Levi wo tirige shɛɛn pu wo keree
3
Tuun wemu ni Tɛhɛnɛ Baa Kilɛ ya jo ni Musa ni Sinayi faaboboŋɔ ki na ge, piimu pu bye Musa ni Arɔn wo kpuun li sipyii pu ge, pee pu wa mɛ. 2 Piimu pʼa pye Arɔn wo jalaa pu ge, pee mɛyɛ yi wa mɛ: Nadabu, wee ɲɛ jashiimɛ we, na Abiyu taha wà, na Eleyazari taha wà, na Itamari taha wàa. 3 Pii pʼa pye Arɔn wo jalaa pee piimu pʼa tìre na pye saraya ɲaha shɔɔnrivɛɛ, na pu yaha saraya ɲaha shɔɔnrivɛɛrɛ ti wo labye wu na ge. 4 Ga a Nadabu ni Abiyu di xhu Tɛhɛnɛ Baa Kilɛ ɲaha tàan Sinayi siwaga ki ni. Bani, pee bi shɛ Tɛhɛnɛ Baa Kilɛ ɲaha tàan ni na katii ni, kemu bi ta bɛ ni Tɛhɛnɛ Baa Kilɛ wo saliya wu ni wɛ. Pya bye wa shishiin mu pu ni wɛ. A Eleyazari ni Itamari di ganha na saraya ɲaha shɔɔnrivɛɛrɛ ti wo kapyeŋɛɛ ki pyi pu to Arɔn wu ɲaha tàan.*
5 A Tɛhɛnɛ Baa Kilɛ di Musa pye: 6 «Pa ni Levi wo gbawege ki sipyii pu ni, ma ba pu kan saraya ɲaha shɔɔnrivɛɛ Arɔn mu, pu da wu tɛri saraya ɲaha shɔɔnrivɛɛrɛ ti wo labye wu na. 7 Pu na ba labye pyi Arɔn mu, na wu pyi Izirayɛli nagoo pu bɛɛri mu Ɲuŋɔ Tacirige Fàya Puga ki ɲaha tàan. Kapyeŋɛɛ kiimu bɛɛri kʼa ɲaha tii kee puga ki na ge, pu na ba kee pyi. 8 Pu na ba Ɲuŋɔ Tacirige Fàya Puga ki yagboyo yi bɛɛri kasɛri, na kasɛɛgɛ yaha bɛ Izirayɛli nagoo pu na pu wo labye wu funŋɔ ni Ɲuŋɔ Tacirige Fàya Puga ki ni. 9 Ma na ba Levi wo tirige shɛɛn pu kan Arɔn ni wu jalaa pu mu. Pee na ba sii dii gan wu mu na foro Izirayɛli nagoo pu ni. 10 Mʼa Arɔn ni wu jalaa pu ɲaha bulo, pee di da saraya ɲaha shɔɔnrivɛɛrɛ ti wo kapyeŋɛɛ ki pyi. Shɛnte bu fulo Fàya Puga ki na, pʼi weefɔɔ gbo.»
11 A Tɛhɛnɛ Baa Kilɛ di Musa pye sanha na: 12 «Li wii, nɛ Levi wo tirige shɛɛn pu shɔɔnri na wolo Izirayɛli nagoo pu niŋɛ ni, na pu pye nayɛ wuu Izirayɛli nagoo pu wo jashiilee pu bɛɛri tɛgɛ. 13 Bani jashiilee pu bɛɛri pu ɲɛ nɛ wuu. Caŋa kemu nɛ Misira fiige ki jashiilee pu bɛɛri gbo Misira fiige ki ni ge, kee caŋa nɛ Izirayɛli nagoo nizhiilee pu bɛɛri yaha nayɛ yahama ni, sipyii wo jashiilee fara yapɔrɔyɔ wo bee nizhiilee pu na. Pu na ba bye nɛ wuu. Nɛ ɲɛ Tɛhɛnɛ Baa Kilɛ.»*
 
Musa ya Levi wo tirige shɛɛn pu tɔrɔ
14 Lee kadugo na a Tɛhɛnɛ Baa Kilɛ di jo ni Musa ni sanha Sinayi siwaga ki ni na wu pye: 15 «Levi wo tirige shɛɛn pu tɔrɔ pu kpɔnhɔɔ ki cɛ fɛni. Namaa pu bɛɛri tɔrɔ, mʼa funabiire ti bɛ tɔrɔ ma ɲɔ co yeŋɛ nigin na na duri.» 16 Ayiwa, a Musa di pu tɔrɔ ma na jo ba Tɛhɛnɛ Baa Kilɛ ya yi jo wu mu jogana lemu na wɛ.
