Taaxɔɔ li wo keree
7
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Mu sipyiyawyii, yemu Tɛhɛnɛ Baa Kilɛ wa yu Izirayɛli wo ɲiŋɛ ki mu ge, yee yi wa mɛ: ‹Taaxɔɔ lʼa nɔ! Taaxɔɔ lʼa nɔ fiige ki kabaya shishɛɛrɛ wu bɛɛri na!
3 « ‹Nimɛ mu wo taaxɔɔ lʼa nɔ, nɛ na ba na loyire li yaha na pa ma fɛni. Nɛ na ba kiiri kɔn ma na na saha ni ma torogana li ni. Nɛ na ba ma tanhaŋa keree ki bɛɛri foo tɔ ma mu. 4 Nʼa da ba ma wii ni ɲiɲaara ni wɛ, nʼa da ba doro sipya wa shishiin ɲuŋɔ ni wɛ. Bani nʼa da ba ma torogana li foo tɔ ma mu, ma tanhaŋa keree ki na ba gori yaha ma niŋɛ ni. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »
5 Yemu Tɛhɛnɛ Baa Kilɛ ya jo ge, yee yi wa mɛ: «Bɔɔngɔ! Ki yɛ mɛgɛ bɔɔngɔ! Kʼa ma! 6 Taaxɔɔ lʼa nɔ! Lʼa nɔ, taaxɔɔ le! Lʼa yìri ma fɛni! Lʼa nɔ! 7 Fiige ki shɛɛn pee, yee na lʼa nɔ! Tɛɛ lʼa nɔ, caŋa ɲii lʼa tɛɛŋɛ, fyaara niguuro wo caŋa ɲii le. Fundanga mujuu da ba foro nige faaboboyo yi ni wɛ! 8 Nimɛ nʼa da ba na kafupege ki wo ma na, di na loyire li niinɛ, fo li tɛhɛnɛ na ma fɛni. Nɛ na ba kiiri kɔn ma na na saha ni ma torogana li ni. Nɛ na ba ma tanhaŋa keree ki bɛɛri foo tɔ ma mu. 9 Nʼa da ba ma wii ni ɲiɲaara ni wɛ, nʼa da ba doro sipya wa shishiin ɲuŋɔ ni wɛ. Nʼa da ba ma torogana li foo tɔ ma mu, ma tanhaŋa keree ki na ba gori yaha ma niŋɛ ni. Yi na ba li cɛ lee funŋɔ ni na nɛ Tɛhɛnɛ Baa Kilɛ, nɛ wʼa yee kpɔn.
10 «Kiiri wu caŋa ki ke! Kʼa nɔ! Yee na lʼa nɔ nimɛ! Pubiin lʼa fun! Tabaara ti wa na se ɲaha na! 11 Fanhaɲɛhɛŋɛ kʼa yìri yere, na bye kuumɔ pu wo kpɔn kpɔn pubiin. Yaaga bɛ da ba gori we shi we ni wɛ, yaaga da ba gori pu naafuu wu ni wɛ, yaaga da ba gori pu sipyiɲɛhɛnɛ li ni wɛ, yaaga di wa da ba gori pu nɔɔrɔ wu bɛ ni wɛ.
12 «Tuun wʼa nɔ, caŋa kʼa tɛɛŋɛ! Wemu wʼa zhɔ pyi ge, wee ganha bu funŋɔ taan wɛ. Wemu wʼa bɛrɛ pyi ge, funyaŋa ganha bu jé wee ni wɛ. Bani loyire niguunɔ li da ba yìri ke fiige ke bɛɛri fɛni. 13 Wemu wʼa bɛrɛ pyi ge, wee wʼa da ba guri di zhɛ wu yapɛrɛyɛ yi lɔ wɛ, ali wu mɛhɛ da ɲìi na bɛ. Bani Kilɛ wo kashɛɛ lemu lʼa sipyiire ti wo ɲuŋɔ dugo wu kaa jo ge, lee wʼa da yìri wɛ. Pu kakuuŋɔɔ ki wuu na, sipya wa shishiin wa da ba já wuyɛ shɔ wɛ. 14 Pʼa maga ki wi, keree ki bɛɛri wʼa gbegele xɔ, ga sipya wa shishiin wʼa da ba shɛ kashɛn ki na wɛ, bani nɛ wo loyire niguunɔ li wa sipyiire ti bɛɛri na.»
