Tiiri wo do wu wo yamɛɛ
27
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Mu sipyiyawyii, yamɛɛ le mʼa suu Tiiri kulo li na! 3 Tiiri wemu wʼa tiin suumɔ lɔhɔ ki ɲɔ na, na kegaaŋa pyi ni shi wu bɛɛri, ni suumɔ lɔhɔ niŋɛ takpiiye fiiye niɲɛhɛyɛ ni ge, yi jo wu mu na yemu Kafɔɔ Kilɛ ya jo ge, na yee yi wa mɛ:
‹Mu Tiiri, mu bi yu na:
“Nɛ saana lʼa fa tɛ tɛ!”
4 Ma fiige ki tɛhɛnɛ li wa,
fo taliige ni suumɔ lɔhɔ ki niŋɛ ki ni.
Piimu pʼa ma yereŋɛ ge,
pʼa ma yereŋɛ ɲɔ,
na ma saana li ɲɔ fa.
5 Seniri wo sipɛrɛ tiire ti pʼa kɔn,
na tee taga ma koɲɔgoyo
yi bɛɛri yàa ba kɔrɔ ɲɛ wɛ,
na Liban wo sɛdiri tige ka kɔn,
na kee yàa na pye ma kɔrɔ
li ɲuɲɔ wu wo fàŋa ki tapɔgɔ.
6 Bashan wo tiye ye, yee pʼa kɔn,
na yee tɛ na pye
lɔhɔ ki ka ka kabiinyɛ ye,
na ma funŋɔ ki yàa
ni Kitimua fiige ki wo sipɛrɛ tiye yi ni,
na suu ganhaa kaciiye taga yi wɔɔgɔ tɔ.
7 Misira fiige ki wo lɛn fàya ye,
yemu yʼa kemɛ su ge,
yee yi bye ma kɔrɔ li wo fatɔgbɔhɔ ke,
yee yi bi sipyii pyi pu na ma cɛni taliige ni.
Elisha fiige ki wo faɲɛɛyɛ ye,
ni bula ɲaha fàya ye,
yee yi bye ma kɔrɔ li wo tɔ tɔ fàya ye.
8 Sidɔn shɛɛn ni Arivadi shɛɛn,
pee pu bye ma kɔrɔ li paavɛɛ pee,
Piimu pʼa bi kɔrɔyɔ ɲaha cɛ xuuni
mu Tiiri yɛpyaa funŋɔ ni ge,
pee pu bi ma kɔrɔ li ɲaha ɲɛri.
9 Gebali kulo li nɔhɔlɛɛ ni li fungɔnyɔ fɛɛ,
pee bye mu yíri,
na kɔrɔ li takyɛɛgɛyɛ yi yari.
Suumɔ lɔhɔ ɲuŋɔ kɔɔgbɔyɔ yi bɛɛri,
ni yi kapyebyii pu bi ma mu mu,
na kegaaŋa pyi ni ma ni.
10 Ma kashɛn keŋɛ ki sipyii pu bye
Pɛrisi shɛɛn, ni Ludi shɛɛn, ni Puti shɛɛn,
pee pu bye ma kashɛnŋmuu pee.
Pee bi ma pu wo ŋmasigiye ye,
ni pu tɔɔrɔ ɲudɔyɔ yi suri suri ma funŋɔ ni.
Pee pʼa bi ma mɛgɛ ki pye kʼa foro.
11 Arivadi shɛɛn, ni ma kashɛnŋmuu pee, pee pu bi ma kasɔrɔyɔ yi ɲuŋɔ sigee. Gamadi shɛɛn, pee di ma zangasoo pu ɲuŋɔ sigee. Pee bi ma pu wo ŋmasigiye yi suri kulo li maha maha kasɔrɔyɔ yi na. Pee pu bi mu wo saana li pye li ɲɔ na fa.
