Kiiri na ba gɔn Zheruzalɛmu na wu kakuuŋɔɔ ki wuu na
11
Ayiwa, a Kafɔɔ wo Munaa lʼi nɛ yirige, na gari ni nɛ ni Kilɛ-pɛɛŋɛ pugbɔhɔ ki Kilɛ-nɔhɔ ki wo kuɲɔɔ li ni, lee lemu lʼa foro to Kilɛ-nɔhɔ ki na ge. A nɛ shɛ namaa kɛlɛɛ shuun ni kaguro (25) ɲa wà kuɲɔɔ li ɲɔ ki na. A nɛ sipyiire ti wo ɲuŋɔfɛɛ shuun wa ɲa pu niŋɛ ni, pee ɲɛ Azuri ja Yaazaniya ni Benaya ja Pelatiya. 2 A Tɛhɛnɛ Baa Kilɛ di nɛ pye: «Sipyiyawyii, pii namaa pii pʼa kakuuŋɔɔ ki wo bye fungɔnyɔ yi kɔɔn, na sipyiire ti leni kooguuŋɔɔ ni. 3 Pʼa yu na: ‹Piyɛyɛ yereŋɛduun sanha nɔ wɛ. Shɔɔ li ɲɛ le kulo le, wèe di ɲɛ xaara li funŋɔ ni!› 4 Lee wuu na, shɛ Kilɛ tuduro jo wá pu na! Sipyiyawyii, shɛ Kilɛ tuduro jo wá pu na!»5 A Tɛhɛnɛ Baa Kilɛ wo Munaa lʼi digi nɛ na, na nɛ pye na nɛ wu ye jo na:
«Yemu Tɛhɛnɛ Baa Kilɛ ya jo ge, yee yi wa mɛ: ‹Izirayɛli puga ke, le jogana le yee wa yu! Le li wa diri yee funyɔ ni ge, nɛ li cɛ! 6 Yee ya sipyiɲɛhɛmɛɛ gbo le kulo le ni, na li kakuuyo yi ɲi xuu na.› 7 Lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Zheruzalɛmu kulo li kunni wa shɔɔ, ga sipyii piimu yee wa gbo shan li funŋɔ ni ge, pee pu wa xaara te. Yee pi ge, nʼa da ba yee kɔri yeege li ni. 8 Ta ŋmɔpara na bɛ yee wa fyagi wɛ? A go lee nʼa da ba yaha ba yee fɛni.› Kafɔɔ Tɛhɛnɛ Baa Kilɛ ɲɔjomɔ pi. 9 ‹Nɛ na ba yee yeege le kulo le ni, na yi le nabuun keŋɛ ni, na na wo kiiri wu shan yi ɲuŋɔ ni. 10 Ŋmɔpara na ba yi shaan, nɛ na ba kiiri kɔɔn yi na Izirayɛli ɲiŋɛ ki kodɛhɛnɛ li na, yi na li cɛ lee funŋɔ ni na Tɛhɛnɛ Baa Kilɛ nɛ ɲɛ. 11 Zheruzalɛmu kulo li wa da ba bye yee mu shɔɔ, yee pu ta pye li funŋɔ xaara ti wɛ. Izirayɛli ɲiŋɛ ki kodɛhɛnɛ li shizhaa wu na nʼa da ba kiiri kɔn yee na. 12 Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. Yee ya ta nɛ saliyaa pu koo ɲaari wɛ, yʼi wa ta na wo kodorogoo ki ɲaari wɛ, ga fiiye yatii shɛɛn piimu pʼa yee maha ge, pee wo kodorogoo yee wa ɲaari.› »
13 Ayiwa, na nɛ yaha nɛ na Kilɛ tuduro ti yu, a Benaya ja Pelatiya di xhu. A nɛ do na sanhana ɲiŋɛ ki na, na xhuulo na: «Aa, Kafɔɔ Tɛhɛnɛ Baa Kilɛ, ta ma da ba Izirayɛli nagoo pusamaa ɲuŋɔ tugo fɛɛfɛɛ?»
