Ma bu jo mʼa bye Naziriyɛn, lee wo kodorogoo
6
Ayiwa, a Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na: ‹Ná wa kelee cee wa bu ɲɔ faa na wee da bye Naziriyɛna, na wee da wuyɛ yaha Tɛhɛnɛ Baa Kilɛ yahama ni, 3 wʼa yaa na wuyɛ co duvɛn ni kafugo yagbaya yi tàan. Wu ya yaa wʼa duvɛntanhaŋa, kelee danha yagbaga katii gbuu kemu ɲɛ ni kafugo ni wɛ. Wu ya yaa wʼa ɛrɛzɛn lɔhɔ gbuu wɛ, wu ya yaa wʼa ɛrɛzɛn li wɛ, wu niburege fara wu niwaga na.* 4 Wu ɲɔfaaga ki wo tɛrɛ li bɛɛri funŋɔ ni, wu ya yaa na yaaga ka shishiin li kemu ya yàa ni ɛrɛzɛn ni wɛ, ma co wu cegee ki na, fo na shɛ nɔ wu fàya yi na. 5 Lee tɛrɛ li bɛɛri funŋɔ ni, ɲuxhuupɔrɔgɔ ya yaa na jé wu ɲuŋɔ ni wɛ. Tɛrɛ lemu bɛɛri funŋɔ ni wʼa da wuyɛ yaha Tɛhɛnɛ Baa Kilɛ yahama ni ge, wʼa yaa na pye fɛɛfɛɛ fo na shɛ wee tuun wu fa, wu wu ɲuzhiire ti yaha tiyɛ mu ti da dɔɔngi ni ɲahazhɔ wu bɛ ni. 6 Tɛrɛ lemu bɛɛri funŋɔ ni wʼa wuyɛ yaha Tɛhɛnɛ Baa Kilɛ yahama ni ge, wu ya yaa na gbo tɛrɛŋɛ wɛ. 7 Ali wu to, kelee wu nu, kelee wu ceborona, kelee wu ceboroshɔ mɛhɛ xhu bɛ, wu ya yaa na wuyɛ nɔrɔgɔ wee wa wo kpɔn keree ni wɛ, bani wʼa wuyɛ yaha Kilɛ yahama ni, lee wo shɛmɛ pu wa mɛ wu ɲuŋɔ ni wu ɲahazhɔ wu xuubaa we. 8 Wu na yaha Tɛhɛnɛ Baa Kilɛ yahama ni wu Naziriyɛn wu wo ɲɔfaaga ki tuun wu bɛɛri funŋɔ ni.9 «Sipya wa bu gburogi xu wu tàan, wu ɲɔfaaga kʼa kyɛɛgi, bani weefɔɔ wo xu wʼa wu ɲuzhiire ti nɔrɔgɔ. Cabyaa gbarashuun bu doro wʼa pye sanha fɛɛfɛɛ, wee tuun wu ni wʼa wu ɲuŋɔ ke ni ɲahazhɔ wu xuu. 10 Caŋa gbarataanri wogo ki na wʼa shɛ ni xobangaa shuun ni, kelee gbegbeshazhɛɛrɛ shuun, saraya ɲaha shɔɔnrivɔɔ wu mu Ɲuŋɔ Tacirige Fàya Puga ki kuɲɔɔ li ni. 11 Saraya ɲaha shɔɔnrivɔɔ wu ma nigin wa wolo na pye jurumu yafa saraga, na nigin wusama wolo na pye saraga nizogoŋɔ. Wu bu xhɔ, wʼa jurumu yafa wo yaaŋa ki pye wu na, na wee gbo wu wo fɔɔnrɔ ti laha wu na. Saraya ɲaha shɔɔnrivɔɔ wu ma guri sanha kee caŋa kiyɛ pyaa, na wu gbegele yaha sanha Tɛhɛnɛ Baa Kilɛ yahama ni. 12 Wufɔɔ na guri na wu wo Naziriyɛn ɲɔfaaga ki ɲɔ co sanha Tɛhɛnɛ Baa Kilɛ mu. Wufɔɔ na ba ni yee nigin dubyapepinŋɛ ni na pa bye yaaŋa saraga. Ga tuun wemu wʼa bi pye xɔ ge, wee tuun we da dɔrɔ wɛ, bani wu ɲɔfaaga kʼa kyɛɛgi.
