Kanhama pemu na ba nɔ Zheruzalɛmu na ge
9
Lee kadugo na, a Tɛhɛnɛ Baa Kilɛ di mujugbɔɔ wá na jo: «Yi fulo pa, yee piimu pʼa da ba ɲakpaan wo le kulo le ɲuŋɔ ni ge! Wa bɛɛri da ma ni wu wo kakara yagboŋɔ ki ni wu keŋɛ ni!»2 Ba lee ya pye wɛ, a nɛ namaa gbaara wa ɲa pu na ma na yìri fugba wu wo tajege ki yíri, kee kemu kʼa ɲaha tii suumɔ kulo kacɛ ki na ge. Wa bɛɛri bye ni wu kakara yagboyo ni wu keŋɛ ni. Ná nigin wa bye pu niŋɛ ni, lɛn fàya yi bye wee na, kama kavɛɛ wo kamagaan la di ɲɛ wu mɛnugumɔ pe ni. A pʼi ba na ba yere saraya tawologo daɲaa tɔɔrɔ wogo ki tàan. 3 Izirayɛli wo Kilɛ wu wo nɔɔrɔ wemu wu bye serubɛɛna pu ɲuŋɔ ni ge, a wee di yìri laha wà, na dii Kilɛ-pɛɛŋɛ pugbɔhɔ ki kuɲɔwege ki na. Ná wemu wʼa lɛn fàya yi le, kamagaan lʼi ɲɛ wu mɛnugumɔ pu ni ge, a Tɛhɛnɛ Baa Kilɛ di wee yiri, 4 na wu pye: «Shɛ kulo li saha, shɛ Zheruzalɛmu kulo li saha, tanhaŋa keree kiimu bɛɛri kʼa byi li ni ge, namaa piimu pʼa ŋmɔgaŋa yeege, na zhiin kee wuu na ge, mʼa fɛ kpɔn pee wo gbahaa ki na.» 5 Lee kadugo na, a wu yi jo pusamaa mu nɛ ɲii na na: «Yi taha wu fɛni yi jé kulo li ni, yʼi da sipyiire ti xuli, yi ganha bu wa wii ni ɲiɲaara ni wɛ, yi ganha bu ɲuŋɔ peŋi ni wa shishiin ni wɛ. 6 Yi nɔhɔlɛɛ pee, ni lɛvɛɛ pee, ni pushaa pee, ni nɔhɔpiire te, ni cèe pu bɛɛri gbo. Ga piimu bɛɛri pu wa ni fɛ ni pu gbahaa ki na ge, yʼi doro pee ɲuŋɔ ni. Yʼi li ɲɔ kɔn nɛ wo fɛfɛɛrɛ xuu wu na.» Ayiwa, nɔhɔlɛɛ piimu pu bye Kilɛ-pɛɛŋɛ pugbɔhɔ ki fɛɛ ni ge, a pʼi li ɲɔ kɔn pee na. 7 Lee kadugo na, a Tɛhɛnɛ Baa Kilɛ di pu pye sanha na: «Yi Kilɛ-pɛɛŋɛ pugbɔhɔ ki nɔhɔ, yʼi ki kaaŋa ki ɲi xuu na! Yi shɛ!» A pʼi foro, na gari, na shɛ sipyiire ti gbo kulo li funŋɔ ki ni.
8 Na pu yaha tee gbuuro ti na, nɛ bɛ dʼa yere na yɛ nigin, a nɛ do, na sanhana ɲiŋɛ ki na, na mujugbɔɔ wá na: «Ee, Kafɔɔ Tɛhɛnɛ Baa Kilɛ, ta ma da Izirayɛli bɛɛri kyɛɛgi, mʼa ma wo loyire li shan Zheruzalɛmu ɲuŋɔ ni ya?» 9 A wu nɛ pye: «Izirayɛli wo puga ke ni Zhuda wo puga ki wo nahama pʼa pɛlɛ ye. Fiige ki bɛɛri kʼa ɲi shishan wonɔ na, kulo li bɛɛri lʼa ɲi tiibaara na, bani pʼa yu na: ‹Tɛhɛnɛ Baa Kilɛ ya fiige ki yaha, Tɛhɛnɛ Baa Kilɛ ya yaaga ɲaa wɛ.› 10 Lee wuu na, nɛ bɛ da ba pu wii ni ɲiɲaara ni wɛ, nɛ da ba ɲuŋɔ peŋi ni pu ni wɛ. Nɛ na ba pu kapyegee ki wo jaagi wu shan pu ɲuŋɔ ni.» 11 Wee tuun wu ni, lɛn fàya yi bye ná wemu na, kamagaan lʼi ɲɛ wu mɛnugumɔ pu ni ge, a wee di ba na ba jo: «Tuduro te mʼa le na keŋɛ ni ge, nɛ ti pye.»