Kilɛ ya yìri tudunmɔɔ kafinɛjuu pu fɛni
13
Ayiwa, A Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, Kilɛ tuduro jo ma wá pii tudunmɔɔ pii na Izirayɛli fiige ki ni. Pʼa puyɛ pyi na Kilɛ tudunmɔɔ pee ɲɛ, na ta pʼi ɲɛ puyɛ pyaa wo tuduro na. Yi jo pu mu na pu na jomɔ pu logo. 3 Yemu Kafɔɔ Tɛhɛnɛ Baa Kilɛ wʼa yu ge, yee yi wa mɛ: ‹Tudunmɔɔ fungɔnyɔ baa fɛɛ piimu pʼa taha puyɛ pyaa wo fungɔnyɔ fɛni, na ta Kilɛ di ya ta yaaga bɛ shɛ pu na-ɛ ge, bɔɔngɔ ki ɲɛ pee wogo! 4 Izirayɛli, ma bi sige puun cɛ katahaya ni dɛ, pee pu ɲɛ mu tudunmɔɔ pee! 5 Pu ya ta kasɔrɔgɔ ki kapahaya yi tɔ wɛ, pʼi ya ta kulo li maha ni kashɛn ɲuŋɔ círi círi kasɔrɔgɔ ni, kɔnhɔ Izirayɛli puga kʼi já pa yere kashɛn ki sige Tɛhɛnɛ Baa Kilɛ wo loyire li caŋa ki na wɛ. 6 Pu kashɛgɛɛ ki bɛɛri ki ɲɛ nafaanra, pu kaɲagaa ki bɛɛri di ɲɛ kafinɛyɛ. Pu ma yu na: “Tɛhɛnɛ Baa Kilɛ ɲɔjomɔ pi.” Na ta Tɛhɛnɛ Baa Kilɛ di ya ta pu tun wɛ. Ga pʼa ganha na daa na nɛ na ba pu jomɔ pu ɲɔ fa. 7 Kashɛgɛɛ kiimu yee wa zhɛɛ ge, ta kee ɲɛ mɛ nafaanra wɛ? Kaɲagaa kiimu yee wa yu ge, ta ki ɲɛ mɛ kafinɛyɛ wɛ? Yee ma jo na: “Tɛhɛnɛ Baa Kilɛ ɲɔjomɔ pi.” Na ta nɛ di ya yaaga bɛ jo wɛ.› 8 Lee wuu na yemu nɛ Kafɔɔ Tɛhɛnɛ Baa Kilɛ wa yu ge, yee yi wa mɛ: ‹Ba ni yee jomɔ pʼi ɲɛ nafaanra, ye kaɲagaa kʼi ɲɛ kafinɛyɛ, lee na nʼa da ba yìri yi fɛni.› Kafɔɔ Tɛhɛnɛ Baa Kilɛ ɲɔjomɔ pi. 9 Tudunmɔɔ piimu wo kashɛgɛɛ ki ɲɛ nafaanra, pu kaɲagaa kʼi ɲɛ kafinɛyɛ ge, nɛ na ba na keŋɛ ki yirige pee fɛni. Pu niŋɛ wa da ba bye nige nɛ wo sipyii pu ni wɛ. Pu mɛyɛ nigaya wa da ba da Izirayɛli nagoo pu tirige shɛɛn pu wo sɛmɛ wu ni wɛ. Pu wa da ba jé Izirayɛli fiige ki ni wɛ. Yi na ba li cɛ lee funŋɔ ni na Kafɔɔ Tɛhɛnɛ Baa Kilɛ nɛ ɲɛ. 10 Pʼa nɛ sipyii pu leni piinŋɛ ni, na yu: ‹Ɲaɲiŋɛ, ɲaɲiŋɛ,› na ta pu ɲaha di ya ɲiŋɛ wɛ. Nɛ sipyii pʼa kasɔrɔgɔ yereŋɛ, a tudunmɔɔ pʼi ki wá wɔɔgɔ ni lasho ni.a 11 Pii pʼa ki waa na wɔɔgɔ ni lasho wu ni ge, yi jo pu mu na kasɔrɔgɔ ki na ba do. Zangbɔhɔ ka na ba do. Zanha kagereye na ba do, zanha kafɛɛgbɔhɔ ka na ba yìri. 12 Kasɔrɔgɔ ki ba do tuun wemu ni, pu na yi yege na: ‹Lasho wu yee ya taga ki wá wɔɔgɔ ge, a wee di lekɛ ɲɔ wɛ?›
