Zheruzalɛmu kulo li ja wʼa jo
(2 Saannaa 25:1-3 ; Zheremi Ɲiɲaara Jomɔ 4:4-10)
4
Ayiwa, a Tɛhɛnɛ Baa Kilɛ di nɛ pye sanha na: «Sipyiyawyii, dufaan pile nigin lɔ ma yaha ma fɛɛ ni, mʼa Zheruzalɛmu kulo li jaa yàa li na. 2 Lee kadugo na mʼa kashɛn taga li ɲɔ tɔ. Mʼa kataduguŋɔ ka yàa li fɛɛ ni, mʼa taduguŋɔ yàa li fɛɛ ni. Mʼa kashɛn keye taga li maha, mʼa kasɔrɔyɔ shan shan mazhii sin sin ma li bɛɛri maha círi. 3 Mʼa tɔɔrɔ dagoŋɔ ka lɔ, mʼa kee sin ma pye tɔɔrɔ kasɔrɔgɔ ma ni kulo li tɛ ni, mʼa ma ɲaha ki tagi li yíri, mʼa kashɛn taga li ɲɔ tɔ, kashɛn di li ɲɔ tɔ. Shɛmɛ pu wa pere Izirayɛli wo puga ki mu.4 «Lee kadugo na mʼa sinnɛ ma kamɛnɛ cɛ kabanugo ki na, mʼa Izirayɛli puga ki wo jurumu wu tugo. Na ma nizinnɛgɛ yaha kee kabanugo ki na, cabyaa kiimu ma da ba bye lee ni ge, kee na ba bye Izirayɛli puga ki wo jurumu wu wo tuguro ma ɲuŋɔ ni. 5 Yee kiimu pʼa pye jurumu wu ni ge, kee ya bɛ ni cabyaa kiimu ni ge, di kee taha ma ɲuŋɔ ni. Lee funŋɔ ni ma na ba cabyaa xhuu taanri ni kɛlɛɛ gbarashɛɛrɛ (390) pye, na Izirayɛli puga ki wo jurumu wu tugo. 6 Kee cabyaa ki ɲɔ ba fa tuun wemu ni, ma na ba sinnɛ ma kanige cɛ kabanugo ki bɛ na, na Zhuda wo puga ki wo jurumu wu tugo na ta cabyaa kɛlɛɛ shishɛɛrɛ (40). Nɛ na ba yee nigin bɛɛri jate ma ɲuŋɔ ni ba caŋa ɲii nigin ɲɛ wɛ. 7 Mʼa ma ɲaha ki tagi Zheruzalɛmu kulo li yíri, kashɛn kʼa lemu kuuri ge, mʼa ma keŋɛ ki niwaga ki tii Zheruzalɛmu kulo li na, mʼa Kilɛ tuduro jo ma wá li na. 8 Nɛ na ba mɛɛrɛ taga ma pɔ, kɔnhɔ ma ganha bu ba kabanugo ka ɲɛri wɛ, kashɛn ki na ba Zheruzalɛmu kulo li kuuri na tuun wemu bɛɛri pye ge, fo na shɛ wee pye wʼa fa.
9 «Ayiwa nimɛ, mʼa da alikama lɔ, ni ɔrijɛ, ni caa, ni caaɲɛ, ni kalaga, ni shòo, mʼa yi wurege yiyɛ ni yaaga nigin funŋɔ ni, mʼa buuri wa yàa. Cabyaa xhuu taanri ni kɛlɛɛ gbarashɛɛrɛ (390) wemu ma da ba bye, ma nizinnɛgɛ ma kabanugo ki na ge, ma na ba wee buuri wu li yee caya yi na. 10 Yalige kemu ma da ba li caŋa ni ge, ma na ba ki taanna. Caŋa bɛɛri wo yalige ki tidugumɔ pʼa yaa na pye giramaa xhuu shuun (200), kee ma da ba li lee tɛɛ li bɛɛri funŋɔ ni. 11 Lɔhɔ ke ma da ba gbuu ge, ki bɛ na ba daanna. Ma na ba lɔhɔ litiri nigin gbuu caŋa ɲii funŋɔ ni, lee tɛɛ li bɛɛri funŋɔ ni. 12 Ma na ba ɔrijɛ gato xaa, na sipya fure taga na wu fúu pu ɲii na.» 13 A Tɛhɛnɛ Baa Kilɛ di nɔhɔ jo sanha na: «Nɛ na ba Izirayɛli nagoo pu kɔri di zhɛ fiiye yemu ni ge, le ligana le na pʼa da ba shɛ pu fɛfɛɛrɛ baa yaligee ki li yee fiiye yi ni.»
14 A nɛ jo: «Aa! Kafɔɔ Tɛhɛnɛ Baa Kilɛ, nɛ sanha dee nayɛ nɔrɔgɔ na ɲa wɛ. Na co na nɔhɔpiire ti tuun wu na, fo na pa nɔ niɲaa na, nɛ sanha yaxugo, kelee naŋa yaaga wo yacozaŋa xa wɛ. Xaara bɛɛri tʼa nɔhɔ ge, tee ta shishiin sanha jé ɲa nɛ ɲɔ ni wɛ.» 15 A wu nɛ pye: «Ayiwa, nɛ sɔɔ ma mu jo ma sipya fure ti yaha wà, ma da nù fure taga mʼa ma buuri wu fúu.» 16 Lee kadugo na, a wu nɛ pye sanha na: «Sipyiyawyii, nɛ na ba Zheruzalɛmu shɛɛn pu wo yaligee ki keree waha. Pu na ba pu yaligee ki taanna na li ni funbɛɛnrɛ ni, na pu logbaga ki taanna na gbuu ni fyaara ni. 17 Yaligee ni lɔhɔ na ba pu xuuŋɔ, fo na pu jaalaa yirige. Pu na ba shɔgɔ shɔgɔ pu jurumu wu keŋɛ ni.»