Talenɛ lemu lʼa jo ɲaanaa shuun we ni ɛrɛzɛn wu shizhaa na ge
17
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, kafila giraŋa ka cee Izirayɛli puga ki mu, kafila talenɛ la jo pu mu! 3 Mʼa pu pye na yemu Tɛhɛnɛ Baa Kilɛ wa yu ge, na yee yi wa ye:
‹Ɲaa tabaaga ke, kee kemu kapaya yʼa tɔnnɔ ge,
kee kemu kʼa ki kapaya yi pii ge,
kee kemu wo shiire tʼa tɔ, na ɲɛgɛlɛ ge,
kee ya pa fo Liban fiige ki ni,
na ba sɛdiri tige ki ɲidii li kɔn.
4 Geŋɛ kemu kʼa tɔnnɔ geye yi bɛɛri ni ge, a wu ba kee kɔn,
na gari ni ki ni kegaaŋa fiige ka ni,
na shɛ ki yaha jagipyii kulo la ni.
5 Lee kadugo na, a wu fiige ki wo fige ka lɔ,
na shɛ kee le tiire gaaŋa ka ni.
A wu shɛ ki nɔri logbɔyɔ ya ɲɔ na,
ba sɔli tige ɲɛ mɛ lɔhɔ na dan ki ni wɛ.
6 A kee fige ki fun, na ɲɛri ɛrɛzɛn geŋɛ nijeŋɛ,
ga ki ya yìri fugba ni wɛ, fo na fúu ɲiŋɛ na.
A ki geye yʼi ɲaha tagi ɲaa wu yíri,
a ki niyɛ yʼi bye ɲaa wu nɔhɔdaan.
A kʼi ɲɛri ɛrɛzɛn tige,
na geye shan, na maalaa yeege.
7 Lee kadugo na, a ɲaa tabaaga kabɛtii di foro,
ki bɛ wo kapaya yʼa pɛlɛ,
ki shiire ti bɛ dʼa tɔ.
Ayiwa, a ɛrɛzɛn tige kʼi ki niyɛ
yi ɲaha ɲɛri wee ɲaa wu yíri,
na ki geye yi tagi wu yíri,
kɔnhɔ wu da lɔhɔ leni ki ni.
8 Ma li ta bɛ, ki bi nɔri ɲijeŋɛ na,
logbɔhɔyɔ ya tàan,
kɔnhɔ kʼi geye shan, kʼi nagoo pye,
kʼi ba bye ɛrɛzɛn tige nijeŋɛ.›
9 Yi jo pu mu na
yemu Kafɔɔ Tɛhɛnɛ Baa Kilɛ wa yu ge,
na yee yi wa mɛ:
‹Ta kee ɛrɛzɛn tige ki na baraga ta ya?
Ta ɲaa nizhiimɛ wu da ba ki niye yi wolo,
na ki nagoo pu kɔn, kɔnhɔ kʼi waha wɛ?
Ki maalaa pu bɛɛri na ba waha waha.
Fanha katii, kelee sipyiɲɛhɛmɛɛ wa da ba sha
di zhɛ ki kɔɔngi wɛ.
10 Ayiwa, kee ɛrɛzɛn tige ki nɔrɔmɔ kunni bi ɲɔ.
Ga, ta ki na ba baraga ta ya?
Kilɛ-nɔhɔ kafɛɛgɛ ki ba nɔ ki na,
ta ki da waha wɛ?
