Nɔburuu
Kilɛ ya jo na Musa wu Izirayɛli nagoo pu tɔrɔ, we sɛmɛ we wʼa pee tɔrɔmɔ pu kaa yu
Musa ya Izirayɛli nagoo pu tɔrɔ
1
Izirayɛli nagoo pu na foro Misira fiige ki ni, li yee shuun wuu li wo yeŋɛ shuun wogo ki cazhiige ki na Tɛhɛnɛ Baa Kilɛ ya jo ni Musa ni, Sinayi siwaga ki ni, Ɲuŋɔ Tacirige Fàya Puga ki ni na wu pye:* 2 «Yi Izirayɛli nagoo pu bɛɛri mɛyɛ ka na saha ni pu gbaweye ye ni pu kpɔnhɔɔ ki ni. Yʼi namaa pu bɛɛri tɔrɔ nigin nigin na. 3 Na co yee kɛlɛɛ shuun (20) na na duri, namaa piimu bɛɛri pu da já zhɛ kashɛn ni Izirayɛli nagoo pu ni ge, yʼi pu bɛɛri tɔrɔ ma ni Arɔn ni na saha ni pu kashɛn keye yi ni. 4 Gbaweye yi bɛɛri wo kpɔnhɔɔ fɛɛ nigin nigin na ba fara yi na. 5 Sipyii piimu pʼa da ba yi tɛgɛ ge, pee wo mɛyɛ yi wa ye:Sheduri ja Elisuri.
6 Simiɲɔ wo gbawege ki ni
Surishadayi ja Shelumyɛli.
7 Zhuda wo gbawege ki ni,
Aminadabu ja Nasɔn.
8 Isakari wo gbawege ki ni,
Shuwari ja Netaɲɛli.
9 Zabulɔn wo gbawege ki ni
Xhelɔn ja Eliyabu.
10 Yusufu wo jalaa shuun wu ni,
Efirayimu wo gbawege ki ni,
Amiyudi ja Elishama.
Manase wo gbawege ki ni,
Pedasuri ja Gamaliyɛli.
11 Bɛnzhamɛ wo gbawege ki
ni, Zhidoni ja Abidan.
12 Dan wo gbawege ki ni,
Amishadayi ja Ayezɛri.
13 Azɛri wo gbawege ki ni,
Okiran ja Pazhiyɛli.
14 Gadi wo gbawege ki ni,
Erewɛli ja Elizafu.
15 Nɛfitali wo gbawege ki ni,
Ena ja Ayira.»
16 Pii sipyii pii pʼa bi shɔɔnri sipyiire ti ni. Pu bɛɛri pu bye kpɔnhɔɔ fɛɛ. Pee pʼa bi nɔhɔ pye bɛ Izirayɛli wo kashɛn keye yi ɲuŋɔfɛɛ.
17 Sipyii piimu mɛyɛ yʼa tɔrɔ mɛ ge, a Musa ni Arɔn di pee fara puyɛ na. 18 A pee di Izirayɛli nagoo pu bɛɛri yiri pinnɛ yee li yeŋɛ shuun wogo ki cazhiige ke, na pu bɛɛri mɛyɛ ka na saha ni pu gbaweye ye ni pu kpɔnhɔɔ ki ni. A pʼi namaa pu bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni, 19 ma na jo ba Tɛhɛnɛ Baa Kilɛ bi yi jo Musa mu wɛ. Ayiwa, a Musa shiin di Izirayɛli nagoo pu tɔrɔ mu lee tɔrɔgana li na Sinayi siwaga ki ni.
20 Ayiwa Izirayɛli wo jashiimɛ Urubɛn wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 21 A pee di bɛ ni sipyii kabɔfoŋɔɔ kɛlɛɛ shishɛɛrɛ ni gbaara, di xhuu kaguro (46.500) ni.
22 Simiɲɔ wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 23 A pee di bɛ ni sipyii kabɔfoŋɔɔ kɛlɛɛ kaguro ni gbarashɛɛrɛ, di xhuu taanri (59.300) ni.
24 Gadi wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 25 A pee di bɛ ni sipyii kabɔfoŋɔɔ kɛlɛɛ shishɛɛrɛ ni kaguro, di xhuu gbaara ni kɛlɛɛ kaguro (45.650) ni.
26 Zhuda wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 27 A pee di bɛ ni sipyii kabɔfoŋɔɔ kɛlɛɛ gbarashuun ni shishɛɛrɛ, di xhuu gbaara (74.600) ni.
28 Isakari wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 29 A pee di bɛ ni sipyii kabɔfoŋɔɔ kɛlɛɛ kaguro ni shishɛɛrɛ, di xhuu shishɛɛrɛ (54.400) ni.
30 Zabulɔn wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 31 A pee di bɛ ni sipyii kabɔfoŋɔɔ kɛlɛɛ kaguro ni gbarashuun, di xhuu shishɛɛrɛ (57.400) ni.
