ƝƆFAAYA WO KODOROGOO
Sipya wo ɲɔfaaga
27
A Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na: ‹Wa bu sipya wo ɲɔfaaga faa Tɛhɛnɛ Baa Kilɛ mu, wufɔɔ na já wari kan sipya wu tɛgɛ. 3 Sipya wemu ɲɔ wʼa faa ge, wu bu da ná, wu shi wʼi ɲɛ yee kɛlɛɛ shuun ni yee kɛlɛɛ gbaara (60) tɛ ni, wari wemu wu da gan wee ɲuŋɔ tàan ge, wee ɲɛ warifyɛn sikilee kɛlɛɛ kaguro (50), na saha ni fɛfɛɛrɛ xuu wu wo jate wu ni.a 4 Wu bu bye cee, wee ɲɛ warifyɛ sikilee kɛlɛɛ taanri (30). 5 Wufɔɔ shi wu bu bye yee kaguro ni yee kɛlɛɛ shuun tɛ ni, wu bu bye ná, wee ɲɛ warifyɛn sikilee kɛlɛɛ shuun. Wu bu bye cee, wee ɲɛ warifyɛn sikilee kɛ. 6 Wufɔɔ shi wu bu bye yeŋɛ nigin ni yee kaguro tɛ ni, wu bu bye ná, wee ɲɛ warifyɛn sikilee kaguro. Wu bu bye cee, we ɲɛ warifyɛn sikilee taanri. 7 Wufɔɔ shi wu bu ɲɔ kɔn yee kɛlɛɛ gbaara (60) na, na duri, wu bu bye ná, wee ɲɛ warifyɛn sikilee kɛ ni kaguro, wu bu bye cee, we ɲɛ warifyɛn sikilee kɛ.8 «Wari wemu wʼa yaa na saraa sipya wu ɲuŋɔ tàan ge, wemu wʼa ɲɔfaaga ki faa ge, se bu bye wu ɲɛ wu ni wu já wee wari we saraa wɛ, wu na zhɛ ni sipya wu ni saraya ɲaha shɔɔnrivɔɔ wu mu. Saraya ɲaha shɔɔnrivɔɔ wu na zhɛ sipya wu wii, na wari ɲɔ ka teŋɛ na saha ni ɲɔfaaga ki faavɔɔ wu wo se ɲuŋɔkana ni.› »
Yapɔrɔgɔ wo ɲɔfaaya
9 « ‹Wufɔɔ bu da wʼa yapɔrɔgɔ wo ɲɔfaaga faa, yapɔrɔgɔ kemu na já wolo saraga Tɛhɛnɛ Baa Kilɛ mu ge, kee yapɔrɔgɔ ki na ba yaha Tɛhɛnɛ Baa Kilɛ yahama ni. 10 Ki da já vaa wɛ, niguuŋɔ da já daga nizaaŋa faa wɛ, nizaaŋa bɛ di da já daga niguuŋɔ faa wɛ. Wu bu yapɔrɔgɔ katii tagaa ɲɔfaaga ki wogo ki faa, wee tuun wu ni yi shuun wu bɛɛri na yaha Tɛhɛnɛ Baa Kilɛ yahama ni.
