Levitike 26

Kilɛ wo Duba we

(Dutɛrɛnɔmɛ 7:12-24 ; 28:1-14)

A Tɛhɛnɛ Baa Kilɛ di jo sanha na: « ‹Yi ganha bu yapɛrɛɛ yaa di yaha yiyɛ mu wɛ. Yi ganha bu jaa wa shishiin yàa kelee di beni wa shishiin yereŋɛ yiyɛ mu wɛ. Yi ganha bu kacemɛ le faaga ka shishiin ni, yi da sogolo kee fɛɛ ni wɛ. Nɛ wu ɲɛ Tɛhɛnɛ Baa Kilɛ yi Kilɛ we.

2 « ‹Yʼa cadɛɛnyɛ yi yɛri, yʼi da gbɔɔrɔ tɛri na pɛɛŋɛ puga ki na. Nɛ wu ɲɛ Tɛhɛnɛ Baa Kilɛ we.

3 « ‹Yi bu daha nɛ wo ɲɔmɛhɛɛ ki fɛni, yi bu kasɛɛgɛ yaha nɛ wo ɲɔmɛjogoo ki na, na ki koo ɲaari, 4 wee tuun wu ni, nɛ na ba zanhaya shaan yi mu yi tuun ni. Ɲiŋɛ ki yapyiire ti na ba ɲɔgi. Tiire ti na ba sɛni. 5 Yi na ba shinma niɲɛhɛmɛ ta, na wu sani fo na shɛ ɛrɛzɛn wu pye wʼa lɛ. Yi na ba ɛrɛzɛn wu bɛ kɔɔn fo na shɛ yemɛ pa wo nugiduun pye wʼa nɔ. Yi na ba yaligee niɲɛhɛŋɛɛ taa, na diin ɲaɲiŋɛ na yi fiige ki ni. 6 Nɛ na ba fiige ki mara yaha ɲaɲiŋɛ na. Yi ba sinnɛ sipya wa shishiin wa da ba yi fya wɛ. Nɛ na ba yacoyo yi xɔ fiige ki ni. Kashɛn da ba jé nige yi fiige ki ni wɛ. 7 Yi na ba yi pɛɛn pu niinɛ, yi ŋmɔparaa kʼi pu shaan. 8 Yee shɛɛn kaguro na ba yi pɛɛn xhuu nigin (100) niinɛ, yi shiin xhuu nigin (100) ma pu kabɔfoŋɔɔ kɛ (10.000) niinɛ, na pu shaan ni yi ŋmɔparaa ki ni.

9 « ‹Nɛ na ba kasɛɛgɛ yaha yi na, na yi pye sege fɛɛ, na yi ɲɛhɛ, na gori yaha na kariɲɛɛgɛ ɲɔmɛɛ li na yi mu. 10 Yi na ba shinmalɛgɛ li. Yi na ba shinmalɛgɛ yeege ki tayahaŋa ni, na nivomɔ le wà. 11 Nɛ na ba na tatɛɛngɛ wolo yi niŋɛ ni, yi tɔn wa da ba bɛn na mu wɛ. 12 Nɛ na ba ɲaari yi niŋɛ ni, nɛ na ba bye yi Kilɛ, yi ma bye na sipyii. 13 Nɛ wu ɲɛ Tɛhɛnɛ Baa Kilɛ, yi Kilɛ we. Nɛ wʼa yee yeege Misira fiige ki ni, kɔnhɔ yi ganha bu bye nige pu wo buloo wɛ. Nɛ yee wo zhu wu pɔɔrɔ ti kɔn, na yi pye yi na ɲaari ni ɲuyirige ni.› »

Kilɛ wo laŋi we

(Dutɛrɛnɔmɛ 28:15-68)

14 A Tɛhɛnɛ Baa Kilɛ di jo sanha na: « ‹Ga yee bu bye yee di ya sɔɔ na nɛ jomɔ logo wɛ, yee bu bye yee di ya nɛ wo ɲɔmɛjogoo ki koo ɲaari wɛ, 15 yee bu zhe nɛ wo saliya wu ni, nɛ wo kodorogoo ki tɔn bu bɛn yee mu, yee bu bye yee di ya nɛ wo ɲɔmɛjogoo ki bɛɛri koo ɲaari wɛ, yee bu nɛ kariɲɛɛgɛ ɲɔmɛɛ li kyɛɛgi, 16 nɛ na ba lemu pye yi na ge, lee li wa mɛ: Nɛ na ba kapegee shan yi ɲuŋɔ ni. Yama pemu ya sipya shɔgɔ ge, ni ceefuuro, yee na ba yi ɲìi ki fanha xuu, na yi cére ti fanha xuu. Yi na ba gbɛri gbɛri yemɛ nuri, bani yi pɛɛn na ba puyɛ ɲɔ shaa ni wee shinma wu ni. 17 Nɛ na ba ŋmahana ɲɛri yi fɛni, lee funŋɔ ni, yi pɛɛn pu na se ta yi na. Piimu pʼa yi kɔ ge, pee na ba yi mara. Yi na ba fe na ta sipya bɛ di ya yi niinɛ wɛ.

