Bulooro ti wo ɲaha shɛshɛɛrɛ
12
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, sipyii piimu niŋɛ ni mu wa ge, nʼa she fɛɛ pu ɲɛ pii. Ɲìi wa pu mu ɲa kaa na, pu di ya ɲaa wɛ. Ɲuwegee wa pu mu logo kaa na, pu di ya nuri wɛ, bani nʼa she fɛɛ pu ɲɛ pii.a 3 Sipyiyawyii, shɛ ma yɛrɛyɛ yi gbegele, ma na jo ba pu da ba sipya co mɛ na se kulo latii ni wɛ. Mʼa foro cafugo na pu ɲii na, ma na giin kulo la ni pʼa ma co na se. Kulo lemu ni mʼa tiin ge, mʼa foro lee ni pu ɲii na ba pu ma sipya co mɛ na se kulo latii ni wɛ. La wa la ni pu na ba li cɛ na nʼa she fɛɛ pee ɲɛ. 4 Cafugo na mʼa da ma yɛrɛyɛ yi yeege pu bɛɛri ɲii na. Mayɛ pyaa ki na ba foro yakoŋɔ ki ni pu ɲii na ba pu ma sipya co mɛ na se kulo latii ni wɛ. 5 Mʼa kasɔrɔgɔ ki furi pu ɲii na, mʼa ma yɛrɛyɛ yi yeege wà. 6 Mʼa ma yɛrɛyɛ yi taha ma kapaŋa ki na pu ɲii na, mʼa foro ni yi ni piige ni, mʼa ma ɲaha ki tɔ, kɔnhɔ ma ganha bu fiige ki ɲa wɛ, bani nɛ funŋɔ ki wa mʼa bye ɲaha shɛshɛɛrɛ Izirayɛli puga ki mu.»
7 Ayiwa, yemu Tɛhɛnɛ Baa Kilɛ ya jo nɛ mu ge, a nɛ lee pye. A nɛ na yɛrɛyɛ yi yeege cafugo na, ba pu ma sipya co na gaaŋi kulo latii ni wɛ. Yakoŋɔ ki ni, a nɛ ba kasɔrɔgɔ ki furi ni keŋɛ ni, na na yɛrɛyɛ yi yeege wà piige ki ni na taha na kapaŋa na pu ɲii na.
8 Ayiwa, kee caŋa ki ɲimuguro ɲisɔɔgɔ ki na, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 9 «Sipyiyawyii, Izirayɛli puga ke, ke nʼa she fɛɛ puga ke, ta ki ya ta ma yege na ɲaha ma di byi mɛ wɛ? 10 Yi jo pu mu na yemu Kafɔɔ Tɛhɛnɛ Baa Kilɛ wa yu ge, na yee yi wa mɛ: ‹Ɲuŋɔfɔɔ we wu wa Zheruzalɛmu ni ge, ni Izirayɛli puga ki sipyii piimu bɛɛri pu wa le kulo le ni ge, pee na pe kapaŋaa jomɔ pe ya ɲaha tii.› 11 Yi jo pu mu na mu ya pye pu mu ɲaha shɛshɛɛrɛ, na lemu mʼa pye ge, na lee li da ba nɔ pu na, na pu na ba jo na kari fiige katii ni. 12 Ɲuŋɔfɔɔb wemu wu wa pu niŋɛ ni ge, wee na ba wu yɛrɛyɛ taha wu kapaŋa na piige ni na foro. Pu na ba kasɔrɔgɔ furi, na wu yeege wà. Wu na ba wu ɲaha ki tɔ, kɔnhɔ wu ganha bu ɲii taha fiige ki na wɛ. 13 Nɛ na ba wu pɛri ni na jɔ̀ wu ni, wʼa jo nɛ wo fuugo ki na. Nɛ na ba gari ni wu ni Babilɔni kulo li ni Kalide shɛɛn pu wo fiige ki ni. Ga wʼa da zhɛ fiige ki ɲa ɲii na wɛ. Wake wʼa da zhɛ xhu.c 14 Piimu bɛɛri pʼa bi dɛn wu tàan ge, pee ni wu kashɛnŋmuu pu bɛɛri, nɛ na ba pu caaga kabaya yi bɛɛri na, na pu nɔhɔ niinɛ ni ŋmɔpara ni. 15 Nɛ ba pu caaga fiiye yatii shɛɛn pu tɛ ni tuun wemu ni, nɛ ba pu caaga fiiye yi bɛɛri ni tuun wemu ni, pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. 16 Ga lee bɛ ni li wuu ni, nɛ na ba pu shɛɛn nigin nigin wa pye wʼa shɔ ŋmɔpara, ni xuugo, ni kafɛɛgɛ yama pu na, fiiye yemu ni pu da ba shɛ bye ge, kɔnhɔ pʼi shɛ pu tanhaŋa keree ki bɛɛri yu yee fiiye yi ni. Pu na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.»