17 Levi wo jalaa pu wo mɛyɛ yi wa ye: Gɛrɛshɔn ni Kexhati ni Marari. 18 Gɛrɛshɔn wo jalaa pee na saha ni pu gbaweye yi ni, pee ɲɛ: Libini ni Shimeyi. 19 Kexhati wo jalaa pee na saha ni pu gbaweye yi ni, pee ɲɛ: Amuramu ni Zhizari, ni Eburɔn, ni Uziyɛli. 20 Marari wo jalaa pee na saha ni pu gbaweye yi ni, pee ɲɛ: Makili ni Mushi. Pee pʼa pye Levi wo tirige shɛɛn pee na saha ni pu kpɔnhɔɔ ki ni.
 
Gɛrɛshɔn jalaa pu wo buguro ti tasinŋɛ ni pu labye
21 Gɛrɛshɔn wo tirige shɛɛn pu ɲɛ Libini wo kpuun le ni Shimeyi wo kpuun le. Pee pʼa pye Gɛrɛshɔn wo puga ki sipyii pee. 22 Namaa piimu pʼa tɔrɔ pee ni ge, ma co yeŋɛ nigin na na duri fugba wu ni, pee bɛɛri ya bɛ ni namaa kabɔfoŋɔɔ gbarashuun ni xhuu kaguro (7.500) ni. 23 Gɛrɛshɔn wo nagoo pu bi pu wo buguloo pu sinni fàya puga ki kadugo yíri, caŋatomɔ pu ni. 24 Pee wo ɲuŋɔfɔɔ wu bye Layɛli ja Elizafu. 25 Ɲuŋɔ Tacirige Fàya Puga ki wo labye wemu kaa lʼa bi le Gɛrɛshɔn wo tirige shɛɛn pu keŋɛ ni ge, wee ɲɛ: Fàŋa kemu ki ɲɛ puga ki funŋɔ ni ge, ni kemu ki wa kpɛɛngɛ ki na ge, ni puga ki wo fatɔŋɔ ke, ni kuɲɔparaga fàŋa ke ki bye puga ki tajege ki ɲɔ ki na ge. 26 Fàya yemu yʼa bi taga fàya puga ke ni saraya nizogoyo yi tawologo ki kuuri ge, na fara kee kaaŋa ki wo kuɲɔparaga fàŋa ki na. Mɛɛrɛ temu ti ma daga puga ki wo fàya yi pɔ ge, na fara tee na, yee wo labye wu bi le pee keŋɛ ni.
