Ezekiyɛli 8

Ezekiyɛli ya yasunyɔ ɲa Kilɛ-pɛɛŋɛ pugbɔhɔ ki ni

(Ezekiyɛli 1:26-28 ; Dutɛrɛnɔmɛ 5:8, 9 ; 32:16, 21 ; 2 Saannaa 21:7)

Ayiwa, yee gbaara wuu li yeŋɛ gbaara wogo ki cabyaa kaguro wu caŋa, nɛ bi tiin na kaban, Zhuda wo nɔhɔlɛɛ pu dʼa tiin nɛ ɲahagbaa na, a Tɛhɛnɛ Baa Kilɛ wo keŋɛ kʼi nɔ nɛ na.

2 A nɛ wii na yaaga ka ɲa kʼa foro sipya fɛni. Xuu wemu wu bye kanna wu mɛnugumɔ pi ge, na co wee xuu wu na, na tigi nɔhɔdaan wu ni, wee ɲɛ ba na ɲɛ wɛ. Na lɔ mɛnugumɔ pu na na dugi fugba wu ni, wee bi ɲí ba daɲaa tɔɔrɔ ɲɛ wɛ, temu ya kemɛ wɔɔgɔ ge. 3 A wu yaaga ka tii nɛ na ba keŋɛ ɲɛ wɛ, na nɛ co na ɲuzhiire ti na. Ba lee ya pye wɛ, a Kilɛ Munaa di nɛ yirige fugba we ni ɲiŋɛ ke tɛ wu ni, na gari ni nɛ ni Zheruzalɛmu ni lee kashɛɛ li ni. Kilɛ-pɛɛŋɛ pugbɔhɔ ki kuɲɔɔ lemu li wa funŋɔ ki ni na ɲaha saha ni suumɔ kulo kacɛ ki ni ge, a Munaa li gari ni nɛ ni lee ɲɔ na. Yapɛrɛ lemu lʼa Tɛhɛnɛ Baa Kilɛ wo luu li yirige ge, lee bye wà. 4 Izirayɛli wo Kilɛ wu wo nɔɔrɔ wu bye wà. Wu bye ba nɛ wu ɲa ɲagana lemu na fadaaŋa ki na wɛ.

5 A Tɛhɛnɛ Baa Kilɛ di nɛ pye: «Sipyiyawyii, ma ɲuŋɔ ki yirige mʼa wii suumɔ kulo kacɛ ki na.» A nɛ na ɲuŋɔ ki yirige, na wii suumɔ kulo kacɛ ki na, yapɛrɛ lemu lʼa Tɛhɛnɛ Baa Kilɛ wo luu li yirige ge, na lee ɲa wà saraya tawologo ki kuɲɔɔ li ɲɔ ki na suumɔ kulo kacɛ ki na, tajege ki ni.

6 A wu nɛ pye sanha na: «Sipyiyawyii, lemu pʼa byi ge, go ma li ɲaa gɛ? Izirayɛli puga kʼa kanɔhɔdiiye pyi, kɔnhɔ pʼi nɛ sanha liigi na fɛfɛɛrɛ xuu wu na. Ayiwa, ma na ba kanɔhɔdiiye ya bɛ ɲa yemu yʼa kolo ye bɛ na ge.»

7 Lee kadugo na, a wu gari ni nɛ ni Kilɛ-pɛɛŋɛ pugbɔhɔ ki kaaŋa ki tajege ki ɲɔ na, a nɛ wii na wege ka ɲa kasɔrɔgɔ ki na. 8 A wu nɛ pye: «Sipyiyawyii, kasɔrɔgɔ ki furi!» A nɛ kasɔrɔgɔ ki furi, a lee di ɲɛri kuɲɔɔ. 9 A wu nɛ pye: «Tanhaŋa keree niguudiigee kiimu pʼa byi naha, ki niguudiigee ge, jé mʼa kee wii.» 10 A nɛ jé na wii, na ɲiŋɛ yakokaara ti tuuyo yi bɛɛri wo jaalaa, ni yaboboyo ninɔhɔyɔ yi tuuyo yi bɛɛri wo jaalaa ɲa wà, Izirayɛli puga ki yapɛrɛɛ ki bɛɛri wo jaalaa dʼa yàa kasɔrɔgɔ ki na, na ki maha. 11 Namaa kɛlɛɛ gbarashuun (70) wu bi pa yere ki tàan ni pu yawurire shɔhɔɔ ni pu keye, ni Izirayɛli puga ki nɔhɔlɛɛ pu ni, Shafan ja Yazaniya di ɲɛ pu niŋɛ ni, nudanga yawurire ti wo wuriluu la di yìri na duri. 12 A wu nɛ pye: «Sipyiyawyii, Izirayɛli puga ki nɔhɔlɛɛ pʼa keree kiimu pyi womɔ ni pu yapɛrɛgbaya yi ni ge, go mʼa ki ɲaa gɛ? Pʼa yu na: ‹Tɛhɛnɛ Baa Kilɛ ya wèe ɲaa wɛ, Tɛhɛnɛ Baa Kilɛ ya fiige ki yaha.› » 13 A wu nɛ pye: «Ma na ba Tanhaŋa keree niguudiigee kii bɛ ɲa, kiimu pʼa byi ge.»

14 A wu gari ni nɛ ni Tɛhɛnɛ Baa Kilɛ wo pɛɛŋɛ pugbɔhɔ ki tajege ki ɲɔ na suumɔ kulo kacɛ ki na. A nɛ shɛ cèe pʼi ta pʼa tiin wà na mɛhɛɛ suu yapɛrɛɛ Tamuzi wuu na. 15 A wu nɛ pye: «Go mʼa le ɲaa gɛ, sipyiyawyii? Ma na ba Tanhaŋa keree niguudiigee kii bɛ ɲɛ kiimu ya kolo kii bɛ na ge.»

16 A wu gari ni nɛ ni Tɛhɛnɛ Baa Kilɛ wo pɛɛŋɛ pugbɔhɔ ki funŋɔ ki wo kaaŋa ki ni. A nɛ shɛ namaa kɛlɛɛ shuun ni kaguro (25) ta wà Tɛhɛnɛ Baa Kilɛ wo pɛɛŋɛ pugbɔhɔ ki tajege ki ɲɔ ki na, kpaan le ni saraya tawologo ki tɛ wu ni. Pee bi kaduyo le Tɛhɛnɛ Baa Kilɛ wo pɛɛŋɛ pugbɔhɔ ki ni, na pu ɲahaya tagi Kilɛ-nɔhɔ ke na, na nuguro sinni, na caŋa ke pɛlɛ Kilɛ-nɔhɔ ki na. 17 A wu nɛ pye: «Go mʼa le ɲaa gɛ, sipyiyawyii? Zhuda puga kʼa Tanhaŋa keree niguudiigee kiimu pyi naha ge, kee ya ta pu yaa wɛ, fo pʼa se ɲaha na, na dun sipyiire ti na fiige ki ni, na nɛ luu li yirige tuun bɛɛri ni. Li wii, tige genɛ pu wa yɛri pu munaa tàan. 18 Lee wuu na nɛ bɛ wa da ba kafugo le nayɛ ni pu fɛni, nɛ da ba pu wii ni ɲiɲaara ɲii ni wɛ, nʼa da ba ɲuŋɔ peŋi ni wa shishiin ni wɛ. Ali pu mɛhɛ ba xhuulo bɛ nɛ fɛni, nʼa da pu mujoŋɔɔ logo wɛ.»