Kilɛ ya to wo jurumu fɔɔ tɔni ja mu wɛ
18
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Ɲaha na yee di le talenɛ le yu Izirayɛli fiige ki ni wɛ? Na: ‹Tii pu pʼa ɛrɛzɛn gereye kun, a jalaa pu wo ganhaa kʼi dɛrɛɛ tanha.› 3 Nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, yee wa da ba le talenɛ le yu nige Izirayɛli fiige ki ni wɛ. 4 Oo dɛ munahaa ki bɛɛri ki ɲɛ nɛ wogoo, ja fara to na, pu bɛɛri pu ɲɛ nɛ wuu. Wemu ba jurumu pye weefɔɔ wʼa da xhuu.
5 «Sipya wemu wʼa tii ge, wemu wʼa tifire keree pyi, na tiimɛ koo ɲaari ge, 6 wu di ya sɔɔ wʼa faaboboyo yi wo saraya yaligee ki li wɛ, wu di ya se Izirayɛli nagoo pu wo yapɛrɛgbaya yi ni wɛ, wu di ya wu sipyiɲii shɔ nɔhɔ muri wɛ, wu di ya sinnɛɛ ni cee ni wu lowuuyo tuun ni wɛ, 7 wu di ya wu sipyiɲii toɲɔni wɛ, wa bu foo lɔ wu mu, na yaaga ka tiimɛ li ɲuŋɔ tàan, wʼa kee tɛrɛŋɛ ki fɔɔ na; wu ya nagaara pyi wɛ, na xuugo foo kaan wu yaligee ni, na fàya kaan fafunmɔ fɔɔ mu; 8 wu ya fɔɔ leni wu ɲudahara taha li na wɛ, wu di da kuduun watii bɛ sha wɛ; wu keŋɛ ya jin katiibaana ni wɛ, na kiiri kɔɔn ni tifire ni; 9 na nɛ wo saliya we, ni nɛ wo kodorogoo ki koo ɲaari, na ɲaari na sahaŋi ni can wu ni, weefɔɔ wʼa tii, wufɔɔ na ba ɲiifɛɛrɛ pye nakaara baa.» Kafɔɔ Tɛhɛnɛ Baa Kilɛ ɲɔjomɔ pi.
10 «Ga wufɔɔ bu ja se wemu ya kanɔhɔyɔ pyi, na gbuuro pyi, kelee na le kakuunɔ lela shi pyi wu ceboro wa na, 11 ma li ta tofɔɔ wu ya ta lee kakuunɔ la shi pye wɛ, jafɔɔ wu ba saraya yaligee li faaboboyo yi na, na wu sipyiɲii shɔ nɔhɔ muri, 12 na funmɔ fɛɛ ni labaafɛɛ toɲɔni, na nagaara pyi, wa bu yaaga ka tiimɛ wu mu kaa la ɲuŋɔ tàan wu da kee tɛrɛŋɛ weefɔɔ na wɛ, na yapɛrɛɛ kaan, na tanhaŋa keree pyi, 13 na fɔhɔɔ leni na ɲudahara tɛri ki na, na kuduun watii bɛ shaa. Ta wee ja we na ɲiifɛɛrɛ pye? Wu da ga ɲiifɛɛrɛ pye wɛ. Wʼa kii tanhaŋa keree kii bɛɛri pye, nakaara baa wu na ba gbo. Wuyɛ pya kabee na ba bye wuyɛ na.
14 «Ayiwa, wee bɛ ba ja wa se, a wee ja wu wu to wu wo kakuuŋɔɔ ki bɛɛri ɲa, wu bu ki ɲa, wu di ya sɔɔ na kee kakuuŋɔɔ ki shi pyi wɛ, 15 wu bye wu di ya saraya yaligee li faaboboyo yi na wɛ, wu di ya Izirayɛli nagoo pu wo yapɛrɛɛ ki kaan wɛ, wu di ya wu sipyiɲii shɔ nɔhɔ muri wɛ, 16 wu ya sipya toɲɔni wɛ; wa bu yaaga ka tiimɛ wu mu, wu da kee ɲɛri di bye wu wogo wɛ; wu ya nagaara pyi wɛ, na xuugo fɔɔ kaan wu yaligee ni, na faya kaan fafunmɔ fɔɔ mu; 17 wu ya katiibaana la shishiin pyi wɛ, wu di ya ɲudahara tɛri wu foo fɔɔ na wɛ, wu di da kuduun watii bɛ sha wɛ, na nɛ wo kodorogoo ki koo ɲaari, na na saliya wu koo ɲaari, wee ja wu da xhu wu to wu wo nahama pu wuu na wɛ. Nakaara baa wu na ba ɲiifɛɛrɛ pye. 18 Wu to wu wu bi dun sipyii na, na wu sipyiɲii yaŋmuyɔ yuli, na katiibaagaa pyi wu fiige shɛɛn pu na ge, wee wu da xhuu wu wo nahama pu wuu na.
