bada wɛ. 33 Nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, nakaara wa li ni wɛ, nɛ loyire wo na ba na keŋɛ ki fanha ki digi yee na, ni na sefɛɛrɛ ti ni. 34 Nɛ loyire wo na ba na keŋɛ ki fanha ke, ni na sefɛɛrɛ ti taga yee yeege fiiye yatii shɛɛn pu tɛ ni, fiiye yemu bɛɛri ni yʼa caaga ge, na yi yeege ye bɛɛri ni na pa binnɛ. 35 Nɛ na ba shɛ ni yi ni siwaga ki ni, na laraga kɔn shi wusama na, na shɛ kiiri kɔn wà yi na ɲaha ni ɲaha. 36 Nɛ kiiri wu kɔn yee tii pu na kɔngana lemu na Misira fiige ki wo siwaga ki ni ge, mu na nʼa da ba wu kɔn yee bɛ na. Kafɔɔ Tɛhɛnɛ Baa Kilɛ ɲɔjomɔ pi. 37 Nɛ na ba yee pye na dubyagbaha, na ganha na se ni yi ni na kariɲɛɛgɛ ɲɔmɛɛ li wo koo li ni. 38 Pii pʼa nʼa she leni puyɛ ni, na ɲuŋɔ nari nɛ na ge, nɛ na ba pee waa laha yi na. Fiige kemu ni pu wa nadadɛɛnrɛ na ge, nɛ na ba pu yeege kee ni, ga pu wa da ba shɛ digi Izirayɛli wo ɲiŋɛ ki na wɛ. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.
39 «Yee pi ge, Izirayɛli nagoo, yemu Kafɔɔ Tɛhɛnɛ Baa Kilɛ wa yu ge, yee yi wa mɛ: ‹Yʼa se, wa bɛɛri di shɛ wu yapɛrɛɛ kaan! Ga ta yee da ba nɛ ɲɔmɛɛ co mɛ lee kadugo na wɛ? Yee da ba nɛ mɛgɛ ki nɔhɔ nige ni yi yakanya ye, ni yi yapɛrɛɛ ki ni wɛ. 40 Bani Izirayɛli puga ki bɛɛri, piimu bɛɛri pu da ba bye fiige ki ni ge, pee bɛɛri na ba nɛ pɛlɛ na fɛfɛɛrɛ faaboboŋɔ ki na, Izirayɛli wo faabobotɔɔngɔ ki na. Kafɔɔ Tɛhɛnɛ Baa Kilɛ ɲɔjomɔ pi. Nɛ na ba sɔɔ yi mu wèe xuu wu ni. Nɛ na ba yi pyi jo yʼa ma yʼa yi yakanya yi kaan na mu, ni yi shinmashiimɛ wu wo saraga ke, na fara yaŋmuyɔ yi na, yemu bɛɛri yi da ba yɛri nɛ yahama ni ge. 41 Nɛ ba ba yi yeege fiiye yatii shɛɛn pu tɛ ni tuun wemu ni, fiiye yemu ni yʼa caaga ge, na yi pinnɛ na foro yee fiiye yi ni, nɛ na ba sɔɔ yi mu ba nudanga saraga ɲɛ mɛ wɛ. Nɛ na ba na fɛfɛɛrɛ ti shɛ yi niŋɛ ni fiiye yatii shɛɛn pu na. 42 Nɛ bi kaa ni na keŋɛ ki yirige wu ni, na fiige kemu wo ɲɔmɛɛ lɔ jo nɛ na ba ki kan yi tii pu mu ge, nɛ ba yi leŋɛ kee ni tuun wemu ni, yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. 43 Na yi yaha wee xuu wu ni, yi funŋɔ na ba do yi ɲaarigana li na, ni yi kapyegee ki bɛɛri ni, kee kiimu yʼa taga yiyɛ nɔhɔ ge. Kakuuŋɔɔ kiimu bɛɛri yʼa pye ge, kee shiige na ba bye yi na. 44 Nʼa da ba yi co na saha ni yi torogaguunɔ le, ni yi kapyegee niguuŋɔ ki ni wɛ, ga nʼa da ba saama pye yi mu nayɛ pyaa wo mɛgɛ ki wuu na. Wee tuun wu ni yi na ba li cɛ na Tɛhɛnɛ Baa Kilɛ nɛ ɲɛ. Kafɔɔ Tɛhɛnɛ Baa Kilɛ ɲɔjomɔ pi.› »