Tiiri kulo lʼa pye kegaaŋa ki wo kugbɔɔ le
12 Tarisisi fiige ki bi kegaaŋa pyi ni mu ni, bani yaŋmuyɔ tuuyo niɲɛhɛyɛ yi bye mu mu. Pee bi pu wo warifyɛn we, ni pu tɔɔrɔ te, ni pu lɛtɛn we, ni pu pulɔn wu fari mu wo yapɛrɛyɛ yi na. 13 Zhavan shɛɛn, ni Tubali shɛɛn, ni Mɛshɛki shɛɛn bi kegaaŋa pyi ni ma ni. Pee bi buloo ni daɲaa tɔɔrɔ yaŋmuyɔ fari ma mu ma yapɛrɛyɛ yi na. 14 Bɛti-Togarima shɛɛn bi wotoriyo wo shɔnyɔ, ni kashɛn ŋmɔ ŋmɔ shɔnyɔ, ni shɔnyɔ kafaya pɛrɛɛ ma mu. 15 Dedan shɛɛn pu bɛ bi kegaaŋa pyi ni ma ni. Suumɔ lɔhɔ niŋɛ takpiiye shɛɛn niɲɛhɛŋɛɛ pʼa ma na ma yapɛrɛyɛ yi shuu. Suu ganhaa ni ebɛni tiin ki bye yapɛrɛyɛ yi wo pɛrɛmɛ pe. 16 Aramu shɛɛn pu bɛ bi kegaaŋa pyi ni ma ni ma yapɛrɛyɛ yi ɲɛhɛ wu wuu na. Pu bi ma na sikaribukili pɛɛwa faakagereye, ni pɛɛwa faɲɛɛyɛ, ni pɛɛwa fasuyo, ni lɛn fàya, ni pɛɛwa kuun, ni urubi pɛɛwa faakagereye fari ma wo yapɛrɛyɛ yi na. 17 Zhuda shɛɛn ni Izirayɛli shɛɛn pu bɛ bi kegaaŋa pyi ni ma ni. Pu bi ma na Miniti kulo li wo alikama myɛ pe, ni shinma, ni sɛrɛ, ni sìnmɛ, ni nudanga yaara fari ma yapɛrɛyɛ yi na. 18 Damasi shɛɛn pu bi kegaaŋa pyi ni ma ni ma yapɛrɛyɛ yi ɲɛhɛ wu wuu na, ma yaŋmuzaaya yi tuuyo niɲɛhɛyɛ yi wuu na. Pu bi ma na Ɛlibɔn shɛɛn wo duvɛn we, ni Saxhari shɛɛn wo dubya shiire ti fari ma yapɛrɛyɛ yi na. 19 Vedan shɛɛn ni Zhavan shɛɛn bi yìri Uzali mara wu ni, na ma na tɔɔrɔ, ni kaseb ni nudanga kagaangaa fari ma yapɛrɛyɛ yi na. 20 Fagbiliye yemu pʼa dɛri shɔnyɔ korogoo ki na ge, Dedan shɛɛn bi ma na yee fari ma mu ma yapɛrɛyɛ yi na. 21 Arabuu fiige ke, ni Kedari wo saannaa pu bɛɛri bi ma na kegaaŋa pyi ni ma ni. Pee bi ma na dubyapepinyɛ, ni dubyapelɛyɛ, ni sikapee fari ma mu. 22 Seba ni Arama kegaaŋa pyevɛɛ pu bi kegaaŋa pyi ni ma ni. Pee bi ma na nudanga yawurire ti bɛɛri wo nizaara te, ni pɛɛwa kagereye yi tuuyo yi bɛɛri, ni sanni fari ma mu. 23 Karan shɛɛn ni Kane shɛɛn ni Edɛni shɛɛn, ni Seba, ni Asiri, ni Kilimadi wo kegaaŋa pyevɛɛ pu bi kegaaŋa pyi ni mu ni. 24 Pee bi ma na kegaaŋa ki pyi ni fazaaya nijeye ni, ni faɲɛɛyɛ, ni fasuyo, ni fakuuyo nizaaya, ni mɛɛrɛ temu ya kemɛ shin ge. 25 Tarisisi wo lɔhɔ kɔrɔyɔ ye yi bi ma kegaaŋa yaŋmuyɔ yi luu.
