Ɛkizode
Sɛmɛ wemu wʼa Izirayɛli nagoo pu wo ɲara li kaa yu ge
Izirayɛli tirige shɛɛn piimu ya kari ni Yakuba ni Misira ni ge
1
Yakuba wemu pʼa byi sanha na Izirayɛli ge, wee ni wu jalaa piimu ya kari ni wu ni Misira fiige ki ni wʼa bɛɛri ni wu kpuun ge, pee mɛyɛ ɲɛ:* 2 Urubɛn, Simiɲɔ, Levi, Zhuda, 3 Isakari, Zabulɔn, Bɛnzhamɛ, 4 Dan, Nɛfitali, Gadi ni Azɛri. 5 Yakuba tirige shɛɛn piimu ya shɛ Misira ni ge, pee ya bye sipyii kɛlɛɛ gbarashuun (70).a Ja wa bɛ bye Yakuba mu na Yusufu, lee ya bi wee ta xɔ Misira ni. 6 Lee kadugo na a Yusufu ni wu ceboronamaa ni pu lɛɲii pu bɛɛri di ba xhu. 7 A Izirayɛli nagoo pʼi bye sege fɛɛ. A pʼi nɔhɔpiire niɲɛhɛrɛ ta. A pʼi sii ɲɛhɛ fo xuuni fo na Misira fiige ki ɲi.*Izirayɛli nagoo wo ɲaa we
8 Ayiwa, a saan nivomɔ wa di ba diin Misira fiige ki ɲuŋɔ ni. Wee bi Yusufu cɛ wɛ.* 9 A wee di Misira shɛɛn pye: «Li wii Izirayɛli nagoo pʼa ɲɛhɛ wèe na, pu fanha bɛ dʼa ɲɛhɛ wèe wogo na. 10 Yi pa wù pu keree ɲaha shɔɔnri ni fungɔngɔ fɛɛrɛ ni, ni lee bɛ wɛ, pu na ba ɲɛhɛ xuuni wèe na. Li na já bye bɛ na kashɛn bu yìri na pee na já vara wèe pɛɛn na na kashɛn kɔn wèe na, lee kadugo na pʼa fiige ki yaha.»* 11 Lee na a Misira shɛɛn pʼi labye ɲuŋɔfɛɛ pii teŋɛ Izirayɛli nagoo pu ɲuŋɔ ni, kɔnhɔ pee di ɲakpaan wo pu na ni kapyewagaa ni. Lee funŋɔ ni pʼa Pitɔmu ni Aramusɛsi kulogoo ki yereŋɛ, kee ki bye Farawɔn wo yaŋmuyɔ yi tayahaya, Misira saan we. 12 Ga pee ya bi la faraa Izirayɛli nagoo pu ɲaa wu na faragana lemu na ge, mu lʼa ya bi faraa Izirayɛli nagoo pu na sege shizhaa na. A lee di Izirayɛli nagoo pu tɔn pɛn Misira shɛɛn pu mu. 13 Wee tuun wu ni a pʼi Izirayɛli nagoo pu le bulooro kapyeŋɛɛ ni. 14 A pʼi kapyewagaa taga ɲakpaan wo pu na, potɔnhɔnɔ, dufaanshaan ni kɛrɛyɛ labye tuuyo bɛɛri. Kee ɲiɲaara baa kapyewagaa kee Izirayɛli nagoo pu bi byi.
15 A Misira shɛɛn saan wu Heburuu lacozhaa shuun Shifura ni Puwa pye: 16 «Heburuu cee wa ba giin di digi, yi pya wu shi wii, wu bu da ná, yʼi wu gbo, wu bu da cee, yʼi wu yaha wà!» 17 Ga a lacozhaa pʼi fya Kilɛ na, Misira shɛɛn saan wʼa yemu jo ge, pu ya ta sɔɔ na lee pye wɛ, na funaŋaa ki yaha ɲìi na. 18 A Misira shɛɛn saan wu lacozhaa pu yiri na pu pye: «Ɲaha na yee di funaŋaa ki yɛri ɲìi na wɛ?» 19 A lacozhaa pʼi Farawɔn pye: «Heburuu cèe pee ni Misira shɛɛn cèe pu ɲɛ nigin wɛ, fanha wa pu ni, yani lacozhɔ wu wu nɔ wufɔɔ yíri ge, wʼa wu ta wʼa tigi xɔ.»
20 A Izirayɛli nagoo pʼi sii ɲɛhɛ fo xuuni. A Kilɛ di saama pye lacozhaa pu bɛ mu, 21 na nagoo kan pu mu bani pʼa fya Kilɛ na.
22 Ba Farawɔn ya lee ɲa wɛ, na wu sipyii pu bɛɛri pye na: «Heburuu pu bu funana lemu bɛɛri se, yʼi lee wà Nili gba lɔhɔ ki ni, ga pu bu fucɛɛrɛ lemu bɛɛri se, yʼi lee yaha.»*