Kilɛ jomɔ ya jo wá Tiiri kulo li na
26
Ayiwa, yee kɛ ni nigin wuu li wo yeŋɛ ki cazhiige ke, Tɛhɛnɛ Baa Kilɛ wo jomɔ pʼa nɔ nɛ na, na nɛ pye:2 «Sipyiyawyii, Tiiri kulo lʼa yi jo wá Zheruzalɛmu kulo li na na: ‹Oo dɛ, kulo lemu li bye shi wu bɛɛri wo tashɛgɛ ki ge, lʼa kyɛɛgi! Sipyiire ti bɛɛri tʼa da da ma nɛ yíri nimɛ. Nimɛ nɛ da ɲii naafuu na, Zheruzalɛmu ya ɲɛri kataha!› 3 Pee jomɔ pe wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Nʼa da yìri mu Tiiri fɛni! Nɛ na ba fiiye yi niɲɛhɛyɛ pye yʼa pinnɛ, na yìri ma kaa na, ba suumɔ lɔhɔ ma ki lokuruyo yirige mɛ wɛ. 4 Pu na ba Tiiri maha maha kasɔrɔyɔ yi ja, na zangasoo pu shan, nɛ ma puuro ti bɛɛri pɔ na kuu na laha wà, na xuu wu pye faaɲuŋmaga. 5 Tiiri kulo li na ba bye ɲiwaga, suumɔ lɔhɔ ki niŋɛ ni, jɔwaa na ba pu jɔlɔɔ cari kemu na ge, nɛ wʼa jo mu. Kafɔɔ Tɛhɛnɛ Baa Kilɛ ɲɔjomɔ pi. Tiiri ɲɔ na ba yaha fiiye yatii mu, yʼa wu kuu. 6 Wu mahama kulogoo kiimu ki wa ɲa funŋɔ kulogoo ki ni ge, ŋmɔpara na ba kee wo sipyii pu gbo, pʼa li cɛ lee funŋɔ ni na nɛ wu ɲɛ Tɛhɛnɛ Baa Kilɛ we.›
7 «Bani yemu Kafɔɔ Kilɛ ya yu ge, yee yi wa ye: ‹Nʼa da Nabukodonozɔɔri yaha ba Tiiri fɛni na yìri suumɔ kulo kacɛ ki na, Babilɔni wo saan we, saannaa pu wo saan we. Wu na ba ni shɔnyɔ ni, ni kashɛn wotoriyo, ni kashɛnŋmuu niɲɛhɛmɛɛ. 8 Wu na ba ma mahama kulogoo ki wo sipyii pu gbo ni ŋmɔpara ni. Lee kadugo na pu na ba taduguŋɔ ka yàa ɲiŋɛ ki na, na kataduguŋɔ ka yàa ma fɛni, na ŋmasigiŋɛ nagaŋa ka yàa. 9 Pu na ba yi kulo li kasɔɔtɔɔnyɔ yi ja ni pu kasɔrɔyɔ shan shan mazhii pu ni, na yi zangasoo pu shan ni pu mazhii pu ni. 10 Pu shɔnyɔ yi kafunnuŋɔ ki na ba ma tɔ. Pu shɔnduguloo pee, ni pu kashɛn wotoriyo ye, ni yi gɔrɔyɔ yi wo tunmɔ pu na ba ma kasɔrɔyɔ yi pye yi na jɛlɛ. Bani wu na ba jé ma kulo li ni, ba pu ma kapahaŋa kɔn mɛ kulo kasɔrɔgɔ na, na jé li ni wɛ. 11 Pu shɔnyɔ yi na ba fereye taga yi kakuutoroyo yi bɛɛri bugo, na ma sipyii pu gbo ni ŋmɔpara ni, na yi piyɛyɛ yi benɛɛ baraga wuu pu shan shan ɲiŋɛ na. 12 Pu na ba ma naafuu wu lɔ na pye kashɛn yataa, na ma jagi yaŋmuyɔ yi kuu, na ma kasɔɔtɔɔnyɔ yi shan, na pusaaya yi ja ja, na yi faaya ye, ni yi tiin kee, ni yi puuro ti lɔ na shɛ wá suumɔ lɔhɔ ni. 13 Nɛ na ba yi ciire ti mujoŋɔɔ ki xɔ, sipya da ga ba ma koni wa mɛɛ logo nige wɛ. 14 Nɛ na ba ma ɲɛri na pye faaɲuŋmaga, ma na ba ɲɛri jɔlɔɔ tacaaga. Sipya da ga ba ma yereŋɛvonɔ yereŋɛ nige wɛ. Nɛ Tɛhɛnɛ Baa Kilɛ wʼa jo mu, Kafɔɔ Kilɛ ɲɔjomɔ pi›.
