Izirayɛli nagoo pʼa yaa na foro yapɛɛgaan ni
14
Ayiwa, caŋa ka Izirayɛli nɔhɔlɛɛ pii ya pa foro nɛ na, na dɛɛn nɛ tàan. 2 Wee tuun wu ni a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:3 «Sipyiyawyii, pii sipyii pii ya pu yapɛrɛɛ ki tugo pu zɔlɔɔ pu na. Kaa lemu lʼa pu tɔɔgɔ leni jurumu ni ge, lee na pu zɔlɔɔ pʼa ɲaha tii. Ta nɛ wʼa da gbara pu na yege kaa la na ya? 4 Lee wuu na, shɛ jo ni pu ni, mʼa pu pye na yemu Kafɔɔ Tɛhɛnɛ Baa Kilɛ ya jo ge, na yee yi wa mɛ: ‹Sipya bɛɛri wʼa wu yapɛrɛɛ tugo wu zɔ wu na, Izirayɛli puga ki ni, kaa lemu lʼa wu tɔɔgɔ leni jurumu ni ge, na wu zɔ wu ɲaha tii lee na ge, wee wa fɔɔ bu ba Kilɛ tudunmɔ wu yege, nɛ Tɛhɛnɛ Baa Kilɛ wʼa da wu ɲɔ shɔ. Nɛ na ba wu ɲɔ shɔ na bɛ ni wu yapɛrɛɛ niɲɛhɛŋɛɛ ki ni. 5 Lee funŋɔ ni nʼa da ba Izirayɛli puga ki shɛɛn pu zɔlɔɔ pu ta, na pu kuruŋɔ na pa nɛyɛ mu, pee piimu pʼa puyɛ sanha liigi nɛ na pu yapɛrɛɛ fɛni ge.› 6 Lee wuu na, yi jo Izirayɛli puga ki mu na yemu Kafɔɔ Tɛhɛnɛ Baa Kilɛ ya jo ge, na yee yi wa mɛ: ‹Yi kadugo le yi yapɛrɛɛ ki ni, yʼi guri pa na mu, yʼi kadugo le yi tanhaŋa keree ki bɛɛri ni. 7 Bani Izirayɛli puga ki sipya wa bɛɛri, kelee nadadiinmɛ bɛɛri wu ɲɛ Izirayɛli ni ge, wee wa bɛɛri bu wuyɛ sanha liigi nɛ na, na wu yapɛrɛɛ ki tugo wu zɔ wu na, kaa lemu lʼa wu tɔɔgɔ leni jurumu ni ge, na wu zɔ wu ɲaha tii lee na, wee wa fɔɔ bu ba Kilɛ tudunmɔ wu mu, na wu ba nɛ yege, nɛ Tɛhɛnɛ Baa Kilɛ yɛpyaa kʼa da wufɔɔ ɲɔ shɔ. 8 Nɛ na ba ŋmahana ɲɛri wufɔɔ fɛni, nɛ na ba wufɔɔ pye ɲaha shɛshɛɛrɛ, sipyii na ganha na wufɔɔ keree taga na puyɛ kalaa taleŋɛɛ ni. Nɛ na ba wufɔɔ niŋɛ kɔn wolo na wo sipyii pu ni. Yi na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.›
9 «Ga Kilɛ tudunmɔ wu bu wuyɛ yaha pʼa faanna ta, na daa na jomɔ pa jo, nɛ Tɛhɛnɛ Baa Kilɛ wʼa wee tudunmɔ wu faanna, nɛ na ba na keŋɛ ki yirige wu fɛni, na wu ɲuŋɔ tugo na foro na sipyii pu tɛ ni, Izirayɛli sipyii pee. 10 Kilɛ tudunmɔ wu fara wu yegevɔɔ wu na, pu shuun wu bɛɛri wo tiibaara ti foo na ba dɔ pu mu. Le li da ba nɔ Kilɛ tudunmɔ wu na ge, lee li da ba nɔ wu yegevɔɔ wu bɛ na, 11 kɔnhɔ Izirayɛli puga ki ganha bu biin di lii na na wɛ, ki ganha bu kiyɛ nɔhɔ nige ni tanhaŋa keree kʼa shishiin ni wɛ. Lee funŋɔ ni pu da bye nɛ wo sipyii, nɛ ma bye pu Kilɛ. Kafɔɔ Tɛhɛnɛ Baa Kilɛ ɲɔjomɔ pi.»
