Izirayɛli gbaweye yi singaŋaa sige ki ni
2
A Tɛhɛnɛ Baa Kilɛ di Musa ni Arɔn pye: 2 «Izirayɛli nagoo pu bɛɛri pu pu fàya buguloo pu sin sin pu wo kashɛn keye yi wo tuugoshɛmɛ pe ni pu wo gbaweye yi wo tuugoshɛmɛ pu tàan. Buguro tʼa yaa ma ti sin na Ɲuŋɔ Tacirige Fàya Puga ki maha, ga na laraga kɔn ki na.»Zhuda ni Isakari ni Zabulɔn wo buguloo pu singana
3 «Zhuda wo kagɛrɛgɛ ki wo kashɛn keye yi na ba pu wo buguloo pu sin Kilɛ-nɔhɔ ki na pu wo tuugoshɛmɛ pu nɔhɔ ni. Zhuda wo gbawege ki ɲuŋɔfɔɔ we, wee ɲɛ Aminadabu ja Nasɔn. 4 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ gbarashuun ni shishɛɛrɛ, di xhuu gbaara (74.600) ni.
5 «Isakari wo gbawege ki ma pu wo buguloo pu sin sogi pee na. Isakari wo gbawege ki wo ɲuŋɔfɔɔ wu ɲɛ Shuwari ja Netaɲɛli. 6 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ kaguro ni shishɛɛrɛ, di xhuu shishɛɛrɛ (54.400) ni.
7 «Lee kadugo na Zabulɔn wo gbawege ki ma pu wo buguloo pu sin. Pee wo ɲuŋɔfɔɔ wu ɲɛ Xhelɔn ja Eliyabu. 8 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ kaguro ni gbarashuun, di xhuu shishɛɛrɛ (57.400) ni.
9 «Zhuda wo kagɛrɛgɛ ki sipyii pu bɛɛri na tɔrɔ, pee ya bɛ ni namaa kabɔfoŋɔɔ xhuu nigin ni kɛlɛɛ gbarataanri ni gbaara, di xhuu shishɛɛrɛ (186.400) ni. Pee ɲɛ gbaweye taanri wu wo sipyii pee. Pee pʼa da ba fɛnhɛ doro pusamaa bɛɛri ɲaha na.»
Urubɛn ni Simiɲɔ ni Gadi wo buguloo pu singana
10 «Urubɛn wo kagɛrɛgɛ ki wo kashɛn keye yi na ba pu wo buguloo pu sin Kilɛ-parama pu ni woroo kulo kacɛ ki na, pu wo tuugoshɛmɛ pu nɔhɔ ni. Urubɛn wo gbawege ki ɲuŋɔfɔɔ we, wee ɲɛ Sheduri ja Elisuri. 11 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ shishɛɛrɛ ni gbaara, di xhuu kaguro (46.500) ni.
12 «Simiɲɔ wo gbawege ki ma pu wo buguloo pu sin sogi pee na. Simiɲɔ wo gbawege ki ɲuŋɔfɔɔ we, wee ɲɛ Surishadayi ja Shelumyɛli. 13 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ kaguro ni gbarashɛɛrɛ, di xhuu taanri (59.300) ni.
14 «Lee kadugo na Gadi wo gbawege ki ma pu wo buguloo pu sin. Gadi wo gbawege ki ɲuŋɔfɔɔ we, wee ɲɛ Erewɛli ja Elizafu. 15 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ shishɛɛrɛ ni kaguro, di xhuu gbaara ni kɛlɛɛ kaguro (45.650) ni.
16 «Urubɛn wo kagɛrɛgɛ ki sipyii pu bɛɛri na tɔrɔ, pee ya bɛ ni namaa kabɔfoŋɔɔ xhuu nigin ni kɛlɛɛ kaguro ni nigin, di xhuu shishɛɛrɛ ni kɛlɛɛ kaguro (151.450) ni. Pee ɲɛ gbaweye taanri wu wo sipyii pee. Pee na ba daha Zhuda wo kagɛrɛgɛ ki na na gaaŋi.
17 «Ye kagɛrɛyɛ shuun we ba yìri, Levi wo tirige shɛɛn pu ma yìri taha pee na ni Ɲuŋɔ Tacirige Fàya Puga ki ni. Pee na ba bye Izirayɛli nagoo pu niŋɛ ni kagɛrɛyɛ nizhiiye shuun we ni kurogo woyo shuun wu tɛ wu ni. Kagɛrɛyɛ yʼa sin sin na tahala yiyɛ na tahalagana lemu na ge, pu ba da yìri, lee yirigana li na pʼa da yìri na tahala tahala puyɛ na, wa bɛɛri di bye wu wo tuugoshɛmɛ pu nɔhɔ ni.»