 
Kexhati nagoo pu wo buguro ti tasinŋɛ ni pu labye
27 Kexhati wo tirige shɛɛn pu ɲɛ Amuramu wo kpuun le ni Zhizari wo kpuun le ni Eburɔn wo kpuun le ni Uziyɛli wo kpuun le. Pee pʼa pye Kexhati wo puga ki sipyii pee. 28 Namaa piimu pʼa tɔrɔ pee ni ge, ma co yeŋɛ nigin na na duri fugba wu ni, pee bɛɛri ya bɛ ni namaa kabɔfoŋɔɔ gbarataanri ni xhuu gbaara (8.600) ni.b Pee pu bi fɛfɛɛrɛ xuu wu wo labye wu pyi. 29 Kexhati wo tirige shɛɛn pu bi pu wo buguloo pu sinni fàya puga ki woroo kulo kacɛ ki na. 30 Pee wo ɲuŋɔfɔɔ wu bye Uziyɛli ja Elizafan. 31 Labye wemu kaa li bi le pee keŋɛ ni ge, wee ɲɛ kariɲɛɛgɛ ɲɔmɛɛ li wo keshi we, ni tabali we, ni sanni sokinnaa pee, ni saraya tawoloyo ye, ni fɛfɛɛrɛ xuu wu wo yagbegeye ye, ni puga ki wo ɲahaparaga fàŋa ke ni yaŋmuyɔ yi wo labye wu bɛɛri.
32 Ayiwa, Levi wo tirige shɛɛn pu wo ɲuŋɔfɛɛ pu bɛɛri wo ɲuŋɔfɔɔ wu bye Eleyazari, saraya ɲaha shɔɔnrivɛɛ Arɔn wo ja we. Fɛfɛɛrɛ xuu wu wo labye wʼa bi le piimu keŋɛ ni ge, wee wu bye pee wo ɲahagbaa fɔɔ.
 
Marari nagoo pu wo buguloo pu tasinŋɛ ni pu labye
33 Marari wo tirige shɛɛn pu ɲɛ Makili wo kpuun le ni Mushi wo kpuun le. Pee pʼa pye Marari wo puga ki sipyii pee. 34 Namaa piimu pʼa tɔrɔ pee ni ge, ma co yeŋɛ nigin na na duri fugba wu ni, pee bɛɛri ya bɛ ni namaa kabɔfoŋɔɔ gbaara ni xhuu shuun (6.200) ni. 35 Pee wo ɲuŋɔfɔɔ wu bye Abixhaali ja Zuriyɛli. Pee bi pu wo buguloo pu sinni fàya puga ki suumɔ kulo kacɛ ki na. 36 Labye wemu kaa li bi le Marari wo jalaa pu keŋɛ ni ge, wee ɲɛ fàya puga ki wo kɔɔjaya ye, ni ki tinbaraa kee, ni ki tinyeeŋɛɛ kee ni ki nɔhɔshanma pu wo tuuyo ye ni yi yagboyo yi bɛɛri. Yee wo labye wu bi le pee keŋɛ ni, 37 na fara puga ki kaaŋa ki wo maha maha tiin ki na ni ki nɔhɔshanma pu wo tuuyo ye ni yi yagboyo yi bɛɛri, ni puga ki kori kori sikaŋaa kee ni ki mɛɛrɛ ti bɛ.
38 Ayiwa, Musa ni Arɔn ni wu jalaa, pee bi pu wo buguloo pu sinni Ɲuŋɔ Tacirige Fàya Puga ki ɲahagbaa na Kilɛ-nɔhɔ ki na. Pee pu bi fɛfɛɛrɛ xuu wu kasɛri, na wu labye wu pyi Izirayɛli nagoo pu mɛgɛ na. Sipya watii bɛɛri wʼa fulo wee xuu wu na ge, weefɔɔ na gbo.
39 Ayiwa, Levi wo tirige shɛɛn piimu Musa ni Arɔn ya tɔrɔ Tɛhɛnɛ Baa Kilɛ ɲɔjomɔ na ge, a pee bɛɛri di bɛ ni namaa kabɔfoŋɔɔ kɛlɛɛ shuun ni shuun (22.000) ni. Pʼa bi pu tɔrɔ na saha ni pu kpɔnhɔɔ ki ni, na ɲɔ co yeŋɛ nigin na duri wà fugba wu ni.