Kaa la shishiin wa da Kilɛ wo kiiri wu fiin wɛ
12 Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye: 13 «Sipyiyawyii, fiige ka bu jurumu pye nɛ na ni katiibaana la wo bye ni, nɛ bu na keŋɛ ki yirige kee fiige ki fɛni, nɛ bu yaligee kɔn kee fiige ki na, nɛ bu xuugo shan ki ɲuŋɔ ni, nɛ bu sipyiire te ni yaboboyo yi ɲuŋɔ tugo, 14 ali pii namaa taanri we mɛhɛ da pu tɛ ni, Nuxhun, ni Daɲɛli, ni Zhɔbu, pee wo tiimɛ pu na ba pee yɛ wo munahaa ki ɲuŋɔ wolo. Kafɔɔ Tɛhɛnɛ Baa Kilɛ ɲɔjomɔ pi. 15 Nɛ bu yacoyo yaha pa kee fiige ki ni, a yee di ganha na nɔhɔpiire ti xuli, fiige ki bu ɲɛri takoloŋɔ, sipya bɛ ya doroo xuu wemu ni nige yee yacoyo yi wuu na wɛ, 16 ali pii namaa taanri we mɛhɛ shɛ da pu tɛ ni, nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, pu wa da já ali puyɛ pyaa jalaa kelee pu poro pushaa ɲuŋɔ wolo wɛ, pu yɛ pe wu da zhɔ, fiige ki ma ɲɛri takoloŋɔ. 17 Kelee nɛ bu ŋmɔpara yaha pa kee fiige ki fɛni, nɛ bu jo: ‹Ŋmɔpara li fiige ki ɲaari!›, nɛ bu sipyiire te ni yaboboyo yi ɲuŋɔ tugo, 18 a lʼi shɛ da na pii namaa taanri we bɛ wu ɲɛ kulo li ni, nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, pu wa da já ali puyɛ pyaa jalaa kelee pu poro pushaa ɲuŋɔ wolo wɛ, pu yɛ pe wu da zhɔ. 19 Kelee nɛ bu kafɛɛgɛ yama yaha pa kee fiige ki ni, nɛ bu na loyire niguunɔ li tirige pu na, na sipyiire ti gbo, na pu ni yaboboyo yi ɲuŋɔ tugo, 20 ali Nuxhun, ni Daɲɛli, ni Zhɔbu bɛ mɛhɛ da pu tɛ ni, nɛ ɲìi wo wu mɛgɛ ki wuu na, Kafɔɔ Tɛhɛnɛ Baa Kilɛ ɲɔjomɔ pi, pu wa da já ali puyɛ pyaa jalaa kelee pu poro pushaa ɲuŋɔ wolo wɛ. Pu wo tiimɛ pu na ba pu yɛ pe wo munahaa ki ɲuŋɔ wolo.
21 «Ayiwa, yemu Kafɔɔ Tɛhɛnɛ Baa Kilɛ wʼa yu ge, yee yi wa mɛ: ‹Ali nɛ mɛhɛ bye nɛ da na kiiri kawagaa tɛhɛɛ shishɛɛrɛ wu yaha shan Zheruzalɛmu ɲuŋɔ ni, kee kiimu ki ɲɛ ŋmɔpara, ni xuugo, ni yacoyo, ni kafɛɛgɛ yama pu ge, kɔnhɔ di sipyiire te ni yaboboyo yi ɲuŋɔ tugo, 22 lee bɛ na, shɛɛn nigin nigin wa na ba da piimu ya shɔ pu jalaa pee ni pu pushaa pu ni ge. Pu na ba nɔ yee na Babilɔni fiige ki ni. Yi ba pu torogaŋaa kee, ni pu kapyegee ki ɲa, bɔɔngɔ kemu nɛ shan Zheruzalɛmu kulo li ɲuŋɔ ni, na kawagaa kiimu bɛɛri pye wu na ge, lee na ba yee logoo ki ɲiŋɛ. 23 Yee ba ba pee wo torogaŋaa kee, ni pu kapyegee ki ɲa, yee logoo ki na ɲiŋɛ. Yi na li cɛ lee funŋɔ ni na lemu bɛɛri nɛ pye Zheruzalɛmu kulo li na ge, na nɛ ta li pye ɲuŋɔ baa wɛ.› » Kafɔɔ Tɛhɛnɛ Baa Kilɛ ɲɔjomɔ pi.