13 « ‹Lee wuu na yemu Kafɔɔ Tɛhɛnɛ Baa Kilɛ ya jo ge, yee yi wa mɛ jo nɛ loyireguunɔ wo na ba zanha kafɛɛgbɔhɔ ka yirige. Nɛ loyire wo na ba zangbɔhɔ shan, na loyireguunɔ wo na ba zanha kagereye tirige yʼa kakara pye. 14 Kasɔrɔgɔ ki yee ya wá wɔɔgɔ ni lasho wu ni ge, nɛ na ba ki shan. Nɛ na ba ki shan, na ki ɲidaa li yeege kpɛɛngɛ na. Kasɔrɔgɔ ki na ba do, yee ɲuŋɔ na dugo ki nɔhɔ ni. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ. 15 Nɛ na ba na loyire li niinɛ fo li tɛhɛnɛ kee kasɔrɔgɔ ki fɛni, na li niinɛ ki wɔɔgɔvɛɛ pu bɛ fɛni. Nɛ na ba yee pye jo: “Kasɔrɔgɔ ki ɲɛ wà nige wɛ. Piimu pʼa ki wá wɔɔgɔ ni lasho wu ni ge, pee bɛ ɲɛ wà nige wɛ. 16 Izirayɛli tudunmɔɔ piimu pu bi ma ɲibaŋa keree yu Zheruzalɛmu keree na, na yu pu kashɛgɛɛ baraga ni na ɲaɲiŋɛ na ba da, na ta ɲaɲiŋɛ di ɲɛ-ɛ ge, pu ɲɛ wà nige wɛ.”› Kafɔɔ Tɛhɛnɛ Baa Kilɛ ɲɔjomɔ pi.»
Cèe celɔbyii pu wo bɔɔngɔ ke
17 «Sipyiyawyii, ma shi shɛɛn cèe piimu pʼa puyɛ pye Kilɛ tudunmɔɔ, na puyɛ pyaa wo fungɔngɔ jomɔ yu ge, ma ɲaha ki ŋmahana ɲɛri pee yíri, mʼa Kilɛ tuduro jo pu shizhaa na, 18 mʼa pu pye na yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Cèe, yee piimu pʼa sɛmɛɛ jooli na buu keye yi bɛɛri na, na ɲubɔhɔɔ yari sipyilɛyɛ ni nɔhɔpiire mu, kɔnhɔ yʼi pu ta di le yi wo fanha ki nɔhɔ ni ge, bɔɔngɔ ki wa yee wogo. Ta yee wa giin na yee na já da nɛ wo sipyii pu munahaa ki coni, yee wo munahaa kʼi da shuu ya? 19 Yee ya nɛ mɛgɛ kyɛɛgi na sipyii pu niŋɛ ni ɔrijɛ keŋɛ ɲii dama dama, ni buuri ɲuŋɔɔ dama dama kaa na. Sipyii piimu ya yaa na pu gbo wɛ, yee ma pee gbo, piimu ya yaa na pu yaha wɛ, yee ma pee ɲìi wuu yaha, bani yee wa kafinɛyɛ yu nɛ wo sipyii pu mu, pu bɛ di yee kafinɛyɛ yi nuri.›
20 «Lee wuu na yemu Kafɔɔ Tɛhɛnɛ Baa Kilɛ ya jo ge, yee yi wa mɛ: ‹Nɛ na ba yìri yee wo sɛmɛɛ pu fɛni, pee piimu yee wa daga na sipyiire ti coni ba shazhɛɛrɛ ɲɛ-ɛ ge. Nɛ na ba pee sɛmɛɛ pu shɛɛngi na wolo yee keye yi na, piimu yee ya co co ge, na pee shɔ yi na. 21 Nɛ na ba yee ɲubɔhɔɔ ki bɛ shɛɛngi, na na sipyii pu ɲuŋɔ wolo na foro yee keye yi ni. Pu da ba bye nige yee wo tifuuyo yi wo yacoyo wɛ, lee funŋɔ ni yi da ba li cɛ na Tɛhɛnɛ Baa Kilɛ nɛ ɲɛ. 22 Sipyii piimu pʼa tii ge, yee ya yi wo kafinɛyɛ yi taga funyaŋa wá pee na, ma li ta bɛ nɛ funŋɔ bye funyaŋa ki nɔ pu na wɛ. Yee ya lowaa le sipyikuuyo ni, fo na yi pye yi ya sɔɔ na kuri kadugo yʼi kuumɔ pu yaha, kɔnhɔ yʼi ɲiifɛɛrɛ pye wɛ. 23 Lee wuu na, yee da ba nafaanra kashɛgɛɛ ɲaa nige bada wɛ, yʼi wa da ba kaɲagaa yu nige bada wɛ. Nɛ na ba na sipyii pu ɲuŋɔ wolo na foro yee keye ni. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.› »