Levi wo tirige shɛɛn pu wo labye we
Kexhati wo nagoo pu wo labye we
4
Ayiwa, a Tɛhɛnɛ Baa Kilɛ di Musa ni Arɔn pye: 2 «Yi Kexhati wo jalaa pu tɔrɔ na foro Levi wo tirige shɛɛn pu ni. Yʼi namaa pu bɛɛri tɔrɔ ba pu wa kpɔnhɔɔ kpɔnhɔɔ wɛ. 3 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, pee piimu bɛɛri pu da já labye pye Ɲuŋɔ Tacirige Fàya Puga ki ni ge.4 «Kexhati wo nagoo pu na ba labye wemu pyi Ɲuŋɔ Tacirige Fàya Puga ki ni ge, wee wu ɲɛ mɛ: Pee pu da ba fɛfɛɛrɛ ti bɛɛri wo fɛfɛɛrɛ xuu wu wo fɛfɛɛrɛ yaŋmuyɔ yi keree shɔɔnri. 5 Izirayɛli nagoo pu ba da gɔɔngi tuun bɛɛri ni, Arɔn ni wu jalaa pu ma jé na puga ki wo ɲahaparaga fàŋa ki tirige, na kariɲɛɛgɛ ɲɔmɛɛ li keshi wu ɲɔ tɔ ni ki ni. 6 Sɛɛgboyo yemu yʼa panhaŋa gea, pʼi yee ya taga fàŋa ki ɲɔ tɔ, pʼi na kuri pʼi bula ɲaha fàŋa ka taga yi bɛɛri ɲɔ tɔ. Pu bu xhɔ lee ni, pʼi keshi wu lɔlɔbegee ki le wu na
7 «Lee kadugo na pʼi bula ɲaha fàŋa ka pii fɛfɛɛrɛ buuri wu wo tabali wu bɛ na, pʼi saraga niwoyo yi wo yagbegeye yi taha wà, yee yemu yi ɲɛ tasaa pee ni setii pee ni cɛɛgbuugoo kee, ni booyo yi ge. Buuri we pʼa wo na gaan na mu gbee ge, pʼi wee bɛ taha yaha tabali wu na. 8 Pʼi faɲiga ka taga yi tɔ. Sɛɛgboyo yemu yʼa panhaŋa ge,b pʼi yee ya taga yi bɛɛri ɲɔ tɔ. Lee kadugo na pʼi tabali wu lɔlɔbegee ki le wu na.
9 «Lee kadugo na pʼi bula ɲaha fàŋa ka taga sanni sokinnaa pee ni pu yaa yaa gbaragaa kee, ni pu shɔɔnrɔ yaleye, ni sìnmɛ yaaya yi bɛɛri ɲɔ tɔ, yee yemu yi ɲɛ sokinnaa pu wo yagbegeye yi ge. 10 Sɛɛgboyo yemu yʼa panhaŋa ge, pʼi kee ka taga yi bɛɛri migile, pʼi yi taha tuguro yalɔgɔ ki na.
11 «Pʼi fàŋa bula ɲaha wogo ka tɔ saraya tawologo sanni wogo ki na, Sɛɛgboyo yemu yʼa panhaŋa ge, pʼi kee ka taga ki ɲɔ tɔ, pʼi ki lɔlɔbegee ki le ki na.
12 «Pʼi fɛfɛɛrɛ xuu wu wo kapyeŋɛɛ yɛrɛyɛ yi bɛɛri lɔ, pʼi yi le fàŋa bula ɲaha wogo ka ni, Sɛɛgboyo yemu yʼa panhaŋa ge, pʼi kee ka tɔ yi na, pʼi yi taha tuguro yalɔgɔ ki na.
13 «Pʼi saraya nizogoyo yi tawologo ki wo shɔɔnrɔ ti wolo ki ni, pʼi ki tɔ ni faɲiga ka ni. 14 Pʼi ki yagbegeye yi bɛɛri taha ki ɲuŋɔ ni yee yemu yi ɲɛ yi yawurire shɔhɔɔ kee, ni ŋmahaa kiimu ni pu ma xaara ti suu ge, ni shɔɔnrɔ yakuuyo ye, ni loleyɛrɛyɛ yi ge. Sɛɛgboyo yemu yʼa panhaŋa ge, pʼi kee ka taga yi bɛɛri tɔ. Pʼi xhɔ pʼi ki lɔlɔbegee ki le ki na.
15 «Pu ba da gɔɔngi tuun wemu ni, Arɔn ni wu jalaa pu bu ba fɛfɛɛrɛ yaŋmuyɔ ye ni yi yagbegeye yi bɛɛri kemɛ na yi tɔ tɔ. Wee tuun wu ni Kexhati wo nagoo pu na da pa yi lɔ. Lee funŋɔ ni pu da já gbɔn yi na yi da tɔ wɛ, lee bɛ wɛ wa bu gbɔn ka na, wufɔɔ na xhuu. Kexhati wo nagoo pu wo nibyii li wa na yee yaŋmuyɔ yi luu Ɲuŋɔ Tacirige Fàya Puga ki wo labye wu ni.