Tiiri wo do wu wo yamɛɛ li sanha
«Ayiwa, Tiiri, mu bi ɲi kegaaŋa yaŋmuyɔ na,
mu bi ɲi na taanna ba kɔɔgbɔhɔ ɲɛ mɛ suumɔ lɔhɔ ni wɛ.
26 Kɔrɔyɔ paavɛɛ pʼa kari ni ma ni logbɔhɔyɔ yi na,
a Kilɛ-nɔhɔ kafɛɛgɛ kʼi yìri, na ma tɔnhɔnɔ suumɔ lɔhɔ ki ni.
27 Ma naafuu we, ni ma yapɛrɛyɛ ye, ni ma kegaaŋa ke, ni ma suumɔ lɔhɔ ki kapyebyii pee, ni ma kɔɔgbɔhɔ ki paavɛɛ pee, ni piimu pʼa kɔrɔyɔ yi yari ge, ni piimu pʼa ma kegaaŋa yaŋmuyɔ yi pɛrɛmɛ pu leni ge, ni kashɛnŋmuu piimu bɛɛri pu ɲɛ ma mu ge, ni sipyiire temu bɛɛri ti ɲɛ ma funŋɔ ni ge, pee bɛɛri na ba do suumɔ lɔhɔ ki ni ma cadogo ke.
28 Ma kɔɔgbɔhɔ ki paavɛɛ
pu wo sipyaa kee,
kee ya suumɔ lɔhɔ ki ɲɔ
ki sipyii pu pye pu na jɛlɛ.
29 Kɔrɔyɔ kabiinyɛ fɛɛ pu bɛɛri
na ba digi pu wo kɔrɔyɔ yi na,
Suumɔ lɔhɔ ki kapyebyii pee,
ni sipyiire ti bɛɛri na ba digi,
na yere ɲiŋɛ ki na.
30 Pu na ba mɛɛyɛ kɔɔn
na zhaan ma wuu na,
na funyaŋa sipyaa waa.
Pu na ba puuro woni pu ɲuyɔ yi ni,
na puyɛ gologolo shɔɔnrɔ ni.
31 Pu na ba pu ɲuyɔ yi xuu ma wuu na,
na bɔrɔyɔ le fàya tɛgɛ ni.
Pu funyaŋa wuu na ba sii mɛhɛɛ su ma na,
na tataara pye ni funyaŋa ni.
32 Pu funyaŋa ki funŋɔ ni,
pu na ba yamɛhɛɛ su ma na.
Pu na ba yamɛɛ li suu na yu na:
«Kulo lekɛ li bi Tiiri xɔ wɛ?
Kulo lemu wo mujoŋɔɔ kʼa yere suumɔ lɔhɔ ki na ge,
kulo lekɛ li bi li xɔ wɛ?»
33 Tuun wemu ni ma kegaaŋa yaŋmuyɔ yi bi doroo suumɔ lɔhɔ ki na ge, mu ya fiiye niɲɛhɛyɛ wo keree yaa. Mu ya ɲiŋɛ ki saannaa pu pye kabyaa fɛɛ ma wo kegaaŋa yaŋmuyɔ yi ɲɛhɛŋɛ ki baraga ni.
34 Ayiwa nimɛ, suumɔ lɔhɔ kʼa ma shan,
ma kegaaŋa ki yaŋmuyɔ ye,
ni ma funŋɔ sipyiire ti bɛɛri,
a yee di digi
suumɔ lɔhɔ ki nɔhɔdaan.
35 Mu keree ya suumɔ lɔhɔ niŋɛ takpiiye
yi shɛɛn pu bɛɛri fo,
a pu saannaa pu jaalaa di yìri,
a pu ɲawiinɛ lʼi ɲɛri funbɛɛnrɛ keŋɛ ni.
36 Lee ya fiiye yatii shɛɛn wo
kegaaŋa pyevɛɛ pu fo,
fo pu na gaala na siwegee wi ma wuu na.
Mʼa ɲɛri pye fyaara yaaga.
Ma wa nige wɛ,
ma di wa da ga bye bɛ nige bada wɛ!