15 «Yemu Kafɔɔ Kilɛ ya yu Tiiri mu ge, yee yi wa mɛ: Pu ba gbuuro ti ɲɔ kɔn na byi yee na tuun wemu ni, sipyibanaya yi ba ɲɔ kɔɔn na zhiin tuun wemu ni, ta yee wo kulo li do wu wo tunmɔ pu da ba fyaara leŋɛ suumɔ lɔhɔ niŋɛ takpiiye yi shɛɛn pu ni, fo pu na jɛlɛ wɛ? 16 Suumɔ lɔhɔ ki ɲɔ fiiye yi wo saannaa pu bɛɛri na ba digi na laha pu wo saanra korogoo ki na, na pu saannaa fàya yi wolo wolo, ni pu fadezuyo ye. Funbɛɛnrɛ na ba pu zɔlɔɔ pu ɲi, pʼa diin diin ɲiŋɛ na. Pu na ba jɛlɛ tuun bɛɛri ni, pu jaalaa pu na yìri fo xuuni mu wuu na. 17 Sipyii na ba le yamɛɛ le suu ma na, na yu:
Ba di gɛ! Ago mʼa curi,
mu kulo mɛgbɔhɔ wuu le,
suumɔ lɔhɔ ki baraga wuu le,
mu wemu suumɔ lɔhɔyɔ yi ɲaarivɛɛ
pu bi ma ba ɲi ge.
Mu ni ma sipyii pu bi ma mahama kulogoo
ki bɛɛri pye ki na jɛlɛ!
18 Suumɔ lɔhɔ takpiiye yi jaalaa ya yìri
nimɛ ma cadogo ke.
Mu na curi, lee ya funbɛɛnrɛ wá
suumɔ lɔhɔ ki takpiiye yi bɛɛri na.
19 «Bani yemu Kafɔɔ Kilɛ ya jo ge, yee yi wa mɛ: Nɛ ba ba ma ɲɛri na pye kataha tuun wemu ni, na ma pye kanna sipya bɛ sanha diin ɲa ma ni wɛ, nɛ ba ba suumɔ lɔhɔ ki pye kʼa yìri dugi ma fɛni, na ma li tuun wemu ni, 20 nɛ na ba ma tirige na shɛ yaha yaŋa kanha na ni xuu pu ni shiizhan, taashiinɛ li wo sipyii pu niŋɛ ni. Nɛ na ba ma tirige na shɛ yaha, fo ɲiŋɛ ki nɔhɔdaan tacogoyo yi ni, yee yemu yi ɲɛ tuun bɛɛri ni ba katahaya ɲɛ-ɛ ge. Piimu pʼa diri na se faya yi ni ge, ma bye wà ni pee ni, kɔnhɔ sipya wa shishiin ganha ga tiinnɛ pye ma ni nige wɛ, ma di wa da ga ɲa nige wyii pu wo ɲiŋɛ ki na wɛ. 21 Nɛ na ba ma pye funbɛnyaaga, na ma ɲuŋɔ tugo fɛɛfɛɛ. Pu na ba ma shaa, ga pu da ga ma sha di ɲa bada wɛ. Kafɔɔ Tɛhɛnɛ Baa Kilɛ ɲɔjomɔ pi.