Kilɛ jomɔ ya jo wá Amɔ shi wu na
25
Ayiwa, a Tɛhɛnɛ Baa Kilɛ jomɔ pʼi nɔ nɛ na, na nɛ pye: 2 «Sipyiyawyii, ma ɲaha ki ŋmahana ɲɛri Amɔ shi shɛɛn pu yíri, mʼa Kilɛ tuduro jo wá pu na! 3 Yi jo Amɔ shi shɛɛn pu mu na pu Kafɔɔ Tɛhɛnɛ Baa Kilɛ wo jomɔ pu logo! Na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ na: ‹Tuun wemu ni nɛ fɛfɛɛrɛ xuu wʼa nɔhɔ ge, ni tuun wemu ni Izirayɛli fiige kʼa ɲɛri takoloŋɔ ge, ni tuun wemu ni pʼa Zhuda shɛɛn pu co na kari fiige katii ni ge, yee ya jo na: “Payi! Payi!” 4 Lee wuu na nʼa da ba yee kan Kilɛ-nɔhɔmɔɔ pu mu, pʼi bye yi kafɛɛ. Pu na ba pu buguloo pu sinni yi ɲiŋɛ ki na. Pu na ba pu tatɛɛnyɛ wo yi ɲiŋɛ ki na. Pee pu wa da ba yi yapyiire ti li. Pee pu wa da ba yi nujirimɛ pu gbuu. 5 Nɛ na ba Araba kugbɔɔ li ɲɛri na pye pu ɲɔhɔyɔ tanahaŋa, na Amɔ shi shɛɛn pu wo fiige ki ɲɛri na pye pu yapɔrɔyɔ tamaraga. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.›6 «Bani yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Yee ya kadahara kpɔn, fo na sirani fundanga keŋɛ ni Izirayɛli wo bɔɔngɔ ki wuu na. Lee funŋɔ ni yee ya yi wo funguuŋɔ ki shɛ Izirayɛli shizhaa na. 7 Lee wuu na nʼa da ba na keŋɛ ki yirige yee fɛni, na yee le fiiye yatii shɛɛn keŋɛ ni, pee na yi keŋɛ yaŋmuyɔ yi bɛɛri kuu. Nɛ na ba yi niŋɛ kɔn na wolo fiiye yatii shɛɛn pu tɛ ni, na yi fiige ki ɲuŋɔ tugo na foro fiiye yi tɛ ni, na yi shi wu xɔ. Lee funŋɔ ni yi da ba li cɛ na Tɛhɛnɛ Baa Kilɛ nɛ ɲɛ.› »
Kilɛ jomɔ ya jo wá Mowabu shi wu na
8 «Ayiwa, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Mowabu shɛɛn ni Seyiri shɛɛn pʼa jo na Zhuda wo puga ki bɛ ki ɲɛ ba shi wusama ɲɛ wɛ. 9 Lee wuu na nʼa da ba Mowabu kabanugo ka mugi di yaha wu pɛɛn pu mu. Kulogoo kiimu ki wa wu tɛhɛŋɛɛ ki na ge, nɛ na ba kee kyɛɛgi, kee kulogoo kiimu ki ɲɛ fiige ki kulogoo nizaaŋaa ki ge, ma na jo Bɛti-Yeshimɔti, ni Baali-Meyɔn, ni Kiriyatayimu. 10 Nɛ na ba wu ni Amɔ shi wu wo fiige ki bɛɛri ɲɔ yaha Kilɛ-nɔhɔ shɛɛn pu mu, na pye pu woyo. Lee bu bye Amɔ shi wu wo mɛgɛ ki na biin na foro fiiye yatii shɛɛn pu tɛ ni. 11 Nɛ na ba na wo kiiri wu shan Mowabu ɲuŋɔ ni, pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »
Kilɛ jomɔ ya jo wá Edomu shɛɛn pu na
12 «Ayiwa, yemu Kafɔɔ Tɛhɛnɛ Baa Kilɛ ya yu ge, yee yi wa mɛ: ‹Edomu shɛɛn pʼa keree kiimu pye na puyɛ logoo ɲiŋɛ Zhuda puga ki ni ge, pʼa pu wo loyire lemu niinɛ, fo na jaagi shan puyɛ ɲuŋɔ ni ge, 13 lee wuu na, yemu Kafɔɔ Tɛhɛnɛ Baa Kilɛ ya yu ge, yee yi wa mɛ: Nɛ na ba na keŋɛ ki yirige Edomu fiige ki fɛni, na sipyii pee ni yapɔrɔyɔ yi gbo, na fiige ki ɲɛri kataha, na co Tema kulo li na, fo na shɛ nɔ Dedan kulo li na, ŋmɔpara na ba pu bɛɛri gbo. 14 Nɛ na ba na wo sipyii, Izirayɛli nagoo pu lɔ na taga na wo loyire li foo tɔ Mowabu mu. Izirayɛli nagoo pu na ba Edomu fiige ki co na saha ni nɛ wo loyire le, ni na kafupege ki ni. Edomu shɛɛn pu na ba nɛ wo loyire li foo tɔgana cɛ lee funŋɔ ni. Kafɔɔ Tɛhɛnɛ Baa Kilɛ ɲɔjomɔ pi.› »
Kilɛ jomɔ ya jo wá Filisiti shɛɛn pu na
15 Ayiwa, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Filisiti shɛɛn pʼa pu loyire li foo tɔ, pʼa li foo tɔ ni pu zɔlɔɔ pu funguuŋɔ ki ni, na bɔɔngɔ pye na saha ni pu tɛhɛnɛ baa makɔŋɔ ki ni, 16 lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Nɛ na ba na keŋɛ ki sanha Filisiti shɛɛn pu fɛni. Nɛ na ba Kereti shɛɛn pu gbo, sipyii piimusamaa pu da ba gori suumɔ lɔhɔ ki ɲɔ na ge, nɛ na ba pee ɲuŋɔ tugo. 17 Nɛ na ba na wo loyire niguunɔ li kuuri pu ni. Nɛ ga ba na wo loyire li kuuri pu na, pu na li cɛ lee funŋɔ ni na Tɛhɛnɛ Baa Kilɛ nɛ ɲɛ.› »