Fɛfɛɛrɛ baa fɛɛ pu wo kodorogoo
5
Ayiwa, a Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na togo wa sipya wemu bɛɛri na ge, ni ceshii wa sipya wemu bɛɛri na ge, ni piimu bɛɛri ya puyɛ nɔrɔgɔ gbo keree ni ge, na pu pee bɛɛri yeege buguro ti ni. 3 Yi pu yeege buguro ti ni, yʼi shɛ pu yaha buguro ti kadugo yíri, ná fara cee na, kɔnhɔ pu ganha bu buguro ti nɔrɔgɔ wɛ, tee temu niŋɛ ni nɛ tiin ge.» 4 A Izirayɛli nagoo pʼi Tɛhɛnɛ Baa Kilɛ ɲɔmɛɛ co. A pʼi pee sipyii pu yeege buguro ti ni, ba Tɛhɛnɛ Baa Kilɛ ya yi jo Musa mu wɛ.Wa bu kaparaga pye, kee wo yaagana
5 A Tɛhɛnɛ Baa Kilɛ di Musa pye:* 6 «Yi jo Izirayɛli nagoo pu mu na ná wa kelee cee wa bu kaparaga pye wu sipyiɲii na, wʼa Tɛhɛnɛ Baa Kilɛ ɲɔmɛɛ yaha, weefɔɔ ya yaa na kayuu shan wu na. 7 Wʼa jurumu wemu pye ge, wʼa yaa na yere wee na, lemu wʼa kyɛɛgi ge, wʼi lee tɛgɛ kan, wu li taaga kaguro wogo fara li na wu kan li kafɔɔ wu mu. 8 Sipya wemu wo yaaga wʼa kyɛɛgi ge, weefɔɔ bu da wʼa xu, wu ceboro wa shishiin di ya ta kee yaaga ke na já gan wemu mu wɛ, wee tuun wu ni, kee yaaga kʼa pye Tɛhɛnɛ Baa Kilɛ wogo. Yi kee kan saraya ɲaha shɔɔnrivɔɔ wu mu, na fara jurumu yafa wo dubyapoo wu na, wee wemu kaparaga ki pyevɔɔ wʼa yaa na wolo pʼi wee taga wu wo jurumu wu yaaŋa ki pye ge. 9 Fɛfɛɛrɛ yaŋmuyɔ yemu bɛɛri Izirayɛli nagoo pʼa wo na gaan Kilɛ mu ge, yee bɛɛri na ba bye saraya ɲaha shɔɔnrivɔɔ wu woyo. 10 Sipya bɛɛri wʼa saraga wolo kan Tɛhɛnɛ Baa Kilɛ mu ge, saraya ɲaha shɔɔnrivɔɔ wu keŋɛ ni wu ma ki le.a Sipya bɛɛri bu yaaga kemu kan saraya ɲaha shɔɔnrivɔɔ wu mu, saraya ɲaha shɔɔnrivɔɔ wu wogo ki ɲɛ kere.»
Na ba wuyɛ kaala wu shɔ na dɔdɔɔrɔ kabaŋa na
11 Ayiwa, a Tɛhɛnɛ Baa Kilɛ di nugo Musa pye sanha 12 na wu yi jo Izirayɛli nagoo pu mu na: «Li bu shɛ da nago cee wa ya wu poo faanna, na foro kpɛɛngɛ na, 13 li bu shɛ da nago kanna wʼa ŋmɔhɔ sinnɛ ni ná wa ni, na wuyɛ nɔrɔgɔ, wu poo wʼi ya ta li sɛɛri cɛ wɛ, na li kaɲuŋɔ pye sɛɛri ya ta wɛ, pʼi ya pu co li tapyege ni wɛ. 14 Ayiwa, naŋmege bu jé ná wu ni, a wu ganha na wuyɛ kaala wu shɔ wu na na wʼa wuyɛ nɔrɔgɔ, a li shiin di da can. Kelee naŋmege ki bi wu pye wu na wuyɛ kaala wu shɔ wu na na wʼa wuyɛ nɔrɔgɔ, na ta yʼi ɲɛ can wɛ. 15 Wee tuun wu ni wee ná wʼa yaa na shɛ ni wu shɔ wu ni saraya ɲaha shɔɔnrivɔɔ wu mu. Wu da se ni saraga bɛ ni cee wu fɛni, kee ɲɛ farini myɛ kiloo taanri. Wu ganha bu sìnmɛ le ki ni wɛ, wʼi ganha bu nudanga sìnmɛ bɛ le ki ni wɛ, bani naŋmege saraga ki ɲɛ kii. Fundogo saraga ki ɲɛ kii kemu ya sipyii funŋɔ tun pu tiibaara na ge.