Izirayɛli nagoo pu wo jurumu wu foo lʼa tɔ pu mu
(Zheremi 6:22-26 ; Ezekiyɛli 6)
15 Ŋmɔpara li wa na gbuuro pyi kpɛɛngɛ ki na, kafɛɛgɛ yama ni xuugo di gbuuro pyi kulo li funŋɔ ni. Wemu bu bye sige ni, ŋmɔpara na wee gbo. Wemu bu bye kulo li funŋɔ ni kafɛɛgɛ yama ni xuugo na wee li. 16 Piimu bu shɔ, na gori ɲìi na, pee na ba baa zhɛ faaboboyo yi na, ba fadaaŋa wo gbegbeshazhɛɛrɛ ɲɛ wɛ. Sipyii pu bɛɛri nigin nigin wu na ba zhiin pu wo tiibaara ti keŋɛ ni. 17 Keye yi bɛɛri na ba xhu. Nugunyɔ yi bɛɛri fanha na ba xhɔ. 18 Pu na ba bɔrɔyɔ fàya† le, pu jaalaa na yìri. Shiige na ba jé pu ɲahaya yi ni. Pu ɲuyɔ yi na ba xhuu. 19 Pu na ba pu warifyɛn wu waa kakuutoroyo yi ni, pu sanni wu ma ɲɛri yaŋmunɔhɔŋɔ. Pu warifyɛn we ni pu sanni wa da já pu shɔ Tɛhɛnɛ Baa Kilɛ wo loyire li caŋa wɛ. Pu xuugo wa da ga xhɔ wɛ, pu yacɛrɛɛ wʼa da ba dinni wɛ. Bani pu warifyɛn we ni pu sanni wu na pʼa kuruŋɔ, yee ya pye pu wo nahama pu kaɲuŋɔ. 20 Pʼa bi puyɛ pɛlɛ pu yalere nizaara ti wuu na. A pʼi tee taga yasunyɔ wo jaalaa yàa, yee yemu yʼa nɔhɔ, na ɲɛ tanhaŋa yaaya ge. Lee wuu na nɛ bɛ wa da ba ye yaŋmuyɔ ye bɛɛri ɲɛri yaŋmunɔhɔyɔ pu mu. 21 Nɛ na ba pu naafuu wu ɲɔ yaha nabuun mu pʼa wu kuu. Fiige ki sipyikuuyo na ba wu kuu na pye pu kashɛn naafuu, kɔnhɔ pʼi wu nɔhɔ. 22 Nɛ na ba kadugo le pu ni. Na pɛɛŋɛ puga kemu kaa lʼa waha na mu ge, pʼa kee nɔhɔ. Java fɛɛ na ba jé wà, na wu nɔhɔ.
23 «Tɔɔrɔ shɔnhɔyɔ ya yàa! Bani fiige kʼa ɲi gbuuro na, kulo lʼa ɲi kafugo keree na. 24 Shi wemu wʼa kolo shi wu bɛɛri ni ge, nɛ na ba wee shi we yaha ba, wee di ba pu piyɛyɛ yi co co. Nɛ na ba pu fanhafɛɛ pu wo tabaara ti xɔ, pu fɛfɛɛrɛ tɛyɛ yi na nɔhɔ. 25 Funbɛɛnrɛ ti wa ma! Pu na ba ɲaɲiŋɛ shaa, ga pʼi da ki ta wɛ. 26 Bɔɔngɔ na ba fara bɔɔngɔ na. Kayekuuyo ya na ba nɔ jé kayekuuyo ya nɔhɔ ni. Pu na ba kashɛgɛɛ shaa Kilɛ tudunmɔ wu mu, saraya ɲaha shɔɔnrivɛɛ wa da ba já da sipyiire ti kalaa nige wɛ, nɔhɔlɛɛ pu wa da ba já da yɛrɛ kaan nige wɛ. 27 Saan wu na ba bye ni funyaŋa ni, saan wu ja wu jaa na ba yìri, fiige ki sipyii pu bɛɛri na ba jɛlɛ funbɛɛnrɛ keŋɛ ni, nɛ na ba pu kiiri wu kɔn na saha ni pu torogana li ni. Nɛ na ba kiiri kɔn pu na na saha ni puyɛ pyaa wo kiiri kɔngaŋaa ki ni, pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.»