16 «Ayiwa, Eleyazari wi ge, saraya ɲaha shɔɔnrivɛɛ Arɔn wo ja we, wee na ba kasɛɛgɛ yaha sanni sokinnaa pu wo sìnmɛ pu na, ni nudanga yawurire te, ni myɛ saraga kemu pʼa wo ɲiga bɛɛri ge, ni sindirimɛ pe. Wu kasɛɛgɛ yaha fàya puga ki bɛɛri na, ni ki funŋɔ yaŋmuyɔ yi bɛɛri na fara fɛfɛɛrɛ yaŋmuyɔ ye ni yi yagbegeye yi bɛɛri na.»
17 A Tɛhɛnɛ Baa Kilɛ di nugo Musa ni Arɔn pye sanha na: 18 «Yi kasɛɛgɛ yaha Kexhati wo nagoo pu na, yi ganha bu bye kaɲuŋɔ pʼi gyɛɛgi foro Levi wo tirige shɛɛn pu ni wɛ. 19 Yee ya yaa na lemu pye pu mu, kɔnhɔ pu ba fulo fɛfɛɛrɛ ti wo fɛfɛɛrɛ xuu wu na tuun wemu ni pu ganha bu xhu wɛ ge, lee li wa mɛ: Arɔn ni wu wo jalaa pʼa yaa na pa jé fàya puga ki ni, na pu bɛɛri nigin nigin wu wo nibyegee shɛ pu na. Pʼa yaa na tuguro temu bɛ lɔ ge, pʼa wa bɛɛri wuuro shɛ wu na. 20 Lee funŋɔ ni pu da ba jin da se da fɛfɛɛrɛ yaŋmuyɔ yi wii ali jɛɛrɛ nifɛnhɛnɛ bɛ funŋɔ ni wɛ. Lee bu bye pu na xhuu.»
Gɛrɛshɔn nagoo pu wo labye
21 Ayiwa, a Tɛhɛnɛ Baa Kilɛ di Musa pye: 22 «Gɛrɛshɔn bɛ wo jalaa pu tɔrɔ ba pu wa kpɔnhɔɔ kpɔnhɔɔ ki wɛ. Piimu pu ɲɛ namaa pu ge, pee bɛɛri tɔrɔ. 23 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, pee piimu bɛɛri pu da já labye pye Ɲuŋɔ Tacirige Fàya Puga ki ni ge. 24 Gɛrɛshɔn wo nagoo pu na ba labye wemu pyi ge, ni pu na ba yɛrɛyɛ yemu luu ge, yee yi wa mɛ: 25 Ɲuŋɔ Tacirige Fàya Puga ki wo fàya ye, ni ki fatɔyɔ ye, ni dofɛn sɛɛyɛ fatɔyɔ ye, ni fàya puga ki tajege ki wo kuɲɔparaga fàŋa ke, 26 ni fàya yemu pʼa taga fàya puga ke ni saraya nizogoyo yi tawologo ki kuuri ge, ni kee kaaŋa ki wo tajege ki wo kuɲɔparaga fàŋa ke, ni yi pɔpɔmɛɛrɛ, ni yi yagboyo yisaya bɛɛri, pee pu wa da ba yee luu. Lee na ba bye pee wo nibyii. 27 Gɛrɛshɔn wo jalaa pu na ba pu wo labye wu pyi Arɔn ni wu wo jalaa pu wo kabeshɛgɛɛ na. Pu ba da lemu bɛɛri pye, kelee pu ba da tuguro temu lɔ, Arɔn ni wu wo jalaa pu pʼa da lee shɛ pu na. 28 We wu ɲɛ Gɛrɛshɔn wo jalaa pu wo labye we Ɲuŋɔ Tacirige Fàya Puga ki funŋɔ ni. Saraya ɲaha shɔɔnrivɛɛ Arɔn ja Itamari, wee wʼa da ba pu wo labye wu shɛɛ pu na.»
