Levitike 3

Ɲaɲiŋɛ saraga wologana

«Ayiwa, sipya wa bu jo wu ɲaɲiŋɛ saraga wolo Tɛhɛnɛ Baa Kilɛ mu, saraga ki bu da nushɔ, kelee nupoo, wʼa yaa na pye manɛ baa. Wufɔɔ di ba wu ni Tɛhɛnɛ Baa Kilɛ ɲaha tàan. 2 Wu wu keŋɛ taha nù wu ɲuŋɔ ni, wu wu kuun Ɲuŋɔ Tacirige Fàya Puga ki tajege ki ɲɔ na. Saraya ɲaha shɔɔnrivɛɛ pee, pee piimu pu ɲɛ Arɔn wo jalaa pu ge, pee di wu shishan pu shɔ, pʼi pu ɲɛrɛgi ɲɛrɛgi saraga tawologo ki kabanuyo yi bɛɛri na. 3 Wu ta wolo kee ɲaɲiŋɛ saraga ki wo xaara ti ni wu pye saraga nizogoŋɔ Tɛhɛnɛ Baa Kilɛ mu. Temu wʼa da wolo ge, tee ɲɛ: sìnmɛ fanfanga kemu kʼa ma laara ti tɔ ge, 4 ni zanlogoo shuun we ni ki wo sìnmɛ pe, ni sìnmɛ pemu pu ma bye gbodiye yi na ge, ni ɲɛrɛ le, pʼi lee pinnɛ laha ni zanlogoo ki ni. 5 Arɔn wo jalaa pʼi yee sòrogo saraya tawologo ki na, na fara saraga nizogoŋɔ ki na, kee kemu ki ɲɛ kajiiye yi wo na ki ni ge. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni.

6 «Wufɔɔ bu da wu na giin di dubya kelee sika kan Tɛhɛnɛ Baa Kilɛ mu di bye ɲaɲiŋɛ saraga, wʼa pye boo la, wʼa pye zhɔ la, manɛ wa shishiin ganha bu bye wu na wɛ. 7 Saraga ki bu da dubya, wufɔɔ di ba ni wu ni Tɛhɛnɛ Baa Kilɛ ɲaha tàan. 8 Wu wu keŋɛ taha wu ɲuŋɔ ni, wu wu kuun Ɲuŋɔ Tacirige Fàya Puga ki tajege ki ɲɔ na. Arɔn jalaa pʼi wu shishan pu shɔ, pʼi pu ɲɛrɛgi ɲɛrɛgi saraya tawologo ki kabanuyo yi bɛɛri na. 9 Wufɔɔ di ye sìnmɛ yɔrɔyɔ ye kɔn wu yee pye saraga nizogoŋɔ Tɛhɛnɛ Baa Kilɛ mu: naŋa ki niboŋɔ, ma ki kɔn laha sɛrɛɛ ki na, sìnmɛ fanfanga kemu ki ma laara ti tɔ ge, ni sìnmɛ pemu bɛɛri pu ma bye laara ti na ge, 10 zanlogoo shuun we ni ki wo sìnmɛ pe, ni gbodiye yi wo sìnmɛ pu bɛ, ni ɲɛrɛ le, pʼi lee pinnɛ laha ni zanlogoo ki ni shiizhan. 11 Saraya ɲaha shɔɔnrivɔɔ wu yee sòrogo saraya tawologo ki na. Yalige ki ɲɛ kii na ya kemu sòrogo Tɛhɛnɛ Baa Kilɛ mu ge.

12 «Ayiwa, saraga ki bu da sika, wufɔɔ di ba ni wu ni Tɛhɛnɛ Baa Kilɛ ɲaha tàan. 13 Wu wu keŋɛ taha wu ɲuŋɔ ni, wu wu kuun Ɲuŋɔ Tacirige Fàya Puga ki tajege ki ɲɔ na. Arɔn jalaa pʼi wu shishan pu shɔ, pʼi pu ɲɛrɛgi ɲɛrɛgi saraya tawologo ki kabanuyo yi bɛɛri na. 14 Pʼi te xaara te wolo pʼi tee sòrogo Tɛhɛnɛ Baa Kilɛ mu: sìnmɛ fanfanga kemu ki ma laara ti tɔ ge, ni sìnmɛ pemu pu ma bye laara ti na ge, 15 zanlogoo shuun we, ni ki sìnmɛ pe, ni sìnmɛ pemu pu ma bye gbodiye yi na ge, ni ɲɛrɛ le, pʼi lee pinnɛ laha ni zanlogoo ki ni. 16 Saraya ɲaha shɔɔnrivɔɔ wu yee sòrogo saraya tawologo ki na. Yalige ki ɲɛ kii na ya kemu sòrogo ge, kee wo nugo ki kʼa dan Tɛhɛnɛ Baa Kilɛ ni.

«Saraga yapɔrɔgɔ bɛɛri, ki sìnmɛ pu ɲɛ Tɛhɛnɛ Baa Kilɛ wo.

17 «Ayiwa we bɛ na ba bye yee ni yi kadugo shi nibama wu mu saliya wemu da ga yìri bada wɛ, xuu bɛɛri ni yʼa tiin ge, wa ganha ga sìnmɛ xa wɛ, wa ganha ga shishan xa wɛ.»