17 Lee kadugo na, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 18 «Sipyiyawyii, ma ba ma yaligee ki li, ma da jɛlɛ, ma da lɔhɔ gbuu ni fyaara ni funbɛɛnrɛ ni, 19 mʼa yi jo sipyiire ti mu fiige ki ni na: ‹Zheruzalɛmu shɛɛn piimu pu wa Izirayɛli ɲiŋɛ ki na ge, yemu Kafɔɔ Tɛhɛnɛ Baa Kilɛ ya yu pu mu ge, yee yi wa ye na pu funbɛnwuu na ba pu yaligee ki li, pu jaa yiriwuu di pu lɔhɔ gbuu, bani pu fiige ki na ba gyɛɛgi, na ki funŋɔ yaŋmuyɔ yi bɛɛri kuu, ki java fɛɛ pu bɛɛri wo kapyegee ki wuu na. 20 Kulogoo ki na ba ɲɛri katahaya, fiige ki na ɲɛri siwaga. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »
Lemu Kilɛ ya jo ge, lee na ba bye
21 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 22 «Sipyiyawyii, ɲaha na sipyiire tʼi wa le talenɛ le yu Izirayɛli fiige ki ni wɛ na: ‹Tɛɛgɛɛ niɲɛhɛŋɛɛ ya toro, ga kashɛgɛɛ kiimu kʼa jo ge, lee la shishiin di sanha fa foro wɛ.› 23 Lee wuu na, yi jo pu mu na yemu Kafɔɔ Tɛhɛnɛ Baa Kilɛ wa yu ge, yee yi wa mɛ: ‹Nɛ na ba le talenɛ le ɲɔ gbo. Li wa da ba yu nige bada Izirayɛli ni wɛ. Ga mʼa yi jo pu mu na kashɛgɛɛ ki bɛɛri wo faduun wʼa nɔ xɔ. 24 Can baa wo kashɛɛ la shishiin, kelee can baa wo kapana la shishiin wa da ga logo nige Izirayɛli fiige ki ni wɛ. 25 Bani Tɛhɛnɛ Baa Kilɛ nɛ ɲɛ. Nɛ ba giin di yemu jo, yee nʼa da jo, li da mɔ bɛ wɛ, yʼi fa foro. Ayiwa, Izirayɛli puga ke, nʼa she fɛɛ puga ke, yeeyɛ pyaa wo caŋa ɲii li ni nʼa da ba na jomɔ pu jo, pʼa fa na foro sanha bɛ.› » Kafɔɔ Tɛhɛnɛ Baa Kilɛ ɲɔjomɔ pi. 26 A Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 27 «Sipyiyawyii, yemu Izirayɛli puga kʼa yu ge, yee yi wa mɛ na: ‹Kashɛgɛɛ kiimu Kilɛ tudunmɔ wʼa yu ge, ki caŋa kʼa lii. Tɛɛgɛɛ kiimu kʼa lii ge, kee wo keree wʼa yu.› 28 Lee wuu na, yi jo pu mu na yemu Kafɔɔ Tɛhɛnɛ Baa Kilɛ wʼa yu ge, na yee yi wa mɛ: ‹Nɛ ba yemu bɛɛri jo, yi na va na foro, li da mɔ bɛ wɛ.› » Kafɔɔ Tɛhɛnɛ Baa Kilɛ ɲɔjomɔ pi.