Marari nagoo pu wo labye
29 A Tɛhɛnɛ Baa Kilɛ di Musa pye sanha na: «Marari bɛ wo jalaa pu tɔrɔ ba pu wa kpɔnhɔɔ kpɔnhɔɔ ki wɛ. 30 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, pee piimu bɛɛri pu da já labye pye Ɲuŋɔ Tacirige Fàya Puga ki ni ge. 31 Labye wemu pu da ba byi, na yɛrɛyɛ yemu luu Ɲuŋɔ Tacirige Fàya Puga ki ni ge, yee yi wa mɛ: Fàya puga ki kɔrɔyɔ ye, ni ki tinbaraa kee, ni ki tinyeeŋɛɛ kee, ni ki nɔhɔshanma pu wo tuuyo ye, 32 ni kaaŋa ki wo maha maha tiin kee, ni ki nɔhɔshanma pu wo tuuyo ye, ni fàya yi wo kori kori sikaŋaa kee ni mɛɛrɛ ti bɛ, na fara yee wo labye yɛrɛyɛ yi bɛɛri na. Wa bɛɛri ya yaa na yɛrɛyɛ yemu lɔ ge, yee yi tɔrɔ shɛ weefɔɔ na. 33 Wee wu ɲɛ Marari wo nagoo pu wo labye we Ɲuŋɔ Tacirige Fàya Puga ki funŋɔ ni. Saraya ɲaha shɔɔnrivɛɛ Arɔn ja Itamari, wee wu da ba pu wo labye wu shɛɛ pu na.»
Levi wo tirige shɛɛn namaa pu ɲɔ
34 Ayiwa, a Musa ni Arɔn ni Izirayɛli nagoo pu wo ɲahagbaa fɛɛ pʼi Kexhati wo jalaa pu tɔrɔ na saha ni pu kpɔnhɔɔ ki ni. 35 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, namaa piimu bɛɛri pu da ba labye pyi Ɲuŋɔ Tacirige Fàya Puga ki ni ge. 36 A pʼi pee bɛɛri tɔrɔ, a pʼi bɛ ni namaa kabɔfoŋɔɔ shuun, di xhuu gbarashuun ni kɛlɛɛ kaguro (2.750) ni. 37 Pee pʼa pye Kexhati wo kpuun li sipyii pee, piimu pʼa tɔrɔ, pee di da da labye pyi Ɲuŋɔ Tacirige Fàya Puga ki ni ge. Musa ni Arɔn bi pu tɔrɔ ma na jo ba Tɛhɛnɛ Baa Kilɛ bi yi jo Musa mu wɛ. 38 A pʼi Gɛrɛshɔn wo jalaa pu tɔrɔ na saha ni pu kpɔnhɔɔ ki ni. 39 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, namaa piimu bɛɛri pu da ba labye pyi Ɲuŋɔ Tacirige Fàya Puga ki ni ge. 40 A pʼi pee bɛɛri tɔrɔ, a pʼi bɛ ni namaa kabɔfoŋɔɔ shuun, di xhuu gbaara ni kɛlɛɛ taanri (2.630) ni. 41 Pee pʼa pye Gɛrɛshɔn wo gbawege ki sipyii pee, piimu pʼa tɔrɔ, pee di da da labye pyi Ɲuŋɔ Tacirige Fàya Puga ki ni ge. Musa ni Arɔn bi pu tɔrɔ ma na jo ba Tɛhɛnɛ Baa Kilɛ bi yi jo Musa mu wɛ.
42 A pʼi Marari wo nagoo pu tɔrɔ na saha ni pu kpɔnhɔɔ ki ni. 43 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, namaa piimu bɛɛri pu da ba labye pyi Ɲuŋɔ Tacirige Fàya Puga ki ni ge. 44 A pʼi pee bɛɛri tɔrɔ, a pʼi bɛ ni namaa kabɔfoŋɔɔ taanri, di xhuu shuun (3.200) ni. 45 Pee pʼa pye Marari wo gbawege ki sipyii pee, piimu pʼa tɔrɔ, pee di da da labye pyi Ɲuŋɔ Tacirige Fàya Puga ki ni ge. Musa ni Arɔn bi pu tɔrɔ ma na jo ba Tɛhɛnɛ Baa Kilɛ bi yi jo Musa mu wɛ.
46 A Musa ni Arɔn ni Izirayɛli nagoo pu wo ɲahagbaa fɛɛ pʼi Levi wo tirige shɛɛn pu bɛɛri tɔrɔ na saha ni pu kpɔnhɔɔ ki ni. 47 Na co yee kɛlɛɛ taanri (30) na fo na shɛ nɔ kɛlɛɛ kaguro (50) na, piimu bɛɛri pu bi da ba labye pyi Ɲuŋɔ Tacirige Fàya Puga ki ni, na ki yɛrɛyɛ yi tugoo na ɲɛri ge, 48 A pu bɛɛri di bɛ ni namaa kabɔfoŋɔɔ gbarataanri, di xhuu kaguro ni kɛlɛɛ gbarataanri (8.580) ni. 49 Na saha ni Tɛhɛnɛ Baa Kilɛ wo nijoyo yi ni Musa mu, pʼa bi pu tɔrɔ, na pu bɛɛri nigin nigin wu wo nibyegee shɛ pu na, wemu na da tuguro temu bɛ luu ge, na tee bɛ shɛ pu na. Pʼa bi pu tɔrɔ na saha ni Tɛhɛnɛ Baa Kilɛ wo nijoyo yi ni Musa mu.