Saraya ɲaha shɔɔnrivɛɛ wo ɲuŋɔfɔgbɔ wu wo jurumu yafa wo saraga wologana
4
Ayiwa, a Tɛhɛnɛ Baa Kilɛ di Musa pye, 2 na wu yi jo Izirayɛli nagoo pu mu na: «Sipya wa bu jurumu wuregi pye, na nɛ Tɛhɛnɛ Baa Kilɛ wo saliya wa kyɛɛgi ni kapyebaana la ni, lemu wufɔɔ ya yaa na pye ge, lee li wa mɛ:3 «Li bu da nago saraya ɲaha shɔɔnrivɛɛ wo ɲuŋɔfɔgbɔ wu wʼa jurumu wu pye, a wee jaagi wu nɔ sipyiire ti bɛɛri na, wʼa yaa na manɛ baa nupee nigin wolo wee jurumu we wuu na, na kan Tɛhɛnɛ Baa Kilɛ mu. Kee ma bye wu jurumu yafa wu wo yaaŋa ki saraga 4 Wu ba ni lee nupee li ni Ɲuŋɔ Tacirige Fàya Puga ki tajege ki ɲɔ na Tɛhɛnɛ Baa Kilɛ ɲaha tàan. Wu wu keŋɛ taha nupee li ɲuŋɔ ni, wu li kuun Tɛhɛnɛ Baa Kilɛ ɲaha tàan. 5 Wu li shishan pa shɔ, wu jé ni pee ni Ɲuŋɔ Tacirige Fàya Puga ki ni. 6 Wu wu kabee le pee shishan pu ni, fɛfɛɛrɛ xuu wu wo ɲahaparaga fàŋa ki ɲaha kemu kʼa saha ni wu ni ge, wu pu ɲɛrɛgi ɲɛrɛgi tɔɔɲii gbarashuun kee ɲaha ki na Tɛhɛnɛ Baa Kilɛ ɲaha tàan. 7 Wu shishan pa fara fara nudanga yawurire ti wo saraya tawologo ki wo yeŋɛɛ ki na, Tɛhɛnɛ Baa Kilɛ ɲaha tàan Ɲuŋɔ Tacirige Fàya Puga ki ni. Wu shɛ shishan pusama bɛɛri wo saraya nizogoyo yi tawologo ki ɲidaa li na, kee kemu ki wa Ɲuŋɔ Tacirige Fàya puga ki tajege ki ɲɔ na ge. 8 Wu lee saraga nupee li wo sìnmɛ pu bɛɛri laha. Sìnmɛ fanfanga kemu ki ma laara ti tɔ ge, ni sìnmɛ pemu pu ma bye laara ti na ge, 9 ni zanlogoo shuun we, ni ki wo sìnmɛ pe, ni gbodiye yi wo sinmè pe, ni ɲɛrɛ le, wu lee pinnɛ laha ni zanlogoo ki ni, 10 ma na jo ba pu ma yi wolo ɲaɲiŋɛ saraga ki wo nuxaara ti ni wɛ. Saraya ɲaha shɔɔnrivɛɛ wo ɲuŋɔfɔgbɔ wu yee sòrogo saraya nizogoyo yi tawologo ki na. 11 Ga nuxaara tisara, na fara sɛɛgɛ ke ni ɲuŋɔ ki na, ni tɔɔyɔ ye, ni laara te ni ti funŋɔ yaŋmuyɔ yi bɛɛri, 12 lee kɔ́ri ɲɛ nù wusama bɛɛri, saraya ɲaha shɔɔnrivɔɔ wu wusama lɔ shɛ buguro ti kadugo yíri. Xuu wemu wu ɲɛ fɛɛfɛɛ, pʼi se na shɔɔnrɔ ti woni wà ge, wʼi shɛ na ka gbɛri kajiiye ya na, wu wu sòrogo wà shɔɔnrɔ ti tawoŋɔ ki ni.
Sipyiire ti wo fooba jurumu yafa saraga wologana
13 «Ayiwa, li bu da nago Izirayɛli nagoo pu bɛɛri pʼa jurumu wuregi pye, pu bu da pʼa kapyebaana la pye, na Tɛhɛnɛ Baa Kilɛ wo saliya wu kyɛɛgi pu yɛ kategee, a lee di pu pye jaagi fɛɛ. 14 Pu ba ba foro wee jurumu we fiin tuun wemu ni, sipyiire ti bɛɛri di nupee nigin wolo pye jurumu wu wo yafa saraga. Pʼi shɛ ni li ni Ɲuŋɔ Tacirige Fàya Puga ki tajege ki ɲɔ na. 15 Pii pu ɲɛ nɔhɔlɛɛ pee sipyiire ti ni ge, pee di pu keye taha nù wu ɲuŋɔ ni Tɛhɛnɛ Baa Kilɛ ɲaha tàan. Pʼi wu kuun Tɛhɛnɛ Baa Kilɛ ɲaha tàan. 16 Saraya ɲaha shɔɔnrivɔɔ wu pee shishan pa lɔ, wu jé ni pu ni Ɲuŋɔ Tacirige Fàya puga ki ni. 17 Wu wu kabee le pu ni, fɛfɛɛrɛ xuu wu wo ɲahaparaga fàŋa ki ɲaha kemu kʼa saha ni wu ni ge, wu pu ɲɛrɛgi ɲɛrɛgi tɔɔɲii gbarashuun kee ɲaha ki na Tɛhɛnɛ Baa Kilɛ ɲaha tàan. 18 Wu shishan pa fara fara nudanga yawurire ti wo saraya tawologo ki wo yeŋɛɛ ki na Tɛhɛnɛ Baa Kilɛ ɲaha tàan Ɲuŋɔ Tacirige Fàya puga ki ni. Wu shɛ shishan pusama bɛɛri wo saraya nizogoyo yi tawologo ki wo ɲidaa li na, kee kemu ki wa Ɲuŋɔ Tacirige Fàya Puga ki tajege ki ɲɔ na ge. 19 Wu xaara ti sìnmɛ pu bɛɛri kɔn laha ti na, wu pu sòrogo saraya tawologo ki na. 20 Wu nù wu pye ba wʼa wuyɛ pya wo jurumu yafa saraga ki wo nù wu pye wɛ. Wu jurumu yafa wu wo yaaŋa ki pye Izirayɛli nagoo pu na, jurumu wu na yafa pu mu. 21 Wu nù wu xaara tisara lɔ shɛ buguro ti kadugo, wu shɛ ti sòrogo wà ba wʼa nushiimɛ wu sòrogo sòrogogana lemu na wɛ. Kee ki wa sipyiire ti wo jurumu yafa wu yaaŋa ki wo saraga ke.
