Yamɛɛ lemu lʼa suu cɛnri we ni wu nagoo pu na ge
«Mu nu we,
jɔgɔ wu bye wii wɛ? Cɛnri.
Wu nizinnɛgɛ ki bye cɛnrɛyɛ yi tɛ ni,
Cɛnripepinyɛ tɛ ni wʼa wu nagoo pu bii.
3 Wʼa wu pya nigin wa taanni,
a wee di ɲɛri cɛnripepinŋɛ,
na xaara cogana taanni,
na ganha na sipyii xaa.
4 A fiiye yatii shɛɛn di wu kaa logo,
na wu shan wege ni,
na tuuŋɔ le wu munaa na,
na gari ni wu ni Misira fiige ki ni.
5 Ba cɛnrizhɔ wʼa pa wu sige kanha wɛ,
na li cɛ na tadaŋa wa nige wɛ,
a wu bige ka bɛ lɔ,
na kee bɛ pye cɛnripepinŋɛ.
6 A kee di ganha na ɲaari cɛnrɛyɛ yi tɛ ni,
na ɲɛri cɛnripepinŋɛ,
na xaara cogana taanni,
na ganha na sipyii xaa.
7 A kʼi pu saanra piyɛyɛ yi jaa,
na pu kulogoo ki ɲɛri siwaya.
Wu mɛɛ li bi fyaara niguuro leŋɛɛ fiige ke,
ni ki sipyii pu bɛɛri ni.
8 Fiiye yatii shɛɛn piimu pʼa wu maha ge,
a pee di puyɛ pinnɛ wu fɛni
na yìri pu fiiye yi bɛɛri ni.
A pʼi wu pɛri ni jɔ̀ ni,
a wʼi do pu wege ki ni.
9 A pʼi tuuŋɔ le wu na,
na wu le saanga nagaŋa ka funŋɔ ni,
na gari ni wu ni Babilɔni saan wu mu.
A pʼi shɛ wu yaha kashɛn ɲaha kɔn kɔn piyɛyɛ ya ni,
kɔnhɔ pu ganha ba wu mujuu nuri nige
Izirayɛli wo faaboboyo yi na wɛ.
Yamɛɛ lemu lʼa suu ɛrɛzɛn tige ki na ge
10 Mu nu wu bye ba ɛrɛzɛn tige ɲɛ wɛ,
kemu ya nɔri gba lɔhɔ ɲɔ na ge.
Nagoo niɲɛhɛmɛɛ pu bye ki na, ni geye niɲɛhɛyɛ,
lɔhɔ ki ɲɛhɛ wu wuu na.
11 Maalaa nijemɛɛ pu bye ki na,
a pee di bye saannaa pu wo saanra pubegee.
A kʼi dɔnnɔ na foro tiire tisara bɛɛri ni.
Ki bi ɲaa na ma yaha fo taliige ni,
ki tɔɔngɔ ke ni ki geye yi ɲɛhɛŋɛ ki wuu na.
12 Ga kʼa kɔɔngi ni loyire ni, na ki wá ɲiŋɛ na.
A Kilɛ-nɔhɔ kafɛɛgɛ kʼi ki nagoo pu waha, a pʼi wo.
A ki geye nijeye yʼi waha, a na di yi sorogo.
13 Nimɛ a kee ɛrɛzɛn tige kʼi nɔri siwaga ni,
ɲiŋɛ na kemu kʼa waha, na ɲɛ lɔhɔ baa ge.
14 A na ka di foro ki geye yi ni,
na ki maalaa pee, ni ki nagoo pu sorogo.
Maraa nijemɛ ɲɛ nige ki na,
wemu na já bye saanra pubiin wɛ.»
Ke yogo ke kʼa pye yamɛɛ le, pu na ba ki cee yamɛɛ ni.