Zheruzalɛmu wo kiiri we
(Zheremi 15:1-7 ; Levitike 26:23-38 ; 1 Saannaa 9:6-9)
5
Ayiwa, a Tɛhɛnɛ Baa Kilɛ di nɛ pye: «Sipyiyawyii, ŋmɔpara ɲɔtaan wuu la lɔ ma pye ɲuxhuupɔrɔgɔ, mʼa lee taga ma ɲuŋɔ ke ni ma ɲahazhɔ wu xuu. Lee kadugo na mʼa tidugumɔ daanna yaaga ki lɔ, mʼa shiire ti taanna, mʼa ti taa taaya taanri. 2 Ma na ba kashɛn taga kulo li maha na cabyaa kiimu ta ge, kee ɲɔ ba fa, mʼa taaga nigin wa sorogo na ni kulo li niŋɛ ki ni. Mʼa taaga nigin wa lɔ, ma da ma ŋmɔpara li taga mʼa ti sani mʼa kulo li mari. Mʼa taaga nigin wusama caaga kafɛɛgɛ ki ni. Nɛyɛ pyaa na ba yìri pu fɛni ni ŋmɔpara ni. 3 Mʼa ɲuzhigee nifɛnhɛfɛnhɛŋɛɛ kii lɔ yaha, mʼa kee pɔ ma fadegeŋɛ ki ni. 4 Temu mʼa lɔ yaha ge, mʼa ta wolo tee ni sanha, mʼa tee le na ni. Na ka na ba foro Izirayɛli puga ki bɛɛri fɛni.»5 Yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Zheruzalɛmu we! Nɛ bi wu teŋɛ fiiye yatii shɛɛn pu tɛ ni, na fiiye yatii taga wu maha. 6 Wʼa nʼa she le wuyɛ ni na wá nɛ wo kodorogoo kee ni nɛ wo saliya wu na. Wu kuumɔ pʼa pɛlɛ na ye fiiye shɛɛn pee, ni fiiye yatii shɛɛn pu wo pu na pee piimu pʼa wu maha ge. Bani pʼa nɛ wo kodorogoo ki she, pu ya ta sɔɔ na taha nɛ wo saliya wu fɛni wɛ.» 7 Lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Yee ya ɲuŋɔ nari nɛ na na toro fiiye yatii shɛɛn pu tàan, pee piimu pʼa yee maha ge, yee ya ta taha nɛ wo saliya wu fɛni wɛ, yʼi wa ta nɛ wo kodorogoo ki ɲaari wɛ. Ali fiiye yatii shɛɛn piimu pʼa yee maha ge, yee ya ta pee bɛ wo kodorogoo ki ɲaari wɛ.» 8 Lee wuu na yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Nɛyɛ pyaa ki da ba kadugo le ma ni! Nɛ na ba kiiri kɔn ma na kulo li niŋɛ ki ni, fiiye yatii shɛɛn pu ɲii na. 9 Ma tanhaŋa keree ki wuu na nʼa da ba kaa pye ma na, kaa lemu li ɲɛ nɛ sanha dee li shi pye ɲa ma na bada wɛ, di wa da li shi tuugo bɛ pye nige ma na bada wɛ. 10 Lee funŋɔ ni, tii na ba pu jalaa xa le kulo le ni, jalaa bɛ na pu tii xa. Nɛ na ba na kiiri wu shan ma ɲuŋɔ ni, piimusamaa pu da ba gori ma ni ge, na pee caaga kabaya yi bɛɛri na.»a
11 «Lee wuu na, nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, Nakaara baa, nɛ bɛ na ba kadugo le ma ni, nɛ da ba ɲuŋɔ ɲaari ma na wɛ, bani mʼa na fɛfɛɛrɛ xuu wu nɔhɔ ni ma yapɛrɛɛ kee, ni ma wo tanhaŋa keree ki bɛɛri ni. 12 Ma sipyii pu taaga taanri wogo ka na ba xhu kafɛɛgɛ yama keŋɛ ni, kelee xuugbɔhɔ na pu ɲuŋɔ tugo yi tɛ ni. Ŋmɔpara na taaga taanri wogo ka gbo na ma maha, nɛ ma taaga taanri wogo kisaŋa caaga kabaya yi bɛɛri na, na ŋmɔpara yirige pu fɛni.
13 «Nɛ na ba na loyire li niinɛ fo li tɛhɛnɛ, nɛ na ba na loyire li kuuri pu ni, fo na na luu li ɲiŋɛ. Nɛ ba na loyire li kuuri pu ni, fo li tɛhɛnɛ na tuun wemu ni, pu na ba li cɛ lee funŋɔ ni na nɛ wu ɲɛ Kafɔɔ Tɛhɛnɛ Baa Kilɛ we, naŋmege wa wemu ni ge. 14 Nɛ na ba ma pye kataha, na ma pye fanhara yaaga fiiye yatii shɛɛn pu mu, pee piimu pʼa ma maha ge, ni kodoroloo pu bɛ ɲii na. 15 Nɛ ba na kiiri wu shan ma ɲuŋɔ ni ni loyire ni kafupege ni tuun wemu ni, na kawagaa niguuŋɔɔ shan ma ɲuŋɔ ni, fiiye yatii shɛɛn piimu pʼa ma maha ge, pee na ba ma fanri, na ma shɛhɛlɛ. Ma na ba bye pu mu ɲaha shɛshɛɛrɛ ni funbɛnyaaga. Nɛ Tɛhɛnɛ Baa Kilɛ wʼa yi jo. 16 Nɛ na ba xuugbɔhɔ wá pu na ba ŋmakuuyo ɲɛ wɛ, na pu ɲuŋɔ tugo. Nɛ na ba xuugo fara yee wo kawagaa ki na, na yaligee kɔn yi na. 17 Nɛ na ba xuugo wá yi na, na yacoyo yaha pa yi fɛni, yee na ba ma nagoo pu gbo. Kafɛɛgɛ yama ni gbuuro na ba bye yi tɛ ni, nɛ na ba ŋmɔpara yaha ba ma fɛni. Nɛ Tɛhɛnɛ Baa Kilɛ wʼa yi jo.»b