Ɛrɛzɛn tige ki wo talenɛ le
15
Ayiwa, a Tɛhɛnɛ Baa Kilɛ wo jomɔ pʼi nɔ nɛ na, na nɛ pye:2 «Sipyiyawyii, ta ɛrɛzɛn kajiige ya ye kajiiye yisaya na ya? Ta ki geye ya ye tiye yisaya wo geye yi na sige ki ni ya? 3 Ta ɛrɛzɛn kajiiye wa daga na yaaga ka tuugo yari ya? Ta pʼa yi taga na sikaŋaa yari, na yaŋmuyɔ tɛri ki na ya? 4 Ahayi! Na ni pʼa yi leni, kee ma yi sorogo. Na ki ma ɲuyɔ shuun wu sorogo, na niŋɛ ki bɛ sorogo. Ki bu sorogo xɔ, ki na já lekɛ ɲɔ sanha wɛ? 5 Na ki ta ki ɲɔporo na, kaɲɔɔ ya ta ki na wɛ, pu da jo na ki ki sorogo! Ta ki na já latii ɲɔ?»
6 Lee wuu na, yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Ba nɛ ɛrɛzɛn kajiige lɔ mɛ sige ni tiye yisaya tɛ ni, na ki sorogo wɛ, lee pyegana li na, nʼa da ba Zheruzalɛmu bɛ pye. 7 Nɛ na ba ŋmahana ɲɛri pu fɛni. Na ka ni pʼa foro, ga na ka kʼa da pu sorogo. Nɛ ba ŋmahana ɲɛri yee fɛni tuun wemu ni, yee na li cɛ lee na na Tɛhɛnɛ Baa Kilɛ nɛ ɲɛ. 8 Nɛ na ba fiige ki ɲɛri takoloŋɔ, bani katiibaagaa pʼa pye.» Kafɔɔ Tɛhɛnɛ Baa Kilɛ ɲɔjomɔ pi.