Ɲibaŋa jomɔ na jo wá Tiiri na
28
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, yi jo Tiiri wo saan wu mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye: ‹Mu zɔ wʼa ɲi tabaara na, a mu di jo: “Kilɛ nɛ ɲɛ, kilɛlɛɛ tatɛɛngɛ ni nɛ tiin suumɔ lɔhɔ ki ɲuŋɔ ni!” Na ta mu di ɲɛ Kilɛ wɛ, ga fo sipya. Mu ya mayɛ pyaa ki wo zɔ wu wii na Kilɛ wo wu ɲɛ wii. 3 Mu ya mayɛ wii na mu ɲɛ fungɔngɔ fɔɔ na ye Daɲɛli na, ŋmɔhɔrɔ kaa la shishiin ya ŋmɔhɔ mu na wɛ. 4 Mu ya naafuu niɲɛhɛmɛ ta ma wo fungɔngɔ fɛɛrɛ te ni ma wo lajɛ wu baraga ni. Mu ya warifyɛn ni sanni mara yaha ma naafuu tayahaya yi ni. 5 Mu ya la fara ma naafuu wu ɲɛhɛ wu na ma wo kegaaŋa ki wo lajɛ wu baraga ni, a wee naafuu wu bye kaɲuŋɔ na tabaara le ma zɔ wu ni. 6 Lee wuu na yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: Ayiwa, ni ma di wa mayɛ pyaa ki wo zɔ wu wii kilɛ wo zɔ wiimɛ ni, 7 nʼa da ba nabuun yaha di ba ma fɛni, piimu pu ɲɛ kafupege fɛɛ fo xuuni ge. Pu na ba pu ŋmɔparaa ki taga ma fungɔngɔ fɛɛrɛ ti wo labye wu kyɛɛgi, na ma wo saana li kyɛɛgi. 8 Pu na ba ma tirige faŋa wege ki ni, ma xugana li na golo suumɔ lɔhɔ ki na. 9 Ta ma na ba já yere ma gbovɔɔ wu ɲahagbaa na sanha mʼa jo na Kilɛ ma ɲɛ ya? Mu da ga já bye Kilɛ ma gbovɔɔ wu keŋɛ ni wɛ, ga sipyiyawyii mu da ba bye wu keŋɛ ni. 10 Ma na ba xhu ba cekɔnbaa ɲɛ wɛ, fiiye yatii shɛɛn wo keŋɛ ni. Bani nɛ wʼa jo mu. Kafɔɔ Tɛhɛnɛ Baa Kilɛ ɲɔjomɔ pi.› »
11 A Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
12 «Sipyiyawyii, yamɛɛ la su Tiiri wo saan wu na! Yi jo wu mu na yemu Kafɔɔ Tɛhɛnɛ Baa Kilɛ wʼa yu ge, na yee yi wa ye na: ‹Yafiin la bi ma xuuŋɔ wɛ, ma bi ɲi fungɔngɔ fɛɛrɛ na, a ma saana li bɛ di fa. 13 Edɛni ni mu bye, Kilɛ wo tiire tɛgɛ ke. Pɛɛwa faaya ye tuuyo ye bɛɛri yi bi taga mu tɔ, sariduwani, ni topazi, ni luulu, ni kirisoliti, ni Onikisi, ni Zhasipu, ni safiiri, ni sikaribukili, ni emerodi, ni sanni. Ma yatinyɛ ye, ni ma sibeŋɛɛ ki bye ma wo labye wu na, yee bɛɛri bi gbegele yaha ma ɲaha na, fo caŋa kekɛ mʼa dà ge. 14 Nɛ bi mu pye serubɛn, kasɛɛgɛ pyevɔɔ, wemu wo kapaya yʼa pii ge. Kilɛ wo fɛfɛɛrɛ faaboboŋɔ ki na nɛ bi mu yaha, wà mu bi bye. Faakagereye naganɲigaa woyo yi tɛ ni mu bi ma ɲaari. 