11 « ‹Yapɔrɔyɔ yemu yi ɲɛ yi ya wo saraga Tɛhɛnɛ Baa Kilɛ mu-i ge, ɲɔfaaga ki wo yapɔrɔgɔ ki bu da kee ka, pʼi shɛ ni ki ni saraya ɲaha shɔɔnrivɔɔ wu mu. 12 Yapɔrɔgɔ ki ɲɛ ɲuŋɔkana lemu na ge, saraya ɲaha shɔɔnrivɔɔ wu lee wo pɛrɛmɛ taha ki na. Wu bu pɛrɛmɛ pemu taha ki na, ki keree di shɔɔnri na saha ni pee ni. 13 Yapɔrɔgɔ ki kafɔɔ wu la bi ɲɛ wu ki shɔ, pɛrɛmɛ pemu saraya ɲaha shɔɔnrivɔɔ wʼa taha ki na ge, wu pee kan, wu guri wu pu taaga kaguro wogo fara pu na wu kan.› »
Puga kemu ya yaha Kilɛ yahama ni ge
14 « ‹Sipya wa bu wu puga kan na yaha Tɛhɛnɛ Baa Kilɛ yahama ni, saraya ɲaha shɔɔnrivɔɔ wu ki pɛrɛmɛ pu taha na saha ni ki ɲuŋɔkana ni. Wu bu pɛrɛmɛ pemu taha ki na, pee pu da bye ki na. 15 Sipya wemu wʼa puga ki kan na yaha Tɛhɛnɛ Baa Kilɛ yahama ni ge, wee bu jo wu ki ɲuŋɔ wolo, pɛrɛmɛ pemu saraya ɲaha shɔɔnrivɔɔ wʼa taha ki na ge, wu pee wo taaga kaguro wogo ki fara pu na wu kan. Puga ki na bye wu wogo.› »
Tɛgɛ kemu ya yaha Kilɛ yahama ni ge
16 « ‹Sipya wa bu wu wo taa kɛrɛyɛ yi wo tɛgɛ ka kan na yaha Tɛhɛnɛ Baa Kilɛ wo yahama ni. Yashi ɲuŋɔkana lemu na já ki nugi ge, ki pɛrɛmɛ pu na le na saha ni wee yashi wu ni. Ɔrijɛ shinma shi kiloo xhuu taanri (300) na já tɛgɛ kemu nugi ge, kee pɛrɛmɛ na bye warifyɛn sikileeb kɛlɛɛ kaguro (50). 17 Wu bu da wʼa tɛgɛ ki kan na yaha Tɛhɛnɛ Baa Kilɛ yahama ni, na co yee kɛlɛɛ kaguro kalenɛ li wo yee li na, pee pɛrɛmɛ pemu pʼa taha ki na ge, pee pu da bye ki na. 18 Ga yee kɛlɛɛ kaguro wo kalenɛ li bu da lʼa toro, a wufɔɔ di na tɛgɛ ki kan na yaha Tɛhɛnɛ Baa Kilɛ yahama ni, yee kiimu kʼa kori yee kɛlɛɛ kaguro wu kalenɛ la bɛ di nɔ ge, saraya ɲaha shɔɔnrivɔɔ wu na ki pɛrɛmɛ pu taha na bɛ ni kee yee ki ni. Ki pɛrɛmɛ pu na ba digi. 19 Wemu wʼa tɛgɛ ki kan yaha Tɛhɛnɛ Baa Kilɛ yahama ni ge, wee bu jo wu ki ɲuŋɔ wolo, wu na ki pɛrɛmɛ pu taaga kaguro wogo fara pu na na kan, tɛgɛ ki na bye wu wogo. 20 Wu bye wu ya tɛgɛ ki ɲuŋɔ wolo wɛ, pu bu ki pɛrɛ sipya watii mu, wu da já ki ɲuŋɔ wolo nige wɛ. 21 Yee kɛlɛɛ kaguro wu kalenɛ li ba nɔ, wemu wʼa ki shɔ ge, wee na ki yaha, kʼa bye fɛfɛɛrɛ wogo na yaha nɛ Tɛhɛnɛ Baa Kilɛ mu. Ki na bye saraya ɲaha shɔɔnrivɔɔ wu wogo.
22 « ‹Sipya wa bu tɛgɛ ka shɔ, kemu ɲɛ wu wo cɛn wogo wɛ, wu bu kee kan na yaha Tɛhɛnɛ Baa Kilɛ yahama ni, 23 yee kiimu kʼa kori yee kɛlɛɛ kaguro wo kalenɛ lʼi nɔ ge, saraya ɲaha shɔɔnrivɔɔ wu na ki pɛrɛmɛ pu jate na saha ni kee yee ki ni, wemu wʼa tɛgɛ ki kan ge, wee di wee wari we saraa ke caŋa kiyɛ pyaa wu tɛgɛ ki ɲuŋɔ wolo. Wee wari wu na yaha nɛ Tɛhɛnɛ Baa Kilɛ yahama ni. 24 Yee kɛlɛɛ kaguro wu wo kalenɛ li ba nɔ, kee tɛgɛ kʼa bi shɔ sipya wemu mu, ni kʼa bi bye wee wo cɛn ge, ki na guri gan wee mu.
