Saraga kemu ɲɛ shinma ge, kee wo wologana
2
«Ayiwa, sipya wa ba da shinma saraga wolo di gan Tɛhɛnɛ Baa Kilɛ mu, wufɔɔ di ki pye myɛ niviinmɛ, wu sìnmɛ le pu ni, wu nudanga yawurire taha pu na. 2 Wu shɛ ni yi ni saraya ɲaha shɔɔnrivɛɛ pu mu, pee piimu pu ɲɛ Arɔn wo jalaa pu ge. Saraya ɲaha shɔɔnrivɔɔ wa di keŋɛ ɲii nigin lɔ pee myɛviinmɛ sìnmɛ wo pu ni, wu nudanga yawurire ti bɛɛri lɔ, wu yee sòrogo saraya tawologo ki na. Kee saraga ki na ba bye fundogo saraga. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni. 3 Saraga myɛ pusama pʼa kori ge, pee ɲɛ Arɔn ni wu nagoo pu wo. Kee ɲɛ fɛfɛɛrɛ ti bɛɛri wo fɛfɛɛrɛ yaaga, bani saraga kemu ya sòrogo Tɛhɛnɛ Baa Kilɛ mu ge, kee ni kʼa foro.4 «Ma funŋɔ bi ɲɛ mʼa ma shinma saraga ki fɔ́ digi ni, ma na ki kan Tɛhɛnɛ Baa Kilɛ mu, mʼa myɛviinmɛ pʼa tɔnhɔ sìnmɛ ni, na pee fɔ́ ma pye buuri shizhɛnhɛrɛ baa wo, kelee mʼa pu pye ŋmɔmia, shizhɛnhɛrɛ ganha bu le wu ni wɛ. Mʼa sìnmɛ wo wu na.
5 «Ma funŋɔ bi ɲɛ mʼa ma shinma saraga ki káa teŋɛɛ ni, ma na ki kan Tɛhɛnɛ Baa Kilɛ mu. Mʼa myɛviinmɛ pa tɔnhɔ sìnmɛ ni, shizhɛnhɛrɛ ganha bu le pu ni wɛ, na pee káa, 6 na pu cere cere, na nɔhɔ sìnmɛ pa bɛ le pu ni. Shinma saraga ki wa kii.
7 «Ma funŋɔ bi ɲɛ mʼa ma shinma saraga ki kaa dagoŋɔ ni, ma na ki kan Tɛhɛnɛ Baa Kilɛ mu. Kʼa yaa na pye myɛviinmɛ, na sìnmɛ taga pu tɔnhɔ. 8 Myɛ saraga kemu mʼa yàa lee yaagana li na ge, mʼa ki lɔ shɛ Tɛhɛnɛ Baa Kilɛ mu. Mʼa shɛ ki kan saraya ɲaha shɔɔnrivɔɔ wu mu, wee di fulo ni ki ni saraya tawologo ki na. 9 Kemu kʼa yaa na wolo ki ni na pye fundogo saraga ge, wu na ba kee wolo ki ni, na kee sòrogo saraya tawologo ki na. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni. 10 Kemusaŋa kʼa da gori kee saraga ki ni ge, kee ɲɛ Arɔn ni wu jalaa pu wogo. Kee ɲɛ fɛfɛɛrɛ ti bɛɛri wo fɛfɛɛrɛ yaaga, bani saraga kemu ya sòrogo Tɛhɛnɛ Baa Kilɛ mu ge, kee ni kʼa foro.
11 «Shinma saraya yemu bɛɛri yʼa da ba wo da gaan Tɛhɛnɛ Baa Kilɛ mu ge, shizhɛnhɛrɛ ganha ga le ka shishiin ni wɛ. Yi ganha ga shizhɛnhɛrɛ kelee sɛrɛ sòrogo di bye saraga nizogoŋɔ Tɛhɛnɛ Baa Kilɛ mu wɛ. 12 Yi ba yi wo yapyiire nizhiire ti kaan Tɛhɛnɛ Baa Kilɛ mu tuun wemu ni, yi na já shizhɛnhɛrɛ ni sɛrɛ ti bɛ kan wee tuun wu ni ba yapyiire nizhiire ɲɛ wɛ. Ga yi ganha ga yi sòrogo saraya tawologo ki na na pye nudanga saraga nizogoŋɔ wɛ. 13 Shinma saraga bɛɛri yʼa da wolo ge, yʼi suumɔ le ki ni. Wa ganha ga shinma saraga wolo na ta wu ya suumɔ le ki ni wɛ, bani yee wo Kilɛ wʼa kariɲɛɛgɛ ɲɔmɛɛ lemu lɔ ni yee ni ge, suumɔ pʼa pye lee wo shɛmɛb pe. Lee wuu na yʼa yaa na suumɔ leni yi saraya yi bɛɛri ni.
14 «Wa ba da shinmafomɔ wu wo shinma nizhiimɛ wolo saraga Tɛhɛnɛ Baa Kilɛ mu, wufɔɔ di shinma sɛyɛ nizhiiye yi kɔn, wu yi kaa, wu yi muwogi, wu yee pye wu shinmafomɔ wu bɛɛri wo nizhiimɛ wo saraga. 15 Wu sìnmɛ le ki ni, wu nudanga yawurire taha ki na. Shinma saraga ki wa kii. 16 Shinma wemu wʼa muwogi ge, saraya ɲaha shɔɔnrivɔɔ wu ma wa lɔ wee ni, ni sinmɛ pu ni, na nudanga yawurire ti bɛɛri lɔ, na yee sòrogo na pye fundogo saraga. Saraga nizogoŋɔ ki wa kii, na ma kemu sòrogo Tɛhɛnɛ Baa Kilɛ mu ge.»