Kilɛ ya ɲɔmɛɛ lɔ Izirayɛli nagoo pusamaa mu
14 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:
15 «Sipyiyawyii, ma cebooloo pee, ma puga shɛɛn pee, ni Izirayɛli wo puga ki bɛɛri, yemu Zheruzalɛmu shɛɛn pu wa yu ni pee ni ge, yee yi wa mɛ na: ‹Laraga kemu ki wa yi ni Tɛhɛnɛ Baa Kilɛ tɛ ni ge, yi kori yaha kee ni. Wèe mu ke fiige ke wo kafɛɛrɛ tʼa kan.› 16 Lee wuu na, yi jo pu mu na yemu Tɛhɛnɛ Baa Kilɛ ya jo ge, yee yi wa mɛ: ‹Nɛ pu kɔri wá taliige ni fiiye yatii shɛɛn tɛ ni, nɛ pu kɔri wá fiiye yi bɛɛri ni. Can wu ɲɛ wii, nɛ pu kɔri wá fiiye yatii ni. Ga lee bɛ na, fiiye yemu bɛɛri ni nɛ pu kɔri wá ge, nɛ pye ni pu ni yee fiiye yi ni, kɔnhɔ pu da na pɛlɛ wà, fo na shɛ nɔ tɛɛrɛ la na.› 17 Lee wuu na, yi jo pu mu na yemu Tɛhɛnɛ Baa Kilɛ ya jo ge, yee yi wa mɛ: ‹Nɛ na ba yi kemɛ binnɛ na foro fiiye yatii shɛɛn pu tɛ wu ni. Fiiye yemu ni yʼa caaga ge, nɛ na ba yi kemɛ binnɛ na foro yee fiiye yi ni, na Izirayɛli ɲiŋɛ ki kuruŋɔ kan yi mu sanha.› 18 Pu na ba guri ba pu wo fiige ki ni. Yapɛrɛɛ kiimu bɛɛri, ni tanhaŋa keree kiimu bɛɛri ki ɲɛ wà ge, pee na ba yee bɛɛri yirige laha wà. 19 Nɛ na ba zɔ nigin kan pu mu, na ɲiifɛɛrɛ nivɔrɔ le pu ni. Pu zɔlɔɔ pu pʼa waha ba faaga ɲɛ-ɛ ge, nɛ na ba pee wolo pu ni, na zɔlɔɔ piitiilee le pu ni piimu ya peŋi ge,a 20 kɔnhɔ pu da na saliyaa pu koo ɲaari, pʼi kasɛɛgɛ yaha na wo kodorogoo ki na, pu da ki ɲaari. Pu na bye na sipyii, nɛ ma bye pu Kilɛ. 21 Ga piimu ba daha yaha pu wo yapɛrɛɛ, ni pu tanhaŋa keree ki na, nɛ na ba pee wo kakuuŋɔɔ ki shan pu ɲuŋɔ ni. Kafɔɔ Tɛhɛnɛ Baa Kilɛ ɲɔjomɔ pi.»
Kilɛ wo nɔɔrɔ wʼa laha Zheruzalɛmu na
22 Ayiwa, lee kadugo na, a serubɛɛn pʼi pu kapaya yi yeege, a gɔrɔyɔ yʼi binnɛ ni pu ni. Izirayɛli wo Kilɛ wu wo nɔɔrɔ wu bye pu ɲuɲɔ wu na.b 23 A Tɛhɛnɛ Baa Kilɛ wo nɔɔrɔ wu yìri laha kulo li niŋɛ ki ni, faaboboŋɔ kemu ki wa kulo li Kilɛ-nɔhɔ ki na ge, na shɛ digi kee na. 24 A Kilɛ Munaa lʼi nɛ lɔ yirige, na gari ni nɛ ni Kalide fiige ki ni, kashɛn buloo pu yíri, kashɛɛ li ni, Kilɛ Munaa fanha ni. Kashɛɛ lemu nɛ bi ɲaa ge, a lee di biin nɛ na. 25 Tɛhɛnɛ Baa Kilɛ ya keree kiimu bɛɛri shɛ nɛ na ge, a nɛ kee bɛɛri paari kashɛn buloo pu mu.