25 «‹Pɛrɛmɛ pemu bɛɛri ma da da dɛri ge, pu bɛɛri di da dɛri na saha ni fɛfɛɛrɛ xuu wu wo warifyɛn sikili wu wo jate wu ni. Sikili nigin ɲɛ geraa kɛlɛɛ shuun.› »
Yaŋmuyɔ yemu ɲuŋɔ ya já wolo wɛ ge
26 « ‹Sipya wa shishiin ganha ga ɲɔ foo kɔn na wu da wu yapɔrɔgɔ ka wo boo nizhiimɛ yaha Tɛhɛnɛ Baa Kilɛ yahama ni wɛ. Bani bee nizhiilee pu bɛɛri pʼa yaha na xɔ Tɛhɛnɛ Baa Kilɛ yahama ni, wʼa pye nù la, wʼa pye dubya la, wʼa pye sika la, Tɛhɛnɛ Baa Kilɛ wo wu ɲɛ wii. 27 Ki bu bye fɛfɛɛrɛ baa wo yapɔrɔgɔ, pu na já kee ɲuŋɔ wolo, na ki pɛrɛmɛ pu taaga kaguro wogo taha ki pɛrɛmɛ pu na. Pu bye pʼi ya ki ɲuŋɔ wolo wɛ, ki ni pɛrɛmɛ pemu pʼa yaa na saha ni saraya ɲaha shɔɔnrivɔɔ wu wo jate wu ni ge, pʼi ki pɛrɛ pee pɛrɛmɛ pu na.
28 « ‹Sipya bu wu keŋɛ laha fɛɛfɛɛ yaaga kemu na, na ki kan ma yaha Tɛhɛnɛ Baa Kilɛ yahama ni, kʼa pye sipyiyawyii la, kʼa pye yapɔrɔgɔ la, kʼa pye wu taa tɛgɛ la, kee yaaga ke da já bɛrɛ nige wɛ, ki ɲuŋɔ bɛ da já wolo nige wɛ. Yaaga bɛɛri na ki kafɔɔ ya keŋɛ laha fɛɛfɛɛ, na ki yaha Tɛhɛnɛ Baa Kilɛ yahama ni ge, kee ya ɲɛri fɛfɛɛrɛ wogo fo xuuni, Tɛhɛnɛ Baa Kilɛ mu.* 29 Pu bu keŋɛ laha sipyiyawyii lemu na fɛɛfɛɛ, na li yaha Tɛhɛnɛ Baa Kilɛ yahama ni, wee ɲuŋɔ da já wolo nige wɛ, pu da wu gbo.› »
Tɛhɛnɛ Baa Kilɛ wo taa le
30 « ‹Jagi bɛɛri wʼa ta ɲiŋɛ ki faa yapyiire ti ni ge, wʼa pye shinma jagi la, wʼa pye tiire yasɛyɛ jagi la, wee bɛɛri ɲɛ Tɛhɛnɛ Baa Kilɛ wo. Tɛhɛnɛ Baa Kilɛ yahama ni wee ya yaha.* 31 Sipya wa funŋɔ bu bye wu wu jagi ɲuŋɔ wolo, wufɔɔ di wu pɛrɛmɛ pu taaga kaguro wogo ki fara pɛrɛmɛ pu na wu kan. 32 Niiyɛ yi wo jagi we, ni dubyaa ni sikaa pu wo wu bɛɛri na yaha nɛ Tɛhɛnɛ Baa Kilɛ yahama ni. Yapɔrɔyɔ yi ba doroo yi tɔrɔduun wu ni, yi nahavɔɔ wu pubiin li nɔhɔ ni, tɔrɔmɔ pu kɛ wo pu ɲɔ ya fani yemu bɛɛri na ge, yee bɛɛri na yaha nɛ Tɛhɛnɛ Baa Kilɛ yahama ni. 33 Wu ganha bu yapɔrɔgɔ ki sha wu ki sɛɛri ki bi ɲɛ nijeŋɛ kelee niguuŋɔ wɛ. Wu ganha bu ka taga ki faa wɛ. Wu bu ki faa, keki fara ki faara ti na, yi shuun wu bɛɛri na yaha Tɛhɛnɛ Baa Kilɛ yahama ni, ka shishiin ɲuŋɔ da já wolo wɛ.› »
34 Kii kodorogoo kii Tɛhɛnɛ Baa Kilɛ ya kan Musa mu wu kan Izirayɛli nagoo pu mu, Sinayi faaboboŋɔ ki na.