Kilɛ ya yapɛɛgaan pu jaagi
(Dutɛrɛnɔmɛ 12:1-7 ; Ezekiyɛli 20:27-33 ; Zheremi 2:19, 20, 28 ; Levitike 26:30-41)
6
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, ma ɲaha ki ɲɛri Izirayɛli faaboboyo yi yíri mʼa Kilɛ tuduro jo ma wá yi na. 3 Mʼa yi pye: ‹Izirayɛli wo faaboboyo ye, yi Kafɔɔ Tɛhɛnɛ Baa Kilɛ wo jomɔ pu logo!› Yemu Kafɔɔ Tɛhɛnɛ Baa Kilɛ ya yu faaboboyo ye ni yaŋaboyo yi mu, ni loguuyo ye ni fadaaŋaa ki mu ge, yee yi wa mɛ: ‹Nɛyɛ pyaa kʼa da ŋmɔpara pye lʼa pa yee fɛni. Nɛ na ba yee wo gan tapyeye yi kyɛɛgi. 4 Yee wo saraya tawoloyo yi na ba zhan, na yee nudanga yawurire shɔhɔɔ ki ja. Nɛ na ba sipyii pu nixhuyo yi shan yee yapɛrɛɛ ki tàan. 5 Nɛ na ba Izirayɛli nagoo pu nixhuyo yi yaha pu yapɛrɛɛ ki fɛɛ ni, na yee kaciiye yi caaga na yi saraya tawoloyo yi maha. 6 Xuu bɛɛri ni yʼa tiin ge, yi kulogoo ki na ba ɲɛri katahaya. Yi gan tapyeye yi na ba gyɛɛgi. Yi saraya tawoloyo yi na ba zhan, na yi tɔnhɔnɔ, na yi yapɛrɛɛ ki kɛgi kɛgi, na ki piinŋɛ, na yi yawurire shɔhɔɔ ki ja ja, na yi wo keŋɛ fɛ pu xɔ laha wà. 7 Sipyii pu na ba dun, na xhuli yee tɛ ni, yi na ba li cɛ na Tɛhɛnɛ Baa Kilɛ nɛ ɲɛ.
8 « ‹Ga nɛ na ba shɛɛn nigin nigin ɲìi wuu yaha, ŋmɔpara da ba pee gbo wɛ. Pee na ba jaaga na kari fiiye yatii ni. 9 Pee ɲìi wuu nigin nigin wemu pu da ba jo na kari fiiye yatii ni ge, pu funŋɔ na ba do ni nɛ kaa ni yee fiiye yi ni. Pʼa dɔdɔɔrɔ pye, na pu zɔlɔɔ pu laha nɛ na, na pu ɲii yeege yasunyɔ fɛni. Lee wuu na nɛ pu kyɛɛgi. Pʼa katiibaagaa ni tanhaŋa keree kiimu pye ge, yee wo shiige da ga já pu yaha pu ɲahaya cori le puyɛ ni pʼa wii wɛ. 10 Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ, kawagaa kiimu kaa nɛ jo na ɲaha tii pu na ge, na nɛ ta kee bɛ jo tawaga ni wɛ.› »
Izirayɛli wo jurumu we
11 Yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Kadaa kpɔn, mʼa tɔɔyɔ yi colo, mʼa xhuulo na: ‹Samadanha› Izirayɛli puga ki wo tanhaŋa keree ki bɛɛri wuu na ŋmɔpara ni xuugo ni kafɛɛgɛ yama wʼa da ba pu kyɛɛgi. 12 Wemu sanha bu lii, kafɛɛgɛ yama na ba wee gbo, wemu bu dɛrɛŋɛ, ŋmɔpara na ba wee gbo, piimusamaa ɲìi wuu bu gori kulo li ni, xuugo na ba pee gbo. Nɛ na ba na loyire li niinɛ, fo li tɛhɛnɛ na pu fɛni. 13 Xuu pu na ba do do pu yasunyɔ yi niŋɛ ni, na do na pu saraya tawoloyo yi maha. Pu na ba do faabobotɔɔnyɔ yi na, ni faaboboyo yi ɲidegee ki ni, ni tipuriye yi nɔhɔ ni, ni terebɛnti titɔyɔ yi nɔhɔ ni, ni xuu wemu bɛɛri ni pʼa bi nudanga saraya yi wo pu yasunyɔ yi mu ge. Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. 14 Xuu bɛɛri ni pʼa tiin ge, nɛ na ba na keŋɛ ki yirige pu fɛni, na fiige ki pye takoloŋɔ. Ki na ba bye takoloŋɔ na co siwaga ki na, woroo kulo kacɛ ki na, fo na shɛ nɔ Dibila kulo li na suumɔ kulo kacɛ ki na. Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.»