Oo dɛ, ki na waha ki tanɔrɔgɔ ki yɛ pyaa ni.› »
Kafila talenɛ li kɔ́ri
11 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 12 «Yi jo ke nʼa she fɛɛ puga ke mu na ta pu ya le kafila talenɛ le kɔ́ri cɛ-ɛ ya? Yi jo pu mu na Babilɔni fiige ki saan wʼa kari Zheruzalɛmu kulo li ni, na shɛ saan we, ni ɲuŋɔfɛɛ pu co na kari Babilɔni ni. 13 Lee kadugo na, a wu saan wu puga shɛn nigin wa lɔ, na kariɲɛɛgɛ ɲɔmɛɛ lɔ ni wee ni, na wee teŋɛ na pye saan, na wu pye wʼa kàa wu mu. Lee bi wu ta wʼa kari xɔ ni fiige ki sipyigbɔɔ pu ni. 14 Wʼa lee pye kɔnhɔ fiige ki fanha kʼi xhɔ yaha, ki ganha bu já fanha ta wɛ, kʼi gori yaha kariɲɛɛgɛ ɲɔmɛɛ li ni, kʼi gori ɲɔmɛɛ fɛɛrɛ ni. 15 Ga a wee saan nivomɔ wu ba nʼa she le wuyɛ ni na wá Babilɔni saan wu na, na tudunmɔɔ tun kari Misira fiige ki ni, na pu shɔnyɔ ni sipyiɲɛhɛmɛɛ yaha pa pu mu. Sipya wemu wʼa lee la shi pyi ge, ta wee na já se ta ya? Ta wu na já zhɔ ya? Wʼa kariɲɛɛgɛ ɲɔmɛɛ li kyɛɛgi, wu sanha na já shɔ shɔgana lekɛ na wɛ? 16 Nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, nakaara wa li ni wɛ, saan wemu wʼa bi wu teŋɛ na pye saan ge, wee saan wu wo fiige ni wʼa da ba shɛ xhu, Babilɔni fiige ki ni. Bani kaa ke wʼa bi kaa wee saan wu mu ge, wu ya ta kee wii yaaga wɛ, wu di ya ta kariɲɛɛgɛ ɲɔmɛɛ li bɛ koo ɲaari wɛ. 17 Ali Misira fiige ki saan wu mɛhɛ ba ni kashɛnŋmuu niɲɛhɛmɛɛ baraga wuu ni, pu wa da já ba wu ɲuŋɔ wolo kashɛn tuun ni wɛ. Bani Babilɔni shɛɛn pu na ba taduguyo ya yàa, na kataduguyo ya yàa, kɔnhɔ pʼi sipyiɲɛhɛmɛɛ ɲuŋɔ tugo. 18 Izirayɛli saan wu ya ta kariɲɛɛgɛ ɲɔmɛɛ li koo ɲaari wɛ, kaaga kemu wʼa kàa ge, wu ya ta kee wii yaaga wɛ. Wʼa le pye, ma li ta bɛ wu bi wu ɲɔmɛɛ kan Babilɔni saan wu mu. Na taha lee na, wu da ga shɔ wɛ. 19 Lee wuu na yemu Kafɔɔ Tɛhɛnɛ Baa Kilɛ wa yu ge, yee yi wa mɛ: Nɛ ɲìi wo wu mɛgɛ ki wuu na, nakaara wa li ni wɛ, nɛ wo kaaga wʼa yaha kadugo yíri, na nɛ wo kariɲɛɛgɛ ɲɔmɛɛ kyɛɛgi. Nɛ na ba lee wo tuguro shan wu ɲuŋɔ ni. 20 Nɛ na ba na wo jɔ̀ wu wá wu na, wʼa jo nɛ wo tifuugo ki na. Nɛ na ba gari ni wu ni Babilɔni ni, na shɛ kiiri kɔn wu na wake, bani katiibaana wʼa pye na na. 21 Wu kashɛnŋmuu piimu bɛɛri pʼa fe na gbee ge, ŋmɔpara na ba pee bɛɛri gbo. Piimu ɲìi wuu pu da ba gori ge, pee na ba jaaga kabaya ye bɛɛri na. Yi na ba li cɛ lee funŋɔ ni na Tɛhɛnɛ Baa Kilɛ wʼa jo.
22 «Yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Nɛyɛ pyaa ki da ba sɛdiri tige ka wo ɲidii li wo maraa wa kɔn na shɛ nɔri. Nɛ na ba maraa wa kɔn ki geye yi ɲidii li ni, nɛyɛ pyaa na shɛ wu nɔri faaboboŋɔ ka na, kemu ya sii tɔnnɔ fo xuuni ge. 23 Faaboboŋɔ kemu kʼa tɔnnɔ Izirayɛli ni ge, nɛ na ba shɛ ki nɔri kee na. Ki na ba fun, na geye yeege, na nagoo pye. Ki na ba ɲɛri sɛdiri tige nigbɔhɔ nijeŋɛ. Shazhɛɛrɛ tuuyo ye bɛɛri na ba dun ki nɔhɔ ni. Ti na ba dun ki geye yi ɲimɛ pu ni. 24 Sige ki funŋɔ tiire ti bɛɛri na ba li cɛ lee funŋɔ ni na tige kemu kʼa bi yìri ge, na nɛ Tɛhɛnɛ Baa Kilɛ wʼa ki tirige, kemu kʼa bi tirige ge, na kee yirige. Na nɛ wʼa tipurege ki pye kʼa waha, na tiwaga ki pye kʼa fyɛn. Nɛ Tɛhɛnɛ Baa Kilɛ wʼa yi jo, nɛ shiin wʼa da li pye.› »