Levitike
Sɛmɛ wemu wʼa saraya ɲaha shɔɔnrivɛɛ pu wo labye wu ɲaha yu ge
SARAYA NI YAKANYA YI WO KODOROGOO
1
Ayiwa a Tɛhɛnɛ Baa Kilɛ di mujuu jo na foro Ɲuŋɔ Tacirige Fàya Puga ki ni, na Musa yiri, na wu pye, 2 na wu yi jo Izirayɛli nagoo pu mu na: «Wa ba da yapɔrɔgɔ wo saraga wolo di gan Tɛhɛnɛ Baa Kilɛ mu yi ni, wufɔɔ wu ki pye nù, kelee dubya, kelee sika.Saraya nizogoyo yi wo wologana
3 «Wufɔɔ wo saraga ki bu da nù, wemu na zorogo fɛɛfɛɛ ge, wufɔɔ di wu pye nupoo wemu ɲɛ manɛa baa ge, wufɔɔ di ba ni wu ni pƝuŋɔ Tacirige Fàya Puga ki tajege ki ɲɔ na, kɔnhɔ Tɛhɛnɛ Baa Kilɛ di sɔɔ wu na. 4 Wufɔɔ di wu keŋɛ taha saraga yapɔrɔgɔ ki ɲuŋɔ ni, kɔnhɔ wu saraga kʼi jo, wu jurumu wu yafa wu mu. 5 Wu yapɔrɔgɔ ki kuun Tɛhɛnɛ Baa Kilɛ ɲaha tàan. Saraya ɲaha shɔɔnrivɛɛ pʼi pee shishan pu shɔ pu pa, pee piimu pu ɲɛ Arɔn wo jalaa pu ge, pʼi pu ɲɛrɛgi ɲɛrɛgi saraya tawologo ki kabaya yi bɛɛri na, kee kemu ki wa Ɲuŋɔ Tacirige Fàya Puga ki tajege ki ɲɔ na ge. 6 Wʼi nù wu puri, wʼi wu kɔn cereye cereye. 7 Saraya ɲaha shɔɔnrivɛɛ pee, Arɔn wo jalaa pee, pee di na ka gbɛri saraya tawologo ki ɲuŋɔ ni, pʼi kajiiye le ki ni. 8 Pʼi xaara ti cereye yi lɔ lɔ, ni ɲuŋɔ ke, ni sìnmɛ pe, pʼi yi le kajiiye yi wo na ki ni saraya tawologo ki na. 9 Saraga ki wolovɔɔ wu nù laara te ni tɔɔyɔ yi bɛ je ni lɔhɔ ni. Lee kadugo na saraya ɲaha shɔɔnrivɔɔ wa di yi bɛɛri sòrogo saraya tawologo ki na. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni.
10 «Saraga ki wolovɔɔ bu da wu na da dubya kelee sika pye saraga nizogoŋɔ ke, wufɔɔ di wu pye dubyapoo kelee sikapoo wemu ɲɛ manɛ baa ge. 11 Wufɔɔ di ba wu kuun Tɛhɛnɛ Baa Kilɛ ɲaha tàan saraya tawologo ki suumɔ kulo kacɛ ki na. Saraya ɲaha shɔɔnrivɛɛ pʼi wu shishan pu shɔ, pee piimu pu ɲɛ Arɔn wo jalaa pu ge, pʼi pu ɲɛrɛgi ɲɛrɛgi saraya tawologo ki kabaya yi bɛɛri na. 12 Saraga ki wolovɔɔ wu ki puri, wu xaara ti kɔn cereye cereye. Saraya ɲaha shɔɔnrivɔɔ wa di yee xaara cereye yi lɔ, na fara ɲuŋɔ ke ni sìnmɛ pu na, wu yi le kajiiye yi wo na ki ni saraya tawologo ki na. 13 Saraga ki wolovɔɔ wu laara te ni tɔɔyɔ yi je ni lɔhɔ ni. Saraya ɲaha shɔɔnrivɔɔ wu yi figi figi Tɛhɛnɛ Baa Kilɛ ɲaha tàan. Lee kadugo na wu yi bɛɛri sòrogo saraya tawologo ki na. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni.
14 «Saraga ki wolovɔɔ wu bu da wu na da shazhira pye saraga nizogoŋɔ ke Tɛhɛnɛ Baa Kilɛ mu, wu ba ni xobanra ni, kelee gbegbeshazhira lemu sanha lɛ-ɛ ge. 15 Saraya ɲaha shɔɔnrivɔɔ wu shɛ ni lee shazhira li ni saraya tawologo ki ɲahagbaa na. Wu li ɲuŋɔ ki kile kɔn, wu kee sòrogo saraya tawologo ki na. Wu li shishan pu wo saraya tawologo ki kabanugo ki na. 16 Wu jemashɔngɔb ki wolo ni ki funŋɔ yaŋmuyɔ yi ni, xuu wemu ni pʼa shɔɔnrɔ ti woni ge, wu ki wá wee xuu wu ni saraya yi tawologo ki Kilɛ-nɔhɔ ki na. 17 Wu shazhira li ja niŋɛ ke ni, ga wu ganha bu li waagi laha liyɛ na wɛ. Wu li sòrogo kajiiye yi wo na ki ni saraya tawologo ki na. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni.»