19 «Yee wa yu na ɲaha na to wo jurumu foo di ya dɔni wu ja mu-i wɛ? Bani jafɔɔ wʼa can ni tiimɛ koo ɲaari, wʼa kasɛɛgɛ yaha nɛ wo saliyaa pu bɛɛri na, na pu koo ɲaari. Nakaara baa, wu na ba ɲiifɛɛrɛ pye. 20 Sipya wemu bu jurumu pye, weefɔɔ wu da xhuu. Ja wa da ɲuŋɔ le tofɔɔ wo nahama tàan wɛ, tofɔɔ bɛ di wa da ɲuŋɔ le jafɔɔ wo nahama tàan wɛ. Tiimɛ fɔɔ wo tiimɛ pu na ba digi wu na, kuumɔ fɔɔ bɛ wo kuumɔ pu ma digi wu ɲuŋɔ ni.
Sipya ya yaa na tiimɛ koo ɲaari tuun bɛɛri ni
21 «Ayiwa, sipyikuuŋɔ ya jurumu wemu bɛɛri pyi ge, wu bu kadugo le wee ni, na kasɛɛgɛ yaha nɛ wo saliyaa pu bɛɛri na, na ganha na tiimɛ ni tifire koo ɲaari, nakaara baa, wu na ba ɲiifɛɛrɛ pye, wu da xhuu wɛ. 22 Jurumu wemu bɛɛri wʼa pye toro ge, wee da dɔrɔ wu fɛni wɛ. Tiimɛ koo lemu wʼa ɲaari ge, wu na ba ɲiifɛɛrɛ pye lee wuu na. 23 Ta sipyikuuŋɔ wo xu wu wa nɛ wo ɲidaan can can na ya? Wu bu ɲɛri, na wu koo niguunɔ li yaha, na ɲiifɛɛrɛ pye, lee li wa nɛ wo ɲidaan we. Kafɔɔ Tɛhɛnɛ Baa Kilɛ ɲɔjomɔ pi. 24 Sipya wemu wʼa tii ge, wee bɛ bu tiimɛ pu koo yaha, na keŋɛ le katiibaagaa ni na byi, kakuubyii ya tanhaŋa keree kiimu bɛɛri pyi ge, wu bu jé kee bɛɛri ni na byi, ta wu na ɲiifɛɛrɛ pye ya? Wʼa tiimɛ pemu bɛɛri pye ge, wa funŋɔ da do nige pee na wɛ. Tiibaara temu wʼa byi, ni jurumu wemu wʼa byi ge, yee wuu na wu da xhuu.
25 «Yee wa yu sanha bɛ na: ‹Kafɔɔ wo korogoo ki ya ta saha wɛ› Ayiwa, Izirayɛli wo puga ke, yi ɲuwegee shan! Ta nɛ wo korogoo kii ki wa ki ya saha can na-ɛ ya? Ta yee wo korogoo ki bɛ ki wa ki ya saha-i wɛ? 26 Sipya wemu wʼa tii ge, wee bu tiimɛ pu koo li yaha, na ganha na tiibaara pyi, wu bu xhu lee wuu na, wu tiibaara wuu na wʼa xu. 27 Sipyikuuŋɔ bi kuumɔ pemu pyi ge, wu bu pee ɲɔ yaha, na ganha na tiimɛ ni tifire keree pyi, wu na wu munaa li ɲuŋɔ wolo. 28 Wu bu wu ɲìi ki mugi, kakuuŋɔɔ kiimu bɛɛri wʼa pye ge, na kee wii, na ki yaha wà, wu na ɲiifɛɛrɛ pye, wu da xhuu wɛ.
29 «Ga lee bɛ na Izirayɛli puga ki wa yu na: ‹Kafɔɔ wo korogoo ki ya tii wɛ.› Izirayɛli puga ke, ta nɛ wo korogoo kii ki ɲɛ ki ya saha wɛ ya? Ta yee wo korogoo ki bɛ ki wa nidiibaagaa ki wɛ? 30 Lee wuu na, nʼa da ba yee wa bɛɛri wo kiiri wu kɔn na saha ni wu kapyegee ki ni, Izirayɛli puga ke.» Kafɔɔ Tɛhɛnɛ Baa Kilɛ ɲɔjomɔ pi. «Yi kuri kadugo, yʼi yi saliya kyɛɛgɛrɛ ti bɛɛri ɲɔ yaha, kɔnhɔ yi wo tiibaara ti ganha bu bye kaɲuŋɔ di da yi tɔɔgɔ leni jurumu ni wɛ. 31 Saliya kyɛɛgɛrɛ temu bɛɛri yʼa pye ge, yi foro tee bɛɛri ni, yʼi yi zɔlɔɔ pu ɲɛri pye nivomɔɔ, yʼi yi ɲiifɛɛrɛ ti bɛ ɲɛri nivɔrɔ. Ɲaha fɛni yʼi wa giin di xhuu wɛ, Izirayɛli puga ke? 32 Sipya wa shishiin wo xu ɲɛ nɛ ɲidaan wɛ. Kafɔɔ Tɛhɛnɛ Baa Kilɛ ɲɔjomɔ pi. Lee wuu na yi kakuuŋɔɔ ki yaha, kɔnhɔ yʼi ɲiifɛɛrɛ pye.»