16 «Saraya ɲaha shɔɔnrivɔɔ wu ba ni wee cee wu ni, wu ba wu yereŋɛ Tɛhɛnɛ Baa Kilɛ ɲaha tàan. 17 Lee kadugo na wu fɛfɛɛrɛ lɔhɔb ka le puuro shɔɔ ni. Wu gbagbaŋa ka kuu fàya puga ki wo ɲiŋɛ ki na wu le kee lɔhɔ ke ni. 18 Cee wu wʼa yereŋɛ Tɛhɛnɛ Baa Kilɛ ɲaha tàan ge, wu wee wo ɲuŋɔ ki sanhana, wu fundogo saraga ki le wu keŋɛ ni, kee kemu ki ɲɛ naŋmege wo saraga ki ge. Ga wuyɛ pyaa di losorogoc ki co, kee kemu kʼa laŋi wu waa ge. 19 Wu cee wu pye wu gàa. Wu wu pye: ‹Ná watii bu da wu sanha sinnɛ ɲa ni ma ni wɛ, na ma yaha ma poo wu mu, ma bu da ma sanha wu faanna ɲa, na mayɛ nɔrɔgɔ wɛ, wee tuun wu ni, ke losorogo ke ya laŋi wemu waa ge, wee ganha bu ma ta wɛ. 20 Ga ma bu da mʼa mayɛ nɔrɔgɔ can na na ma yaha ma poo wu mu, ná watii bu da wʼa sinnɛ ni ma ni wemu ɲɛ ma poo wu wɛ, 21 Tɛhɛnɛ Baa Kilɛ wu ma ɲɛri seganha, wu ma yacɛrɛ li fɔ, fo ma sipyii pu ba da laŋi bɛɛri pye, pʼi ma pye wee wo ɲaha shɛshɛɛrɛ. 22 Ke laŋi lɔhɔ ke ki jé ma cére ti ni, kʼi ma yacɛrɛ li fɔ, kʼi ma sege ki pɔ.› Cee wu ma jo: ‹Amiina! Amiina!›
23 «Saraya ɲaha shɔɔnrivɔɔ wu ma xhɔ na kee laŋi ɲɔmɛhɛɛ ki ka kama wɛŋɛ ka na, na ki je le laŋi losorogo ki ni. 24 Wʼa kee laŋi losorogo ki kan cee wu mu wʼa gba. Kee lɔhɔ ki ma jé wu cére ti ni, lee ma soro wu ni. 25 Ga wʼa fɛnhɛ naŋmege saraga ki shɔ cee wu mu, na ki figi figi Tɛhɛnɛ Baa Kilɛ ɲaha tàan, na shɛ ki yaha saraya tawologo ki ni. 26 Wʼa keŋɛ ɲii nigin myɛ wolo kee saraga ki ni na pye fundogo kaa*, na pee sòrogo saraya tawologo ki ɲuŋɔ ni. Wu bu xhɔ lee ni, wʼa kee lɔhɔ ki kan cee wu mu wʼa gba. 27 Ba cee wʼa kee lɔhɔ ki gba wɛ, wu bu da wʼa wuyɛ nɔrɔgɔ can na, na fòro kpɛɛngɛ na, kee laŋi lɔhɔ ki na jé wu ni, na kaa soro wu ni. Wu yacɛrɛ li na ba fɔ, wu sege ki ma bɔ. Wu sipya wa ba da laŋi pye, wʼa wu lɔ na pye ɲaha shɛshɛɛrɛ. 28 Ga cee wu bu da wu ya wuyɛ nɔrɔgɔ wɛ, wu bu da fɛɛfɛɛ, laŋi wʼa da do wu ɲuŋɔ ni wɛ, wu sege ki bɛ wʼa da yere wɛ.
29 «Ayiwa, gbaga shɔ wemu bu wu poo faanna, na wuyɛ nɔrɔgɔ, le shɔɔnrigana le na, kee naŋmege ki wo keree kʼa yaa na shɔɔnri. 30 Kelee naŋmege bu jé ná wemu ni, a wu ganha na wuyɛ kaala wu shɔ wu kpɛɛngɛ voro na, saraya ɲaha shɔɔnrivɔɔ wu ma shɛ ni wee cee wu ni Tɛhɛnɛ Baa Kilɛ ɲaha tàan, na kii keree kii bɛɛri shɔɔnri ki shɔɔnrigana na wu shizhaa na. 31 Jaagi wa shishiin da zhan ná wu na wɛ, ga cee wu bu da wʼa nahana, lee wo bɔɔngɔ na ba do wu ɲuŋɔ ni.»