18 « ‹Pee kanhama pu bɛɛri kadugo na, yee bu bye yee di ya sɔɔ na nɛ jomɔ logo wɛ, nɛ na ba pee kanhama pu tɛhɛɛ gbarashuun shan yi ɲuŋɔ ni, yi wo jurumu wu wuu na. 19 Fanha kemu kaa yʼa daga na yiyɛ pɛlɛ ge, nɛ na ba kee kyɛɛgi, na fugba wu pye wʼa waha ba toowɔ ɲɛ wɛ, na ɲiŋɛ ki pye kʼa waha ba daɲaa tɔɔrɔ ɲɛ wɛ. 20 Yi fanhaya na ba xhɔ tawaga ni, yi ɲiŋɛ ki yapyiire ti wa da ba ɲɔgi wɛ, fiige ki tiye yi wa da ba nagoo pyi wɛ.

21 « ‹Yi bu gaɲa shii sanha, yi bye yʼi ya sɔɔ na na nɛ jomɔ pu logo wɛ, nɛ na ba yi kpɔn sanha tɔɔɲii gbarashuun na saha ni yi jurumu wu ni. 22 Nɛ na ba yacoyo yeege yi fɛni. Yee na ba yi nagoo pu xuli, na yi yapɔrɔyɔ yi kyɛɛgi. Yi na ba yi kyɛɛgi fo na yi pye yisamaa ya ye wɛ, yi korogoo ki niwagaa na gori wà sipyii baa.

23 « ‹Pee kanhama pu bɛ bu bye pʼi ya yee kuu wɛ. Yee bu yi gaɲa shii sanha nɛ na, 24 wee tuun wu ni, nɛ bɛ na ba ŋmahana ɲɛri yi fɛni. Nɛ na ba yi kpɔn tɔɔɲii gbarashuun yi jurumu wu wuu na. 25 Nɛ na ba ŋmɔpara yaha ba yi fɛni, lee na ba kariɲɛɛgɛ ɲɔmɛɛ li wo xakɛ wu foo tɔ. Yi bu baa shɛ jé yi wo kugbɔhɔɔ ki ni, nɛ na kafɛɛgɛ yama wá yi na, na yi le yi pɛɛn pu keŋɛ ni. 26 Nɛ ba yaligee kɔn yi na tuun wemu ni, cèe kɛ na ba yee wo buuri wu fɔ́ buuri tafɔgɔ nigin ni, na wu taanna taanna yataanga ni na kan yee mu. Yi na ba wu li, ga wʼi wa da la wolo yi wo xuugo ki ni wɛ.

27 « ‹Lee bɛ nibyege na, yee bu bye yee di ya nɛ jomɔ logo wɛ, yee bu gaɲa shii nɛ na, 28 wee tuun wu ni nɛ bɛ na ba ŋmahana ɲɛri yi fɛni ni kafugo ni, na yi kpɔn sanha tɔɔɲii gbarashuun yi wo jurumu wu wuu na. 29 Yi na ba yi jalaa pu xaara xaa, na yi pushaa pu xaara xaa. 30 Faaboboyo yemu na yʼa pɛɛŋɛ ki pyi ge, nɛ na ba yee kyɛɛgi. Saraya tawologo kemu na yʼa nudanga yawurire ti wo ge, nɛ na ba kee kyɛɛgi, na yee nixhuyo yi pii yi wo yapɛrɛɛ ki nixhuyo yi ɲuŋɔ ni. Yi tɔn na ba bɛn na mu. 31 Nɛ na ba yi kugbɔhɔɔ ki ɲɛri katahaya, na yi wo fɛfɛɛrɛ tɛyɛ yi kyɛɛgi. Nɛ da ba sɔɔ di da yi wo nudanga yawurire saraya yi wo nugo ki nuri nige wɛ. 32 Nɛ na ba yi fiige ki kyɛɛgi. Yi pɛɛn piimu na ba diin ki ni ge, pee na ba gaala. 33 Nɛ na ba yi caaga shi wusama wo fiiye yi ni, na ŋmɔpara kɔ yi fɛni. Yi fiige ki na ba gyɛɛgi, yi kugbɔhɔɔ ki ma bye katahaya.