Efirayimu ni Manase ni Bɛnzhamɛ wo buguloo pu singana
18 «Efirayimu wo kagɛrɛgɛ ki wo kashɛn keye yi na ba pu wo buguloo pu sin caŋatomɔ pu ni, pu wo tuugoshɛmɛ pu nɔhɔ ni. Efirayimu wo gbawege ki ɲuŋɔfɔɔ we, wee ɲɛ Amiyudi ja Elishama. 19 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ shishɛɛrɛ, di xhuu kaguro (40.500) ni.
20 «Manase wo gbawege ki ma pu wo buguloo pu sin na sogi pee na. Manase wo gbawege ki ɲuŋɔfɔɔ we, wee ɲɛ Pedasuri ja Gamaliyɛli. 21 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ taanri ni shuun, di xhuu shuun (32.200) ni.
22 «Lee kadugo na Bɛnzhamɛ wo gbawege ki ma pu wo buguloo pu sin. Bɛnzhamɛ wo gbawege ki wo ɲuŋɔfɔɔ we, wee ɲɛ Zhidoni ja Abidan. 23 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ taanri ni kaguro, di xhuu shishɛɛrɛ (35.400) ni.
24 «Efirayimu wo kagɛrɛgɛ ki sipyii pu bɛɛri na tɔrɔ, pee ya bɛ ni namaa kabɔfoŋɔɔ xhuu nigin ni gbarataanri, di xhuu nigin (108.100) ni. Pee na ba bye kashɛn keŋɛ taanri wogo na yìri taha Levi wo tirige shɛɛn pu na.»
Dan ni Azɛri ni Nɛfitali wo buguloo pu singana
25 «Dan wo kagɛrɛgɛ ki wo kashɛn keye yi na ba pu wo buguloo pu sin suumɔ kulo kacɛ ki na, pu wo tuugoshɛmɛ pu nɔhɔ ni. Dan wo gbawege ki ɲuŋɔfɔɔ we, wee ɲɛ Amishadayi ja Ayezɛri. 26 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ gbaara ni shuun, di xhuu gbarashuun (62.700) ni.
27 «Azɛri wo gbawege ki ma pu wo buguloo pu sin ma sogi pee na. Azɛri wo gbawege ki ɲuŋɔfɔɔ we, wee ɲɛ Okiran ja Pazhiyɛli. 28 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ shishɛɛrɛ ni nigin, di xhuu kaguro (41.500) ni.
29 «Lee kadugo na Nɛfitali wo gbawege ki ma pu wo buguloo pu sin. Nɛfitali wo gbawege ki wo ɲuŋɔfɔɔ we, wee ɲɛ Ena ja Ayira. 30 Wu kashɛn keŋɛ ki sipyii pu nidɔrɔgɔ na, pee ya bɛ ni namaa kabɔfoŋɔɔ kɛlɛɛ kaguro ni taanri, di xhuu shishɛɛrɛ (53.400) ni.
31 «Dan wo kagɛrɛgɛ ki sipyii pu bɛɛri na tɔrɔ, pee ya bɛ ni namaa kabɔfoŋɔɔ xhuu nigin ni kɛlɛɛ kaguro ni gbarashuun, di xhuu gbaara (157.600) ni. Pee ɲɛ gbaweye taanri wu wo sipyii pee. Pee na ba yìri pu bɛɛri kurogo ni pu wo tuugoshɛmɛ pu ni.» 32 Pii pʼa pye Izirayɛli nagoo pee na pu tɔrɔ na saha ni pu gbaweye yi ni. Kagɛrɛyɛ yi sipyii pu bɛɛri ma tɔrɔ na saha ni pu kashɛn keye yi ni, pu bɛɛri ya pye namaa kabɔfoŋɔɔ xhuu gbaara ni taanri, di xhuu kaguro ni kɛlɛɛ kaguro (603.550). 33 Pu ya ta Levi wo tirige shɛɛn pu tɔrɔ le Izirayɛli nagoo pu ni wɛ, ba Tɛhɛnɛ Baa Kilɛ ya yi jo Musa mu wɛ.
34 Ayiwa, a Izirayɛli nagoo pʼi kii keree kii bɛɛri pye cibɛ ba Tɛhɛnɛ Baa Kilɛ ya yi jo Musa mu wɛ. A pʼi ganha na pu buguloo pu sinni pu wo tuugoshɛmɛ pu nɔhɔ ni, na pu kɔɔngi na saha ni pu singaŋaa ki ni wa bɛɛri ni ma gbawege ni ma kpuun.