32 Yusufu wo jashiimɛ Efirayimu wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 33 A pee di bɛ ni sipyii kabɔfoŋɔɔ kɛlɛɛ shishɛɛrɛ, di xhuu kaguro (40.500) ni.
34 Yusufu wo ja shuun wo Manase wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 35 A pee di bɛ ni sipyii kabɔfoŋɔɔ kɛlɛɛ taanri ni shuun, di xhuu shuun (32.200) ni.
36 Bɛnzhamɛ wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 37 A pee di bɛ ni sipyii kabɔfoŋɔɔ kɛlɛɛ taanri ni kaguro, di xhuu shishɛɛrɛ (35.400) ni.
38 Dan wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 39 A pee di bɛ ni sipyii kabɔfoŋɔɔ kɛlɛɛ gbaara ni shuun, di xhuu gbarashuun (62.700) ni.
40 Azɛri wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 41 A pee di bɛ ni sipyii kabɔfoŋɔɔ kɛlɛɛ shishɛɛrɛ ni nigin, di xhuu kaguro (41.500) ni.
42 Nɛfitali wi ge, a pʼi wee wo sipyii pu tɔrɔ pu kpɔnhɔɔ ki cɛ fɛni. Namaa piimu bɛɛri pu da já kashɛn ŋmɔ ge, a pʼi pee bɛɛri mɛyɛ ka nigin nigin na, na co yee kɛlɛɛ shuun (20) na na duri fugba wu ni. 43 A pee di bɛ ni sipyii kabɔfoŋɔɔ kɛlɛɛ kaguro ni taanri, di xhuu shishɛɛrɛ (53.400) ni.
44 Ayiwa, pii sipyii piiri Musa ni Arɔn ni Izirayɛli ɲuŋɔfɛɛ kɛ ni shuun wʼa tɔrɔ. Pee ɲuŋɔfɛɛ pʼa bi foro Izirayɛli gbaweye yi bɛɛri ni, gbawege ka bɛɛri shɛn nigin. 45 A pʼi Izirayɛli nagoo pu bɛɛri tɔrɔ pu kpɔnhɔɔ ki cɛ fɛni, piimu bɛɛri pu da já kashɛn ŋmɔ ge, na co yee kɛlɛɛ shuun (20) na na duri fugba wu ni. 46 A pu bɛɛri di bɛ ni sipyii kabɔfoŋɔɔ xhuu gbaara ni taanri, di xhuu kaguro ni kɛlɛɛ kaguro (603.550) ni.
Ɲɔmɛɛ lemu lʼa jo Levi wo gbawege ki shizhaa na ge
47 Ga Izirayɛli nagoo piimu pu ɲɛ Levi wo gbawege ki sipyii pu ge, pu ya ta pee pinnɛ tɔrɔ ni sipyiire tisara ni wɛ. 48 Bani Tɛhɛnɛ Baa Kilɛ bi Musa pye: 49 «Ma ganha bu Levi wo gbawege ki sipyii pu niŋɛ le pe kama pe ni wɛ, ma ganha bu pu pinnɛ dɔrɔ ni Izirayɛli nagoo pusamaa ni wɛ. 50 Kariɲɛɛgɛ ɲɔmɛɛ li keshi wu wa fàya puga kemu ni ge, kee fàya puga ke ni ki funŋɔ yaŋmuyɔ ni ki yatoyo yi bɛɛri kaa le pu keŋɛ ni. Pee pʼa da da fàya puga ke ni ki yatoyo yi luu na ɲaari, na ki labye wu bɛɛri pyi. Pu na ba pu wo buguloo pu sin sin ma Ɲuŋɔ Tacirige Fàya Puga ki maha. 51 Ɲuŋɔ Tacirige Fàya Puga ki ba da gɔɔngi, pee pʼa da ki waraga, ki ba da zin, pee pʼa da ki sin. Sipya bɛɛri wʼa fulo Ɲuŋɔ Tacirige Fàya Puga ki na, na ta wufɔɔ di ɲɛ Levi wo gbawege ki shɛn wa-ɛ ge, weefɔɔ na gbo. 52 Izirayɛli nagoo pu na ba pu fàya buguloo pu sin kagɛrɛyɛ kagɛrɛyɛ, namaa pu bɛɛri nigin nigin di bye pu wo tuugoshɛmɛa pu tàan na saha ni pu wo kashɛn keye yi ni. 53 Ga Levi wo tirige shɛɛn pu na ba pu wo fàya buguloo pu sin na Ɲuŋɔ Tacirige Fàya Puga ki maha, pu da ki kasɛri. Lee funŋɔ ni Izirayɛli nagoo pu da ba nɛ wo loyire li kilee da zhaan puyɛ ɲuŋɔ ni nige wɛ.» 54 A Izirayɛli nagoo pʼi kii keree kii bɛɛri pye cibɛ ba Tɛhɛnɛ Baa Kilɛ ya yi jo Musa mu wɛ.