Ɲahagbaa fɔɔ wo jurumu yafa saraga wologana
22 «Ayiwa, li bu da nago sipyiire ti wo ɲahagbaa fɔɔ wa wʼa wuregi jurumu pye, na kapyebaana la pye lemu ya Tɛhɛnɛ Baa Kilɛ, wu Kilɛ wu wo saliya wu kyɛɛgi, a lee di wu pye jaagi fɔɔ ge. 23 Wu ba foro wu jurumu wu fiin tuun wemu ni, wu shɛ sikapoo manɛ baa wo pye saraga 24 Wu wu keŋɛ taha sikapoo wu ɲuŋɔ ni, wu wu kuun saraya nizogoyo yi wo takɔɔngɔ ki ni, Tɛhɛnɛ Baa Kilɛ ɲaha tàan. Jurumu yafa wo saraga ki wa kii. 25 Saraya ɲaha shɔɔnrivɔɔ wu wu kabee taga jurumu yafa saraga ki wo shishan pa lɔ, wu pu fara fara saraya nizogoyo yi tawologo ki wo yeŋɛɛ ki na. Wu shishan pusama wo saraya nizogoyo yi tawologo ki ɲidaa li na. 26 Wu xaara ti sìnmɛ pu bɛɛri sòrogo saraya tawologo ki na, ba pu ma ɲaɲiŋɛ saraga ki wo sìnmɛ pu sòrogo wɛ. Saraya ɲaha shɔɔnrivɔɔ wu wee ɲahagbaa fɔɔ wu wo jurumu yafa wu wo yaaŋa ki pye wu na, wu jurumu wu na yafa wu mu.
Sipyitiimɛ wo jurumu yafa saraga wologana
27 «Ayiwa, sipyiire ti wo sipyitiimɛ wa bu jurumu wuregi pye, na kapyebaana la pye lemu ya Tɛhɛnɛ Baa Kilɛ wo saliya wu kyɛɛgi, na wufɔɔ pye jaagi fɔɔ ge. 28 Wufɔɔ ba foro wu jurumu wu fiin tuun wemu ni, wufɔɔ di sikashɔ manɛ baa wo wolo saraga, wu jurumu wu wuu na. 29 Wu wu keŋɛ taha jurumu yafa saraga sika wu ɲuŋɔ ni, wu wu kuun saraya nizogoyo yi tawologo ki ni. 30 Saraya ɲaha shɔɔnrivɔɔ wu kabee taga shishan pa lɔ, wu pee fara fara saraya nizogoyo yi tawologo ki wo yeŋɛɛ ki na, wu shishan pusama bɛɛri wo saraya tawologo ki ɲidaa li na. 31 Wu xaara ti sìnmɛ pu bɛɛri kɔn laha ba pu ma ɲaɲiŋɛ saraga ki wo pu kɔn wɛ. Saraya ɲaha shɔɔnrivɔɔ wu pee sòrogo saraya tawologo ki na. Kee nugo ki kʼa dan Tɛhɛnɛ Baa Kilɛ ni. Saraya ɲaha shɔɔnrivɔɔ wu weefɔɔ wo jurumu yafa wu wo yaaŋa ki pye wu na, wu jurumu wu na yafa wu mu.*
32 «Ayiwa, wufɔɔ bu da wu na da dubyapige kan di bye jurumu yafa wu wo saraga ke, wu ba ni dubyashɔ ni manɛ baa wo. 33 Wu wu keŋɛ taha jurumu yafa saraga dubya wu ɲuŋɔ ni, wu wu kuun saraga nizogoyo yi tawologo ki ni, wu pye jurumu yafa saraga. 34 Saraya ɲaha shɔɔnrivɔɔ wu kabee taga kee jurumu yafa saraga ki wo shishan pa lɔ, wu pee fara fara saraya nizogoyo yi tawologo ki wo yeŋɛɛ ki na, wu shishan pusama wo saraya tawologo ki wo ɲidaa li na. 35 Wu xaara ti sìnmɛ pu bɛɛri kɔn laha ba pu ma ɲaɲiŋɛ saraga dubya wu wo pu kɔn wɛ. Saraya ɲaha shɔɔnrivɔɔ wu pee sòrogo saraya tawologo ki na, ni saraya yisaya ni yemu yʼa sòrogo Tɛhɛnɛ Baa Kilɛ mu ge. Wu weefɔɔ wo jurumu yafa wo wu yaaŋa ki pye, wu jurumu wu na yafa wu mu.