34 « ‹Wee tuun wu ni, na yi yaha yi pɛɛn pu wo fiige ki ni, ɲiŋɛ ki bɛ na ŋmɔ kee yee ki funŋɔ ni. Ɲiŋɛ ki bɛ na ba ki wo yeŋmɔŋɔɔ ki pye, kee kiimu bɛɛri kʼa toro pyebaa ge. 35 Ɲiŋɛ ki na ba tuun wemu bɛɛri pye sipyii baa ge, ki bɛ na ba ki wo yeŋmɔŋɔɔ ki ŋmɔ, kee yeŋmɔŋɔɔ kiimu kʼa toro ki ɲuŋɔ ni, na yi yaha ki ni ge.

36 « ‹Yee piimusamaa ɲìi wuu pu da ba gori yi pɛɛn pu wo fiiye yi ni ge, nɛ na ba fyaara niguuro le pee wo zɔlɔɔ pu ni. Pu ba tige wɛŋɛ nidiige bɛ tunmɔ logo, kafɛɛgɛ ya kemu lɔ ge, pu na da fe. Pu na ba fe fo na wo na dun, ba sipya ma fe mɛ ŋmɔpara ɲaha na wɛ, na ta sipya bɛ di ya pu niinɛ wɛ. 37 Pu na ba birege puyɛ ni, ma na jo ŋmɔpara li ɲɛ pu fɛni, na ta sipya bɛ di ya pu niinɛ wɛ. Yee da ba já yere yi pɛɛn sige wɛ. 38 Yee na ba gyɛɛgi shi watii shɛɛn tɛ ni, yi pɛɛn pu wo fiige ki na ba yi lɔ jɔ. 39 Piimusamaa pu da ba gori pu pɛɛn pu wo fiiye yi ni ge, pee na ba siinnɛ puyɛ pyaa wo tiibaara ti keŋɛ ni, ni pu tii pu bɛ wo tiibaara ti keŋɛ ni.› »

Kilɛ ya ɲɔmɛɛ lemu lɔ ge, wu funyɔ ya wuu li na wɛ

40 A Tɛhɛnɛ Baa Kilɛ di jo sanha na: « ‹Ga, yi nagoo pu na ba yere pu wo tiibaara te, ni pu sefɛɛ pu bɛ wo tiibaara ti na, na jo na kanahana pee ya pye nɛ na, na pee bi nʼa she le puyɛ ni nɛ fɛni. 41 Lee lʼa nɛ bɛ pye nɛ bɛ ya ŋmahana ɲɛri pu fɛni, na pu yaha kari pu pɛɛn pu wo fiige ki ni. Wee tuun wu ni, pu na ba xhɔ puyɛ tirige, na pu ɲuwɛwaa li yaha. Pu wo tiibaara ti foo li na ba dɔ pu mu. 42 Wee tuun wu ni, nɛ na ba na funŋɔ to na kariɲɛɛgɛ ɲɔmɛɛ li na ni Yakuba ni, nɛ na ba na funŋɔ to na kariɲɛɛgɛ ɲɔmɛɛ li na ni Ishaaga ni, na na funŋɔ to li na ni Ibirayima ni. Nɛ bi fiige kemu wo ɲɔmɛɛ lɔ pu mu ge, nɛ na ba na fungɔngɔ yaha kee na. 43 Pu na ba foro fiige ki ni, na ki niwaga yaha. Fiige ki wo yeŋmɔŋɔɔ kiimu ya toro ki ɲuŋɔ ni ge, fiige ki na ba kee ŋmɔ. Pu tiibaara ti wo foo li na ba dɔ pu mu wee tuun wu ni, bani pʼa nɛ wo kodorogoo ki she, a nɛ wo kajogoo ki tɔn di bɛn pu mu. 44 Ga lee bɛ na, na pu yaha pu pɛɛn pu wo fiige ki ni, nʼa da ga zhe pu ni wɛ. Pu tɔn wa da ga bɛn na mu fo di pu shi wu tɔ wɛ. Nʼa da ga na kariɲɛɛgɛ ɲɔmɛɛ li kyɛɛgi na ni pu tɛ ni wɛ, bani nɛ wu ɲɛ Tɛhɛnɛ Baa Kilɛ, pu Kilɛ we. 45 Nɛ na ba na funŋɔ to na kariɲɛɛgɛ ɲɔmɛɛ li na ni pu sefɛlɛɛ pu ni, pee piimu nɛ yeege Misira fiige ki ni, shi wusama ɲii na, kɔnhɔ di bye pu Kilɛ ge. Nɛ wu ɲɛ Tɛhɛnɛ Baa Kilɛ we.›»

46 Ayiwa, kajogoo ni kodorogoo, ni saliyaa piimu Tɛhɛnɛ Baa Kilɛ ya teŋɛ wu ni Izirayɛli nagoo pu tɛ ni Musa keŋɛ kurogo, Sinayi faaboboŋɔ ki na ge, pee pʼa pye piiri.