15 Na co caŋa kemu mu ya dà ge, mu ɲaarigana li bi ɲɔ fo xuuni, fo na pa nɔ caŋa kemu na tiibaara ya ɲa ma na ge. 16 Ma kegaaŋa kʼa taan ma na fo xuuni ge, a kafupege di jé ma ni, a ma ganha na kakuuŋɔɔ pyi. Lee wuu na nɛ ma kɔri laha Kilɛ wo faaboboŋɔ ki na, serubɛn kasɛɛgɛ pyevɔɔ, na ma kɔri yeege faakagereye naganɲigaa woyo yi tɛ ni. 17 Ma saana lʼa pye kaɲuŋɔ na tabaara leŋɛ ma zɔ wu ni. Ɲafɛ we wu ɲɛ ma na ge, a wee di bye kaɲuŋɔ na ma fungɔngɔ fɛɛrɛ ti kyɛɛgi. Lee wuu na nɛ ma kɔri wà ɲiŋɛ ki na, na ma pye yawiige saannaa pu mu. 18 Ma jurumu niɲɛhɛmɛ we ni tiibaara temu mʼa byi ma wo kegaaŋa ki ni ge, yee ya mu wo pɛɛŋɛ piyɛyɛ yi nɔhɔ. Lee wuu na nʼa da ba na le ma na, kee di ma sorogo. Nʼa da ba ma sorogo na pye shɔɔnrɔ ɲiŋɛ ke na, ma wiivɛɛ pu bɛɛri ɲii na. 19 Fiiye yatii shɛɛn piimu bɛɛri pʼa ma cɛ ge, ma keree na ba bye pee mu kakanhana. Ma na ba bye pu mu fyaara yaaga. Ma ɲɛ wà nige wɛ, ma di wa da ba bye wà nige bada wɛ!› »
Ɲibaŋa jomɔ na jo wà Sidɔn na
20 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
21 «Sipyiyawyii, ma ɲaha ki ŋmahana ɲɛri Sidɔn yíri, mʼa Kilɛ tuduro jo wá wu na! 22 Mʼa wu pye na yemu Kafɔɔ Tɛhɛnɛ Baa Kilɛ wa yu ge, na yee yi wa ye: ‹Nʼa da yìri ma fɛni Sidɔn! Nɛ na ba na wo nɔɔrɔ wu shɛ ma niŋɛ ki ni. Nɛ ba ba na wo kiiri wu shan ma ɲuŋɔ ni, pu na ba li cɛ lee funŋɔ ni na nɛ wu ɲɛ Tɛhɛnɛ Baa Kilɛ we. Nɛ na ba ma taga na wo fɛfɛɛrɛ ti shɛ. 23 Nɛ na ba kafɛɛgɛ yama tun ma mu, na shishan pye pu na fúu ma kakuutoroyo yi ni. Ŋmɔpara na ba yìri ma fɛni kabaya yi bɛɛri na, na xuu pu shaan ma niŋɛ ni. Pu na ba li cɛ lee funŋɔ ni na nɛ wu ɲɛ Tɛhɛnɛ Baa Kilɛ we.› »
Izirayɛli na ba ɲaɲiŋɛ ta
24 « ‹Lee bu bye, ma da ba bye nige xhuyo Izirayɛli nagoo pu mu, na pu waagi, kelee na pu sogolo, pu lawuuvɛɛ pu tɛ ni wɛ, pee piimu pʼa pu maha ge. Pu na ba li cɛ lee funŋɔ ni na nɛ wu ɲɛ Kafɔɔ Tɛhɛnɛ Baa Kilɛ we.›
25 «Yemu Tɛhɛnɛ Baa Kilɛ ya yu ge, yee yi wa mɛ: ‹Fiiye yemu ni Izirayɛli nagoo pʼa caaga ge, nɛ ga ba pu ɲɔ kɔn na gemɛɛ na binnɛɛ na yìri yee fiiye yi ni tuun wemu ni, nɛ na ba Izirayɛli nagoo pu taga na wo fɛfɛɛrɛ ti shɛ yee fiiye yi na. Pu na ba diin pu ɲiŋɛ ki na, kee kemu nɛ kan na kapyebye Yakuba mu ge. 26 Pu na ba diin wà ɲaɲiŋɛ na. Pu na ba piyɛyɛ yereŋɛ, na ɛrɛzɛn tiire nɔrɔgi. Pu mahama shɛɛn piimu bɛɛri pʼa pu la wo ge, nɛ ga ba na wo kiiri wu shan pee ɲuŋɔ ni tuun wemu ni, Izirayɛli nagoo pu ɲaɲiŋɛ wuu na ba diin pu ɲiŋɛ ki na. Pu na ba li cɛ lee funŋɔ ni na nɛ wu ɲɛ Tɛhɛnɛ Baa Kilɛ we, pu wo Kilɛ we.