Ezekiyɛli ya Kilɛ wo nɔɔrɔ wu ɲavonɔ ɲa
10
Ayiwa, fugba wu fanfanga kemu ki bye serubɛɛna pu ɲuɲɔ na ge, a nɛ wii na pɛɛwa faakagereŋɛ tuugo ka ɲa wà ba safiiri kagereŋɛ ɲɛ wɛ. Kee bye ba saanra koro ɲɛ wɛ.b 2 Ná wemu wʼa lɛn fàya yi le ge, a Tɛhɛnɛ Baa Kilɛ di wee pye: «Gɔrɔyɔ ye yi wa serubɛɛn pu nɔhɔ ni ge, shɛ jé yee tɛ ni, mʼa shɛ naganhaa kii wolo serubɛɛn pu tɛ ni mʼa ma keye ye ɲi, mʼa ki wá kulo li na.» A nɛ wu ɲa wu na gaaŋi.c3 Wu nigariwo, lee bi serubɛɛn pu ta Kilɛ-pɛɛŋɛ pugbɔhɔ ki kanige cɛ wu ni, a ɲahaŋa ka di funŋɔ ki wo kaaŋa ki ɲi. 4 A Tɛhɛnɛ Baa Kilɛ wo nɔɔrɔ wu yìri laha serubɛɛn pu ɲuɲɔ wu na, na gaaŋi Kilɛ-pɛɛŋɛ pugbɔhɔ ki kuɲɔwege ki ni. Wee tuun wu ni a ɲahaŋa di ba Kilɛ-pɛɛŋɛ pugbɔhɔ ki ɲi, a Tɛhɛnɛ Baa Kilɛ wo nɔɔrɔ wu kpɛɛngɛ kʼi kaaŋa ki ɲi. 5 A serubɛɛn pu wo kapaya yi tunmɔ pʼi shɛ foro, fo kpɛɛngɛ ki wo kaaŋa ki ni. Pee tunmɔ pu ɲɛ ba Se Bɛɛri Fɔɔ Kilɛ wo mujuu li ɲɛ wɛ, wu ba yu tuun wemu ni.
6 Ba Tɛhɛnɛ Baa Kilɛ ya lɛn fàya fɔɔ wu pye na wu shɛ na ka lɔ gɔrɔyɔ yi tɛ wu ni, serubɛɛn pu tɛ wu ni wɛ, a wu gari na shɛ yere gɔrɔyɔ yi tàan. 7 A serubɛn nigin wa di wu keŋɛ yeege tii na ki na, serubɛɛn pu tɛ wu ni, na na ka wolo serubɛɛn pu tɛ wu ni na le lɛn fàya fɔɔ wu keŋɛ ni. A wu ki co, na gari. 8 Keŋɛ ka ki bye serubɛɛn pu kapaya yi nɔhɔ ni ba sipya keŋɛ ɲɛ wɛ. 9 A nɛ wii na gɔrɔyɔ shishɛɛrɛ ɲa serubɛɛn pu tàan, serubɛn bɛɛri gɔrɔgɔ nigin na bye wu tàan. Yee gɔrɔyɔ yi bi ɲí ba kirisoliti faakagereŋɛ ɲɛ wɛ.d 10 Yee gɔrɔyɔ shishɛɛrɛ wu bɛɛri bi foro yiyɛ fɛni. Gɔrɔgɔ ka bɛɛri bye kanna gɔrɔgɔ ka funŋɔ ni pʼa ki sɔɔri. 11 Yee gɔrɔyɔ yi bi fe na se yi kabaya shishɛɛrɛ wu bɛɛri na. Yi bi ŋmahana na ɲɛri, yʼi na yʼa se wɛ. Ɲuŋɔ ki bu ɲaha tagi xuu wemu yíri, yʼa faa toro na se wà, na ta yi ya ŋmahana ɲɛri wɛ. 12 Pee serubɛɛn pu ceesɛɛgɛ ki bɛɛri ki bye ɲìi na ki maha círi, pu kaduyo ye, ni pu keye ye, ni pu kapaya ye, na fara gɔrɔyɔ shishɛɛrɛ wu bɛ na, yi bɛɛri yi bye ɲìi.e 13 A nɛ yee gɔrɔyɔ yi mɛgɛ logo pu na yi pyi na: «Kafɛnaɲile.» 14 Serubɛn wa bɛɛri wu bye ni ɲahaya shishɛɛrɛ ni. Ɲaha nizhiige ki ɲɛ serubɛn ɲaha, shuun wogo ki ɲɛ sipya ɲaha, taanri wogo ki ɲɛ cɛnri ɲaha, shishɛɛrɛ wogo ki ɲɛ ɲaa ɲaha.f 15 Lee kadugo na, a serubɛɛn pʼi yìri kari fugba wu ni. Ɲìi yaŋmuyɔ yemu nɛ fɛnhɛ ɲa Kebari Gba wu tàan ge, yee ninuyɔ yi bye yii. 16 Serubɛɛn pu ba se, gɔrɔyɔ yi bɛ na ganha na se pu tàan wu ni. Serubɛɛn pu bu pu kapaya yi yeege na zhaa di yìri fugba wu ni, gɔrɔyɔ yi da ga laha pu na wɛ. 17 Serubɛɛn pu bu yere, gɔrɔyɔ yi bɛ na yere. Pu bu yìri fugba wu ni, gɔrɔyɔ yi bɛ na yìri ni pu ni, bani ɲìi yaŋmuyɔ yi wo munaa le li bye gɔrɔyɔ yi bɛ ni.
Tɛhɛnɛ Baa Kilɛ wo nɔɔrɔ wʼa laha Kilɛ-pɛɛŋɛ pugbɔhɔ ki na
18 Ayiwa, a Tɛhɛnɛ Baa Kilɛ wo nɔɔrɔ wu yìri laha Kilɛ-pɛɛŋɛ pugbɔhɔ ki kuɲɔwege ki ni, na shɛ digi serubɛɛn pu na. 19 A serubɛɛn pʼi pu kapaya yi yeege na zhaa di yìri. A nɛ pu ɲa pʼa yìri kari fugba wu ni ni gɔrɔyɔ yi bɛ ni. A pʼi shɛ yere Kilɛ-pɛɛŋɛ pugbɔhɔ ki Kilɛ-nɔhɔ kacɛ ki wo tajege ki ɲɔ na. A Izirayɛli wo Kilɛ wu wo nɔɔrɔ wu ganha na ɲí pu ɲuɲɔ wu na. 20 Ɲìi yaŋmuyɔ yemu nɛ fɛnhɛ ɲa Izirayɛli wo Kilɛ wu nɔhɔ ni Kebari Gba wu tàan ge, yee yi bye yii. A nɛ li cɛ jo serubɛɛn pu ɲɛ pii. 21 Pu nigin nigin wu bɛɛri wu bye ni ɲahaya shishɛɛrɛ ni kapaya shishɛɛrɛ ni. Keye ya bye pu kapaya yi nɔhɔ ni ba sipya keye ɲɛ wɛ. 22 Yaŋmuyɔ yemu nɛ ɲa Kebari Gba wu tàan ge, pu ɲahaya yi bye ba yee woyo yi ɲɛ wɛ. Yi bɛɛri yi ɲɛ tuunuŋɔ. Yeeyɛ pyaa kʼa sii kii. Ka bɛɛri ba se, kʼa dii na gaaŋi ki ɲahatiimɛ pu ni.