 
Levi wo tirige shɛɛn pʼa yaha Izirayɛli wo jashiilee pu faara
40 A Tɛhɛnɛ Baa Kilɛ di Musa pye: «Izirayɛli nagoo pu wo jashiilee pu bɛɛri tɔrɔ, na li ɲɔ co yeŋɛ nigin wo nagoo pu na na duri fugba wu ni, mʼa pu bɛɛri mɛyɛ ka. 41 Ma bu xhɔ, mʼa Levi wo tirige shɛɛn namaa pu yaha na yahama ni Izirayɛli nagoo pu bɛɛri wo jashiilee pu faara. Mʼa Levi wo tirige shɛɛn pu wo yapɔrɔyɔ yi bɛ yaha na yahama ni Izirayɛli nagoo pu wo yapɔrɔyɔ yi nagoo nizhiilee pu bɛɛri faara, pee piimu pu ɲɛ bee pu ge. Nɛ ɲɛ Tɛhɛnɛ Baa Kilɛ.» 42 A Musa di Izirayɛli nagoo pu wo jashiilee pu bɛɛri tɔrɔ ba Tɛhɛnɛ Baa Kilɛ ya yi jo wu mu wɛ. 43 Jashiilee pu bɛɛri na tɔrɔ pu mɛyɛ yi fɛni, na ɲɔ co yeŋɛ nigin na duri fugba wu ni, a pu bɛɛri di bɛ ni namaa kabɔfoŋɔɔ kɛlɛɛ shuun ni shuun, di xhuu shuun ni kɛlɛɛ gbarashuun ni taanri (22.273) ni.
44 A Tɛhɛnɛ Baa Kilɛ di Musa pye: 45 «Levi wo tirige shɛɛn namaa pu yaha na yahama ni Izirayɛli nagoo pu wo jashiilee pu bɛɛri faara. Mʼa pu yapɔrɔyɔ yi bɛɛri yaha na yahama ni Izirayɛli nagoo pu wo yapɔrɔyɔ yi wo nagoo nizhiilee pu faara pee piimu pu ɲɛ bee ge. Levi wo tirige shɛɛn pu na ba bye nɛ wuu. Nɛ ɲɛ Tɛhɛnɛ Baa Kilɛ. 46 Izirayɛli nagoo pu wo jashiilee pʼa sipyii xhuu shuun ni kɛlɛɛ gbarashuun ni taanri (273) wemu taha Levi wo tirige shɛɛn namaa pu mu ge, mʼa pee ɲuŋɔ wolo. 47 Ma na ba warifyɛn sikilee kaguro kaguro shɔ pu bɛɛri nigin nigin wu ɲuŋɔ tàan na saha ni fɛfɛɛrɛ xuu wu wo warifyɛn sikili wu ni. Sikili nigin ya bɛ ni geraa kɛlɛɛ shuun (20) ni.c 48 Izirayɛli jashiilee pʼa ɲɔ kemu taha Levi wo tirige shɛɛn pu mu ge, mʼa kee wo wari wu kan Arɔn ni wu jalaa pu mu. Wee wari wu na ba bye pee wo ɲuwuuro wari.» 49 Ayiwa, Izirayɛli nagoo pʼa sipyii ɲɔ kemu taha Levi wo tirige shɛɛn pu mu ge, wari wemu wʼa taga pu ɲuŋɔ wolo ge, a Musa di wee shɔ. 50 Wee wari wemu wʼa shɔ Izirayɛli nagoo pu ɲuŋɔ tàan, na taga pu ɲuŋɔ wolo ge, a wee di bɛ ni wari sikilee kabɔfonɔ nigin, di xhuu taanri ni kɛlɛɛ gbaara ni kaguro (1.365) ni na saha ni fɛfɛɛrɛ xuu wu wo sikili wu ni. 51 A Musa di wee wari wu kan Arɔn ni wu jalaa pu mu Tɛhɛnɛ Baa Kilɛ wo ɲɔjomɔ pu na, ba Tɛhɛnɛ Baa Kilɛ bi yi jo wu mu wɛ.