13 «Naziriyɛn wu wo tɛrɛ li ɲɔ ba fa caŋa kemu, wee tuun wu ni wufɔɔ ya yaa na saliya wemu koo ɲaari ge, wee wu wa mɛ: Pʼa shɛ ni wufɔɔ ni Ɲuŋɔ Tacirige Fàya Puga ki kuɲɔɔ li ni.* 14 Wufɔɔ ma ye saraya ye wolo kan Tɛhɛnɛ Baa Kilɛ mu: Yee nigin dubyapepinŋɛ fɛ baa wogo, kee di bye saraga nizogoŋɔ. Yee nigin dubyapya fɛ baa wo, wee di bye jurumu yafa wo saraga. Dubyapoo fɛ baa wo, wee di bye ɲaɲiŋɛ saraga. 15 Daŋa ɲii nigin buuri wemu ya yàa ni sìnmɛ ni, shizhɛnhɛrɛ di ɲɛ wu ni-i ge, ni shizhɛnhɛrɛ baa ŋmɔmi, na sìnmɛ le wu ni. Myɛ ni ni saraga niwoŋɔ kemu bɛ wu ma daha saraya yi na ge, ni yee bɛ. 16 Saraya ɲaha shɔɔnrivɔɔ wu ma shɛ yee yakanya ye shɛ Tɛhɛnɛ Baa Kilɛ na, wu bu xhɔ, wʼa jurumu yafa wo saraga ki wolo ni saraga nizogoŋɔ ki ni. 17 Lee kadugo na wʼa dubyapoo wu pye ɲaɲiŋɛ saraga Tɛhɛnɛ Baa Kilɛ mu, na fara daŋa ɲii shizhɛnhɛrɛ baa buuri wu na, na myɛ pe ni saraga niwoŋɔ ki taha yee na. 18 Wee tuun wu ni wemu wʼa bi wuyɛ yaha Tɛhɛnɛ Baa Kilɛ yahama ni na pye Naziriyɛn ge, wee na shɛ wu ɲuŋɔ ki xuu Ɲuŋɔ Tacirige Fàya Puga ki kuɲɔjii li ni. Wʼa ɲuzhiire te ni ɲahazhɔ wu wo shiire ti lɔ, ɲaɲiŋɛ saraga ki wa na kemu na ge, na shɛ ti le kee na ki ni. 19 Ba Naziriyɛn wʼa ɲuŋɔ ki xuu xɔ wɛ, saraya ɲaha shɔɔnrivɔɔ wu na shɛ dubyapoo wu wo kapaŋa ki nizhɔhɔŋɔ wolo, na shizhɛnhɛrɛ baa buuri ɲuŋɔ nigin wolo daŋa ki ni, na shizhɛnhɛrɛ baa ŋmɔmi ɲile nigin lɔ ŋmɔmi wu ni, na yee le Naziriyɛn wu keŋɛ ni. 20 Lee kadugo na saraya ɲaha shɔɔnrivɔɔ wu ma yee yaŋmuyɔ yi figi figi Tɛhɛnɛ Baa Kilɛ ɲaha tàan. Fɛfɛɛrɛ yakanya yi ɲɛ yii, yee yemu yi ɲɛ saraya ɲaha shɔɔnrivɔɔ wu woyo ge, na fara dubyapoo wu gbii wu na wee wemu wʼa figi figi Tɛhɛnɛ Baa Kilɛ ɲaha tàan ge, ni shii le, lee lemu pu ma lɔ yaha ge. Kee keree ki bɛɛri bu xhɔ tuun wemu ni, wee tuun wu ni Naziriyɛn wu na já duvɛn gba.
21 «Ayiwa, sipya wemu bu ɲɔ foo lɔ na wu da bye Naziriyɛn, we saliya we wʼa yaa na ɲaari. Saraya yemu bɛ wʼa yaa na wolo Tɛhɛnɛ Baa Kilɛ mu lee funŋɔ ni ge, yee wa ye saraya ye. Yaaga kabɛtii se bu jé wu ni, wu na já kee bɛ kan na fara ye saraya ye na. Yemu yʼa jo Naziriyɛn wu wo ɲɔfaaga ki keree na ge, wʼa yaa na yee shɔɔnri na bɛ ni wee saliya we ni.› »
Duba pyegana
22 A Tɛhɛnɛ Baa Kilɛ di Musa pye: 23 «Yi jo Arɔn ni wu nagoo pu mu na duba wemu pʼa yaa na byi Izirayɛli nagoo pu mu ge, wee wu wa mɛ, na pʼa yu:
24 ‹Tɛhɛnɛ Baa Kilɛ wu baraga le ma ni,
wu ma mara!
25 ‹Tɛhɛnɛ Baa Kilɛ wu wu ɲaha ki kpɛɛngɛ ki ɲí ma mu,
wu ɲuŋɔ ɲaari ma na!
26 ‹Tɛhɛnɛ Baa Kilɛ wu wu ɲaha ki ɲɛri ma yíri,
wu ɲaɲiŋɛ kan ma mu!›
27 «Saraya ɲaha shɔɔnrivɛɛ pu ba nɛ mɛgɛ ki yiri le yirigana le na pu duba wu pyeduun ni Izirayɛli nagoo pu mu, nɛyɛ pyaa na baraga le pu ni.»